Ja ngwanta kwin yebiti Ngöbö mikata ütiäte

1. ¿Ñobätä nita nemen gätä kri yebätä angwane, nitre kwati ie tä nemen gare?

¹ Nita nemen gätä kri yebätä angwane, nitre kwati ie tä nemen gare. Juta keta kabre känti, nitre kukwe mikaka gare ye tä kukwe mike gare nibätä nitre kä yekänti ie. Hotel aune mrö rürübäin käi yekänti nitre Testiko tä nemen kwati krubäte, aune ji ngrabare ja mräkätre kwati tä nemen solapa ye ngwen jabätä. Kukwe ruäre ngwanta törö nie ye ja känenkäre ni bike mike gare jai, abokän käkwe ni dimikai ja ngwen kwin Ngöbö mikakäre ütiäte gätä kri nuaindi yekänti (1 Ped. 2:12).

2. ¿Kä känti gätä kri nuainta yekänti nikwe ja ngwäkitai kwin angwane Ngöbö mikai ño ütiäte?

² Ja ngwäkita kwin. Ni tädre gätäbätä ye ngwane nikwe ja ngwäkitadre kwin ye gare nie. Akwa, kä madakänti abokän ni tädi ja ngwäkitani ño ye käkwe nitre mikai töbike krubäte, ñodre, ni rükadre hotel, ni rikadre mröre o ni rikadre jondron kökö ja kräke ye ngwane. Kä ye ngwane ni rikadre dän nänkäre gätäbätä ye kwrere te ribe ñaka nie akwa dän kwin kitadre jabätä nänkäre. Nire nire käkwe ni tuai yei rabai gare kwin ni abokän kristiano metre aune ni ñaka ja ngwen nitre mada ñaka kukwebätä ye erere (Rom. 12:2). Ne madakäre, ni rikadre solapa ngwena jabätä, ne kwe nitre yei rabadre gare nita gätä kri yebätä, aune kä rabai kwin kukwe driekäre nie, bätä ni rükai gare jötrö ja mräkätre mada yei.

3. ¿Ñongwane kätä nemen kwin nie ni mada ngübabätäkäre bätärekä aune blitakäre kwin ben?

³ Nikwe ni mada ngübadrebätä bätärekä aune blitadre kwin ben. Kä nengwane nitre kwati töita ja aibebätä aune ñaka debe bien jire. Ye medenbätä, nikwe ni mada ngübadrebätä bätärekä aune blitadre kwin ben ye käkwe nitre töi mikai jäme, metrere nitre sribikä hotel aune mrö rürübäinta yekänti kräke rabai kwin krubäte (2 Tim. 3:1-5). Nikwe täkärä diandrekä ja kräke o ni rikadre täräkwata mrä den jai ye ngwane nikwe töbikadre ni mada yebätä (1 Cor. 10:23, 24). Ni brare iti janamane kena gätä kri yebätä, käkwe niebare: “Kukwe kädrieba gätäte ye ñaka törö jire tie, akwa nitre Testiko ja ngwen kwin ye käi ñaka nikwitekä tibiti”.

4. ¿Ñobätä ni rabadre ja töi mike sribire gätä kri nuainta yete?

⁴ Ni tädre juto biare. Nitre kristiano metre ye tä bämike tä käre juto biare ni mada dimikakäre (Sal. 110:3). ¿Mä raba ni mada dimike? Kä ükaninte gätä kri kräke yebätä ja mräkätre 600 käkwe ja dimikani kwärikwäri kä ye ükete kwin. Ni kä bianka ye töi namani ñan krütare aune kukwe ne niebare kwe: “Kukwe ne erere nun ñaka tuabare jire. Nitre jökrä tä sribire ja töi jeñebiti ye tä nun töi mike ñan krütare”. Gätä kri köbömä 2013 ye nita ngübare kä jutobiti, gätä kri yete kukwe kädriei ye nikwe kukwe nuai aune ja tötikai bätä Jehová Ni ni Tötikaka ye mikai ütiäte.

