Kukwe kwin bämikai
1. Kukwe kädriei ye rabai tuin kwin nitre madai, akwa ¿dre mada matai kwin niaratre yebätä?
1 ¿Ñongwane nuaindi? Jesús ja nire biani Ngwanta Törö jai ye ngwane. Ye medenbätä, nita ja di ngwen krubäte nitre jökrä nübaikäre. Kukwe kukwei nuai kwetre ye ñan aibe rabai tuin kwin ietre, ñakare aune dre dre tuai kwetre ye matai kwin niaratre yebätä arato. Meri iti janamene Jesús ja nire biani ngwaninta törö jai yebätä, ye bitikäre niebare kwe ni jökrä käkwe niara kani ngäbiti kwin aune nitre sribikä ja töi jeñebiti kätä Ju ja Ükarakrö ye ükete kwin aune bä nuäre, yebätä blitabare kwe arato. ¿Ye tä dre driere nie? Köbö ütiäte ye kräke ni kukwe kädriekä ye ñan aibe raba kukwe kwin bämike, ñakare aune ni jökrä raba nuainne arato (Efe. 4:16).
2. ¿Nitre rükai yei kukwe kwin bämika raba ño?
2 Nitre kadre ngäbiti kwin. Nikwe kä mikadre nuäre ja ngwärebätä aune köbö kwin biandre nitre rükai yei, yebiti nikwe kukwe kwin bämikai (Juan 13:35). Nane mä ñan raba blite nitre rükai ye jökrä ben, akwa mä raba köbö kwin bien nitre mä bäre yei aune ja kä niere ietre (Heb. 13:1, 2). Nanekänti, ni iti käkwe täräkwata ni nübaikäre kani ngäbiti aune rükadre kena, bätä ni mada ñaka gare ie, ye ngwane ni tädre juto ni ye ka ngäbitikäre kwin. Kukwe ne ngwantari raba ie: “¿Mä nü krire matare nete?”. Jän niedre kwe mäi angwane mäkwe nübai täke ja ken, aune raba kukwe ngwentari mäi mäkwe nie ie. Konkrekasion mäkwe käkwe kä mikadrekä jötrö ngwarbe, ne kwe konkrekasion mada käkwe ja ükadrekrö kä ye arabe känti, ye ngwane mä raba niere krörö ie: “Gätä ne nibi tuin ño mäi yebätä ti tönibi blitai mäbe. ¿Ñongwane ni raba blite bäri kwin?”.
3. ¿Dre nuaindre ne kwe nitre kukwe driekä abokän ñaka niena kukwe driere ie ja rabadre ruin kwin?
3 Nitre ñaka niena kukwe driere kadre ngäbiti kwin. Nitre kukwe driekä abokän ñaka niena kukwe driere ye rükai, ruäre abokän tä nüke gätä ne nuainta kä kwatire kwatire te ye aibe ngwane. Niaratre kadre ngäbiti kwin aune kätä juto mäbätä ye bämikadre ietre (Rom. 15:7). Ye bitikäre, nitre umbre raba niken niaratre gwirete dimikakäre, ne kwe ja ükadrekrö jankunu kwetre. Nitre rükai käkwe Ngöbö käikitadrekä kukwe kukwei nuai kwetre yebätä, ye ñan aibebätä nunta orare, ñakare aune nunta nuainne, ne kwe “munkwe jändrän kuin nuendi niaratre okwäbti” ye käkwe niaratre mikai Ngöbö käikitekä arato. (1 Ped. 2:12, Kukwe Kuin Ngöbökwe [KKN]).