¿Mä raba niken Macedonia arato?
1. ¿Ñobätä Pablo bätä nitre nänkä ben nikani Macedonia?
1 Kä 49 ye ngwane apóstol Pablo nämene juta Antioquía de Siria yekänti, kä ye ngwane niara nikani bobukäreta sribi misionero ye nuainne kä madakänti, niara nikani juta Éfeso aune juta mada mada Asia Menor ye tuinbiti. Akwa üai deme ye köböire niara nübaibare ‘niken Macedonia’ arato. Niara bätä nitre nänkä ben käkwe kukwe ye kani ngäbiti kä jutobiti, aune ye köböire konkrekasion kena ye ükaninte juta yekänti (Hech. 16:9, 10; 17:1, 2, 4). Ye erere arato, kä nengwane, kä jökräbiti tibien sribikä kwati ribeta nüra ngwä ötakäre (Mat. 9:37, 38). ¿Mä raba sribi ne nuainne siba?
2. ¿Kukwe medenbätä, nitre ruäre tä nemen nütüre ñan raba niken nüne juta madate?
2 Apóstol Pablo nämene sribi misionero nuainne ye erere mä törba ja tuai, akwa mä jämi ja töi mike kwatibe niken nüne juta madate. Kukwe keta kabre tä mä kisete yebätä mä ñaka raba niken kwela Galaad yete, ñodre mä tä monsore o mä niena umbre krubäte nänkäre kwela yete, mä meri kaibe o monso tä ngübadre mäi. Nane ngwane, blitadre kukwe madabiti ye jürätä nemen mäbätä, yebätä mä ñan ja töi mike niken nüne juta madate o mäkwe ja käi tuanimetre rikakäre ngwian ganainne juta madate, yebätä mä rikadre nüne juta madate ye ñaka nuäre mä kräke. Akwa, mäkwe orasion nuaindre aune kukwe ye töibikadretari angwane raba nüke gare mäi mä raba niken nüne juta madate kukwe driekäre.
3. Ni tötikata sribi misionero nuainkäre juta madate ye ¿ñobätä ni ñaka rabadre nütüre ni ñan raba sribi ye nuainne kwin?
3 ¿Ni ñaka raba ja tötike sribi misionero ye nuainkäre? Pablo bätä nitre nänkä ben nämene tö ngwen Jehovai aune üai deme kwe yei, ye köböire sribi Ngöbökwe ye namani bare kwin ietre (2 Cor. 3:1-5). Kukwe keta kabre tä mä kisete, yebätä mä tötika ñaka raba sribi misionero ye nuainkäre, akwa mä rikadre nüne juta madate kukwe driekäre ye köböire mä raba nuainne kwin. Mäkwe ngwan törö jai, ni tötikata Kwela Sribi Ngöbökwe kräke aune Gätä Sribi Ngöbökwe Nuainkäre ye kätä ni dimike kukwe driere. Mä töita nänbätä Kwela Galaad yete o kwela madate, angwane mä raba niken nüne juta madate mä jämi niken kwelate ye känenkri, ne kwe mä nübaidre angwane sribi ye nuaindre ño ye rabaira gare mäi.
4. ¿Ñobätä nitre niena umbre ñaka raba niere ti ñan raba niken nüne juta madate kukwe driere?
4 Nitre kukwe driekä niena umbre. Juta ruäre yekänti nitre kukwe driekä ñaka krubäte, ja mräkätre niena umbre aune dite kukwe ja üairebiti, ñaka bren, raba nemen sribi ye nuainne kwin juta yekänti. ¿Mä jubilabarera? Ja mräkätre ruäre ie ngwian bianta chi, akwa juta medenkänti ngwian ñaka krubäte aune kräkä o jondron mada rürübäinta bäri brai juta kwe ye kräke yekänti tätre niken nüne kukwe driekäre.
5. Ja mräkä iti jubilabare nikani nüne juta madate yebätä kukwe meden kwin namani bare ye mäkwe nie.
5 Ja mräkä iti abokän blite kwin kukwe kwe yebiti, tä sribire ni umbre erere aune tä sribi prekursor ye nuainne, niara ñaka namanina sribire ye ngwane nikani nüne nitre nämene nüke basare juta sureste Asia yekänti, ne kwe nitre kukwe driekä ni ükän abokän nämene kukwe driere inglere, nitre 30.000 nämene niken kä yekänti yei ye dimikakäre. Kä nikani kubu ta ye ngwane nitre 50 namanina ja ükökrö gätäbätä. Ja mräkä ye käkwe niebare: “Ti jatani nüne kä nekänti ye köböire kukwe kwin keta kabre namanina tikwe. Kä ñaka raba nemente tie niekäre jökrä”.
