Mäkwe ka ngäbiti kä jutobiti

¿Nikwe nire kadre ngäbiti kwin? Nitre jökrä tä nüke gätäbätä, krire kena tä nüke gätäbätä o niena gare mekerabe nie ye arato (Ro 15:7; Heb 13:2). Ñodre, ja mräkä nüne juta madate rükadre gätäbätä o ni testiko iti tä tibo kukwe ja üairebiti abokän rükadreta gätäbätä. ¿Mä tädre niara ye erere angwane ja rabadre ruin ño mäi? Mä kadre ngäbiti kä jutobiti ye erere ie mä tö rabadre ¿ñan ererea? (Mt 7:12). Yebätä bäri kwin nikwe ja di ngwandre kise ngökö nitre jökrä ie gätä ye känenkri aune gätä ye bitikäre. Ye köböire kä rabai jäme aune juto nitre jökräbätä (Mt 5:16). Metrere ruäre ngwane ni ñan raba blite nitre jökrä tä yete ben. Akwa gwairebe nikwe ja di ngwain angwane, ja rabai ruin kwin nitre jökrä ie.a

Nikwe ja töi mikadre mantiame kä jökrä ngwane aune ñan köbö Jesús Ja Nire Biani Ngwainta Törö Jai ye ngwane aibe. Ni kristiano tä ja tarere aune ye erere tä nitre tä nüke kena gätäbätä ye tarere angwane ye tä niaratre töi mike Jehová käikitekä aune kukwe metre ye mike täte gwairebe nibe (Jn 13:35).