Köbö 2 abril ja käne täräkwata döräidi Jesús ja nire biani Ngwanta Törö jai kräke
1. ¿Ñongwane täräkwata döräidi nitre nübaikäre Jesús ja nire biani Ngwanta Törö jai kräke? ¿Aune ye köböire dreta nemen bare?
1 Köbö 2 nemen 17 abril ye ngwane nikwe nitre jökrä nübai köbö bäri ütiäte kräke: Kristo ja nire biani ni ütiäre Ngwanta Törö jai. Nitre nübaita kä kwatire kwatire te ye nitre kwati käkwe ka ngäbitibarera. Ñodre, Jesús ja nire biani Ngwanta Törö jai köbö ye näire meri iti käkwe ñäkäbare köte sukursalte aune niebare kwe: “Gwä ti nüta gwi aune täräkwata biti nitre nübaita ye kuni tie jukwebätä. Ti tönibi näin, akwa ora nuäi ye ñaka gare tie”. Ora nuäi te nuaindi ye mikata gare täräkwata yebätä ye ni sribikä yete käkwe niebare ie, aune meri ye käkwe niebare: “¡Matare tibike niken Jesús ja nire biani Ngwanta Törö jai yebätä!”.
2. ¿Nitre nübaidre ye ngwane dre niedre?
2 Driedre ño. Köbö bianta braibe täräkwata ye döräikäre kukwe drieta yekänti, ye medenbätä ñaka blitadre raire. Nie raba krörö: “Ñantörö. Tita mä aune mä mräkätre nübaire. Kukwe ütiäte nuainta kä kwatire kwatire te, ye abokän nuaindi kä jökräbiti tibien dominko 17 abril yete [mäkwe täräkwata ye bian]. Köbö ye näire Jesús murie ketani aune ni kökanintari ye köböire kukwe kwin raba nemen ño nikwe ye kädriei arato. Ngwian ñaka käräi. Kä medenkänti aune ora nuäi te rabai bare ye mikata gare täräkwata yebätä”.
3. ¿Dre nuaindre nitre kwati nübaikäre?
3 Konkrekasion nikwe ye käi ere kukwe driekäre angwane, nitre umbre raba täräkwata ye mikatemana ni ñaka gwi ye gwirete, akwa ni mada ie ñaka rabadre tuin yekänti mikadrete. Nitre tuabitita mäkwe, mä mräkätre, nitre nänkä kwelate mäbe, sribi muko, bätä nitre mada gare mäi ye mäkwe nübai. Bämän krüte yebätä täräkwata La Atalaya bätä ¡Despertad! ye drie raba täräkwata ni nübaikrä yebe. Arato, ¿mä raba sribi prekursor ausiliar ye nuainne kukwe driekäre bäri?
4. ¿Ñobätä ni tö ni mada tuai nüke siba Jesús ja nire biani ngwanta törö jai yebätä?
4 ¡Nitre rükai gätä yebätä yei kukwe kwin rabai gare! Jehovakwe ni kökanintari ni tare krubäte kwe yebätä ye kukwe nuai kwetre (Juan 3:16). Gobran Ngöbökwe käkwe kukwe kwin nuaindi ni jökrä kräke ye rabai gare ietre arato (Isa. 65:21-23). Ne madakäre, nitre ye nübaidre ja tötika Bibliabätä ye kärere ni ni käi ükatekä ie, kukwe metre mikakäre gare bäri kwin jai. Nunta orare ne kwe nitre kwati töi bökän käkwe täräkwata ye kadre ngäbiti aune rükadre siba nibe Jesús ja nire biani Ngwanta Törö jai yebätä.