Mä ja ngöka ñöte bitikäre mäkwe nän ‘jankunu’ Jesús ben

1, 2. ¿Ni iti tä ja ngökö ñöte ye ngwane, tä nemen nüne ño?

NI ITI tä ja ngökö ñöte ngwane, tärä nemen juta Jehovakwe yete. Aune ye käita nemen juto nibätä. Nire tä kukwe ne erere nuainne ye tä nemen ja kete kwin Jehovabe aune ni salmo tikaka David ye erere töita: “Mäta nire den jai aune mäta mike nökrö ja ken ni yebätä kätä juto, ne kwe niara nünandre jubäre ju mäkwe yete [Jehová]” (Sal. 65:4).

² Jehová ñan tä ni jökrä tuenmetre nemen ju kwe yekänti jubäre. Rababa gare nie kukwe ja tötikara känebätä erere, nire tä töi bökänbiti Jehová mike täte ye aibe ken niara tä nökrö (Sant. 4:8). Nire tä ja denkä mento aune ja ngökö ñöte ye tä nemen ja kete kwin krubäte Jehovabe. Aune niara tä kukwe ne käbämike nitre yei: “Tikwe jondron kwin biain krubäte aune munkwe ñaka jondron medei nikadi jire rabai gare munye” (Mal. 3:10; Jer. 17:​7, 8).

3. ¿Ni kristiano ja dianinkä mento aune ja ngökani ñöte ye ie dre tä nuaindre? (Eclesiastés 5:​4, 5).

³ Nita ja ngökö ñöte ye abokän kukwe kena nuainta nikwe. Ni kristiano jökrä tö nünain ja diankata mento Jehovakrä ye ererebätä aune bärira nita ja tuin kukwe tare ben aune tödeka nikwe nuateta ngwane (ñäkädre Eclesiastés 5:​4, 5 yebätä).a Ni jökrä rabadre ja di ngwen ja ngwankäre metre Jesús erere aune kukwe biani kwe ye mikakäre täte (Mat. 28:​19, 20; 1 Ped. 2:21). Kukwe ja tötikara ne käkwe ni dimikai.

MÄ NUADRETE AUNE KUKWE TARE YEBITI TA MÄKWE JA NGWANDRE METRE ‘JANKUNU’ JESÚS ERERE

4. ¿Nikwe ja tuai kukwe tare ben niebare Jesukwe ye ngwane, dre gäräbare kwe? (Lucas 9:23).

⁴ Nikwe ja ngökai ñöte ye bitikäre ni rabai nüne kwin aune jäme ye ñaka nütüdre. Jesús ara käkwe niebare “köbö kwatirekwatire ja kwata raba ruentari tare ñakare ie” (ñäkädre Lucas 9:23 yebätä). ¿Nikwe ja tare nikadi käre ai gäräbare kwe? Ñakare. Ñakare aune, kukwe kwin rabai bare ni kräke akwa nikwe ja tuadi kukwe tare ben arato, aune kukwe ruäre ye abokän bäri tare (2 Tim. 3:12).

5. ¿Nire tä kukwe ñan nuäre nuainne Gobran Ngöbökwe mikakäre käne ye ie Jesukwe dre kwin käbämikani?

⁵ Mäkwe ja tuanina kukwe tare ben, mä mräkätre ja mikani mä rüere o mäkwe kukwe ñan nuäre nuainbare gobran Ngöbökwe mikakäre käne (Mat. 6:33). Ye erere ngwane, mäta kukwe nuainne Jehová kräke ye ñaka käi kwitekä jire chi jabiti tädre gare mäi (Heb. 6:10). Kukwe niebare Jesukwe ye metre mäkwe tuanina raba ruin nunye. Jesús niebare: “Ni ño kwa käkwe ja jue, ja eteba, ja ngwai, ja meye, ja rün, ja merie, ja monsoi, ja käi tuadremetre ti köböite, angwane ti kukwe ja nire kräke köböite, bä gre ketarike mada rabadre ni nekwe kä tibien nebätä, ju, eteba, ngwai, meye, monsoi, kä, angwane kä mrä kwainta, ja nire käre rabai ni nekwe” (Mar. 10:​29, 30, NGT). Kukwe kwin Jehová tä mike nemen bare mä kräke ye bäri kwin mäkwe kukwe ñan nuäre tuanimetre ye kräke (Sal. 37:4).

6. ¿“Kukwe käme ie ni tö” yebe ñobätä nikwe ja tuai jankunu nita ja ngökö ñöte ye bitikäre?

