Ja tare ye tuani kwetre

YOMARA, Marcelo aune Hiver niaratre nimä ye ja mräkäre aune kä ñan tuin ietre niaratre ye jakwe, tä nüne juta chi Guatemala yekänti. Yomara jatani ja tötike Bibliabätä nitre Testiko ben. Biti ngwai nibu kwe ye jatani ja tötike Bibliabätä arato. Akwa kukwe keteiti nämä nemen bare: Ñäkä ñan nämäne gare ietre kukwe braille yebiti. Aisete nire nämä tötike ye ie nämä nemen ñäkädre párrafo keteitire keteitire aune texto kwatire kwatire yebätä ietre.

Nändre gätäbätä ye ñaka nämä nemen nuäre kräketre. Ju ja ükarakrö bäri no ye nämä nemenkä 40 minuto niaratre kräke, ye medenbätä ñan raba nemen kaibe yete. Aisete ja mräkätre konkrekasionte nämäne kukwe ükete jai ngwankäre gätäbätä. Niaratre nimä ie kukwe bian jatani kädriekäre gätäte bämä ngrabare ngwane, ja mräkätre nämäne dimike ne kwe dre niedre kwetre ye rabadre gare ie ja töite.

Mayo 2019 ye ngwane nitre Testiko jatani gätä nuainne niaratre käite. Ye bätärabe nitre prekursor regular iti gure käkwe ja kwitabare kä yekänti. Nitre gure ne käkwe ja töi mikani ja mräkätre nimä ne kite ñäke aune kukwe tike braille. Akwa ñäkä ñan nämäne gare niaratre ie. Ye medenbätä nikani biblioteca yekänti aune drebiti nitre tötika raba aune ño nitre tötikadre ye känänbare kwetre, niaratrekwe ja kitabare käne kukwe braille yebätä.

Sö nikani braibe ta aune nitre ja mräkäre nimä ye ie ñäkä nämänina gare kukwe braille yebiti, ye käkwe niaratre dimikani bäri ririakäre kukwe ja üairebiti.a Nengwane, Yomara, Marcelo aune Hiver niena prekursor regular, aune Marcelo kädekani siervo ministerial. Niaratre tä kä denkä krubäte jai kukwe ja üaire kräke bämän kratire kratire. Kä ta juto krubäte bätätre ye tä nitre mada töi mike erere nuainne arato.

Ja mräkätre konkrekasionte tä ja tare bämike ja mräkätre nimä ne ie aune tä dimike yebätä niaratre tä debe bien krubäte. “Ja mräkä rababa gare nunye, ye ngwane niaratre käkwe ja tare metre bämikani nunye”, nieta Yomarakwe. Marcelo tä niere arato: “Ja ketamuko kwin krubäte tä nunkwe konkrekasionte. Aune ja mräkätre kä jökräbiti tibien tä ja tarere metre ye ngätäite nunta arato”. Yomara aune ngwai kwe tä kä tibien ne kwitai bä nuäre ye ngübare ngäbiti kisere (Sal. 37:10, 11; Is. 35:5).