Gätä kri köbömä tä kukwe metre miketa törö nie
1. ¿Nitre israel nämene bieta deme nuainne ye ngwane kukwe medenbätä niaratre nämene töbike?
1 Nitre Israel nämene ja ükökrö bämä, kä kwatire kwatire te bieta deme nuainkäre. Erametre, nitre brare aibe rikadre bieta yebätä, akwa mräkätre jökrä nämene niken siba kä Jerusalén yete köbö ütiäte ye kräke (Deu. 16:15, 16). Köbö ye ngwane kä nämene nemente ietre töbikakäre kukwe ütiäte Ngöbökwe yebätä. Ñodre, Jehová Ngöbö ja tarekä nämene nitre niara mikaka täte yei jondron bien (Deu. 15:4, 5); bätä Ngöbö nämene niaratre jie ngwen aune kriemike kwin (Deu. 32:9, 10), arato Ngöbökwe niaratre dianinkä juta kwe erere yebätä niaratre rabadre kukwe kwin nuainne (Deu. 7:6, 11). Kä nengwane gätä kri köbömä nuainta ye tä ni dimike töbike kukwe keta kabre yebätä.
2. ¿Kukwe ükaninte kädriekäre gätä kri yete ye käkwe ni dimikai ño kukwe metre mike gare jai?
2 Kukwe kädrieta yebiti kukwe metre mikata gare nie. Kukwe kädrieta gätä kri köbömä yete kukwe bämikata aune blitata ja mräkä madabe, ye tä kukwe metre Bibliabätä mike gare bäri kwin nie (Juan 17:17). Juta Jehovakwe tä ja ükete kukwe ükatekäre kwin, ne kwe kukwe kädriedi ye rabadre ni kä jökräbiti tibien dimike (Mat. 24:45-47). ¿Kukwe keta kabre rabai gare mäi ye käkwe mä töi mikai ño raba ruin mäi?
3. ¿Dre käkwe ni dimikai kukwe kädriei ye kukwe nuin kwin?
3 Ni kwandre köbö köbömä yete aune olo mikadre kwekebe kukwe kädriedi yei, ye käkwe ni dimikai. Mäkwe blita sribi bäkänkä mäkwe yebe ne kwe köbö biandre ngwarbe mäi nänkäre ye mäkwe ñaka käi kwitaka jabiti. Mä ñaka ja düka kä rairebiti ne kwe köbö köbömä yete mä tädre ngwäte. Ja mräkätre ruäre tätre ni kukwe kädriekä yebätä nikren aune kukwe kädrieta ye tike täräbätä jai. Teléfono ötadre ne kwe ñaka rabadre mä aune ni mada töi nike. Kukwe kädrieta ye ngwane mä ñaka rabadre blite ngwarbe, kukwe juen celularte bätä jondron kwete.
4. ¿Nitre rüne raba monsotre kwe dimike ño ne kwe gätä kri ye rabadre tuin kwin ietre?
4 Kä nämene niken kwä kükü ta ye ngwane nitre judío nämene sabado käi ngwen juto jabätä, aune bieta cabaña nuain nämene kwetre ye ngwane niaratre nämene ja ükökrö kukwe biani Ngöbökwe ietre ye kukwe nuakäre. Nitre ja mräkäre jökrä nämene ja ükökrö ja tötikakäre kwin kukwe yebätä, aune ye ngätäite “monsotre kia” nämene siba (Deu. 31:12). Nitre ja mräkäre käkwe täkädre ja ken aune monsotre kia tädre kwekebe ngwäte kukwe kädrieta ye kukwe nuin ye kwin kräketre. Kukwe kädriei abokän rabadre tuin ütiäte nitre ja mräkäre yei, yebätä blitadre kwetre jabe köbö ye arabe te deu. ‘Monsotre ñaka ja ngwen kwin’, yebätä nitre rüne ñaka rabadre monso kwe tuenmetre ‘ja gobraine akwle’. Niaratre tädre mokre bentre tädre hotelte aune kä bianta ja dükakäre chi ye ngwane (Pro. 22:15; 29:15).
