Köbö köbömä yete ni mikai dite
1. Kä nete gätä kri köbömä nuaindi, ¿yete dre rabai nikwe?
1 Satana tä kä gobraine yete ñö ñaka ñadre jire chi, akwa Jehová abokän tä ñö kwin bien ñadre ere ni niara mikaka täte yei (Isa. 58:11). Tä nuainne kukwe keta kabrebiti aune gätä kri köbömä nuainta kä kwatire kwatire te yebiti tä nuainne arato. Gätä kri nuaindi kä nete jatai nökrö ja ken ye ngwane, ja mikadre juto nitre mada dimikakäre bätä ja mikakäre dite kukwe ja üaire yebiti. ¿Nuaindre ño? (Pro. 21:5.)
2. ¿Kukwe meden tä ükadrete nie?
2 Mä jämi ja mike juto angwane, mäkwe kukwe ükate jai bätä köbö dianka jai sribibätä, ne kwe mä kwandre gätä yebätä köbö köbömä yete. ¿Mäkwe kukwe ükaninante jai nänkäre gätä yebätä aune täkärä känänkäre jai gätä kömika jämi ye känenkri? Jehovata mrö ja üaire sribere ni kräke ye ni ñaka tö juain ja bäre, ¿ñan ererea? (Isa. 65:13, 14.) ¿Mä rabai medente aune drebiti mä näin yebätä mäkwe töbikabarera?
3. ¿Kukwe kädriei gätä kri yebätä ye käkwe ni aune ni mräkätre dimikadre, yekäre dre nuaindre?
3 ¿Ni töi tädre kukwe kädriei yebätä, yekäre dre nuaindre? Mäkwe ñaka kübia kä rairebiti, ne kwe köbö ñaka rabadre mä nike, mä okwä tädre ni kukwe kädriekä yebätä, texto Bibliabätä känändre jökrä, kukwe kädriei ye mäkwe tika. Nitre ja mräkäre käkwe täkädre ja ken ye kwin krubäte, ne kwe nitre rüne käkwe monsotre kwe dimikadre kukwe kädriei ye kukwe nuin kwin (Pro. 29:15). Kukwe kädriei abokän rabadre tuin ütiäte nitre ja mräkäre yei, yebätä blitadre kwetre jabe. Arato, mäkwe ja tötikadre mä mräkätre yebe, ye ngwane mun raba blite kukwe kädriei yebätä, ne kwe kukwe ye ñaka käi rikwitadrekä munbiti.
4. ¿Nitre mada rabadre dite kukwe ja üairebiti yekäre dre nuaindre?
4 Nitre mada dimikadre ño. Nitre mada rabadre dite kukwe ja üairebiti yei ni tö arato. ¿Ja mräkätre umbre bätä ja mräkätre mada abokän kräke ñaka nuäre nändre gätä yete, yebätä mäkwe töbikabarera? Ja mräkätre ye erere tärä konkrekasionte angwane, ¿mä raba dimike? (1 Juan 3:17, 18.) Ni umbre nitre braibe kukwe driekä jie ngwanka käkwe kukwe ükadrete nitre ye dimikakäre.
5. ¿Täräkwata döräidi nitre nübaikäre ye nuaindi ño? (Rekwadro mikadre ñärärä.)
5 Nita nuainne kä kwatire kwatire te erere, bämän krämä gätä kri känenkri täräkwata döräita nitre jökrä nübaikäre. Täräkwata bianta nitre nübaikäre ye konkrekasion kwatire kwatire käkwe ja töi mikadre döräire kukwe drieta kwetre ye jökrä känti. Nitre ja mräkä ie täräkwata ye ñaka krütadre angwane rikadre ngwena gätä kri nuaindi yekänti kukwe driekärebiti. Nuaindre ño ye mikai gare biernente. Täräkwata döräidre käbe ye erere diandrekä jai aune mada ye biandre ni ni käi ükatekä ie gätä kömika jämi känenkri. Munkwe ngwan törö jai kukwe kädriei dominkote mrä ye tä mikani täräkwata yebätä, aisete mäkwe täräkwata ye dian kati jai.
6. ¿Ja ngwanta kwin ye bämikadre ño gätä kri yete?
6 Ja ngwanta kwin yebiti nitre mada dimikata. Kä nengwane nitre “kwati rabadi ja tarere au”, ye medenbätä, nitre ye ñaka töita ni madabätä, ja mräkätre kristiano töita ni madabätä ye ngätäite nita siba ¡ye tä kä mike nuäre nibätä! (2 Tim. 3:2, KKN.) ¿Nikwe dre nuaindre ja ngwankäre kwin? Kena, jukwe tikadre ora krä kwä dekä ye ngwane ni ñaka rikadre dreke dreke käteri; arato nitre nünanka nibe bätä nitre nänkä nibe carrote o ni ja tötikaka Bibliabätä nibe ye aibe kräke täkärä känändre. Ni gätä kömikaka kätä ribere nie ni rabadre täkärä känene aune musika gätä kömikakäre ye kukwe nuin ye ngwane nikwe kukwei mikadre täte; kukwe kädrieta ye ngwane celular ötadre ne kwe ñaka ni mada töi nikadre. Arato, kukwe kädrieta ye ngwane ni ñaka rabadre blite ngwarbe, kukwe juen celularte, jondron kwete o näin ngwarbe nekwäre sekwäre.
