Täräkwata Ngöböta kukwe kwin mike gare nie yebiti kukwe driedre ño
Sribebare ni dimikakäre ne kwe nikwe ni mada tuadrebiti aune ja tötika Bibliabätä kömikadre
1. ¿Gätä kri köbömä “Nikwe ja brukwä ye kriemikadre” yete täräkwata meden biani nie abokän raba ni dimike ni mada tuinbiti aune ja tötika Bibliabätä kömike?
1 Gätä kri köbömä “Nikwe ja brukwä ye kriemikadre” yete täräkwata mrä bianba nie ne kwe nikwe ni mada tuadrebiti aune ja tötika Bibliabätä kömikadre, ¡ye käi rababa juto nibätä! Täräkwata Ngöböta kukwe kwin mike gare nie ye rabai täräkwata Ngöbö tö dre nuainmana nie ye täte, aune täräkwata ye bäsi ja erebe ñobätä ñan aune kukwe tä mikanibätä ye nuäre aune jötrö rükadre gare bätä ni raba ja tötika Bibliabätä ye kömike jukwebätä ni gwi yebe arato. Ne madakäre, ni kristiano nünandre ño yebätä täräkwata Ngöbö tö dre nuainmana nie ye nämene blite metrere, ye abokän ñaka nämene nemen nuäre rükadre gare nitre ja tötikaka Bibliabätä mrä ye kräke. Akwa, täräkwata mrä ye tä blite metrere kukwe kwin tä Bibliate yebätä (Hech. 15:35).
2. ¿Ñobätä täräkwata Kukwe kwin ye sribebare?
2 ¿Ñobätä täräkwata mrä sribebare? Ja mräkätre kä jökräbiti tibien nämene täräkwata nuäre rükadre gare ye kärere ne kwe nitre ie kukwe ñaka gare ye törbadre kukwe mikai nüke gare jai aune rabadre ja tötike tärä Dre drieta yebätä, tärä yebiti nita metrere nitre mada tötike Bibliabätä. Aune nitre kwati ñaka töta nemen ja tötikai tärä kri yebätä, akwa täräkwatabätä kukwe tikani braibe yebätä nitre töta nemen ja tötikai. Ne madakäre, täräkwata ye abokän kwita raba bäri kukwe keta kabre yebiti.
3. ¿Ñobätä täräkwata ne ñaka ja erebe tärä o täräkwata ja tötikara mada yebe?
3 Täräkwata ye tä sribebare ño. Tärä o täräkwata keta kabre ja tötikara tä nikwe ye tä sribebare ne kwe nitre rabadre ñäkebätä aune kukwe metre Bibliabätä ye rabadre nüke gare akwle ietre. Akwa täräkwata ne abokän sribebare bä jene: sribebare nitre jie ngwankäre ja tötike akwa ni mada dirikä käkwe nitre dimikadre ja tötikebätä. Ye medenbätä nikwe täräkwata ye driedre angwane, bäri kwin ja tötikadre párrafos keteiti o ketebubätä ni gwi yebe. Täräkwata yebätä kukwe ñaka tikani krubäte ye medenbätä ni raba ja tötikebätä ni gwi yebe jukwebätä o tä sribire yekänti. Kukwe kena tä täräkwatabätä ye bäri kwin ja tötika kömikakäre, akwa jökrä bäsibiti ja tötika kömika raba.
4. ¿Täräkwata ne tä ni dimike ño nitre ja tötikaka ye tötike metrere Bibliabätä?
4 Tärä o täräkwata keta kabre tä nikwe, yebätä kukwe ngwantarita ye raba kwen nie párrafo meden kräke kukwe ngwantarita ye erere känti. Akwa täräkwata nebätä, kukwe ngwantarita ye mikata gare texto tä Bibliabätä yebiti, ñobätä ñan aune nitre kwati töta nemen kukwe metre ye mikai gare jai Biblia yebiti aune ñaka kukwe nieta tärä o täräkwata tä nikwe yebiti. Ye medenbätä texto Bibliabätä tä dre niere ye ñaka tä tikani jire täräkwata yebätä. Metrere ñäkädrebätä Biblia yete ye bäri kwin. Ye aibe köböire nitre ja tötikaka yei rabai gare kukwebätä tätre ja tötike ye kite Ngöbökri (Is. 54:13).
5. ¿Ñobätä ütiäte krubäte ni dirikä ye rabadre ja tötike kwin nitre tötikadre batire batire kwe ye kräke?