⁶ Mä ja ngökai ñöte ye bitikäre mäkwe ja di ngwandre jankunu ja tuakäre jondron jökrä kämekäme ie ni töta nemen yebätä (1 Juan 2:16). Akwa yebiti ta mä abokän töi ngite jankunu. Ja raba nemen ruin mäi ruäre ngwane, apóstol Pablo ye erere, niara niebare: “Ti töite nete abko Kukwe Biani Ngöbökwe Moiséye ye tä nebe tuen kuin nuäre nuendre tie, akwa tibtä nete abko kukweta nakenkä mda mda käta ti töi miketa bä jene, ye abko kukwe käme tä ti töibtä, ye mdeita nebe tie abko käta rüre jändrän kuin ti tö nuein yebe, aisete ni ngite kä teri ñan raba kwäräbere au, ye kwrere jire tita kukwe kämekäme kisete” (Rom. 7:​22, 23). Mäta ja tuin kukwe tare ben ye ngwane mä raba nemen töbike krubäte. Akwa mäkwe ja dianinkä mento Jehová kräke yebätä mäkwe töbikai, ye mä dimikai ja tuin kukwebiti mä nuateta yebe. Ni ja dianinkä mento Jehová kräke ye köböire tä nemen bäri nuäre ni kräke ja tuakäre kukwe tare yebe. ¿Ñobätä nita ye niere?

7. ¿Nita ja denkä mento Jehová kräke ye tä ni dimike ño ja ngwen metre ie?

⁷ Ni iti tä ja denkä mento Jehová kräke, ye tä dre ie töta nemen ye tuenmetre. ¿Ye dre gärätä? Dre ie ni töta nemen jakrä abokän tuin käme Jehovai ye ni ñaka tä kai ngäbiti jire chi (Mat. 16:24). Aisete, nita ja tuin kukwe tare ben ngwane, nikwe ñaka töbikai nikwe dre nuaindi yebätä. Ñakare aune kukwe keteitibe nikwe nuaindi: ni töi täi ja ngwanbätä metre Jehovai aune kä tuai jutobätä. Nita ja denkä mento Jehová kräke yebiti, nita ja töi mike ñaka kukwe mada kain ngäbiti jire. Aune nikwe niedi Job erere: “Tikwe ja ngwain metre” (Job 27:5).

8. ¿Nikwe ja dianinkä mento Jehová kräke yebätä töbikadretari ye köböire nikwe ja ngwain ño ni nuateta ye ngwane?

⁸ Nikwe ja kukwei kitaninkä Jehovai yebätä nikwe töbikaitari köböire rabai bäri nuäre ni kräke ja tuakäre kukwe tä ni nuinte yebe. Ñodre, nitre ja mäkäninante ye ie nikwe ñaka kukwe nuäre o kukwe mane mane niedre. Nikwe ja dianinkä mento ye ngwane nikwe ñaka kukwe ye nuaindi jire chi nikwe käbämikani. Nikwe ye erere nuaindi ye köböire ni ñaka rakai kukwe blo yei aune rabai nuäre ni kräke kukwe ye diankakäre ja brukwäte aune rabai nuäre ni kräke ja tuakäre kukwe yebe. “Kukwe blo yebätä” ni täi mobe (Prov. 4:​14, 15).

9. ¿Nikwe ja dianinkä mento Jehová kräke yebätä nikwe töbikaitari, ye ñobätä ni dimikai Gobran Ngöbökwe mike nuaindre käne jai?

⁹ Sribi driedre nie, köböite ni ñan rabadre kwen gätä jökräbätä ye ngwane, nikwe dre dian nuaindre jai yebätä nikwe töbikabarera. Aisete nikwe ñaka sribi ye kain ngäbiti, ñobätä ñan aune nikwe sribi ye kain ngäbiti biti nikwe Gobran Ngöbökwe mikadre käne ye ni ñan täi nütüre. Ñakare aune, Jesús erere ni tö kä tuai juto Jehovabätä, ye medenbätä dre ñaka tuin kwin Ngöböi ye ni ñaka kain ngäbiti jire (Mat. 4:10; Juan 8:29).

10. ¿Kukwe meden ütiäte nuaindre nikwe abokän käkwe ni dimikai ja ngwen jankunu Jesús erere?

¹⁰ Metrere, kukwe tare aune ni nuateta yebiti nita bämike nita ja ngwen metre Jesuye. Aune rabadre bare nie yekäre Jehová ni dimikai käbämikata kwe nie, Bibliabätä tä kukwe ne käbämike nie: “Ngöböta ja kukwei mike täte amne, tä juto biare mun die mike, aisete kukwe bäri tare käkwe mun nötadre temen, ye ngäniene munkwe kwäräbedre ño abko Ngöbökwe mikadi gare munye, mun rabadre nünenkä dite abkokäre” (1 Cor. 10:13).

