Nikwe nitre tötikadre täräkwata Kukwe kwin yebiti
1. ¿Täräkwata Kukwe kwin ye sribebare ño?
1 Täräkwata Sribi Nikwe Ngöbökrä julio yebätä nikwe mikaba gare jai ye erere, täräkwata Ngöböta kukwe kwin mike gare nie ye kwin krubäte kukwe metre ye driekäre nitre madai. Täräkwata nebätä, bersikulo ye ñaka tä tikani, ne kwe nitre ja tötikaka ye käkwe känändre metre ta Biblia yebätä. Täräkwata nikwe ye jökrä sribeta ne kwe nikwe ja tötikadre kaibebätä, akwa täräkwata ne sribebare ne kwe ja tötikadrebätä ni dirikä iti ben. Ye medenbätä, nikwe driedre ni madai angwane, ni mada tötikata ño Bibliabätä ye driedre ietre aune ye köböire kukwe kwin ye mikadre gare jai ye tä kä mike juto nibätä rabai gare ietre (Mat. 13:44).
2. ¿Ni rikadre kena ye ngwane ni raba blite ño täräkwata Kukwe kwin yebiti?
2 Mä rika kena ye ngwane: Mä raba niere: “Kukwe mikata gare noticia yete, yebätä nitre kwati tätre töbike krubäte kä ja känenkäre yebätä. ¿Ja känenkäre nünain bäri kwin raba ruin mäi? [Mäkwe tuanmetre blite.] ¿Biblia tä kukwe kwin mike gare ni kräke ye gare mäi? Kukwe ruäre ngwantarita ye Biblia tä mike gare ye mikata gare täräkwata nebätä”. Mäkwe täräkwata ye bian ie aune kukwe ngwantarita página mrä yebätä ye meden raba tuin kwin ie ye mäkwe ngwantari ie. Ni tötikata ño Bibliabätä ye mäkwe mika gare ie kukwe kena aune párrafo kena yebiti, yekänti kukwe ngwantarita ye mikata gare. Arato, kukwe ngwantarita mäkwe diandrekä ye täräkwata ye raba ni dimike ño ne kwe kwandre nie Bibliabätä ye mäkwe mika gare ie. Internet käi jw.org yete video tärä blite kukwe ja tötikara ye ererebätä angwane, mäkwe mika tuare.
3. Nitre mada tötikadre ño Bibliabätä täräkwata Kukwe kwin yebiti ye mäkwe mika gare.
3 Nitre mada tötikadre ño täräkwata nebiti: 1) Kukwe ngwantarita jatäri tä jükani drüne yebätä mäkwe ñäkä ne kwe kukwe meden bäri ütiäte yebätä nitre ja töi mikadre. 2) Ye bitikäre, mäkwe ñäkä párrafo yebätä. 3) Texto tä tikani cursiva yebätä mäkwe ñäkä, aune mäkwe töbika kwin kukwe mada ngwantarikäre kukwe ngwantarita tä jükani drüne ye mikakäre gare Bibliabiti. 4) Kukwe ngwantarita ye kräke párrafo mada tärä angwane, kukwe 2 bätä 3 nieta ye erere mäkwe nuain. Video tärä kukwe ngwantarita ye mikakäre gare, aune mä jämi mike tuare ie angwane, mäkwe mika tuare ja tötika yete. 5) Mrä mada, kukwe ngwantarita ye mäkwe mikamana gare ni yei, ye köböire kukwe ye nüke gare ie o ñakare ye rabai gare mäi.
4. ¿Dre käkwe ni dimikai kukwe driere bäri kwin täräkwata nebiti?
4 Mäkwe täräkwata ne mika gare kwin jai aune raba angwane käre mäkwe kukwe driebiti. Mä jämi ja tötika kömike ye ngwane, mäkwe töbika ni ja tötikaka yebätä aune texto tä kukwe ja tötikara yebätä yebiti mä raba dimike ño yebätä mäkwe töbika (Prov. 15:28; Hech. 17:2, 3). Kukwe driedre ño täräkwata nebiti ye rabai gare kwin nie angwane, bäri ni törbadi kukwe metre ye driedibiti nitre madai.