5 Täräkwata ne ñaka tä texto Bibliabätä ye jökrä mike gare. Täräkwata ne sribebare ne kwe nitre ja tötikaka rabadre kukwe ngwentari aune nitre kukwe driekä rabadre kukwe driere bäri kwin. Ye medenbätä, ütiäte krubäte ja tötikadre kwin kukwe ketare ketare ye kräke. Akwa: nikwe ñaka blitadre krubäte. Ni töta nemen texto Bibliabätä ye mikai gare kwin, akwa bäri kwin nikwe nitre ja tötikaka Bibliabätä ye tuanemetre dre nüke gare ietre texto yebätä ye niere. Töbikadre kwin kukwe ngwantarikäre ye köböire bätärekä ni raba kukwe metre ye mike nüke gare ietre (Hech. 17:2).
6. ¿Ni raba kukwe driere ño täräkwata nebiti a) nitre ñaka Ngöbö aune Biblia mike era jai ye käi känti? b) kukwe driedre ju ju te ye ngwane? c) ja tötika Bibliabätä ye driekäre bengwairebe? d) nitre tuadrebiti ye ngwane?
6 Tärä o täräkwata mada ni tötikara ye erere, ni raba täräkwata ne driere köbö ño erere te, sö yebätä kukwe drie ñakabiti akwa driedre. Nitre kwati kukwe driekä ye törbai nitre gwi ye tötikai Bibliabätä täräkwata nebiti jukwebätä. Ne madakäre, mikaba gare gätä kri köbömä te ye erere, “täräkwata ne ni dimikai metrere nitre tuinbiti kä jutobiti” (recuadro tä páginas 5 nemen 7 ye mikadre ñärärä).
7. ¿Kukwe meden nieta nitre tötikakäre Bibliabätä täräkwata nebiti?
7 Ni raba nitre tötike ñobiti. Ni raba kukwe ngwantarita tä jükani drüne yebätä ñäke aune kukwe mada tä ja känenkäre yebätä. Biti, texto tä mikani cursivas ye känändre Bibliabätä aune kukwe ngwandretari yebiti, nikwe nitre mada dimikadre kukwe ye mike nüke gare kwin jai. Aune ni jämi ja tötike kukwe madabätä ye känenkri, kukwe ngwantarita tä jükani drüne ye nikwe ngwandretari ne kwe kukwe ye nüke gare ni ja tötikaka yei o ñakare ye rabadre gare nie. Nitre tuadrebiti kena ye ngwane, bäri kwin nikwe kukwe ngwantarita keteiti o ketebu yebätä ja tötikadre. Ja känenkäre, bätärekä jatäri ni raba kukwe den bäri ja tötikakäre o nuainkäre täte.
8. ¿Nikwe ñäkädre texto yebätä angwane nikwe dre ngwandre törö jai, aune ñobätä?
8 Kukwe Mäkwe ñäkä nieta ye bitikäre texto tä mikani ye kätä kukwe ngwantarita tä jükani drüne ye mike gare bäri metre. Nikwe ñäkädre texto keteitibätä ye ngwane, bäri kwin ñaka kukwe ne erere niedre “apóstol Pablo kukwe ne tikani” o “Jeremías ni Ngöbö kukwei niekä tä dre niere nete mike ñärärä”, nikwe kukwe ye erere niedre angwane nitre ye raba nütüre nita ñäke nitre kä nebätä kukwei yebätä. Ye medenbätä bäri kwin nikwe niedre “Kukwe Ngöbökwe tä niere” o “kukwe rabai bare niebare Bibliabätä ye mike ñärärä nete”.
9. ¿Párrafos känti texto tä mikani ye jökräbätä ñäkädre?
9 ¿Nikwe ñäkädre texto jökräbätä o “mäkwe ñäkä” nieta ye aibebätä? Kukwe ño ye ererebätä nuaindre. Erametre texto ye ñaka tä párrafos aune kukwe tä tikani ye aibe mike gare metre; texto ketare ketare yete kukwe ütiäte mikata gare. Akwa, kä ñaka krubäte ni ja tötikaka yei, ñaka tö kukwe ye mikai gare jai o ñäkä ñaka gare kwin täräbätä ie ye ngwane, bäri kwin texto känti “mäkwe ñäkä” nieta ye aibebätä ñäkädre.
10. ¿Ñongwane ja tötika kömika raba tärä Dre drieta yebiti?