MÄKWE NÄNDI ÑO JANKUNU JESUBE

11. ¿Kukwe meden bäri ütiäte ni raba nuainne nänkäre jankunu Jesús ben? (Üai mikadre ñärärä).

¹¹ Jesús nämäne Jehová mike täte ja brukwä tätebiti aune orasion yekwe niara dimikani nökrö bäri ken (Luc. 6:12). Nita ja ngökö ñöte ye bitikäre, kukwe keteiti ütiäte krubäte raba ni dimike nänkäre jankunu Jesús ben yekäre nikwe ja di ngwandre kukwe ruäre nuainne, ja kite kukwe ruärebätä rökrakäre bäri Jehová ken. Biblia tä kukwe ne niere: “Nikwe nünandre ño Ngöbö ngwärekri nena gare nie, ye kwrere nikwe nünandre” (Filip. 3:16). Ja mräkätre käkwe kukwe nuainbare sribikäre bäri Jehová ye nikwe kukwe nuai ruäre ngwane. Ñodre janamane Kwela nitre Gobran Ngöbökwe kukwe Driekä kräke yebätä, mada abokän ja kwitani kä ruäre känti kukwe driekäre bäri. Ne erere mä raba nuainne ngwane, ¡mäkwe nuain! Ni Jehová mikaka täte tä käre ja di ngwen kukwe driekäre bäri (Hech. 16:9). Ye erere ñaka raba nemen bare mäi ngwane, mä ñaka ütiäte o nitre mada bäri ütiäte mä kräke mäkwe ñaka nütü. Nita kä ngwen nüke jai ye abokän bäri ütiäte (Mat. 10:22). Ni raba dre nuainne aune dre nuain gare nie ye ererebiti nita sribire Jehová kräke ngwane, kätä nemen jutobätä ye ngwandre törö jai. Ye abokän kukwe keteiti bäri ütiäte nänkäre Jesús jiebiti, ja ngökanina ñöte ye bitikäre (Sal. 26:1).

12, 13. ¿Kä ñan tärä kite juto nibätä kukwe ja üaire nuainkäre ngwane dre nuain raba? (1 Corintios 9:​16, 17; recuadro “Niadre jankunu” ye mikadre ñärärä).

¹² Mä ja ngökani ñöte ye bitikäre mäta kukwe ja erebe niere orasionte, mäta ñäke Bibliabätä aune ja tötike ye ngwane, mä ñaka tä kä ngwen juto Jehovabätä ruin mäi, yebätä Jehová ñan mä dimike üai demebiti mäkwe ñaka nütü. Ni ngite ye medenbätä ruäre ngwane nita nemen di nekä. Ye erere tä nemen bare mäbätä ngwane, mäkwe ja kita Pablo yebätä. Pablo nämäne ja di ngwen täte ja ngwankäre Jesús erere akwa ruäre ngwane, nämäne ja di ribere (ñäkädre 1 Corintios 9:​16, 17 yebätä). Apóstol Pablo kukwe ne tikani: “Sribi mikani ti kisete Ngöbökwe, erere tita nuene, aisete tita ütiä kärere ñakare, ñobtä ñan angwane ti sribikä Kristokwe jirekäbe aibe”. Yebiti nüke gare metre nie ja nämäne nemen ruin ño Pablo ie yebiti ta, töi nämäne kwatibe Gobran Ngöbökwe ye mike nemen bare.

¹³ Ye erere arato, ja ruin ño mäi ye ñan aibätä mäkwe kukwe dian nuaindre jai, ñakare aune mäkwe ja töi mika kwatibe kukwe kwin nuainbätä, mä ñan töta nemen nuainbätä yebiti ta. Ye köböire kä näin ta ngwane, mä töi jatai nuainbätä. Mäkwe kukwe ükaite jai ja tötikakäre kaibe orasion nuainkäre, nänkäre gätäbätä aune kukwe driekäre ye käkwe mä dimikai. Ne madakäre, mäta ja di ngwen jankunu ye jutuen ja mräkätre konkrekasionte ie ngwane, yekwe niaratre dimikai (1 Tes. 5:11).

“JA TRÄ TUADRE JANKUNU”

14. ¿Drebätä töbikadre ruäre ngwane aune ñobätä? (2 Corintios 13:5).