6. ¿Meri bati testiko Jehovakwe käkwe ja töi mikani niken nüne juta madate yebätä kukwe meden kwin namani bare?
6 Ja ngwaitre merire kaibe. Juta ruäre te nitre kukwe driekä ñaka krubäte, yekänti Jehovata ja ngwaitre merire mike kukwe kwin ye driere bäri (Sal. 68:11). Meri bati testiko Jehovakwe käkwe ja töi mikani niken kukwe driere bäri juta madate, akwa niara rabadre ño juta yete yebätä rün bätä meye namani töibikare krubäte. Ye medenbätä, juta känti gobrantre ñaka nämene ja rüere aune ngwian nämene krubäte yekänti niarakwe ja töi mikai niken aune tärä tikani kwe sukursal yei, dre dre nuaindre kwe ye sukursal käkwe mikani gare kwin ie. Nünanbare kwe kä kwä ti te juta yete aune kukwe keta kabre namanina kwe. Niarakwe niebare: “Ti käite tikwe ñaka nitre tötikadre krubäte Bibliabätä. Akwa juta madate nitre ribe nämene kukwe driere yekänti ti nikani ye köböire tikwe nitre kwati tötikani Bibliabätä aune diridre ño bäri kwin ye namani gare tie”.
7. Nitre ja mräkäre nikani nüne juta madate ye köböire kukwe meden kwin namani bare ye mäkwe nie.
7 Nitre ja mräkäre. ¿Monso tärä mäkwe yebätä mä ñaka raba niken Gobran Ngöbökwe kukwei driere juta madate? Nitre rüne monsoi nibu —iti kä kwä kwäbiti aune iti abokänbiti kä kwäjätä— käkwe nuainbare. Meye käkwe niebare: “Monsotre nunkwe ye ririabare nete ye köböire niaratre ja ketabare nitre prekursor especial aune nitre misionero yebe ye käi juto nunbätä. Erametre, kä känti kukwe drie ñaka krubäte yekänti nunkwe ja töi mikani niken nüne, ye köböire kätä juto krubäte nunbätä”.
8. ¿Ni ñaka ja kite blite kukwe madabiti, akwa ni raba niken nüne juta madate kukwe driekäre? Mäkwe mika gare.
8 Blitadre kukwe madabiti. ¿Mäkwe blitadre kukwe madabiti yebätä mä ñaka ja töi mike niken juta madate? Nanekänti, juta ruäre yete blitata mä kukwei yebiti abokän känti nitre ribeta Gobran Ngöbökwe kukwei driekäre. Juta keteiti yekänti nitre blite kukwe jene jenebiti nämene nüne, nitre ruäre abokän blite inglere; juta yete nitre gure blite inglere nikani nüne. Konkrekasion meden meden te nitre ribe nämene kukwe driekäre inglere ye sukursal käkwe mikani gare ietre. Niaratre ja töi mikani niken konkrekasion keteiti te aune janamene bobu konkrekasion yete. Ye bitikäre, niaratre nikaninta ja gwirete, ñaka namanina ngwian kitekä krubäte sö kratire kratire te, aune ngwian ükaninkrö kwetre jai kä kwati jire. Niaratre namani juto nänkäre kä yekänti, ye ngwane ja mräkätre nünanka kä yekänti käkwe ju ütiä kärä nämene brai ye känänbare kräketre.
9, 10. ¿Nitre kätä juta kwe tuenmetre ye käkwe töbikadre kukwe medenbätä aune ñobätä?
9 Nitre tä niken nüne juta madate. Kukwe metre Bibliabätä jämi nemen gare mäi, ¿ye känenkri mä nikani nüne juta madate? Nane ngwane, juta mäkwe yete nitre ribeta nura ngwä ötakäre angwane, ¿mä raba ja töimike nikenta juta mäkwe yete kukwe driekäre? Mä nünanbare juta yete, ye medenbätä ju aune sribi raba kwen mäi nitre menteni ye ngwä, bätä kukwe medenbiti blitata juta yete ye gare mäi. Ne madakäre, nitre nünanka juta yete ye ngätäite mä nünanbare, aisete nitre ye raba mä kukwe nuin bäri nitre nünanka juta madate ye kräke.
