Nitre ja mikaka ngite ye tuin ño Jehovai ye konkrekasion tä bämike

1. ¿Dre ie Jehová tö?

NIKWE dre dre nuaindre ye Jehovakwe ni tuanimetre den akwle jai. Aune köbö kwatire kwatire nita kukwe den nuaindre jai akwa ruäre abokän ñan ütiäte mada abokän ütiäte krubäte. Kukwe bäri ütiäte dianta nikwe jai ye abokän ja diankata mento Jehová kräke ye ngwane, nita nemen juta Jehovakwe yete. Ni jökrä käkwe kukwe ye diandre nuaindre jai ye ie Jehová tö. ¿Ñobätä? Ñobätä ñan aune ni jökrä tare kwe yebätä aune kukwe kwin tädre nikwe ye niara tö. Nikwe ja ketadre ben kä jutobiti aune ni rabadre nünandre käre ie tö (Deut. 30:​19, 20; Gál. 6:​7, 8).

2. ¿Ni ja mikaka ngite krubäte jämi ja töi kwite aune kukwe blo tuenmetre yekwe dre nuaindre ie Jehová? (1 Juan 2:1).

² Nikwe Jehová mikadre täte ja dibiti ye ña ribere nie ñakare aune ni tö dre nuain ye tä gare ni itire itire ie. Akwa, ¿ni iti konkrekasionte käkwe ja mikadre ngite krubäte ye ngwane, dre nuaindre? Ñaka ja töi kwitai aune kukwe blo tuainmetre kwe ngwane diandrekä mento konkrekasionbätä (1 Cor. 5:13). Ni ja mikaka ngite yekwe ja töi kwitadre aune rökradreta Jehová ken yebätä töita kwatibe. Monso kwe juani kwe ja nire bien ni kökatarikäre nekwe ni ja mikaka ngite yekwe ja töi kwite aune kukwe blo tuenmetre ngwane, niara raba ngite kite ta biti (ñäkädre 1 Juan 2:1 yebätä). Ni Rün ni tarekä krubäte ye tä juto biare ni ja mikaka ngite ye töi miketa nökröta ja ken aune dimike ja töi kwite (Zac. 1:3; Rom. 2:4; Sant. 4:8).

3. ¿Dre rabai gare nie kukwe ja tötikara nebätä?

³ Kukwe käme aune ni kukwe käme nuainkä ye Jehová tä mike tuin ño jai ye erere nikwe mikadre tuin jai yei tö. Kukwe ja tötikara ne käkwe ni dimikai ye nuainne. Kena, siklo kena yete ni iti nämäne ja mikaka ngite krubäte konkrekasion Corinto, yebätä dre nuainbare ye rabai gare nie. Biti ni iti ja mikani ngite yekwe kukwe blo tuanimetre aune ja töi kwitani yebätä Pablokwe kukwe biani nuaindre yebätä ja kitai. Mrä mada, ni ja mikaka ngite krubäte ye Jehová tä mike tuin ño jai ye rabai gare nie.

JA MIKANI NGITE KRUBÄTE YE ÜKANINTE ÑO SIKLO KENA YETE

4. ¿Dre nämäne nakainkä konkrekasion Corinto yete? (1 Corintios 5:​1, 2).

⁴ (Ñäkädre 1 Corintios 5:​1, 2 yebätä). Pablo nikani bämäkäre sribi misionero nuainne ngwane, konkrekasion Corinto krire ükaninte yete kukwe käme nuain nämene namani gare ie. Ye abokän: ja mräkä iti konkrekasionte nämäne nemen meyekrä kwe ben. Kukwe nämäne nakainkä yebätä Pablokwe niebare krörö “nitre tötekaka ñakare Jesubiti kätä kukwe käme diän diän ye kwrere nuene ñakare jire abko erere nuenta mun ngätäite yete”. Konkrekasion nämäne kukwe käme nämäne nakainkä ye kain ngäbiti akwa ye ñan aibe käi nämäne nemen jutobätä arato. Ni töi ngite yebätä kukwe käme nuain nämäne ye nämäne nüke gare ie aune ni mikaka tuin bobre jai yebätä nütü nämäne ni kristiano ruäre yekwe nie raba. Akwa metrere kukwe käme ye kräke Jehová brukwäta yebätä ñaka kukwe käme ye tuenmetre nemen bare juta kwe yete. Metrere ni ja ngwanka käme nämäne kukwe blo blo nuainne ne nämäne konkrekasion ye mike käme. Ni Kristiano mada ye töi mika nämäne blo kwe arato. Ye ngwane, ¿Pablo kukwe meden biani ietre kukwe ye ükatekäre?