5. ¿Ja ngwanta kwin ye köböire blita raba ño kwin kukwe metre yebätä?
5 Ja ngwanta kwin ye tä kukwe metre mike gare. Gätä nuainta yekänti ja ngwanta kwin ye köböire blita raba kwin kukwe metre yebätä (Tito 2:10). Nitre sribikä hotelte töta nemen nitre tä nemen yete ye tuai ja ngübadrebätä bätärekä, ja töi mike kwin aune ja dimike arato (Col. 4:6). Kä känente, nitre sribikä sukursalte nämene kukwe ükete ne kwe ja mräkätre käkwe ja dükadre hotelte, ye ngwane meri hotel ütiä käräkä käkwe niebare: “Nun töta nemen nitre testiko Jehovakwe tuai nemen hotel nunkwe nete, ñobätä ñan aune niaratre ye ja ngwen kwin aune töi kwin arato. Ne madakäre, tätre nitre sribikä nete ye mike tuin ütiäte jai aune tätre kä ne ngübare kwin”.
6. ¿Nita ja ükete kwin ye köböire blita raba ño kukwe metre yebätä gätä kri nuainta yekänti?
6 Ja mräkätre ie ni rabadre gare o gätä nuainta ye ñan aibebätä nita tarjeta ngwen jabätä, ñakare aune nita nuainne ne kwe kukwe metre rabadre gare nitre madai. Nire tä tarjeta ngwen jabätä ye tä ja ngwä kite kwin aune ja ükaninte kwin ye rükai gare nitre madai, aune ñaka tädre ja ngwä kitani nitre mada ngwarbe tä ja ngwä kite kwrere (1 Tim. 2:9, 10). Ye medenbätä, ni tädre gätä kri nuainta yekänti o hotelte angwane ni tädre ja ngwäkitani kwin. Ni rabadre dän ngüre otore te aune sueterte ye ngwane ñaka blita raba kwin ni Jehová mikaka täte yebätä. Gätä kri ye nuaindre jubäre akwa nikwe dän kwin kitadre käre jabätä. Gätä kri krütadre ye bitikäre ni rikadre mröre, ye ngwane nikwe ngwandre törö jai ni abokän tädre gätä kribätä, ye medenbätä ni ñaka raba ja ngwä kite ni mada ngwarbe ye kwrere.
7. ¿Gätä kri nuainta yete ni raba ja mäke ño kwin ja mräkätre mada yebe?
7 Nitre israel nämene bieta nuainne ye ngwane ja mräkätre juta madate yebe niaratre nämene ja mäke kwin, aune ye köböire nämene keteitibe (Hech. 2:1, 5). Gätä kri köbömä yete nita nemen keteitibe ja mräkätre mada yebe, ye medenbätä nitre mada töi ñan tä nemen krütare (Sal. 133:1). Nikwe kä diandrekä jai blitakäre ja mräkätre mada yebe ni tädre mröre ye ngwane, aune ñan ni rikadre mrö kökö jai kä madakänti.
8. ¿Ñobätä nikwe ja töi mikadre sribire gätä kri yete?
