Köbö 22 marzo yete ja käne nitre nübaidi Jesús Ja Nire Biani Ngwainta Törö jai ye kräke

Kä nete, köbö 22 marzo yete ja käne nitre nübaidi Jesús Ja Nire Biani Ngwainta Törö jai ye kräke. Ni jökrä nübaita nuainne. Bämän krüte yebätä ni raba täräkwata Ni Mikaka Mokre bätä ¡Despertad! driere angwane nuain raba arato. Sabado kena sö abril yebätä nikwe täräkwata döräidi nitre nübaikäre aune ñaka ja tötika Bibliabätä kömikata ye nuaindi. Akwa, nire tö rabadre kukwe mikai gare metre jai angwane, ni raba ja tötika Bibliabätä kömike ben. Täräkwata ye döräidi nitre tä nemen kwati yekänti köböire nita kukwe driere yekänti nitre tä nüne ye nübai raba bäri o ñakare ye ni umbre kukwe drieta jie ngwanka yekwe mikai gare. Ni mräkätre, nitre sribikä nibe o nitre nänkä kwelate nibe, nitre tö kukwe mikai gare jai aune nitre mada gare nie abokän ni tö tuai nüke siba ye nikwe kä tikadre täräbätä jai, bätä täräkwata döräi jatai kenanbe ye ngwane nikwe biandre kati ietre. Jehová aune Jesukwe ni tare krubäte bämikani abokän ngwainta törö jai yebätä ni tö nitre kwati tuai nüke nibe (Juan 3:16; 15:13).