7. ¿Nikwe dre nuaindre ja dimikakäre aune ja mräkätre mada dimikakäre?
7 Ja ketamuko kwin tä kwen nie. Gätä kri yete ni raba nemen ja kete kwin ja mräkätre mada yebe (Sal. 133:1-3). ¿Ñobätä mä ñan ja töi mike ja mräkätre konkrekasion madate ye mike gare jai, ne kwe ja ketamuko mada rabadre mäkwe? (2 Cor. 6:13.) Köbö kwatire kwatire yete mä raba ja töi mike ni iti o nitre ja mräkäre mada mike gare jai. Kä bianta ñänä ruäre mrökäre ye ngwane nuain raba. Ye medenbätä, mä rika mrö ngwena chi kwetadre jai gätä nuainta yekänti, ne kwe mä ñaka rikadre mröre mrö rürübäinta yekänti. Mäkwe ye erere nuaindre angwane ye köböire ja ketamuko kwin raba kwen mäi.
8. ¿Ñobätä nikwe ja töi mikadre sribire gätä kri nuaindi yete aune sribi meden nuain raba?
8 Sribi Ngöbökwe nuaindre gwairebe ja mräkätre mada yebe ye kätä kä mike juto nibätä. Ñodre, sribi keta kabre nuaindi ye kräke mä raba ja töi mike sribire o konkrekasion mada abokän kisete kä tädre ükadrete ye mä raba dimike (Sal. 110:3). Sribi ñaka biani nuaindre mäi angwane mä raba kärere Nitre Käkwe Ja Mikani Sribikä yei. Ni kwati kätä sribire gwairebe angwane sribi ye mikata krüte jötrö ngwarbe aune nuainta kä jutobiti.
9. ¿Ñobätä ütiäte nikwe ja ngwandre kwin bätä ja ükadrete kwin gätä nuainta ye ngwane?
9 Nitre tä ni mrusaire raba blite kwin nibätä. Kukwe kädrieta gätä yebätä ye ñan aibe ngwane ja ngwandre kwin, ñakare aune ja ngwandre kwin köbö köbömä te. Aisete, nitre mada kätä ni mrusaire ye ie rükadre gare ni abokän ñaka ja ngwen nitre mada ye erere (1 Ped. 2:12). Ni tädre gätä nuainta yekänti, nita nemen yekänti o mrö rürübäinta yekänti, ye ngwane ja ngwäkitata bätä ja ükateta yebiti Jehová käikitadrekä (1 Tim. 2:9, 10). Nikwe solapa ngwandre jabätä ye ngwane nitre mada ie rükai gare ni abokän testiko Jehovakwe aune ye köböire ni raba blite bentre kukwe driekäre ietre.
10. Nitre sribikä hotelte o mrö rürübäinta yekänti käkwe blitadre kwin gätä kri nuainta yebätä, ¿yekäre dre nuaindre?
10 ¿Nitre sribikä hotel o mrö rürübäinta yekänti käkwe töbikai ño nibätä? Kwarto ribeta kwäbe ye aibe kärädre ja kräke, ne kwe ñaka kwarto ükadrete ngwarbe, arato kwarto mikadrete ja mräkätre mada kräke. Hotel yete ni rükadre o ni rikadreta aune nitre tädre kwati jite, ye ngwane ja töi mikadre kwin nitre ye kräke bätä ngübadre bätärekä (Col. 4:6). Nitre sribikä mrö rürübäinta yekänti o nitre sribikä hotelte abokän tä ni dimike tribe ngwen, kwarto ükete o tä jondron mada nuainne ni kräke yei ngwian biandre (propina).
11. ¿Nitre kristiano tä kukwe kwin bämike angwane blita raba ño kukwe Ngöbökwe yebätä?
11 ¿Gätä kri nuainta ye ngwane nitre tä blite ño nibätä? Kä känti gätä kri nuainbare, yekänti ni iti kädekani kä ye ngübabitikä käkwe kukwe ne niebare periodicobätä: “Nitre ye ja ngwen kwin krubäte. Niaratre tä nüke nete kä kwatire kwatire te ye käita nemen juto nunbätä”. Kä känente, ni iti abokän ñaka Testiko ye kän cartera nianinte hotelte, aune nitre nänkä gätäbätä nämene kübien hotel yete. Dre nämene cartera yete ye bianinta jökrä, ye ngwane hotel bäkänkä käkwe niebare cartera bäkänkä ie: “Nitre testiko Jehovakwe tätre gätä kri nuainne känime nete aune niaratre tätre kübien hotelte ye kwin krubäte. Nitre mada tädre nete akräke cartera ñaka raba kwenta mäi.”