8 Gätä kri ye ükateta kwin aune ja mräkätre tä sribi nuainne ja töi jeñebiti ye tä nemen tuin kwin nitre mada yei. ¿Mä raba “ja töi mike sribire ja töi jeñebiti” gätä yebätä? (Sal. 110:3.) Nitre rüne kwati tätre ja kä bien sribikäre monsotre kwe yebe, ne kwe rabadre nitre mada dimike sribibätä arato. Mä jakaire krubäte yebätä ja ketadre ja mräkätre madabe ye ñaka nuäre mä kräke; ye erere angwane mäkwe sribidre gätä kri yete ye käkwe mä dimikai ja kete ni madabe. Ja ngwai mada käkwe niebare: “Gätä kri yete ti mräkätre aune ja mräkätre ruäre aibe nämene gare tie. Akwa tikwe ja mikaba kä ükatekä gätä kri ye kräke ye ngwane ja mräkätre brare bätä merire kwati rababa gare tie. ¡Ye mataba kwin tibätä!”. Nita kise ngökö ja mräkätre kwati ie angwane ja ketamuko kwati rabai nikwe aune ye käkwe kä mikai juto nibätä (2 Cor. 6:12, 13). Dre dre ribeta sribikäre gätä kri yete ye mäkwe ngwantari nitre umbre yei.
9. ¿Nikwe dre nuaindre nitre nübaikäre gätä kri yebätä?
9 Nitre mada nübaidre kukwe metre kukwe nuin. Kä kwatire kwatire te täräkwata döräita nitre nübaikäre gätä kri yebätä, ye kömikata bämän krämä gätä ye känenkri. Täräkwata bianta nitre nübaikäre ye konkrekasion kwatire kwatire käkwe ja töi mikadre döräire kukwe drieta kwetre ye jökrä känti. (Rekwadro “Täräkwata döräidi nitre nübaikäre driedi ño” ye mikadre ñärärä). Mäkwe ñaka täräkwata döräidre jökrä angwane namaninte mäi ye mä rika ngwena gätä kri nuaindi yete, ne kwe ja mräkätre mada käkwe kukwe driedibiti.
10. Täräkwata döräita nitre nübaikäre kä kwatire kwatire te gätä kri ye kräke ye köböire dre kwin tä nemen bare ye mikadre gare.
10 ¿Täräkwata döräidi nitre nübaikäre ye köböire dre kwin tä nemen bare? Bati, ni ni käi ükatekä käkwe täkärä känänbare nitre nibu gure kräke. Niaratre niebare ie ni mada käkwe nübaibare aune dre nuaindi gätä yebätä ye niaratre tö namani mikai gare jai. Niaratre nikani 300 kilómetros (200 millas) karote rabakäre gätä nuain nämene yekänti. Arato, ja ngwai nämene kukwe driere ju ju te ye ngwane täräkwata biani kwe ni brare ie. Ni ye tö namani kukwe mikai gare jai, ye medenbätä ja ngwai käkwe ja töi mikani kukwe mike gare ie täräkwata yebiti. Ye bitikäre, ja ngwai käkwe ni ye tuani näin ni mada ben gätä yebätä, aune täräkwata mrä bianba gätä yete ye ni ye nämä ngwen jabätä.
11. ¿Ñobätä ütiäte krubäte ni rikadre gätä kri nuainta kä kwatire kwatire yebätä?
11 Bieta deme yebiti Jehová nämene nitre israel tuenmetre niara ‘mike täte metre aune töi kwinbiti’ (Jos. 24:14). Ye erere arato, gätä kri köbömä ye tä ni dimike “kukwe erametre Ngöbökwe [...] mike ütiäte janknu” aune ye ütiäte Ngöbö mikakäre täte (3 Juan 3, WBT). Nire nire tä Jehová tarere aune tä ja di ngwen näin kä kwatire kwatire gätä kri yebätä, aune tä olo ketete kukwe kädrieta yei ye Jehová rabadre jondron kwin mike nemen bare kräke ye nun tö.
[Kukwe nieta página 4]
Gätä nuainta yekänti ja ngwanta kwin ye köböire blita raba kwin kukwe metre yebätä
[Kukwe nieta página 5]
Bämän krämä gätä ye känenkri täräkwata döräidi nitre nübaikäre gätä kri yebätä
[Rekwadro página 3-6]
Kukwe Ngwanta Törö Gätä Kri Köbömä Kä 2012 Kräke
◼ Ora gätä kräke. Gätä kri köbömä ye jökrä kömikai 9.20 dekä. Jukwe tikai 8.00 dekä. Musika kömikai dekä ye ngwane, ni jökrä käkwe täkädre täkärä yete, ne kwe gätä ye kömikadre kwin. Bierne bätä sabado gätä krütai 4.55 dere aune dominko krütai 3.40 dere.