10 Ni iti nünanka Albania nikani nüne Italia ja kriemikakäre. Juta yekänti sribi kwin kwani ie aune nämene ngwian juen mräkätre kwe ye kräke. Ye bitikäre, kukwe metre namani gare ie angwane, nitre prekursor italiano abokän rikadre kukwe driere juta Albania yekänti, nitre ye niara nämene tötike blitakäre kukwe albanés yebiti. Ja mräkä ye käkwe niebare: “Juta tuanimetre tikwe ye kokwäre niaratre nämene näin, ne madakäre, kukwe medenbiti blitata juta yete ye ñaka nämene gare ietre akwa kä nämene juto bätätre. Ti blite kukwe Albanés yebiti aune ti abokän albanés, ¿ti nämene dre nuainne juta Italia yekänti?” Ja mräkä ye käkwe ja töi mikani nikenta juta kwe yete kukwe kwin driekäre. “Tikwe sribi aune ngwian ere ye tuanimetre juta Italia yekänti, yebätä ja ñaka ruin ulire tie”. Niebare kwe arato: Sribi bäri kwin kwani tie juta Albania yekänti, ñobätä ñan aune, sribidre Jehová kräke jondron nikwe yebiti ye tä kä mike bäri juto nibätä”.
11, 12. ¿Nitre töita nänbätä nünankäre juta madate ye rabadre dre nuainne?
11 Nuaindre ño. Pablo aune nitre nänkä ben jämi niken Macedonia ye kokwäre, ye känenkri niaratre nämene näin kä nindrini ye kokwäre. Akwa, üai deme ye käkwe ñaka tuanimetre niken, ye medenbätä niaratre nikani kä ngwitäri ye kokwäre (Hech. 16:6). Niaratre nämene kä Bitinia ye ken angwane Jesukwe ñaka mikani näin ta (Hech. 16:7). Kä nengwane, Jehovata Monso kwe yebiti kukwe drieta ye jie ngwen (Mat. 28:20). Ye medenbätä, mä törba niken nüne juta madate angwane mäkwe ja di kärä Jehovai ja jie ngwankäre (Luc. 14:28-30; Sant. 1:5; rekwadro “¿Juta medente ti tö näin yete nitre ribeta ye rabadre gare ño tie?”).
12 Mätä kukwe ükete jai ye mäkwe mika gare nitre umbre konkrekasionte yei ne kwe mä dimikadre kwetre (Pro. 11:14; 15:22). Tärä sribeta yebätä kukwe mikata gare ni tö näin nüne juta madate yebätä, mäkwe ñäkä tärä yebätä aune medente mä törba näin, yebätä mäkwe kukwe känä bäri. ¿Mä raba niken basare juta yete kä mikakäre ñärärä? Mä töita kwatibe nänbätä juta madate angwane, mäkwe kukwe ngwantari sukursal tä juta yekänti yei, ne kwe mä dimikadre kwe kukwe ruärebätä. Medente ye mäkwe känä Anuario kä nete yebätä. Mäkwe tärä tikadre angwane, käne mäkwe biandre nitre umbre konkrekasionte yei, ne kwe kukwe ruäre tikadre kwetre jämi juen sukursalte ye känenkri (Tärä Organizados para hacer la voluntad de Jehová, página 111 bätä 112, mikadre ñärärä).
13. ¿Sukursal ye raba mä dimike ño aune mä rabadre kukwe meden meden ükete akwle jai?
13 Sukursal käkwe kukwe mikai gare mäi juta yebätä ne kwe mäkwe kukwe ükadrete jai. Akwa, gobran tä jondron meden meden ribere juta yete, ñodre permiso o visa ye ñaka ükaite mä kräke. Ñaka ju känäin mä kräke. Mä jämi niken nüne juta yete ye känenkri mäkwe kukwe ye ükadrete jökrä jai. Visa o permiso sribikäre ye diandrekä medente yekänti mä rikadre denkä jai. Nire nire törba näin nüne juta madate ye rabadre kukwe ribeta gobrankwe ye jökrä ükete akwle jai (Gál. 6:5).
14. ¿Sribi Ngöbökwe ñäkäita juta ruäre yekänti, yete mä törba näin angwane mäkwe dre nuaindre?
