“Munkwe ja die mikadre käre nünakäre jäme ni jökräbe”

1. Ñaka ni kadre ngäbiti kwin ju ruäre känti ye ngwane, ¿kukwe meden Bibliabätä ja jie ngwankäre nikwe ngwandre törö jai?

¹ Juta Jehovakwe tä nüne jäme jabe aune kukwe nünankäre jäme ye mikata gare kwetre (Is. 52:7). Akwa, nita niken nitre ruäre gwirete ye ngwane, tätre nemen rubun. Ye erere ngwane, dre ni dimikai ja töi mike jäme aune ñaka nemen rubun ye ani mike gare jai (Rom. 12:18, Kukwe Kuin Ngöbökwe [WBT]).

2. ¿Ñobätä ütiäte krubäte ni mada töi mikadre nüke gare jai?

² Nitre töi mikadre nüke gare jai. Nitre ruäre ñaka tö kukwe metre mikai gare jai yebätä tätre nemen ñäke rubune, nitre mada abokän tä nemen rubun akwa ñan kukwe drieta nikwe ye aibätä. Kä ñaka debe te nita nemen nitre yekänti o kukwe tä niaratre kisete ye tä nemen mike rubun. Aune kukwe drieta nikwe ye tä nemen ñaka mate kwin niaratre yebätä, ñobätä ñan aune nitre mada blitabare käme nitre Testiko yebätä niaratre okwäbiti ye kätä töi mike ye erere (2 Cor. 4:4). Töbikadre kwin aune nitre mada töi mikadre nüke gare jai ye raba ni dimike ñaka töbike nitre mada tä rubun ni kräke yebätä, aune ye käkwe ni töi mikai jäme (Prov. 19:11).

3. ¿Nitre ni kukwe nuaka ye nita mike ütiäte jai bämika raba ño?

³ Nitre mikadre ütiäte jai. Kä känti nita kukwe driere yekänti nitre kwati töi ñaka kukwe mikata täte kwetre ye tuametrebätä (2 Cor. 10:4). Erametre niaratre törbai kukwe drieta ye kukwe nuai o ñakare ye tä gare ietre. Kukwe meden mikata täte nitrekwe ye ni ñaka rabadre ñäke rüere aune kukwe ñaka gare jire niaratre ie ye ni ñaka rabadre mike nüke gare ietre. Ni rikadre mentokwäre ye ribedre nie angwane, töi jämebiti ni rikadre mento.

4. ¿Blitadre “ja moto jämenbti” ye dre gärätä?

⁴ Blitadre töi jämebiti. Ñäkädre tare nie ye ngwane, ni rabadre blite “ja moto jämenbti” o töi kwinbiti (Col. 4:6, [WBT]; 1 Ped. 2:23). Nikwe ñaka ñäkädre ni madabe jai, ñakare aune kukwe meden debe niara kräke ni erere yebätä nikwe ja töi mikadre metrere. Ñobätä ni ye tä töbike ye erere ye nikwe ngwandretari ie akwa töbikadre kwin käne nuainkäre. Akwa ruäre ngwane, bäri kwin blita ye mikadre krüte nitre ben ne kwe ñaka rabadre rubun bäri (Prov. 9:7; 17:14).

5. Nikwe ja töi mikai jäme kukwe driekänti angwane, ¿dre kwin raba nemen nikwe?

⁵ Nikwe ja töi mikai jäme angwane, ñäkäbare tare nie ye näire nikwe ja töi mikani jäme rükaita törö nitre ie aune törbai köbö mada ngwane kukwe Bibliabätä drieta ye kukwe nuai (Rom. 12:20, 21). Nitre tä ja töi mike kwatibe ja mikakäre kukwe metre drieta rüere ye raba nemen kukwebätä siba nibe ye ñaka gare jire nie (Gál. 1:13, 14). Niaratre ja töi kwitai o ñakare akwa, nikwe ja ngrabare gobrain kwin aune ja töi mikai jäme angwane, nikwe Jehová mikai ütiäte aune kukwe drieta nikwe ye mikai bä nuäre (2 Cor. 6:3).