¡Täräkwata mrä döräidi! Köbö 20 octubre nemen 16 noviembre yebätä
1 Köbö lunes 20 octubre yete ja känenkäre, Kä jökräbiti tibien täräkwata mrä kädekata ¿Mä törba kukwe metre ye mikai gare jai?, ye nikwe döräidi bämän kräbäkä täte te. Täräkwata döräidi kä jökräbiti tibien, yebiti ni tö nitre mada kwati töi mikai mike gare jai medente kukwe metre ye raba kwen nie (Juan 17:17).
2 Kukwe ütiäte keta ti ngwantarita abokän mikata gare metre täräkwata mrä yebätä: ¿Erametre Ngöbö töita nibätä? ¿Rü bätä ja tare nikata ye riaikä Kä nebätä? ¿Nita krüte ye ngwane dreta nakainkä nibätä? ¿Nitre krütanina ye raba nüketa nire? ¿Nikwe oradre ño ne kwe Ngöbökwe ni kukwe nuadre? bätä ¿Ñokänti kä raba nemen juto nibätä? Kukwe ngwantarita ne nitre kukwe ngwarbe driekä ye ñaka mike gare metre jire chi. Nitre kwati ñaka kristiano kätä kukwe ne ngwentari jai arato, akwa kukwe ye mikata gare Bibliabätä ye ñaka gare ietre. Nebätä gare nie, kukwe mikata gare täräkwata mrä yebätä ye ni kwati käkwe kain ngäbiti.
3 Mä käi ye jökrä känti kukwe driedre: Ütiäte krubäte nikwe ja di ngwandre döräire ju ju te kä jökrä känti. Kä ere krubäte angwane, nitre umbre raba täräkwata ye mikatemana kati ni ñaka gwi yekänti ni janandre kena ye ngwane. Mäkwe täräkwata mrä ye mikate kati nitre nünanka mä ken yei, mä mräkätre, sribi muko o ja ketamuko kwelate bätä nitre mada ben mätä blite käre yei. ¿Mä raba ja mike prekursor ausiliar ye nuainkäre octubre o noviembre yebätä? Ne madakäre, monso tärä mäkwe o ni ja tötikaka tärä mäkwe nirien kukwe ja üaire yebiti, abokän raba ja mike kukwe driekä jämi ja ngökö ñöte erere, ye angwane mäkwe blita nitre umbre yebe.
4 Dre niedre: Nikwe blitadre jötrö ngwarbe ye bäri kwin, ne kwe kukwe ye mikadre gare bäri ni kwati ie. Kukwe keta ti ngwantarita täräkwata kä kena yebätä ye mä raba ngwentari keteiti nitre gwi yei, biti kukwe ye mikata gare täräkwata ye arabebätä ye mäkwe mika tuare ietre. Ne käkwe nitre kukwe driekä ye dimikai, ne kwe kukwe meden ütiäte nitre kä yekänti yekrä ye erere kädriedre ben. Ni ruäre törba kukwe mikai gare jai angwane, mäkwe tika täräbätä bätä mä rika tuinbitita bobukäre. Bämän krüte yebätä, täräkwata La Atalaya bätä ¡Despertad! ye drie raba täräkwata mrä yebe arato. Köbö 16 noviembre yete täräkwata ye döräidi mrä, ye bitikäre nikwe tärä Enseña ye driedi. Täräkwata rabaite ye driedi täräkwata mräkä tä nikwe ye erere.
5 Ja tötika Bibliabätä ye kömikakäre: Täräkwata mrä ne sribebare metrere ni dimikakäre ja tötika Bibliabätä ye kömike. ¿Nuaindre ño? Ni rikadre ni mada tuinbitita ye ngwane, kukwe metre Bibliabätä meden käkwe dimikani ye ni raba ngwentari ie. Ja tötika Bibliabätä ye nuainta ño nieta tärä kä mrä yebätä ye mikadre tuare ie bätä tärä Enseña ye mikadrete kwati ie. Raba erere aune, kukwe meden törba mikai gare jai yebätä nikwe ja tötikadre jötrö ngwarbe ben, parrafo keteiti o ketebubätä kapitulo kätä kukwe ye kädriere bäri yekänti.
6 Nire nire tö Jehová mikai täte niara “üaibiti bätä kukwe metre yebiti” ye niarata känene (Juan 4:23). Ni tö nitre mada dimikai kukwe metre ye mike gare jai, yebätä ¡ni jökrä käkwe täräkwata ye döräidre!