10 Ñongwane ja tötikadre tärä Dre drieta yebiti. Ni ja tötikaka ye tädre käre ja tötike ye ngwane, ni raba tötike tärä Dre drieta yebiti o ni raba ja tötike jankunu täräkwata yebätä nememe krütadre ye ngwane. Akwa kukwe ye tä gare metrere nitre kukwe driekä yei. Ne madakäre, ¿nikwe ja tötika ye kömikadre kapitulo kena yekänti tärä yebätä? Ye nuainkäre kukwe ñaka tärä ükaninte, ñobätä ñan aune nitre itire itire ye ñaka töi ja erebe. Akwa tärä Dre drieta yebiti nikwe kukwe ketare ketare yebätä ja tötikai bätärekä nitre ja tötikaka yebe angwane rabai kwin kräketre.
11. ¿Ñobätä ni rabadre kukwe driere täräkwata mrä nebiti ribeta nie?
11 Kä jökräbiti tibien kukwe tare ye aibe kukwe nuata, akwa kukwe kwin mikadre gare ye tä ni kisete: ye abokän Gobran Ngöbökwe niena gobrane aune gwäune nitre kukwe kwin nuainkä aibe mikai nüne kwe (Mat. 24:14; 2 Ped. 3:13). Erametre, nire nire käkwe kukwe kwin ne kukwe nuai ye kräke kukwe Ngöbökwe tikani ne rabai metre: “¡Ni kite kukwe kwin ngwena ngutuäbiti kwin ye ngoto bä nuäre krubäte, ni kä jäme mikaka gare, ni kite kukwe kwin ngwena jondron bäri kwin yebätä, ni diaintari ye kukwei mikaka gare, ni niekä Sión yei: ‘¡Ngöbö mäkwe ye nibira reire!’” (Is. 52:7). Täräkwata mrä nebiti ni rabadre Ngöböta kukwe kwin mike gare ye driere nitre jökrä tä kukwe üaire ribere jai yei.
[Rekwadro de página 7]
Nitre ñaka Ngöbö aune Biblia mike era jai yekänti kukwe driedrebiti
● Kä ruäre känti Ngöbö aune Biblia nieta ye ngwane ñaka tä nemen kwin nitre kräke ye gare nunye. Ye medenbätä bäri kwin kä yekänti nikwe blitadre, kukwe meden ben nitre tä ja tuin yebätä, ñodre, gobran kwin ribeta jai, kukwe kwin ni ja mräkäre kräke ye rabadre kwen medente aune ni raba dre kwin ngübare kä ja känenkäre yete. Nikwe blitadrera kukwe keta kabrebätä ni gwi yebe aune Ngöbö tärä bätä niara Kukwei ie tö ngwan raba ye mikadrera gare ie, ye bitikäre ni raba täräkwata Kukwe kwin ye driere ie.
[Rekwadro de página 8]
Kukwe driekäre ju ju te
● “Ngöbö tö dre nuaindi ni kä tibienbätä yebätä ye nitre kwati tä ngwentari jai, akwa kukwe ye nuäre mikadre gare jai ye ti törba mikai gare mäi. Ñodre, ¿Ngöbö töita ja tare nika ye diankabätä raba ruin mäi? [Mäkwe tuanmetre blite.] Täräkwata ne mä dimikai kukwe ngwantarita ye mike gare jai Biblia mäkwe yebiti. [Mäkwe täräkwata ye bian ie, aune kukwe kena känti párrafo kena tä aune Jeremías 29:11 yebätä mäkwe ñäkä.] Kukwe nieta nete ye erere, erametre Ngöbö tö kukwe kwin tuai nemen nikwe ja känenkäre ¿ñan ererea? [Mäkwe tuanmetre blite.] Mä raba täräkwata ye den jai, aune köbö madate ti jataita mä känti ye ngwane ni raba ja tötike párrafo ketebukäre yebätä ne kwe Ngöbökwe ja tare nika diainkä ño ye mikakäre gare jai.” Kä tärä bäri ja tötikara ni yei angwane, mä raba ñäke aune ja tötike párrafo ketebukäre aune texto ketamä yebätä ben. Mäkwe köbö ükate jai ja tötikakäre ben kukwe mada ngwantarita yebätä.
