Täräkwata mrä ¿Nire nire tä kukwe Jehovakwe nuainne ni näire? yebiti kukwe driedre ño
Sribebare nitre ja tötikaka Bibliabätä jie ngwankäre juta Ngöbökwe kokwäre
1. ¿Ñokäre täräkwata Kukwe Jehovakwe ye sribebare?
1 Täräkwata ¿Nire nire tä kukwe Jehovakwe nuainne ni näire? ye bitinkä namani ni kisete. ¿Ni niena kukwe drierebiti? Täräkwata ne sribebare nitre ja tötikaka Biblia dimikakäre: 1) juta Ngöbökwe mike gare jai, 2) sribi meden meden nuainta nikwe ye mikakäre gare bäri kwin jai aune 3) juta Ngöbökwe tä sribire ye mikakäre nüke gare jai. Täräkwata Kukwe Jehovakwe ye tä kukwe mike gare página keteitibebätä ye medenbätä minuto krärike o krä jätä ja tötika rababätä kukwe ketare ketare kädrieta krütadre ye bitikäre.
2. Täräkwata ne tä ükaninte ño aune sribebare ño ye mike gare.
2 Täräkwata ye tä sribebare ño. Täräkwata ne tä ñäkäninbiti ketamä jatäri känti kukwe keta kabre mikata gare juta Jehovakwe yebätä aune tä kukwe ketamä kädrite käne ye mike gare. Kukwe 28 kädrieta ye tä kukwe ngwentari, aune subtítulos tä jükani drüne ye tä kukwe ngwantarita ye mike gare. Täräkwata ye jökräbätä jondron üai tä mikani ye kite juta 50 biti bäri yekänti aune kä meden känti jondron üai ye dianinkä mikata gare, aune tä mike gare kä jökräbiti tibien nita sribi Ngöbökwe nuainne. Kukwe keta kabre yekänti recuadro tä mikani abokän kädekata “Kukwe mikakäre gare bäri jai”, yekänti kukwe ütiäte mikata gare nitre ja tötikaka kräke.
3. ¿Täräkwata nebiti ni raba ja tötike ño nitre ja tötikaka yebe?
3 Kukwe driedre ñobiti. Kukwe ketare ketare kädriedre mäkwe ye ngwane título tä kukwe ngwentari ye erere mäkwe nuain. Ye bitikäre, ñäkä tädre párrafos yebätä angwane, mäkwe subtítulos ye mika gare. Mrä mada, página yekänti ngösöri kukwe ngwantarita yebiti mäkwe kukwe ngwantari ngwankäreta törö. Ñäkä raba kukwe ye jökräbätä o, mä törbadre angwane, mä raba kukwe ye kädriere ketare ketare. Texto meden medenbätä mäkwe ñäkäi ye erere mäkwe dianka, aune jondron üai tä mikani täräkwatabätä aune recuadro kädekata “Kukwe mikakäre gare bäri jai” ye kädriedre mäkwe ñaka käi kwitaka jabiti. Metrere, kukwe tä ükaninte ño jatäri ye ererebätä ja tötikadre. Akwa ruäre ngwane bäri kwin kukwe meden bäri ütiäte yebätä ja tötika raba käne. Ñodre, gätä kri ye rabadrera känime angwane, ja tötika raba kukwe 11 yebätä.
4. ¿Täräkwata mrä sribebare ye ñobätä käi juto nibätä?
4 Nita ni mada tötike Bibliabätä ye ngwane, nikwe ni ye dimikadre ni Rün kä kwinbiti mike gare jai. Akwa, ni rabadre dimike arato juta Jehovakwe yebätä kukwe mike nüke gare jai (Prov. 6:20). ¡Täräkwata mrä sribebare metrere ni mada dimikakäre ye käi juto nibätä!