Kukwe ngwantarita

◼ ¿Nitre nüne juta madate ñaka gare nie yei ni raba kukwe driere o tötike Bibliabätä Internet yete?

Juta ruäre känti ni tuanmetre ñaka kukwe driere o ni Testiko ñaka bäsi, nitre nünanka kä yekänti yei ja mräkätre ruäre tä ja tötika Bibliabätä driere Internet yete. Ruäre ngwane, kukwe kwin namanina bare. Akwa, nikwe correo biandre jai kwärikwäri o nitre ñaka gare nie yebe nikwe kukwe tikadre jai ye raba kukwe kri mike ni kisete (mäkwe Nuestro Ministerio del Reino julio 2007, página 3 ye mika ñärärä). Ni törbadre nitre brukwä kwin yei Gobran Ngöbökwe ye mikai gare ye ñaka blo, akwa ye raba ni mike blite nitre töi käme ben o nitre kukwe metre tuanimetre aune tä ja mike rüere yebe arato (1 Cor. 1:19-25; Col. 2:8). Ne madakäre, kä ruäre känti sribi Ngöbökwe ñäkäita o ni tuanmetreta kukwe ruäre aibe nuainne yebätä nita dre dre nuainne ye gobrantre raba känenentari. Ye raba kukwe kri mike nitre Testiko nünanka juta yete ye kisete. Ye medenbätä, ni ñaka rabadre nitre nünanka juta madate ye känene Internet yete kukwe Ngöbökwe driekäre ietre.

Nita kukwe driere kä jökrä ngwane ye ngwane nikwe kukwe driedre ni nünanka juta madate tädre basare yei angwane, rikadreta juta kwe yete ye ngwane ni ñaka rabadre kukwe mike gare bäri ie, o sukursal juta yekänti dre niedre ye erere nikwe nuaindre. Tärä o täräkwata aune sukursal meden tä sribi Ngöbökwe jie ngwen juta kwe yekänti ye raba kwen ño ie jw.org yete ye ni raba driere ie. Ni ye tä nüne yekänti Ju ja Ükarakrö tärä angwane, raba niken yete ni raba niere ie. Törbadre kukwe mikai gare bäri jai angwane, kä ño, nüne medente ye nikwe tikadre täräbätä biti biandre ni kukwe konkrekasionte tikaka yei, aune ja mräkä yekwe juain Betel jw.org yete. Tä nüne yekänti sukursal meden tä Sribi Ngöbökwe jie ngwen ye raba niara dimike bäri kwin, ñobätä ñan aune kä yekänti nünanta ño ye gare bäri kwin ja mräkätre sukursal yete yei (mäkwe Sribi Nikwe Ngöbökrä junio 2014, página 6, aune Sribi Nikwe Ngöbökrä noviembre 2011, página 2 ye mika ñärärä).

Nita ni tuinbiti ye rikadre nüne juta madate, o ni nünanka juta madate ye nita tötike Bibliabätä aune ni ye gare nie Internet ye aibe te angwane, kukwe kädrieni párrafo käne yebätä ye erere nikwe nuaindre. Ni raba ni ye töi mike kukwe mike gare bäri jai, akwa ni kukwe driekä nünanka kä yekänti rikadre känti ye ngwane nikwe tuanemetre kisete. Akwa, kä ruäre känti Sribi Ngöbökwe ñäkäita o ni tuanmetreta kukwe ruäre aibe nuainne yekänti ni ye tä nüne angwane, nikwe tärä tikadre, blitadre teléfono yebiti o kukwe juandre correo yete ye ngwane nikwe ja ngübadrebiti blitakäre kukwe Bibliabätä yebätä (Mat. 10:16).