◼ Kä karo mikatekäre. Kä biani nie karo mikatekäre ye ñaka ütiä käräi aune karo rabai nüke ye ererebätä ükaite jatäri. Placa mikani karobätä nitre bren kräke, karo ye aibe mikadrete kä dianinkä nitre bren kräke yekänti. Kä ñaka bianta krubäte karo mikatekäre, ye medenbätä raba angwane mun raba niken karo kwatibe te.
◼ Täkärä. Nitre nänkä mäbe karote, nitre ja tötika mäbe o mä mräkätre ye aibe kräke mä raba täkärä denkä (1 Cor. 13:5).
◼ Mrö. Ni rikadre mrö ngwena jai ye bäri kwin, ne kwe ni ñaka rikadre kökö jai kä madakänti ñänä ruäre yete. Nevera chi mika raba täkärä täni, aibe ni raba niken ngwena. Jondron vidriore ye ñaka jänrikadre arato.
◼ Ngwian. ¿Ni raba debe bien ño gätä kri yebätä? Ngwian biandre ja töi jeñebiti sribi Ngöbökwe nuainta kä jökräbiti dimikakäre. Ngwian biandre chekere angwane, sribedre “La Torre del Vigía” ye käbiti.
◼ Kukwe tare rabadre bare. Gätä nuainta yete kukwe tare rabadre bare ye ngwane, nitre ni käi ükatekä yei nikwe mikadre gare jötrö ngwarbe. Niaratre käkwe mikai gare nitre Ni dimikaka kukwe tare yebätä ye käi känti, ne kwe niaratre käkwe ni mada juandre ni bren tuin känti aune kräkäi mike. Kukwe kri krubäte rabadre bare angwane nitre Ni dimikaka kukwe tare yebätä käkwe ñäkädre número 911 yete; ne kwe ñaka ñäkädre ngwarbe número yete kukwe ñaka ütiäte yebätä.
◼ Kräkä. Kräkä meden ñata mäkwe ye mä rika ngwena jai, ñobätä ñan aune kräkä ye ñan raba kwen mäi gätä nuainta yekänti. Mätä aku mike ja kwatate bren diabetes yebätä ye ngwane mäkwe ñaka aku o jondron mada grine ye kita ngwarbe tibien. Jondron mikata kä burei kitakäre hotelte o gätä kri nuainta yete, yekänti mä ñaka raba kite arato.
◼ Sabato. Kä kwatire kwatire te nitre tä ngoto juin nemenkä o mate tibien sabato yete. Mäkwe sabato kwin känän, ne kwe mäkwe nändre kwin kalera yebätä.
◼ Nitre ie ni kukwe ñaka ruin kwin. Kä ruäre känti kukwe kädriei gätä kri yete, ye mikai kukwe nuakäre radiote (FM) yete. Yekäre, mä raba radio bätä audífono ngwena kukwe nuakäre.
◼ Karo monso kia ngwankäre bätä täkärä mada. Ni ñaka rikadre karo monso kia ngwankäre bätä täkärä jeñe nikwe ye ngwena gätä yekänti. Täkärä kia monso kräke mika raba ja ken ye aibe ni raba niken ngwena.
◼ Ja rä mikara. Ruäre gätä kri nuainta kä ketaninkä känti, yebätä abanico mikata. Ye medenbätä, jondron ja rä mikara, ye nikwe ñaka mikadre krubäte jabätä, ne ñan ñobätä aune ye raba nitre dokwä mike tare o mike bren (1 Cor. 10:24).