12. Gätä jatadre nökrö ja ken ye ngwane, ¿ja töi mikadre dre nuainne aune ñobätä?
12 Gätä kri köbömä nuaindi kä nete ye abokän nibira nökrö bäri ja ken. Sribi nuainta krubäte kukwe kädriei ye ükatekäre bätä jondron mada nuainkäre gätä kri ye kräke. Ye medenbätä, mäkwe ja töi mika nemen köbö köbömä yete, ne kwe Jehová aune juta kwe tä kukwe ükete mä kräke ye mäkwe kadre ngäbiti. Mäkwe ja töi mika blite kwin aune ja ngwen kwin nitre mada dimikakäre. Ye erere nuaindre angwane ja rabai ruin nie ni iti käkwe kukwe tikani gätä nuainbare kä känente yebätä ye erere: “¡Gätä ye ñaka käi rikwitaikä jire tibiti!”.
[Rekwadro de página 4]
Nita nuainne kä kwatire kwatire te erere, bämän krämä gätä kri känenkri täräkwata döräita nitre jökrä nübaikäre
[Rekwadro de página 6]
Ni tädre gätä nuainta yekänti, nita nemen yekänti o mrö rürübäinta yekänti, ye ngwane ja ngwäkitata bätä ja ükateta yebiti Jehová käikitadrekä
[Rekwadro de página 7]
Mäkwe ja töi mika blite kwin aune ja ngwen kwin nitre mada dimikakäre
[Rekwadro de página 4]
Kukwe ngwanta törö gätä kri köbömä kä 2011 kräke
◼ Ora gätä kräke. Gätä kri köbömä ye jökrä kömikai 9.20 dekä. Jukwe tikai 8.00 dekä. Musika kömikai dekä ye ngwane, ni jökrä käkwe täkädre täkärä yete, ne kwe gätä ye kömikadre kwin. Bierne bätä sabado gätä krütai 4.55 dere aune dominko krütai 3.40 dere.
◼ Kä carro mikatekäre. Kä biani nie carro mikatekäre ye ñaka ütiä käräi aune carro rabai nüke ye ererebätä ükaite jatäri. Placa mikani carrobätä nitre bren kräke, carro ye aibe mikadrete kä dianinkä nitre bren kräke yekänti. Kä ñaka bianta krubäte carro mikatekäre, ye medenbätä raba angwane mun raba niken carro kwatibe te.
◼ Täkärä. Nitre nänkä mäbe carrote, nitre ja tötika mäbe o mä mräkätre ye aibe kräke mä raba täkärä denkä (1 Cor. 13:5).
◼ Mrö. Ni rikadre mrö ngwena jai ye bäri kwin, ne kwe ni ñaka rikadre kökö jai kä madakänti ñänä ruäre yete. Nevera chi mika raba täkärä täni, aibe ni raba niken ngwena. Jondron vidriore ye ñaka jänrikadre arato.
◼ Ngwian. ¿Ni raba debe bien ño gätä kri yebätä? Ngwian biandre ja töi jeñebiti sribi Ngöbökwe nuainta kä jökräbiti dimikakäre. Ngwian biandre chekere angwane, sribedre “La Torre del Vigía” ye käbiti.
◼ Kukwe tare rabadre bare. Gätä nuainta yete kukwe tare rabadre bare ye ngwane, nitre ni käi ükatekä yei nikwe mikadre gare jötrö ngwarbe. Niaratre käkwe mikai gare nitre Ni dimikaka kukwe tare yebätä ye käi känti, ne kwe niaratre käkwe ni mada juandre ni bren tuin känti aune kräkäi mike. Kukwe kri krubäte rabadre bare angwane nitre Ni dimikaka kukwe tare yebätä käkwe ñäkädre número 911 yete; ne kwe ñaka ñäkädre ngwarbe número yete kukwe ñaka ütiäte yebätä.
◼ Kräkä. Kräkä meden ñata mäkwe ye mä rika ngwena jai, ñobätä ñan aune kräkä ye ñan raba kwen mäi gätä nuainta yekänti.
◼ Sabato. Kä kwatire kwatire te nitre tä ngoto juin nemenkä o mate tibien sabato yete. Mäkwe sabato kwin känän, ne kwe mäkwe nändre kwin kalera yebätä.
◼ Nitre ie ni kukwe ñaka ruin kwin. Kä ruäre känti kukwe kädriei gätä kri yete, ye mikai kukwe nuakäre radiote (FM) yete. Yekäre, mä raba radio bätä audífono ngwena kukwe nuakäre.
