Ngöbö kä ye mikadre deme
1. ¿Kukwe dianinkä gätä kri köböbu kä 2012 kräke kädekata ño, aune texto medenbätä tä dianinkä?
1 Kä 1931 ye ngwane ni kädeka jatani testiko Jehovakwe, Ngöbö Gobranka kri Kä jökräbiti tibien yebiti ni kädekata ye ütiäte krubäte. Niarakwe ni kädekani kä ütiäte yebiti (Isa. 43:10). Jesukwe Rün kwe ye kä mikani ütiäte arato, ye medenbätä orasion driebare kwe nitre ja tötikaka ben yei, ye ngwane blitabare käne kwe Rün kä yebätä (Mat. 6:9). Jesukwe kukwe niebare orasionte ye dianinkä gätä kri köböbu 2012 kräke, kädekata: “Ngöbö kä ye mikadre deme”.
2. ¿Kukwe meden meden kädriei gätä kri yete?
2 Kukwe meden meden kädriei. Sabadote kukwe ne kädriei: “Sribi nuainta köbö täte yebiti nikwe Ngöbö kä mikadre gare”, aune sribi ye tä kä mike juto ño nibätä ye mikai gare. Arato, kukwe ne kädriei jatäri: “Nikwe ñaka Jehová kä mikadre käme” yete mikai gare kukwe ketabokä nitre kätä nuainne abokän nikwe ñaka nuaindre. Kukwe kädriei: ¿Ñobätä Ngöbö kä ye mikadre deme? Nitre ñaka tö kukwe Ngöbökwe mikai gare jai, akwa dre raba ni dimike kukwe driere bäri aune kä jutobiti ye mikai gare yete. Dominkote kukwe ketabokä kädriei jatäri, yete mikai gare ño ni raba Ngöbö kä mike deme ja töi yebiti, blita yebiti, nita dre den nuaindre jai yebiti, aune nita ja ngwen ño yebiti. Kukwe kädriei ni jökrä kräke kädekata: “Jehovakwe ja kä mikai deme Rü kri yete” kukwe ye matai kwin nitre rükai kena yebätä.
3. ¿Kukwe meden ütiäte tä ni kisete, aune gätä kri ye käkwe ni dimikai ño?
3 Jehová köböra ja kä ye mike deme (Eze. 36:23). Ngöbö kä ye köböire dre dre rabai bare ye nita mike gare ye abokän kukwe ütiäte tä ni kisete. Jehová kä yebiti ni kädekata ye ütiäte krubäte, ye medenbätä gätä kri köböbu ye käkwe ni dimikai ja ngwen kwin niara ye erere.