[Rekwadro de página 3 nemen 6]

Kukwe ngwanta törö gätä kri köbömä kä 2013 kräke

◼ Ora gätä kräke. Gätä kri köbömä ye jökrä kömikai 9.20 dekä. Jukwe tikai 8.00 dekä. Musika kömikai dekä ye ngwane, ni jökrä käkwe täkädre täkärä yete, ne kwe gätä ye kömikadre kwin. Bierne bätä sabado gätä krütai 4.50 dere aune dominkote krütai 3.35 dere.

◼ Kä karo mikatekäre. Kä biani nie karo mikatekäre ye ñaka ütiä käräi aune karo rabai nüke ye ererebätä ükaite jatäri. Placa mikani karobätä nitre bren kräke, karo ye aibe mikadrete kä dianinkä nitre bren kräke yekänti. Kä ñaka bianta krubäte karo mikatekäre, ye medenbätä raba angwane mun raba niken karo kwatibe te.

◼ Täkärä. Nitre nänkä mäbe karote, nitre ja tötikaka mäbe o mä mräkätre ye aibe kräke mä raba täkärä denkä. Täkärä nitre umbre aune nitre bren kräke ye braibe, aisete ni ja mräkäre jökrä ñaka raba täke ben. Mun raba täkärä ye mikete nitre umbre aune nitre bren bätä nitre tä näin niaratre ngübakäre aibe kräke (1 Cor. 13:5).

◼ Mrö. Ni rikadre mrö ngwena jai ye bäri kwin, ne kwe ni ñaka rikadre kökö jai kä madakänti ñänä ruäre yete. Nevera chi mika raba täkärä täni aibe ni raba niken ngwena. Jondron vidriore ye ñaka jänrikadre arato.

◼ Ngwian. Bieta ja üaire yebätä ni raba debe bien, yekäre nikwe ngwian biandre ja töi jeñebiti sribi Ngöbökwe nuainta kä jökräbiti dimikakäre gätä kri näire. Ngwian biandre chekere angwane, sribedre obisina ka ngäbitita gobrankwe nitre testiko Jehovakwe ie ye käbiti. Arato ni raba tarjeta de crédito o tarjeta mada yebiti ngwian bien gätä kri nuaindi ruäre yekänti.

◼ Kräkä. Mätä kräkä meden ñain ye mä rika ngwena jai, ñobätä ñan aune kräkä ye ñan raba kwen mäi gätä nuainta yekänti. Mätä aku mike ja kwatate bren diabetes yebätä angwane, mäkwe ñaka aku o jondron mada grine ye kita ngwarbe tibienta. Jondron mikata kä burei kitakäre hotel o gätä kri nuainta yete, yekänti mä ñaka raba kite arato.

◼ Sabato. Kä kwatire kwatire te nitre tä ngoto juin nemenkä o mate tibien sabato üe nga yete. Mäkwe sabato kwin känä, ne kwe mäkwe nändre kwin kalera yebätä.

◼ Nitre ie ni kukwe ñaka ruin kwin. Kä ruäre känti kukwe kädriei gätä kri yete, ye mikai kukwe nuakäre radio (FM) yete. Yekäre, mä rika radio bätä audífonos ngwena kukwe nuakäre jai.

◼ Karo monso kia ngwankäre bätä täkärä mada. Ni ñaka rikadre karo monso kia ngwankäre bätä täkärä jeñe nikwe ye ngwena gätä yekänti. Täkärä kia monso kräke mika raba ja ken ye aibe ni raba niken ngwena.

◼ Ja rä mikara. Ruäre gätä kri nuainta kä ketaninkä yekänti, yebätä abanico mikata. Ye medenbätä, jondron ja rä mikara, ye nikwe ñaka mikadre krubäte jabätä, ñobätä ñan aune ye raba nitre dokwä mike tare o mike bren (1 Cor. 10:24).