5. ¿Pablo dre tikabare konkrekasion ie aune kukwe niebare kwe yebiti, dre gärä nämäne kwe? (1 Corintios 5:13; üai mikadre ñärärä).

⁵ (Ñäkädre 1 Corintios 5:13 yebätä). Ni ja ngwanka käme ñaka ja töi kwite aune kukwe blo tuenmetre ye diandrekä mento konkrekasionte ye Pablo niebare üai deme köböire. Akwa, ¿ni kristiano ja ngwanka metre yekwe mikadre tuin ño jai niebare kwe? Niaratre ye ñaka rabadre ja kete ben aune mröre jire ben Pablo niebare ietre (1 Cor. 5:11). Nita mröre ni iti ben ye ngwane nita niken blite ben. Ye medenbätä ni iti ja ngwanka käme yebe ñaka ja ketadre ja mräkätre yekwe niebare Pablokwe. Ye köböire ñaka konkrekasion ye töi mikai kukwe blo ye nuainne kwe siba (1 Cor. 5:​5-7). Ne madakäre ni kukwe käme nuainkä ye käkwe Jehová moto mikani ulire aune kukwe blo nuainbare kwe yebätä rabadre ja gaire aune ye köböire töi raba ja töi kwitabätä aune kukwe blo ye tuenmetre yebätä Pablokwe kukwe ye niebare arato.

6. ¿Ni ja mikaka ngite bätä konkrekasion ye käkwe kukwe juani Pablokwe ye kani ngäbiti ño?

⁶ Pablokwe kukwe tikani konkrekasion Corinto ie ye bitikäre, ja mräkätre ye käkwe kukwe ye kain ngäbiti ño yebätä namani töbike. Kä nikani ruäre ta ye bitikäre, Tito käkwe kukwe ütiäte niebare ie ye abokän: ja mräkätre käkwe kukwe biani Pablokwe ye kani ngäbiti aune mikani täte niebare kwe (2 Cor. 7:​6, 7). Ne madakäre, Pablo tärä juani ye bitikäre, ni ja ngwanka käme yekwe kukwe blo ye tuanimetre aune ja töi ükaninte kwe. Aune ñan namanina ja ngwen käme bätä jatani kukwe metre Jehovakwe ye nuainne niebare kwe (2 Cor. 7:​8-11). ¿Ye bitikäre Pablokwe dre biandi nuaindre konkrekasionte ie mada?

NI JA MIKAKA NGITE YE MIKAI TUIN ÑO JAI KONKREKASIONKWE

7. ¿Ni kukwe käme nuainkä dianinkä konkrekasionte ye köböire dre kwin namani bare? (2 Corintios 2:​5-8).

⁷ (Ñäkädre 2 Corintios 2:​5-8 yebätä). Pablo niebare: “Ni ja mikaka ngite, btä mun kwati käkwe mäträbare krubäte, ye abko namanina dbe”. Ye abokän, ni ja ngwanka käme ye käkwe kukwe blo tuaimetre aune ja töi kwitai kwe yekäre mäträbarebätä aune ye erere nuainbarera kwe: ja töi kwitani aune kukwe blo tuanimetre kwe (Heb. 12:11).

8. ¿Kä nikani ta ye bitikäre dre nuain mananbare konkrekasion ie Pablokwe?

⁸ Ye bitikäre, ja mräkä ja mikaka ngite ye kräke ja töi mikadre ño ye Pablokwe niebare: “Aisete mtare kukwe btä ja mikani ngite kwe, ye munkwe dianka bti ta amne, munkwe die mikata amne kä mikata nuäre btä munkwe”. Arato niebare kwe: “Munta ni ja mikaka ngite ye tarere kri abko munkwe bä mikata tuadre ie abko ti tö ribei”. Nemen gare nie erere Pablo ñan tö namani ni ja mikaka ngite ye rükadreta jerekäbe konkrekasionte ye aibe ie, ñakare aune ja mräkätre nämäne blite aune ja ngwen ño yebiti ni ja mikaka ngite yebiti ngite kitanina ta biti kwe ye bämikadre kwe ie ye ie Pablo tö namani. Ye köböire ni ja mikaka ngite ye kani ngäbiti kä jutobiti konkrekasionkwe ye rabadre gare ie yekäre.

