Ni rikadre biare nitre tö kukwe mikai gare jai yekänti

Internet käi nikwe sribebare ye ngwane ja käne, nitre kwati krubäte tä ja tötika Bibliabätä ribere bäri jai Internet yete. Kukwe mrä ükaninte kukwe driekäre ni jökrä ngwärekri ye köböire nitre kwati tö ja tötikai arato. Ja tötika ribeta ye sukursal tä mike gare drekebe. Kukwe juanta jw.org yete angwane, köbö niken köböbube ta yete sukursal tä kukwe ye mike gare nitre umbre konkrekasionte yei. Akwa ruäre ngwane bämän tä niken kabre ta ye ngwane batibe ni Testiko tä nemen ni tö ja tötikai Bibliabätä yekänti mikanina gare nunye. ¿Nikwe dre nuaindre biare nitre ye dimikakäre ne kwe törbadre kukwe mikai gare bäri jai? (Mar. 4:14, 15.)

Nire ñaka nüne konkrekasion tä kukwe driere yekänti abokän törbadre kukwe mikai gare jai angwane, mäkwe biare formulario Sírvase visitar (S-43) yebätä kukwe tika aune mäkwe bian drekebe ngwarbe gätä nuaindita yete ni kukwe konkrekasionte tikaka yei. Biti, ni kukwe tikaka yekwe kukwe ye mikai gare köbö jämi niken köböbu ta ye känenkri konkrekasion mada yete o sukursal ie Congregación nieta tä Internet käi jw.org yete. Ne madakäre, käre nitre umbre rabadre Internet käi nikwe ye mike ñärärä. Nire törbadre ni Testiko tuai nemen jakänti ye mikadre gare ie angwane, rabadre ni känene drekebe ngwarbe tuabitikäre. Aune ni kukwe driekä meden juandre ni ye tuinbiti ye rabadre niken biare känti. Ni ye ñaka kwandre gwi ie angwane, raba kukwe tike täräkwatabätä mikatekäre ie.