14 Juta ruäre te Sribi Ngöbökwe ñäkäita. Juta ruäre te ja mräkätre tätre ja ngwen mokre sribi Ngöbökwe ye nuainkäre (Mat. 10:16). Nane ngwane, ja mräkätre tätre niken nüne juta mada yekänti ye köböite nitre mada raba ja mike ja mräkätre nünanka juta yete ye rüere. Mä töita nänbätä nünankäre juta ye erere känti angwane mäkwe tärä tikadre biandre nitre umbre konkrekasionte yei, ne kwe niaratre käkwe juandre sukursalte.
15. Mä ñaka raba niken nüne juta madate, ¿akwa mä raba kukwe driere ño bäri?
15 Mä ñaka raba niken nüne juta madate ye ngwane ¿mäkwe dre nuaindre? Kä nengwane mä ñan raba niken nüne juta madate angwane mäkwe ñaka ja di ngwan nekä. Nane ngwane, “kä tärä kri amne kuin sribikrä [mäi] ni Dänkienkrä” (1 Cor. 16:8, 9, KKN). Konkrekasion medente nitre ribeta ja dimikakäre ye gare ni ni tuabitikä ie, mä raba niken yete konkrekasion ye dimike. Konkrekasion o nitre braibe tä krire ja ükökrö abokän blite kukwe madabiti yekänti mä raba niken. Arato, mä raba kukwe driere bäri konkrekasion mäkwe yete. Mäkwe ngwan törö jai, kukwe keta kabre tä mä kisete, akwa yebiti ta mäkwe sribi Jehovakwe nuaindre ja nire tätebiti ye bäri ütiäte (Col. 3:23).
16. ¿Nire törbadre näin juta madate mikadre kwe nie ye ngwane nikwe dre niedre ie?
16 ¿Ja mräkä meden tä ja töi mike niken nüne juta madate kukwe driekäre ye gare mäi? Ye erere ngwane mäkwe kukwe kwin nie ie dimikakäre. Pablo nikani mento juta Antioquía de Siria yete, ye ngwane kä nämene ere juta yete (Roma yete kä nämene ere, ketebukäre Alejandría arato). Juta yete kä nämene ere kukwe driekäre, ye medenbätä ja mräkätre konkrekasionte ñaka tö namani Pablo tuai nikenta. Akwa, Biblia ñaka tä mike gare ja mräkätre käkwe Pablo töi mikani ja mikete. Niaratre ñaka namani kwekebe, ñakare aune kä tibien ye namani tuin ietre “tire ye kwrere” (Mat. 13:38, KKN).
17. ¿Ñobätä mä rabadre ja töi mike ‘niken Macedonia’ arato?
17 Pablo aune nitre nänkä ben nübaibare näin juta Macedonia yekänti ye erere nuainbare kwetre, ye köböire kukwe kwin keta kabre namani kwetre. Juta Filipos yekänti, Lidia namani gare ie, “Pablo näma blite Jesubtä angwane, Ngöbökwe niara töi mikaba tödeke Jesubti” (Hech. 16:14, KKN). Lidia aune mräkätre kwe jökrä käkwe ja ngökabare ñöte ye käkwe kä mikani juto krubäte Pablo aune misionero mada mada yebätä. Juta keta kabre yekänti nitre kwati töita erametre Lidia ye kwrere abokän ietre Gobran Ngöbökwe kukwei ye drie jämi. Mä nübaita ‘niken Macedonia’ arato, ye mäkwe kadre ngäbiti angwane mäkwe nitre ye erere dimikai.
[Rekwadro página 5]
“¿Juta medente ti tö näin yete nitre ribeta ye rabadre gare ño tie?”
• Anuario sribebare mrä mrä yebätä mäkwe kukwe känä aune nitre nibe bätä nitre kukwe driekä nibe tä juta jene jene yete ye mäkwe mika ñärärä.
• Índice yebiti mäkwe täräkwata känä juta ye mikakäre gare bäri jai aune kukwe meden namani bare juta yekänti yebätä mäkwe ñäkä.
• Nitre kukwe driekä jananbarera basare o nüne juta yete yebe mäkwe blita.
• Mä törba kukwe driei kukwe mäkwe yebiti angwane, juta medente blitata kukwe mäkwe yebiti, ye mäkwe känä Internet yete, ne kwe nitre nibe tä nüne juta yete abokän blite mä kukwei yebiti ye rabadre gare mäi.