¡Ja tötika Bibliabätä kömikadre octubre yebätä!
1. ¿Dre driedi octubre yebätä?
1 Octubre yebätä täräkwata La Atalaya bätä ¡Despertad! ye driedi. Nitre törba kukwe mikai gare jai angwane ni raba niken täräkwata ¿Mä törba kukwe metre ye mikai gare jai? ye ngwena kräke, ne kwe ni rabadre ja tötika Bibliabätä kömike ben. ¿Nuain raba ño?
2. Nitre käkwe täräkwata kani ngäbiti ye ni rikadreta tuinbiti ye ngwane, ¿täräkwata Kukwe metre yebiti ni raba ja tötika Bibliabätä kömike ño?
2 Täräkwata ye driedre ño. Ni raba niere: “Tikwe täräkwata mikateba mäi ye kätä ni jökrä nübaire ja tötike Bibliabätä. [Täräkwata Kukwe metre ye mäkwe bian ie aune kukwe ngwantarita jatäri yete ye mäkwe mika tuare ie.] Biblia tä kukwe ye mike gare. ¿Meden nibi tuin kwin mäi?”. Ni gwi käkwe dre niedre ye mäkwe kukwe nua. Ye bitikäre, täräkwata tä kukwe ye mike gare ño, yebätä mäkwe ñäkädre ie aune mäkwe ñäkädre texto keteitibätä. Biblia tä kukwe keta kabre mike gare ye mäkwe nie ie. Biti mäkwe tärä Enseña bian ie. Mä raba kukwe ketebu nuainne mada. Keteiti, mä raba índice mike tuare ie aune törbadre blitai kapitulo medenbätä, ye ererebätä mäkwe ja tötika párrafo ruärebätä ben. Ketebu, kukwe medenbätä mätä blite ben, ye ererebätä mä raba känene tärä Enseña yebätä. Nuain raba ño ye kräke kukwe mikata gare nete:
● ¿Erametre Ngöbö töita nibätä? (pág. 10, 11 párr. 6-10)
● ¿Rü bätä ja tare nikata ye riaikä Kä nebätä? (pág. 12 párr. 12, 13)
● ¿Nita krüte ye ngwane dreta nakainkä nibätä? (pág. 59, 60 párr. 7, 8)
● ¿Nitre krütanina ye raba nüketa nire? (pág. 71 párr. 13-15)
● ¿Nikwe oradre ño ne kwe Ngöbökwe ni kukwe nuadre? (pág. 166, 167 párr. 5-8)
● ¿Ñokänti kä juto ye raba kwen nie? (pág. 9 párr. 4, 5)
3. ¿Dre dre nuain raba nitre tötikakäre Bibliabätä?
3 Mä rikadre ni iti tuinbitita kena, akwa mäkwe ñaka ja tötika Bibliabätä kömikani ben tärä Enseña yebiti, ye ngwane mä raba köbö ükete blitakäre ben köbö mada ngwane. Nitre tö kukwe mikai gare jai ye mä rikadre tuinbitita angwane kukwe ngwantarita täräkwata yebätä yebiti mä raba ja tötike ben, mä jämi tärä Enseña driere ie ye känenkri. Erametre täräkwata yebiti ni raba ja tötika Bibliabätä kömike octubre yebätä aune nitre brukwä kwin dimike kukwe metre ye mike gare ietre (Juan 8:31, 32).