Ngöbö töi ye erere rabadre bare
1. ¿Gätä kri köböiti 2012 ye kädekata ño, aune ñobätä nikwe ja tötikadre kukwe yebätä?
1 Jehová tö namani ni sribei yebätä ni sribebare kwe (Rev. 4:11). Ye medenbätä, ni törba nünain kwin angwane, Ngöbö töita dre nuainbätä ye nikwe mikadre gare jai aune ye erere nuaindre. Kukwe ne raba tuin nuäre nuaindre nie, akwa ye ñaka nuäre, ñobätä ñan aune ni “ngrabare, [tö] [...] kukwe kämekäme [...] nuene” kukwe yebe ja tuata, bätä “nitre ie Ngöbö gare ñakare” o nitre kä nebätä tä ja ngwen ño ye kwrere ruäre ngwane nita ja ngwen arato (Efe. 2:3, Kukwe Kuin Ngöbökwe [KKN]; 1 Ped. 4:3, KKN; 2 Ped. 2:10). Ngöbö ñaka ni dimike akräke “diablukwe ni [...] ka[dre] [...] ngite ja mikakäre täte” (2 Tim. 2:26, KKN). Gätä kri köböiti 2012, ye käkwe ni itire itire dimikai Jesukwe kukwe niebare ketamäkäre orasionte ye erere nuainne (Mat. 6:9, 10). Gätä kri ye kädekata: “Ngöbö töi ye erere rabadre bare”.
2. ¿Kukwe meden meden ngwantarita abokän mikai gare gätä kri köböiti yete?
2 Kukwe meden mikai gare. Kukwe ngwantarita ne mikai gare ye ngwane mä tädre ngwäte kukwe nuakäre. Kukwe ne mikai gare: Nita Ngöbö Kukwei kukwe nuin akwa, ¿nikwe kukwe meden ütiäte nuaindre arato? ¿Ngöbö tö dre nuainmana nie ye raba nemen gare ño bäri kwin nie? ¿Ñobätä ni tädre juto biare ni jökrä dimikakäre? ¿Ño ni raba nüne kwin aune kä jutobiti? Monsotre, ¿munkwe kukwe meden bämikadre Jehovai? ¿Ngöbö tö dre nuainmana nie ye erere nuainta angwane dre kwin tä nemen nikwe? ¿Ñobätä ni rabadre ja mräkätre dimike bäri kä nengwane?
3. ¿Nikwe dre nuaindre ne kwe gätä kri köböiti ye käkwe ni dimikadre?
3 Mäkwe ja di ngwan,nüke gätä kri yebätä aune kukwe kädriei ye kukwe nuakäre kwin. Ja mräkä sribikä Betel o ni ni tuabitikä juan raba kukwe kädriere gätä kri yete. Nunta mun nübaire blite niarabe, aune muko tärä kwe angwane munkwe blita muko kwe yebe, gätä ye känenkri o gätä ye täbiti. Kukwe kädriei ye ñaka ‘käi rikwitadrekäʼ munbiti, yekäre mun rabata gwi angwane, munkwe ja tötika kukwe yebätä mun mräkätre yebe (Sant. 1:25). Ngöbö tö dre nuainmana munye ye mun raba nuainne ño bäri kwin yebätä munkwe blita jabe.
4. ¿Ngöbö tö dre nuainmana nie ye ñobätä nikwe mikadre nuaindre käne jai?
4 Nitre töita jondron käme käme nuainbätä aune ñaka Jehová kukwei mike täte ye niara köböra mike krüte (1 Juan 2:17). Ye medenbätä, Jehovata kukwe ne ükete ni kräke yebätä nita debe bien ie. Kukwe ye käkwe ni dimikai Ngöbö tö dre nuainmana nie ye erere nuainne käne.