9. ¿Ñobätä ñan namani nuäre ja mräkätre ruäre kräke ngite kitakäre ta ni ja mikaka ngite käkwe ja töi kwitani yebiti?

⁹ ¿Ni ja mikaka ngite käkwe ja töi kwitani aune kukwe blo tuanimetre, jataninta konkrekasionte ye namani nuäre ka ngäbitikäre ja mräkätre kräke? Metrere Biblia ñan kukwe niere yebätä, akwa namani bare raba ruin nie. Ñobätä ñan aune ni ja mikaka ngite käme ne käkwe konkrekasion mikani ja tare nike aune ja mräkätre ruäre käkwe ja tare nikani köböite raba ruin nie. Aisete ñan namani nuäre kräketre ka ngäbitikäre, ne madakäre ni ja mikaka ngite käme krubäte ne kadre ngäbitita kä jutobiti aune ja tare bämikadre ie ñan namani tuin debe ja mräkätre ie ñobätä ñan aune ja mräkätre nämäne ja di ngwen kukwe Jehovakwe mike täte akwa ni ja mikaka ngite ne käkwe ñaka nuainbare yebätä (Lucas 15:​28-30 mikadre ñärärä). Akwa, ¿ñobätä ütiäte konkrekasionkwe ni ja mikaka ngite jataninta Jehová kokwäre ye kadre ngäbiti kwin?

10, 11. ¿Ni ja mikaka ngite käkwe ja töi kwitanina yebiti ta nitre umbre ñaka ngite kitadre akräke dre rakadrekä?

¹⁰ ¿Ni umbre konkrekasionte ye ñaka ni ja mikaka ngite käkwe ja töi kwitani ye kadre ngäbiti konkrekasionte o ja mräkätre konkrekasionte ñaka kadre ngäbiti kä jutobiti akräke dre raba nemen bare? Ni ja mikaka ngite käkwe ja töi kwitani ye moto raba nemen “ulire dikaro”. Aune ye ngwane, ja rabadre ruin ngwarbe ie aune ñan tö rabadre ja di ngwanbätä ja ketakäreta Jehovabe.

¹¹ Akwa ye ñan ngöräbe. Ja mräkätre konkrekasionte ye ñaka ni ja mikaka ngite ja töi kwitani ye kadre ngäbiti o ngite kitadre ta biti ngwane, niaratre ye nämäne ja kete ño Jehovabe ye raba nemen kukwe tare te. ¿Ñobätä? Ñobätä ñan aune Jehová ni mikaka tuin bobre jai aune ngite kitaka ta nibiti ye erere ñaka ja ngwandre kwetre ñakare aune Satana töi käme ni mikaka ja tare nike ye erere ja ngwandre kwetre. Ni ja mikaka ngite ja töi kwitani ye satana tö namani dikainkä mento, ye erere rabadre bare niaratre ye köböite (2 Cor. 2:​10, 11; Efes. 4:27).

12. ¿Nitre konkrekasionte yekwe ja töi mikadre ño Jehová erere?

¹² ¿Konkrekasion raba ja ngwen ño Jehová töi erere aune ñaka satana ye erere? Ni ja mikaka ngite ja töi kwitani ye Jehová nämäne mike tuin ño jai ye erere mikadre tuin kwetre jai. Nitre kukwe tikaka kirabe käkwe kukwe ne niebare Jehovabätä. Ñodre David niebare: “Mä abokän töi kwin aune mätä juto biare ngite juankäre ta” (Sal. 86:5). Miqueas ne niebare: “¿Ngöbö meden mä erere, abokän ngite kite tä nitrebiti [ . . . ]?” (Miq. 7:18). Ne madakäre, Isaías niebare: “Ni kukwe käme nuainkä käkwe ji blo tuanemetre aune ni käme käkwe ja töi kwitadre; jatadreta Jehová kokwäre, niarakwe mikai tuin bobre jai, jatadreta Ngöbö nikwe kokwäre, ñobätä ñan aune niarakwe ngite juain tabiti töi kwinbiti” (Is. 55:7).

13. ¿Ni iti ja mikani ngite kädekaninta jötrö ngwarbe konkrekasionte ye ñobätä namani kwin? (Recuadro “¿Ño ngwane ni iti Corinto ye kädekaninte kristiano?” mikadre ñärärä).