◼ Täräkwata Sírvase visitar (S-43-S). Nikwe kukwe driedre ye ngwane nire nire törbadre kukwe mikai gare jai ye kä tikadre täräkwata Sírvase visitar yebätä. Gätä krütadre angwane täräkwata ye bian raba Tärä Bianta ye käi känti o ni kukwe konkrekasionte tikaka yei.

◼ Mrö rürübäin käi: Mrö rürübäinta yekänti ni rikadre mröre angwane ja ngwandre kwin, ye tä Jehová käikitekä. Mäkwe ja ngwäkita kwin ni kristiano tä ja ngwäkite ye erere. Kä keta kabre känti ngwian (propina) mikateta nitre sribikä yei angwane ye erere mäkwe nuain arato.

◼ Hotel:

1) Cuarto ribeta kwäbe mäkwe jai ye aibe mäkwe kärädre aune ñaka ni mada mikadre kübien te.

2) Cuarto käräbare mäkwe, yete mä ñaka rabai angwane mäkwe mika gare jötrö hotel yei (Mat. 5:37). Mäkwe nuain angwane, cuarto meden ñaka ütiä biain mäkwe ye mäkwe número tika täräbätä jai. Mäkwe cuarto dianinkä ja kräke yete mä ñaka rabai ye mäkwe ñaka mikai gare ora gre ketebu biti krä kwä rikadre ta ye känenkri angwane, mäkwe ngwian biani ye ñaka biainta mäi.

3) Mäkwe hotel ütiä biandre tarjeta de crédito o tarjeta mada yebiti angwane hotel käkwe ngwian mada diainkä mäkän, ne kwe nane mä tädre yete ye ngwane kukwe mada rakadrekä ye ütiä biankäre; akwa mäkwe hotel ütiä biandre täte ye ngwane ngwian ye biainta mäi.

4) Jondron mikata tribe ngwankäre ye tädre juto tribe ngwankäre angwane mä raba niken ngwena biti miketa täte ni mada kräke.

5) Nuainta käre angwane, mäkwe ngwian bian nitre sribikä hotel yete tä niken maleta ngwena mä kräke yei aune mäkwe (propina) mikate ni sribikä cuarto yete ie köbö kwatire kwatire.

6) Ñaka mrö riadre cuartote nieta ye erere nikwe nuaindre.

7) Mrö, kabe o jondron mada mikata kwetadre hotel yete, ye nikwe kwetadre debe näre.

8) Nikwe blitadre nitre sribikä hotelte ben ye ngwane Ngöbö üai tä ni töi mike kwin, ye nikwe bämikai. Nitre kwati tä nemen hotel yete ye nitre sribikä kätä dimike ye nikwe ngwandre törö jai, ye medenbätä nikwe ja töi mikadre kwin nitre ye kräke bätä ngübadrebätä bätärekä ye kwin niaratre kräke.

9) Monsotre tädre hotel yete, rikadre elevador, piscina, o kä madakänti ye ngwane nitre rüne rabadre mokrebiti.

10) Lista de Hoteles recomendados ye ütiä nuäi köbö kwatire kwatire ye erere tä tikanibätä, akwa ngwian mada biandre arato ye ñaka tä mikani yete. Ngwian kärädre bäri mäi o jondron meden abokän mä ñaka käräbare ja kräke ye mäkwe ñaka ka ngäbiti, aune Nitre ni Käi Känänkä yei mäkwe mika gare jötrö ngwarbe gätä kri yete.

11) Cuarto te mä tädre yete kukwe rabadre bare angwane, mäkwe mika gare drekebe Nitre ni Käi Känänkä yei mä tädre gätä kri yete ngwane.

◼ Ja töi jeñebiti sribidre. Nire törbadre sribi nuain ye raba ja kä bien Nitre Käkwe Ja Mikani Sribikä käi yekänti. Kä jämi 16 monsotre yebiti raba sribire arato, akwa ni mada, rün o meye kwe ye käkwe ngübadrebiti.