Mäkwe diri bäri kwin: mäkwe ja kita blitakäre ni rubun yebe

Ñobätä ütiäte. Nita kukwe driere yekänti nitre kwati tä blite töi kwinbiti nibe. Akwa, nitre ruäre brukwä rabai ni kräke Jesukwe niebare (Juan 17:14). Ye medenbätä, nitre ruäre rabadre rubun ni kräke ye ngwane ni ñaka rabadre töi ñan krütare. Ye rabadre bare nibätä angwane, Jehová tö ja ngwamana ño nie ye erere nikwe nuaindre, nita blite Ngöbö ye käbiti (Rom. 12:17-21; 1 Ped. 3:15). Nikwe blitadre töi jämebiti ye köböire kukwe bäri kri ñaka rabai bare. Ne madakäre, nikwe kukwe kwin bämikai ni yei aune nitre mada tädre ni mrusaire yei arato, ye köböire mada ngwane raba ni Testiko kukwe nuin bäri kwin (2 Cor. 6:3).

Nuaindre ño:

Mäkwe ja töi mika jäme aune blita töi kwinbiti. Ye käkwe nitre töi mikai jäme. Ni rubun ye tä ja mike mä rüere ye mäkwe ñaka nütü (Ecl. 7:9). Kukwe kri krubäte tä kisete o kä ñaka debe te mäkwe ñäkädre jukwebätä ie yebätä raba ja töi mike kore. Nita kukwe driere ye tä mike rubun angwane, kukwe metre ñaka gare nibätä ietre yebätä raba ja töi mike ye erere (2 Cor. 4:4).
Mäkwe blita töi kwinbiti (Prov. 15:1). ¿Mä ni ye miri nüke ngwäte? ¿Mäkwe miri sribi nuainta kwe ye ötö? Nita sribi nikwe nuainne yebätä ni ñaka rabadre ngite juamana ta jabiti nitre madai. Akwa, kä ñaka debe ngwane mäkwe blitadre ben yebätä mäkwe ngite juamana ta jabiti bökän ie. Akwa, kukwe ngwarbe niebare nibätä olote yebätä tädre rubun, ¿ye ngwane dre nuaindre? Ye erere ngwane, mä raba niere: “Ñobätä mätä rubun ye nüke gare tie. Akwa kukwe niebare nunbätä mäi ye ñaka metre. ¿Ti raba mike gare metre mäi?”. Kukwe ruäre nuainta nikwe ye ñaka nemen debe ni ye kräke, ñodre nitre kitakata kukwebätä o däri mikata ja kwatate ye tuin ño nie, ye ngwane mä raba niere: “Nüke gare tie. Nitre mada tärä kukwe ye arabe niere nunye. Akwa, ¿ñobätä nunta ja töi mike ye erere ye ti raba mike gare Bibliabiti mäi?”.
Ni ye rabadre rubun krubäte ye ngwane, ni rikadre ja jiebiti aune ñaka kukwe niedre ie ye bäri kwin. Aune ñaka tö nitre testiko Jehovakwe tuai näinta ja gwirete ribedre kwe angwane, nikwe ja di ngwain ye nuainne nikwe mikadre gare ie.

Mäkwe kukwe ne nuain sö krati:

Ngöbö mikadre täte ni mräkäbe yete mäkwe ja kita ne nuainkäre.
Ni rabadre rubun mä kräke ye gwirete mä rika mentokwäre angwane, mä rabadre ja töi mike ño bäri kwin ye mäkwe ngwantari ja mräkä nänkä mäbe yei.