¹³ Ja mräkätre Corinto ye käkwe ni ja mikaka ngite ja töi kwitani ye kadre ngäbitita kä jutobiti, taredre kwetre yebiti Jehová töi ño ye erere nämenentre ja ngwen bämikadre kwe. Ni ja mikaka ngite yebiti ta ngite kitadre ta kwetre ye ngwane, nämäne ja mike “täte jire jökrä” Pablo niebare (2 Cor. 2:9). Kä nikani braibe ta ni ye dianinkä mento konkrekasionbätä akwa mäträbarebätä ye käkwe dimikani ja töi kwite aune kukwe blo tuenmetre. Aisete, nitre umbre käkwe kädekaninta jötrö biarebe ni kristiano erere konkrekasionte.

JEHOVATA JA NGWEN ÑO YEBÄTÄ DRE NEMEN GARE NIE

14, 15. Konkrekasion Corinto yete ni iti nämäne ja mike ngite krubäte ye ükaninte ño ¿yebätä dre nemen gare nie? (2 Pedro 3:9; üai mikadre ñärärä).

¹⁴ Kukwe namani bare Corinto ye Jehovakwe “tikani ni töi tikakrä” (Rom. 15:4). Nebiti nemen gare nie kukwe jökrä blo blo käme nuainta juta kwe yete ye niara ñaka tuenmetre. Jehová ye ni mikaka tuin bobre jai ye medenbätä ni ja mikaka ngite käme ye tä tuenmetre konkrekasionte yete, ye nitre ruäre tä nütüre akwa ye ñaka metre. Jehová ye ni mikaka tuin bobre jai metrere, akwa ñaka kukwe blo blo ye tuenmetre nemen bare aune kukwe biani ja jie ngwankäre kwe nie dre kwin aune dre käme yebätä ye ñaka kwite jire (Jud. 4). Ne madakäre, ni ja ngwanka käme ye ñaka ja töi kwitadre ngwane niarakwe ñaka tuanmetre konkrekasion yete ñobätä ñan aune konkrekasion jökrä mikadre kukwe kri te kwe (Prov. 13:20; 1 Cor. 15:33).

¹⁵ Kukwe namani bare konkrekasion Corinto yebiti nemen gare nie Jehová ñaka tö ni jire iti gaite. Metrere kukwe ñokwäbätä ni rabadre kwäre ie niara tö. Aune nire tä ja töi kwite aune kukwe blo tuenmetre bätä tä ja di ngwen ja ketakäreta ben ye niarata mike tuin bobre jai aune tä nemen ruentari tare ie (Ezeq. 33:11; ñäkädre 2 Pedro 3:9 yebätä). Ye medenbätä, ja mräkä iti ja mikani ngite konkrekasion Corinto ye käkwe ja töi kwitani aune kukwe blo tuanimetre ye ngwane, konkrekasion yekwe ngite kitadre ta biti aune kadre ngäbitita konkrekasionte ye Jehovakwe ribebare Pablo yebiti.

16. Ja mika nämäne ngite krubäte konkrekasion Corinto yete ye ükaninte ño ¿yebätä mata töbike ngwane dre nemen gare mai Jehovabätä?

¹⁶ Kukwe nakaninkä konkrekasion Corinto yete yebätä töbikatarita ngwane, Jehová yekwe ni tare, kukwe ükatekä metre aune ja ngwanka metre ye tä nemen gare nie (Sal. 33:5). ¿Metrere Jehová töi kwin keta kabre ye tä ni töi mike jankunu niara käi kitekä ñan ererea? Ni kä nebätä jökrä töi ngite aisete, niarakwe ngite kitadre nibiti ta ye ribeta jai. Ni kökanintari Jehovakwe ye köböire ngite kita raba nibiti ta, yebätä nita debe bien ie aune nire tä mike täte ye tä tarere krubäte aune tö kukwe kwin tuai nemen bare kräke. Kukwe ne tä ni töi mike jäme.

17. ¿Kukwe ja tötikara ja känenkäre yebätä dre rabai gare nie?

¹⁷ ¿Nengwane kukwe ükateta ño? Ni iti ja mikadre ngite krubäte ye ngwane ¿ni umbre konkrekasionte raba ja tare bämike ño Jehová erere aune ni ja mikaka ngite dimike ja töi kwite? ¿Nitre umbre konkrekasionte tä ja töi mike ni ja mikaka ngite ye denkä konkrekasionte o kädeketa konkrekasionte ngwane nikwe ja töi mikadre ño? Kukwe ngwantarita ne nikwe mikai gare jai kukwe ja tötikara ja känenkäre yebätä.