Jesús ja nire biani ni ütiäre Ngwainta Törö jai kräke ja ükadrete kä jutobiti
1. ¿Jesús ja nire biani ni ütiäre Ngwanta Törö jai ye käi näire kätä nemen dre nuainkäre nie?
1 Jesús ja nire biani ni ütiäre Ngwainta Törö jai, ye abokän nuaindi kä nete martes 26 marzo, köbö ye tä nemen kwin krubäte kä ngwankäre juto jabätä aune töbikatarikäre kukwe nuainbare Ngöbökwe ni mikakäre kwäre yebätä (Is. 61:10). Akwa kä nengwane nikwe kä ngwain juto jabätä ye käkwe ni dimikai ja mike juto köbö ye kräke. Ñobätä ye ani mike gare jai.
2. ¿Dre tä ni töi mike ja mike juto Jesús ja nire biani ni ütiäre ye kräke?
2 Gätä ütiäte nuaindi ye kräke ja ükadrete. Ni Däkien käkwe Mröbare ye nuainkäre ñaka jondron bätäkä ngwarbe sribeta akwa nemen ütiäte krubäte. Aune kukwe meden meden ütiäte ye ni ñaka tö käi kwitaikä jabiti, yekäre biarebe nikwe jondron jökrä ükadrete köbö ye kräke (Prov. 21:5). Ora aune kä kwin gätä ye nuainkäre diandrekä ye ütiäte, aune kä ye tädre ükaninte kwin bätä rabadrera juto gätä nuaindi ye känenkri. Ban aune vino debe gätä ye kräke erere känändre. Ne madakäre, ni kukwe kädriekä ye rabadre ja tötike kwin kukwe kädriekäre, aune nitre ni käi ükatekä bätä nitre ban aune vino bianka ye kisete sribi meden tädre ye rabadre gare kwin ietre. Erametre, ni niena sribi ne jökrä nuainne. Ni kökataribare köböire ni rabai kwäre käi juto nibätä ye ni töi mikai ja ükete kwin köbö ütiäte krubäte ne kräke (1 Ped. 1:8, 9).
3. ¿Ni Däkien käkwe Mröbare ye kräke ni raba ja brukwä ükete ño?
3 Ja brukwä ükadrete. Ja brukwä ükadrete ye ütiäte krubäte arato (Esd. 7:10). Ye aibe köböire ñokäre gätä ye nuainta rükai gare nie. Ye nuainkäre, ni rabadre kä denkä jai ñäkäkäre texto Bibliabätä dianinkä Jesukwe ja nire biani ni ütiäre Ngwainta Törö jai kräke yebätä, aune Jesús nünanbare köbö mrä te Kä tibienbätä yebätä ni jökrä rabadre töbiketari. Jesukwe kukwe nuainbare ja nire tätebiti yebätä töbikadretari ye ni töi mikai ja ngwen niara erere (Gál. 2:20).
4. Ni kökataribare köböire kukwe keta kabre kwin tä ni kräke, ¿ye meden tä kä mike bäri juto mäbätä?
4 Jesús ja nire biani murie ketadre ye köböire Gobran Ngöbökwe mikani kri, ni mikani kwäre ngite aune gata yebätä aune ni raba ja mäke kwin Ngöböbe bätä ja nire käre raba nemen nikwe (Col. 1:21, 22; 1 Juan 2:2). Ne madakäre, töbikadretari Jesús ja nire biani ni ütiäre yebätä ye ni töi mikai bäri ni ja dianinkä Jehová mikakäre täte ye nuainkäre aune ja ngwen jankunu Kristo ja ngwani ye erere (Mat. 16:24). Erametre Jesús ja nire biani ni ütiäre Ngwainta Törö jai ye kräke ni ja ükaite aune ni näin gätä yebätä ye käkwe kä mikai juto ni brukwäbätä.