Nitre jökrä nübaidi

1. ¿Nitre nübaidi gätä kri regional ye kräke ye kömikai ñongwane?

¹ Nikwe ja di ngwandre aune ngwian kitadrekä krubäte mrö kwin sribekäre ja ketamuko o ni mräkätre kräke ye ngwane, nikwe nübaidre kä jutobiti. Ye erere arato, ja di ngwani krubäte mrö kwin ja üaire ye sribekäre ere gätä kri regional nuaindi ye kräke. Bämän rabai krämä gätä kri ye känenkri angwane, Jehovakwe sribi ütiäte mikai ni kisete nitre mada nübaikäre nüke gätä yebätä. ¿Dre käkwe ni dimikai nuainne kä jutobiti?

2. ¿Dre käkwe ni töi mikai nitre nübaire bäri?

² Jehovakwe mrö kwin ja üaire biain nie gätä kri yete yekwe ni itire itire dimikai ño yebätä nikwe töbikaitari angwane, ye käkwe ni töi mikai nitre jökrä nübaire (Is. 65:13, 14). Nita nitre nübaire ye köböire kukwe kwin tä nemen bare ye nikwe ngwandre törö jai arato (mäkwe recuadro “Kukwe kwin tä nemen bare” ye mika ñärärä). Nikwe nitre nübaidi ye ruäre rükai nibe gätä yebätä, akwa ruäre ñaka rükai. Nikwe nitre nübaidi ye rükai nibe ye kärera, nikwe ja di ngwain nitre nübaire ye käkwe Jehová käikitaikä aune töita kwin ni kräke ye nikwe bämikai (Sal. 145:3, 7; Rev. 22:17).

3. ¿Nikwe täräkwata nitre nübaikäre ye döräidi ño?

³ Täräkwata jökrä ye döräidi ño ye nitre umbre konkrekasionte käkwe ükaite. Nitre ñaka gwi yekänti mikaite o ñakare, o kukwe drieta nitre kwati tä näin ta yekänti bian nitre ie o ñakare ye niedi kwetre. Raba angwane, bämän krüte yebätä täräkwata ni nübaikäre ye driedi täräkwata Ni Mikaka Mokre yebe gwaire. Täräkwata döräidi ünä nitre nübaikäre angwane, kä rabai juto nibätä ñobätä ñan aune nikwe nitre nübaibare kä jutobiti aune nikwe ja di ngwani nitre kwati nübaire nüke siba nibe mrö ja üaire biani ere Jehovakwe nie yebätä.

Kukwe kwin tä nemen bare

Kä nikanina kabre ta yete, meri testiko nämene nitre nübaire gätä kri regional ye kräke angwane niara nämene ja di ngwen ngwarbe namani ruin ie. Nämene ngwentari jai: “¿Nitre nübaita ye köböire näin gätä kri yebätä?”. Sabadote dekä, gätä kri yete, ni iti nämene kukwe sij yebätä jutuabare ie. Meri testiko ye nämene täkäni ni ye ken, yebätä ja töi mikani kwe blite ben. Täräkwata ni nübaikäre ye biani ni yei yebätä janamene gätä kri yebätä. Nämene kukwe keta kabre ngwentari, abokän meri testiko ye käkwe mikani gare kä jutobiti ie. Gätä kri ye namani tuin kwin ni yei niebare kwe meri testiko yei, aune nitre jökrä nämene ja ngwä kitani kwin aune ja ngwen kwin ye käkwe töi mikani ñan krütare niebare kwe ie. Köbö ye arabe te, meri testiko ye namani blite nitre gure nämene täkäni ken yebe. Täräkwata nitre nübaikäre ye biani ietre, aune niaratre janamene yete buste. Kukwe kädriebare ye namani tuin kwin krubäte ietre, yebätä ja töi mikani kwetre näinta domingote. Ye ngwane, nita nitre nübaire ye ütiäte krubäte ye nükani gare meri testiko yei.
Bitinkä, nitre precursor regular gure käkwe ja mikani gare nitre gure bäri umbre kräketre ye ie gätä kri regional yete. Nitre gure umbre ye janamene krire kena gätä ye erere te niebare kwetre ja mräkätre yei. Ja mräkätre precursor ye käkwe ngwanintari ietre: “¿Nirekwe mun nübaibare?”, niaratre käkwe niebare ietre: “Bati, nun rükabata gwi angwane, täräkwata nitre nübaikäre ye mikaninte jukwe täni kwanba nunye?”. Niaratre käkwe ñäkäbare täräkwata yebätä aune kwäräkri ja kä aune nämene nüne medente ye tikani kwetre. Gätä kri yete, ja mräkätre ruäre käkwe mrö jakwe ye biani ietre. Kukwe kädriebare ye namani tuin kwin nitre gure yei yebätä janamenentre domingote arato. Kukwe ükaninte nitre ye tuabitikäre aune dimikakäre kukwe metre ye mike gare bäri jai.