¿Jesús ja nire biani ngwainta törö jai ye kräke mätä ja mike juto?

Pascua sribe jababare mrä Jesukwe ye nuain jababare kwin kwe. Niara murie keta jababare yebätä niara tö namani Pascua nuain apóstol kwe ben aune yete ja käne Dakien mrö biani ye niaratre rabadre nuainne kä kwatire kwatire te, ye Jesús käkwe ribebare ietre. Aisete, Pedro aune Juan rabadre cuarto ükete ribebare kwe ietre (Lu 22:7-13; üai kena täräkwatabätä ye mikadre ñärärä). Ye medenbätä nikwe ja mikadre juto Jesús ja nire biani ngwainta törö jai köbö 27 marzo ye kräke. Nirekwe kukwe kädriei aune kukwe ükaite ño pan aune vino o jondron mada mada ye kräke ye konkrekasion keteitire keteitire käkwe nuaindi. Akwa, ¿ni itire itire raba dre nuainne ne kwe tädre juto köbö ye kräke?

Nikwe ja brukwä ükadrete. Texto dianinkä ñäkäkäre Jesús ja nire biani ngwainta törö jai ye kräke yebätä nikwe töbikadre. Täräkwata Texto köbö kwatire kwatire kräke yete texto medenbätä ni raba ñäke ye kwandi ükaninte nie. Sección 16 Tärä ni jie ngwankäre ja tötike Kukwe Ngöbökwe yebätä aune Kukwe ja jie ngwankäre gätäte abril 2020 yete kukwe tä ükaninte bäri kwin. Ñobätä ni kökanintari ye ütiäte krubäte, yebätä mä tö ja tötikai mä mräkätre ben ngwane, kukwe ye raba kwen Índice de las publicaciones Watch Tower aune Tärä ni testiko Jehovakwe jie ngwankäre ja tötike yete.

Nitre mada nübaidre. Sö te nitre nübaidi Jesús ja nire biani ngwainta törö jai yebätä ngwane, ja di ngwandre kukwe driere. ¿Ni raba nire nire nübaire? Nitre tuabitita nikwe, nitre nämäne ja tötike nibe Bibliabätä aune ni mräkätre o nitre mada gare nie, ye ni raba nübaire. Nire nire tä tibo kukwe ja üairebiti ye nitre umbre ji ngwanka rabadre nübaire. Kä meden meden känti Jesús ja nire biani ngwainta törö jai ye ken nitre ruäre ñaka nüne ngwane, kä medente mada ye erere nuaindi ye mika raba ñärärä jw.org yete, ne kwe nuaindi bäri känime yekänti ni raba niken. Mä raba clic mike NUNBÄTÄ nieta yekänti aune biti clic mikadre “Conmemoración” nieta ye känti.

¿Ti tädre juto yekäre ti raba dre mada nuainne?