Kukwe ne nuain raba ne kwe gätä nuainta kukwe driekäre rabadre bare kwin

Gätä keta kabre nuainta konkrekasionte ye jondron ütiäte biani Jehovakwe nie aune gätä nuainta kukwe driekäre ye arato. Ye köböire ni raba kukwe kwin nuainne aune ni raba ja tare bämike kwärikwäri (Heb 10:24, 25). Gätä nuainta yete, nitre ñäkäbitita, medente kukwe driei aune orasion nuaindre, kukwe jökrä ye nuadre minuto 5 o 7 näre te. Gätä kukwe driekäre ye nuaindre gätä mada ye bitikäre ngwane, nuaindre bäri jötrö. Nireta ni denkä ye käkwe kukwe ütiäte känändre nitre dimikakäre kukwe driekäre köbö ye näire. Ñodre, ja mräkätre ñaka tä kukwe driere krubäte bämän ngrabare ye tä niken sabadote kukwe driere ngwane, drebätä blitadre köbö ye näire ye ngwandreta törö jötrö ngwarbe ye bäri kwin. ¿Kukwe meden mada madabätä blita raba?

• Kukwe nieta kukwe driekäre tä Kukwe ja jie ngwankäre gätäte Nita Dirire aune Ja Ngwen Ño yebätä.

• Kukwe namani bare bitinkä yebiti blita kömikadre ño.

• Kukwe nieta ni kukwei ötakäre ye ngwane diridre ño.

• Ni iti ñaka Ngöbö mike era jai, jondron nikwite jatäri ye tä mike era jai, ni blitaka kukwe madabiti o ni iti tä iglesia madate abokän ñan gare krubäte tä kukwe niere ye ie ni raba kukwe driere ño.

• Kukwe driedre ño jw.org, aplicación JW Library^® o Biblia yebiti.

• Tärä o video dirikäre bäri yebiti diridre ño.

• Kukwe driedre ño teléfono yebiti, tärä tikadre, kukwe drieta ni jökrä ngwärekri, nitre tuadrebiti o nitre tötikadre ño.

• Nikwe ja ngibiadrebiti ño, nitre tä blite ye ererebätä blitadre, ja ngwandre kwin aune ja töi mikadre kwin o kukwe mada mada yebätä kukwe ngwandreta törö.

• Kukwe ja tötikara keteiti o video keteiti tä täräkwata Ñäkädre kwin täräbätä aune diridre kwin ye kädrie raba.

• Kukwe drie muko nikwe ye ni raba dimike aune mike ño dite.

• Texto tä blite kukwe drie yebätä o kukwe ütiäte namani bare abokän raba ni dimike yebätä blita raba.