Täräkwata bitinkä yebiti nikwe kukwe driedre kwin

Nikwe täräkwata ükaikrö jerekäbe o kitaikä ye ngwane kukwe kwin ñaka raba nemen bare, yebätä nikwe kukwe driedrebiti. Kwatibebiti ni raba ni mada töi mike kukwe metre ye mike gare jai aune töi mike Jehová käikitekä (Rom. 10:13, 14). Täräkwata bitinkä yebiti nikwe kukwe driedre ño kwin ye mikata gare nete.

• Kä medenkänti kukwe drieta nane nane yekänti ni rikadre kukwe driere angwane, ju medente nitre ñaka gwi yekänti ni raba täräkwata mikete, akwa ñaka mikadrete kä merete ne kwe ñaka jutuadre nitre nänkä ta yei.

• Nita kukwe driere nitre tä nemen kwati yekänti, ñodre, bus ngübata o tren ngübata yekänti angwane, nitre tädre bus o tren ngübare ye tö ñäkäi täräbätä ye nikwe ngwandretari ietre aune nikwe täräkwata ruäre mikadre tuare ietre ne kwe meden rabadre tuin kwin ietre ye diandre kwetre jai.

• Kä medenkänti nita kukwe driere yekänti dän bätäte käi, nitre umbre ngüba käi, clínica o kä mada känti ni rikadre ye ngwane, ni raba täräkwata mikete ruäre nitre tä nemen täkäni yekänti. Ni ji ngwanka jutuadre nie ye ngwane, käne nikwe kä kärädre ie nänkäre gwä. Täräkwata ruäre mikaninante kä yekänti angwane, ñaka mada mikadrete.

• Ni tädre ja mike juto nitre tuabitikäre ye ngwane, kukwe meden raba nemen tuin kwin nitre itire itire ie yebätä nikwe töbikadre. ¿Monsoi tärä? ¿Töta nemen näin kä madakänti? ¿Kä ükadrete bä nuäre jubäre ye tuin kwin ie? Täräkwata känekäne tä nemente nie ye nikwe känändre ne kwe kukwe meden tädrebätä abokän raba dimike ye jänrikadre kräke.

• Ni gwi tö namani kukwe mikai gare jai yebe ni ñaka bliteta sö kabre te abokän ben nikwe blitadreta angwane, täräkwata meden ñaka mikaninte ie ye mikadre tuare ie.