◼ Carro monso kia ngwankäre bätä täkärä mada. Ni ñaka rikadre carro monso kia ngwankäre bätä täkärä jeñe nikwe ye ngwena gätä yekänti. Täkärä kia monso kräke mika raba ja ken ye aibe ni raba niken ngwena.
◼ Ja rä mikara. Ruäre gätä kri nuainta kä ketaninkä känti, yebätä abanico mikata. Ye medenbätä, jondron ja rä mikara, ye nikwe ñaka mikadre krubäte jabätä, ne ñan ñobätä aune ye raba nitre dokwä mike tare o mike bren (1 Cor. 10:24).
◼ Täräkwata Sírvase visitar (S-43-S). Täräkwata Sírvase visitar ye ni rikadre ngwena kati o kobu, ne kwe nikwe kukwe driedre angwane, nire nire törbadre kukwe mikai gare jai ye nikwe kä tikadrebätä. Gätä krütadre angwane täräkwata ye bian raba Tärä Bianta ye känti o ni kukwe konkrekasionte tikaka yei (Sribi Nikwe Ngöbökrä noviembre kä 2009, página 4, mikadre ñärärä).
◼ Mrö rürübäin käi. Ni rikadre mröre mrö rürübäinta yekänti angwane ja ngwandre kwin, ye kätä Jehová käikitekä. Kä keta kabre känti ngwian (propina) mikateta nitre sribikä yei.
◼ Hotel.
1) Kwarto ribedre kwäbe mäkwe ye aibe kärädre bätä ñaka ni mada mikadre kübien yete.
2) Kwarto käräbare mäkwe, yete mä ñaka rabai angwane mäkwe mika gare jötrö hotel yei (Mat. 5:37).
3) Jondron mikata tribe ngwankäre ye ribedre angwane mä raba niken ngwena biti mikadreta täte ni mada kräke.
4) Ñaka mrö riadre kwartote nieta ye erere nikwe nuaindre.
5) Mäkwe ngwian (propina) mikate ni sribikä kwartote yei köbö kwatire kwatire te.
6) Mrö, kabe o jondron mada mikateta kwetadre hotel yete, ye nikwe kwetadre debe näre.
7) Ngöbö üai kätä ni töi mike kwin, ye nikwe bämikadre blitadre nitre sribikä hotel yebe ye ngwane. Nikwe ngwandre törö jai, nitre kwati tä nemen hotel yete ye nitre sribikä kätä dimike, ye medenbätä nikwe ja töi mikadre kwin nitre yekrä bätä ngübadre bätärekä ye kwin niaratre kräke.
8) Lista de Hoteles recomendados ye ütiä nuäi köbö kwatire kwatire ye erere tä tikanibätä, akwa ngwian mada biandre arato ye ñaka tä mikani yete. Ngwian kärädre bäri mäi o jondron meden abokän mä ñaka käräbare ja kräke ye mäkwe ñaka ka ngäbiti aune nitre ni Käi känänkä yei mäkwe mika gare jötrö ngwarbe gätä kri yete.
9) Kwarto te mä tädre yete kukwe rabadre bare angwane nitre ni Käi känänkä yei mäkwe mika gare gätä kri yete.
10) Mäkwe hotel ütiä biandre tarjeta de crédito o tarjeta mada yebiti angwane hotel käkwe ngwian diainkä mada mäkän, ne kwe nane mä tädre yete ye ngwane kukwe mada rakadrekä ye ütiä biankäre; akwa mäkwe hotel ütiä biandre täte ye ngwane ngwian ye biainta mäi.
◼ Ja töi jeñebiti sribidre. Nita sribire ja töi jeñebiti ne kwe gätä kri ye rabadre bare kwin ye kätä kä mike bäri juto nibätä (Hech. 20:35). Nire törbadre sribi nuain ye raba ja kä bien Nitre Käkwe Ja Mikani Sribikä käi yekänti. Monsotre kä jämi 16 bititre raba sribire arato, akwa ni mada, rün o meye kwe ye käkwe ngübadrebiti.
[Rekwadro de página 5]
¿Täräkwata döräidi nitre nübaikäre ye nuaindi ño?
Blitadre jötrö ngwarbe ne kwe täräkwata ye döräidre kukwe drieta nikwe ye jökrä känti. Kukwe ne nie raba: “Ñantörö. Kä jökräbiti nunta täräkwata ne döräire nitre nübaikäre. Ne mä kräke. Kukwe mada mikata gare täräkwata nebätä”. Jondron üai bämikata tuare kena yete, aisete mäkwe bian ie ne kwe jondron üai tuadre kwe. Blitadre kä jutobiti. Bämän krüte yebätä täräkwata mada drie raba täräkwata ni nübaikäre yebe.