Nikwe nitre kadre ngäbiti kä jutobiti
1. ¿Köbö meden bäri ütiäte tä nie kukwe driekäre, aune ñobätä?
1 Jesús ja nire biani ni ütiäre Ngwainta Törö jai ye köböi te kä rabai kwin krubäte nie kukwe driekäre. Kä nete, kukwe ütiäte ketebu kädriei ni tare krubäte bämikani aune ni kökanintari yebätä ye kukwe nuakäre nita nitre diez millones biti bäri jiebäre (Juan 3:16; 15:13). Jondron kwin tä niaratre kräke ye rabai gare ietre aune kukwe ütiäte nuainbare ni kräke ye köböire kukwe ye raba nemen nikwe ye rabai gare ietre arato (Is. 65:21-23). Akwa köbö ye näire ni kukwe kä driekä ye ñan aibe käkwe kukwe ütiäte kädriei ni madabe. Ni jökrä kukwe driekä rabadre kukwe ye nuainne, nitre nübaibare rükadre kadre ngäbiti kwetre yebiti (Rom. 15:7).
2. ¿Nitre nübaibare ye ni raba kain ngäbiti ño ne kwe ja rabadre ruin kwin ietre?
2 Ni ñaka rabadre täkäni tibien aune kwekebe gätä kämika jämi ye känenkri ñakare aune nikwe ja töi mikadre käne niken blite nitre tädre täkäni ni bäre yebe. Nitre tä nüke kena yei dre rabai bare ye ñaka gare aune tätre nemen ruäre jakaire. Ye medenbätä, nikwe kä mikadre kötare ja ngwärebätä aune köbö kwin niedre ietre ye raba niaratre töi mike jäme. Niaratre tä yete ñobätä ñan aune täräkwata ni nübaikäre ye biani ietre. Ye erere o ñakare ye mikakäre gare jai ni raba ngwentari ietre tä näin kena gätäbätä o ni konkrekasionte tärä gare ietre. Ni raba nübaire täke ja ken aune Biblia nikwe yebätä texto känändre bentre bätä ni raba kantiko nikwe yebätä kantare bentre. Jesukwe ja nire biani ni ütiäre ye Ngwainta Törö jai ye nuaindre Ju ja Ükarakrö yete angwane, bäri kwin ni rabadre dre dre tä mikani gwi ye mike tuare nitre yei. Kukwe kädriedre ye bitikäre, kukwe tärä ngwandretari nitre yei o ñakare ye ni rabadre ngwentari ietre. Nane ngwane konkrekasion yei rabadre nändreta jötrö mentokwäre ne kwe konkrekasion mada rükadre angwane, ni raba niere ietre: “Kukwe kädrieni ye nibi tuin ño mäi ti törba gai. ¿Ti raba bliteta ño mäbe?”. Aune nikwe köbö ükadrete jai nitre tö kukwe mikai gare jai ye tuabitikäreta, blitakäre bäri bentre kukwe yebätä. Ja mräkätre ñaka niena kukwe driere rükadre yebe metrere nitre umbre konkrekasionte käkwe blitadre dimikakäre aune kä mikakäre jutobätätre.
3. Jesús ja nire biani ni ütiäre Ngwainta Törö jai kräke nitre nübaibare rükai, ¿ye ñobätä ütiäte krubäte nikwe ja töi mikadre käne kain ngäbiti?
3 Nitre Jehová mikaka täte yebätä kä juto, tä nüna jäme aune keteitibe kukwe ja üaire yebiti, ye rabai gare nitre kwati rükai yei bätä tuai ja okwä jeñebiti kwetre (Sal. 29:11; Is. 11:6-9; 65:13, 14). ¿Nitre nübaibare ye käkwe dre kwin niei konkrekasion nikwe yebätä? Nikwe ja di ngwain niaratre kain ngäbiti ye aibe köböire kukwe kwin rabai bare.