◼ Täräkwata Sírvase visitar (S-43-S). Täräkwata Sírvase visitar ye ni rikadre ngwena kati o kobu, ne kwe nikwe kukwe driedre angwane, nire nire törbadre kukwe mikai gare jai ye nikwe kä tikadrebätä. Gätä krütadre angwane täräkwata ye bian raba Tärä Bianta ye känti o ni kukwe konkrekasionte tikaka yei (Sribi Nikwe Ngöbökrä noviembre kä 2009, página 4, mikadre ñärärä).
◼ Mrö rürübäin käi. Ni rikadre mröre mrö rürübäinta yekänti angwane ja ngwandre kwin, ye kätä Jehová käikitekä. Kä keta kabre känti ngwian (propina) mikateta nitre sribikä yei.
◼ Hotel
1) Kwarto ribedre kwäbe mäkwe ye aibe kärädre bätä ñaka ni mada mikadre kübien yete.
2) Kwarto käräbare mäkwe, yete mä ñaka rabai angwane mäkwe mika gare jötrö hotel yei (Mat. 5:37).
3) Mäkwe hotel ütiä biandre tarjeta de crédito o tarjeta mada yebiti angwane hotel käkwe ngwian diainkä mada mäkän, ne kwe nane mä tädre yete ye ngwane kukwe mada rakadrekä ye ütiä biankäre; akwa mäkwe hotel ütiä biandre täte ye ngwane ngwian ye biainta mäi.
4) Jondron mikata tribe ngwankäre ye ribedre angwane mä raba niken ngwena biti mikadreta täte ni mada kräke.
5) Mäkwe ngwian (propina) mikate ni sribikä kwartote yei köbö kwatire kwatire te.
6) Ñaka mrö riadre kwartote nieta ye erere nikwe nuaindre.
7) Mrö, kabe o jondron mada mikateta kwetadre hotel yete, ye nikwe kwetadre debe näre.
8) Ngöbö üai kätä ni töi mike kwin, ye nikwe bämikadre blitadre nitre sribikä hotel yebe ye ngwane. Nikwe ngwandre törö jai, nitre kwati tä nemen hotel yete ye nitre sribikä kätä dimike, ye medenbätä nikwe ja töi mikadre kwin nitre yekrä bätä ngübadre bätärekä ye kwin niaratre kräke.
9) Nitre rüne rabadre mokre monsotre kwe yebiti, tädre hotelte, rikadre piscina, o kä madakänti ye ngwane.
10) Lista de Hoteles recomendados ye ütiä nuäi köbö kwatire kwatire ye erere tä tikanibätä, akwa ngwian mada biandre arato ye ñaka tä mikani yete. Ngwian kärädre bäri mäi o jondron meden abokän mä ñaka käräbare ja kräke ye mäkwe ñaka ka ngäbiti aune nitre ni Käi känänkä yei mäkwe mika gare jötrö ngwarbe gätä kri yete.
11) Kwarto te mä tädre yete kukwe rabadre bare angwane nitre ni Käi känänkä yei mäkwe mika gare gätä kri yete.
◼ Ja töi jeñebiti sribidre. Nire törbadre sribi nuain ye raba ja kä bien Nitre Käkwe Ja Mikani Sribikä käi yekänti. Monsotre kä jämi 16 bititre raba sribire arato, akwa ni mada, rün o meye kwe ye käkwe ngübadrebiti.
[Rekwadro página 6]
¿Täräkwata döräidi nitre nübaikäre driedi ño?
Blitadre jötrö ngwarbe ne kwe täräkwata ye döräidre kukwe drieta nikwe ye jökrä känti. Kukwe ne nie raba: “Ñantörö. Kä jökräbiti nunta täräkwata ne döräire nitre nübaikäre. Ne mä kräke. Kukwe mada mikata gare täräkwata nebätä”. Blitadre kä jutobiti. Bämän krüte yebätä täräkwata mada drie raba täräkwata ni nübaikäre yebe.