● “Bä kabre nita blite Ngöböbe orasion yebiti, aune metrere kukwe tare tä nemen ni kisete ye ngwane, ¿ñan ererea? [Mäkwe tuanmetre blite.] ¿Ngöböta orasion ye jökrä kukwe nuin raba ruin mäi, o ruäre ñaka nemen kwin kräke? [Mäkwe tuanmetre blite.] Kukwe ngwantarita ye raba kwen medente nie Bibliabätä ye tita täräkwata ngwen ne tä mike gare. [Mäkwe bian ie, aune mäkwe ja tötika ben kukwe 12, párrafo kena aune textos känti “mäkwe ñäkä” nieta yebätä.] Ngöböta ni nübaire nökrö ja ken orasion yebiti gare nie ye käi juto nibätä; akwa rabadre nikwe yekäre, ni rabadre niara mike gare kwin jai. [Mäkwe kukwe 2 ye känä aune mäkwe subtítulos ye mika tuadre ie.] Mä törba angwane, ti raba täräkwata ne mikete mäi aune kukwe ütiäte ngwantarita ne Biblia tä mike gare ño ye mikakäre gare mäi ti raba kiteta köbö mada ngwane mä känti.”
● “Kukwe ja känenkäre ye tä nitre töi nike krubäte gare nuen yebätä nunta nitre tuinbiti ju ju te. ¿Kukwe jökrä ye ükaite raba ruin mäi? [Mäkwe tuanmetre blite.] ¿Bibliabätä kukwe kwin mikata gare abokän raba ni miketa tö ngwen ye gare mäi? Kukwe ruäre ngwantarita ye Biblia tä mike gare mike ñärärä nete.” Mäkwe täräkwata ye bian ie aune kukwe ngwantarita täräkwata kä mrä yekänti ye meden tuin ütiäte ie ye mäkwe nübaidre niere. Biti, kukwe meden niedre kwe ye erere mäkwe känändre aune ja tötikata ño täräkwata yebiti ye mäkwe mika gare ie. Mäkwe köbö ükate jai tuabitikäre ne kwe kukwe mada ngwantarita yebätä mäkwe ja tötikadre ben.
[Rekwadro de página 9]
Ja tötika driekäre bengwairebe
● “Nunta nitre tuinbiti jötrö ngwarbe ja tötikadre ño Bibliabätä ye driekäre ietre. Täräkwata nebätä kukwe ja tötikara keta jätä biti ketarike tä yekänti kukwe ütiäte ngwantarita ne abokän raba kwen medente Bibliabätä nie ye mikata gare. [Ni üai tä mikani tärä kwata kena aune täräkwata kä mrä yebätä ye mäkwe mika tuadre ie.] ¿Mä tärä ruäre ngwane ja di ngwen kukwe Bibliabätä ye mikakäre nüke gare jai? [Mäkwe tuanmetre blite.] Kukwe nebätä ja tötikadre nuäre ye ti tönibi mikai gare mäi. [Mäkwe kukwe 3 ye känä aune kukwe ngwantarita ketamäkäre párrafo kena kräke yebätä mäkwe ja tötika ben. Biti, mäkwe ñäkä Apocalipsis 21:4, 5 yebätä. Raba nuainbare mäi angwane mäkwe ñäkä párrafo aune texto ja känenkäre yebätä.] Mä raba täräkwata ye den jai. Mäkwe ja tötikadre kukwe keteitibätä ie nun törba. Mä törba ja tötikai jankunubätä angwane, mä raba nuainne. Mada ngwane, ni raba ja tötike kukwe tä página keteitibe känti yebätä.”
[Rekwadro de página 9]
Nitre tuadrebiti ye ngwane kukwe driedrebiti
● “Mä kuninta gwi tie yebätä kä nibi juto tibätä. Tiki täräkwata ne ngwena mä kräke abokän tä kukwe ütiäte keta kabre ngwantarita ye mike gare texto Bibliabätä yebiti. [Mäkwe täräkwata ye bian ie aune täräkwata kä mrä ye känändre kwe mäkwe ribe ie.] ¿Kukwe tä mikani nete ne meden mä törba mikai gare bäri jai? [Mäkwe tuanmetre blite aune törbadre kukwe meden mikai gare jai ye mäkwe känä.] Kukwe ngwantarita ye Biblia tä mike gare ño ye ti raba mike gare mäi täräkwata nebiti.” Párrafo keteiti o ketebu aune texto Bibliabätä dianinkä ñäkäkäre yebätä mäkwe ja tötika ben ne kwe ja tötikadre ño ye mäkwe mikadre gare ie. Ja tötika Bibliabätä ye kömikata nuäre ne erere. Täräkwata mikadrete ie ye bitikäre, köbö ükadrete jai tuabitikäreta. Kukwe ja tötikara ye krütadre mäi angwane kukwe mada diandrekä ni ja tötikaka yekwe ye ererebätä mä raba ja tötike ben o mä raba nuainne jankunu kena krütadre mäi ye bitikäre.