Täräkwata döräita nitre nübaikäre ye köböire kukwe kwin tä nemen bare
Bämän krämä gätä kri köbömä ye känenkri, täräkwata döräidi nitre nübaikäre gätä kri kräke aune kukwe ütiätebätä ni rabadre nuainne siba arato. Nitre nübaibare kä känente gätä kri kräke aune janamane ye töi nemen ñan krütare kukwe kädrieta yebätä, nitre sribikä ja töi jeñebiti tätre ükaninte kwin sribikäre aune ja ngwen kwin bätä nitre ja ükaninkrö ye nemen keteiti jakänti (Sal. 110:3; 133:1; Is. 65:13, 14). Ne madakäre, nitre nübaidre gätä kri kräke ye törbadre näin akwa rabadre nändre mente krubäte ietre, ye erere angwane, ¿täräkwata döräidre ye köböire kukwe kwin raba nemen bare?
Gätä kri köbömä 2011 nikani ta ye bitikäre, meri iti nämene ja üke nitre Testiko yebätä, akwa täräkwata döräita ye kwani ie jukwebätä, ye käkwe tärä tikani sukursal keteiti ie. Tärä yebätä kukwe ne nämene tikani: “Ju bä nuäre tä tikwe aune ti muko töi kwin krubäte, ye jondron jökrä kä ngwankäre juto jabätä nämä tikwe ti nämä nütüre. Akwa ñaka ye erere, kukwe kwin ñaka nämä jire tikwe. Ye käkwe ti töi mikaba niken gätä kri yebätä köbö sabado yete, ye nuainkäre tikwe nänba karote 320 kilómetros (200 millas)”. Gätä ye namani tuin kwin krubäte ie ye medenbätä blitabare kwe muko yebe celular yebiti aune niebare kwe ie niara ñan rabaita deu ñobätä ñan aune tö namani näin gätäbätä dominkote. Niara tä mike gare: “Kukwe kädrieba ye tikwe kukwe nuaba jökrä aune nitre Testiko rababa gare kwati tie. Ti ñaka törbaba gätä ye tuai krüte”. Namaninta gwi angwane namani ja tötike Bibliabätä aune sö nikani kräbokä ta niara kädekani kukwe driekä ñaka ja ngökani ñöte. Niara kukwe ne mikani gare: “¡Täräkwata ni nübaikäre mikaninte jukwebätä ti kräke ye kwin krubäte! Aune matare ti raba niere, tita kukwe ütiäte nuainne ja nire tikwe yebiti”.
Nitre nübaidi nikwe ye ruäre rabai gätä kri yebätä. Aisete nikwe kä jutobiti täräkwata nitre nübaikäre ye döräidre. Mä rika gätä kri yebätä angwane, mä rika täräkwata nitre nübaikäre ye ngwena jabe ne kwe mä rabadre blite nitre mada nünanka kä yekänti ben.
[Rekwadro de página 5]
¿Täräkwata döräidi nitre nübaikäre ye driedi ño?
Ni tö kukwe driei nitre jökrä ie angwane, ni rabadre blite jötrö. Ni raba kukwe ne erere niere: “Ñantörö. Kä jökräbiti nunta täräkwata ne döräire nitre nübaikäre. Ne mä kräke. Kukwe mada kwain mäi täräkwata nebätä”. Mäkwe blita kä jutobiti. Bämän krüte yebätä mäkwe täräkwata döräi nitre nübaikäre angwane mä raba täräkwata Ni Mikaka Mokre aune ¡Despertad! ye driere arato.