¿Ñokänti ni raba ja töi mike Ngöbö aune ni mada tarere?

Kukwe biani Moisés ie ye nikwe mikadre täte ye ribe ñaka nie, akwa kukwe ketebu bäri ütiäte biani nuaindre, ñodre Ngöbö aune ni mada taredre yebrä täbe ütiäte ye ni Ngöbö mikaka täte käkwe nuaindre ie niara tö (Mt 22:37-39). Nikwe Ngöbö aune ni mada taredre ye ñaka tä nemen bare jötrö ngwarbe nie ñakare aune nikwe ja töi mikadre nuainne. ¿Ni raba nuainne ño? Ye abokän nikwe ja tötikadre mantre jetebe Bibliabätä ye ütiäte krubäte. Drebätä nita ñäke yebätä nikwe töbikadretari aune Jehová töi kwin krubäte ye rükai gare nie (Sl 27:4). Ye köböire ni rabai niara tarere bäri aune nikwe töbikai niara erere. Ye tä ni töi mike kukwe biani nuaindre kwe nie ye mike täte, ñodre ni mada taredre bökän (Jn 13:34, 35; 1Jn 5:3). Ja tötika Bibliabätä ye rabadre tuin kwin nie yekäre ani kukwe ketamä mike gare jai.

• Kukwe bämikadre ja töite aune töbikadretaribätä. Nita yete ye bämike ja töite. Dreta nemen bare ye mrusaire, kukwe nuin aune räse. Ja namani ruin ño nitre ie ye bämike ja töite.

  

• Ni raba nuainne bä jene arato. Ni raba ñäke ja dibitibätä o kukwe grababarera ye ni raba kukwe nuin aune miketari ñärärä Bibliabätä. Ni raba ne nuainne arato ni ñan törbadre ñäkäi kapitulo ketare ketarebätä angwane nitre kädrieta Bibliabätä ye itibätä ni raba kukwe mike gare jai o kukwe meden tuin bäri kwin nie yebätä ni raba ñäke. Ñodre, Tärä ni jie ngwankäre ja tötike Kukwe Ngöbökwe yebätä sección 4 aune 16 yekänti ni raba ja tötike Jesús yebätä. Kukwe mada ye abokän nikwe texto ja tötikakäre köbö kwatire kwatire ye kräke kapitulo meden tä dianinkä yebätä ni raba ñäke o kukwe nakaninkä ño jatäri kä jene jene te yebätä ni raba ñäke.

  

• Nikwe ñäkädre Bibliabätä ne kwe kukwe rükadre gare nie. Bäri kwin nikwe ñäkädre kapitulo keteitibebätä köbö kwatire kwatire te aune drebätä nita ñäke yebätä nikwe töbikadretari aune ñan jerekäbe nikwe ñäkädre kapitulo keta kabrebätä mikakäre krüte jai. Drebätä nita ja tötike yebätä nikwe töbikadre. Mapa aune referencias marginales yebätä ni raba ja tötike. Aune kukwe meden ñaka rükadre gare nie yebätä nikwe kukwe mada känändre. Raba ngwane, nita kä denkä nuäi jai ñäkäkäre Bibliabätä ye näre nikwe kä diandrekä jai töbikatarikärebätä.