Mäkwe diri bäri kwin: ñäkädre mä rüere ye ngwane mäkwe dre niedre ye mäkwe mika gare jai

Ñobätä ütiäte. Kukwe tare köböra nakainkä ye gare mäi aune nitre tika ñaka mentokwäre angwane nitre kwati krubäte murie ketai kukwe tare yekwe ye bämike ja töite. Mä rikadre kukwe ye mike gare ni nünanka mä ken yei, akwa ni yekwe ñan mä ngwandre blite aune tädre jondron nuainne niedre kwe mäi. ¿Mä rikadreta jerekäbe? ¡Ñakare! Ye erere arato, nitre kwati ñaka töta nemen ni kukwe nuai ñobätä ñan aune nita kukwe driere ye ñan raba ni mike kwäre nemen ruin ietre. Ruäre ngwane tätre töbike krubäte ye näire nita nemen känti yebätä ñaka töta nemen ni kukwe nuai (Mat. 24:37-39). O kukwe ngwarbe niebare nibätä ietre yebätä ñaka töta nemen ni kai ngäbiti (Mat. 11:18, 19). Nitre kukwe madabätä ñaka kukwe kwin nuainne ye erere nita nuainne arato tätre nütüre (2 Ped. 2:1, 2). Kenanbe nitre ñaka törbadre kukwe mikai gare jai, akwa nikwe ñaka ja di ngwandre nekä.

Nuaindre ño:

Mä jämi niken kukwe driere ju ju te ye känenkri, kukwe meden niedre mä rüere aune mäkwe dre niedre yebätä mäkwe töbika.
Ni gwi kukwe niedre mä rüere angwane, mäkwe blita töi jämebiti ben. Mä raba kukwe kwin niere ie. Ñodre, niena kukwebätä niedre kwe mäi angwane, mä raba niere krörö ie: “Ni mada erere mä töita kukwe ja üairebätä ye käi nibi juto tibätä”. Ni gwi ye töita ño aune kukwe meden tä kisete yebätä mäkwe töbikai angwane, mä raba blite jankunu ben. Tädre jondron nuainne niedre kwe mäi angwane, mä raba niere: “Nibira gare tie. Akwa ti jämi nikenta känenkri, ti törba ne mikaite mäi”. O ñaka tö kukwe mikai gare jai niedre kwe angwane, mä raba ngwentari ie: “¿Mä ñaka tö kukwe Bibliabätä ai mikai gare jai, o mä töi ñaka kukwe jene jene ye mikabätä gare jai?”.
Mäkwe töbika kwin. Jehová ñaka ni mike ja dibiti ja kukwe nuin ye mäkwe ngwan törö jai (Deut. 30:19). Ni itire itire sribidre ja kräke kukwe ja üairebiti (Gál. 6:5). Akwa, ni gwi yekwe ñäkädre jume nie angwane, bäri kwin ni rikadreta. Töita ño ye nikwe mikadre ütiäte jai, ye köböire ja mräkätre mada kukwe driekä raba niken känti köbö mada ngwane kukwe driere ie (1 Ped. 3:15).

Mäkwe kukwe ne nuain sö krati:

Ni gwi käkwe ñäkädre mä rüere ye ngwane mä rikadreta ye bitikäre, mäkwe kukwe meden bäri kwin niedre ie näre ye mäkwe kädrie ni kukwe driekä mäbe yebe.