¹⁴ Nita ja ngökö ñöte ye bitikäre, nita nüne ño, nita ja ngwen ño yebätä töbikadre ruäre ngwane ye ütiäte krubäte (ñäkädre 2 Corintios 13:5 yebätä). Nita orare, ñäke Bibliabätä, ja tötikebätä, kwen gätäbätä aune kukwe driere yebätä töbikadretari. Nikwe kukwe jökrä ne nuaindi köböire ni täi kukwe ja üaire ye nuainne kwin. Ni raba kukwe ne kwrere ngwentari jai: “¿Kukwe ütiäte Bibliabätä driedre ño ye gare tie? ¿Ti raba dre nuainne kukwe drie ye käi ngwankäre bäri juto jabätä? ¿Tita orare yete tita kukwe niere metre aune tita tö ngwen Jehovai tita bämike? ¿Ti raba dre nuainne ñaka gätä juankäre jire jabäre? ¿Ti raba dre nuainne gätä ye kukwe nuakäre kwin?”.

15, 16. ¿Dre raba nemen gare nie Robertbätä?

¹⁵ Kukwe ruärebätä ñan tä nemen nuäre ni kräke ja gobrainkäre yebätä nikwe töbikadretari ye ütiäte krubäte aune ñobätä nuaindre ye ani mike gare jai. Ja mräkä iti kädekata Robert tä niere: “Kä nämä 20 tibiti ngwane, ti nämä sribire köbö ruäre aibe te. Bati sribi bitikäre sribi muko iti tikwe merire käkwe ti nübaiba ja gwirete, ‘nun kä ngwain juto jabätä’ aune nitre ñaka gwi nieba kwe tie. Kenanbe ti rababa kukwe mika jabiti, akwa biti mada ti ñakare nieba kwatibe ie, ñobätä tikwe ñakare nieba ie ye tikwe mikaba gare ie”. Robert käkwe ja gobrainbare kukwe yebätä. Akwa niara ara ie nükani gare, ñaka nuainbare kwin kwe, “Ñobätä ñan aune ñaka, ñakare niebare bengwairebe kwe Josekwe nuainbare Potifar muko ben erere (Gén. 39:​7-9). Ñan rabai ribi ti kräke tikwe nütüba, ye medenbätä rükaba gare tie tikwe ja ketadre bäri kwin Jehovabe”.

¹⁶ Mä nuadrete aune ñan rabadre nuäre mä kräke ñakare niekäre ye ngwane, Robert kukwe nuainbare ye erere mä raba ja töi mike nuainne. Ñobätä ñan namani nuäre mä kräke ye mäkwe ngwantari jai. Aune rüka gare mäi ngwane, mä ñaka ja di ngwan nekä. Drebätä ñan namani nuäre mä kräke ja gobrainkäre niena gare mäi ye bäri kwin. Aisete mäkwe ora Jehovai aune mä dimikadre kwe mike täte ye mäkwe ribe ie (Sal. 139:​23, 24).

17. ¿Jehová kä mikata ño nita ja ngwen metre ye ngwane?

¹⁷ Akwa kukwe ye ñan aibe namani bare Robertbätä. Tä kukwe ne mike gare: “Sribi muko tikwe ti nübaiba akwa tikwe ñaka kä ngäbitiba ie yebätä ‘kwin krubäte’ nie kwe tie. Dre nie nämä kwe ye tikwe ngwantariba ie. Nieba kwe, sribikä mada testiko nämä nete nämä niere, nitre testiko ye abokän tä ja ngwen käme arato, aisete kukwe käme nuain raba kwetre ngwane tätre nuainne jötrö ngwarbe, yebätä ja töi mikani kwe ti nuinte. ¡Käta juto krubäte tibätä, ñobätä ñan aune tikwe ñaka Jehová kä mikani käme!”.

18. ¿Nita ja ngökö ñöte ye bitikäre ni töi täi kwatibe dre nuainbätä? (Recuadro “Kukwe ketebu ütiäte” ye mikadre ñärärä).

¹⁸ Ja diankata mento Jehová kräke aune ja ngökata ñöte yebiti ni tö niara kä mikai deme nita bämike ie. Ruäre ngwane nita ja tuin kukwe tare ben o ni nuateta yebe ñan nuäre ja tuakäre ye gare Jehovai. Aune nita ja di ngwen kukwe jökrä yebiti ta ja ngwen metre ie ye tuin ie aune kukwe kwin mikai nemen bare kwe ni kräke. Nikwe ja tuai kukwe tare ben akwa niarakwe ni dimikai kukwe kwin nuainkäre (Luc. 11:​11-13). Nikwe ja ngökai ñöte ye bitikäre Jehovakwe ni dimikai näin jankunu Jesús jiebiti.