¿Nire mada nübai raba tikwe?

Kä kwatire kwatire te kukwe ükateba nitre nübaikäre Jesús ja nire biani ngwainta törö jai ye kräke. Aune nitre ye ruäre ñaka gare nie. Akwa ni rabadre nitre gare nie ye nübaire arato. Nitre nübaita yei ni garera ngwane raba ja töi mike bäri niken gätäbätä (yb08–S 11 párr. 3; 14 párr. 1). ¿Ni raba nire nübaire?

• Ni mräkätre

• Nitre ja tötikaka o sribikä nibe

• Nitre nünanka ni bäre

• Nitre tuabitita nikwe, nitre ja tötikaka nibe o nitre ben nikwe ja tötikabarera

Ne madakäre, nitre umbre konkrekasionte käkwe ja mräkätre tibo kukwe ja üairebiti ye nübaidi. Mä tö rabadre ni gare mäi ye nübaire akwa ñaka nüne känime ngwane, ¿mä raba dre nuainne? Ni ye tä nüne yekänti, Jesús ja nire biani ngwainta törö jai ye nuaindi medente aune ora nuäi te ye mäkwe mika gare jai. Yekäre mä rika jw.org NUNBÄTÄ nieta yekänti aune mäkwe clic mika “Conmemoración” nieta ye känti. Köbö ütiäte ye jämi nüke känenkri mä raba töbike nire nübai raba mäkwe yebätä aune mäkwe nuain.