Ni ngite diankata konkrekasionte ye dimika raba ño

1, 2. a) ¿Ni ja mikaka ngite ñan ja töi kwite ye tuin ño Jehovai? b) ¿Dre ie Jehová tö?

JA NGWANTA käme ye Jehová ñaka kai ngäbiti (Sal. 5:​4-6). Kukwe biani kwe nie Bibliabätä ja jie ngwankäre ye nikwe mikadre ütiäte aune mikadre täte ye ie niara tö. Metrere, nikwe kukwe nuaindi kwin metre ye ñan ngübare nibätä ñobätä ñan aune ni töi ngite ye gare ie yebätä (Sal. 130: 3, 4). Akwa “ni ye abko ni ngututu moto kämekäme Ngöbö rüere. Ngöböta ni tarere ja moto kuinbti, aisete ni rabadre kukwe kämekäme nuene bätäkä ngwarbe, akwa Ngöbökwe ñan ni mikadre ja ngie nuen, tätre niere, erere tätre nuene”. Ni töbikaka kore ye Jehová ñaka kai ngäbiti jire (Jud. 4). Ni töi kämekäme ye Ngöbökwe gaite Armagedón yete nieta Bibliakwe (2 Ped. 3:7; Apoc. 16:16).

² Ni jire iti gadrete ye ie Jehová ñaka tö. Kukwe ja tötikara känebätä namani gare nie erere “ni jökrä kukwe nuenkä kämekäme Ngöbö rüere, ye abko käkwe tödekadre jökrä Jesubti amne ñan rikadre ja tare nike Ngöbö okwä bäre mento” ye ie Jehová tö ye Biblia tä mike gare metre (2 Ped. 3:9). Ni ja mikaka ngite käme krubäte ye nitre umbre ji ngwanka tä dimike ne kwe rabadre ja töi kwite aune ja keteta Jehovabe. Ye ngwane nitre umbre tä ja ngwen Jehová ni ngübaka bätärekä ye erere. Akwa nitre ruäre dimikata ye ñaka tö kai ngäbiti (Is. 6:9). Nitre umbre tä bä kabre ni ja mikaka ngite käme krubäte ye dimike ne kwe rabadre ja töi ükete aune kukwe blo ye tuenmetre akwa ni ye ñan tö ja töi kwitai ngwane, ¿dre nuaindre?

“NI KUKWE KÄME NUAINKÄ YE DENKÄ MENTO”

3. a) Ni ja mikaka ngite käme krubäte ye ñan tö ja töi kwitai kukwe blo yebätä ngwane, ¿dre nuaindre? b) ¿Ni ja mikaka ngite ye diandrekä kukwebätä ye ie tö namani ye ñobätä nie raba?

³ Ni iti ja mikadre ngite käme krubäte aune yebätä ñan ja töi kwitai kwe ngwane ni umbre ji ngwanka konkrekasionte yekwe dre nuaindre ye ñan tä nemen gare ie. Ye ngwane tä kukwe nieta 1 Corintios 5:13 ye tä mike täte: “ni kukwe käme nuenkä ye munkwe dianka mento ja ngätäite”. Erametre ni ja mikaka ngite ye ara käkwe kukwe ye diani nuaindre jai. Aisete dre nökani kwe ye tä ükekrö (Gál. 6:7). ¿Ñobätä? Ñobätä ñan aune bä kabre nitre umbre käkwe ja töi mikani dimike akwa ñaka tä kai ngäbiti (2 Rey. 17:​12-15). Jehová kukwei ye ñan tö mikai täte ye tä bämike tä ja ngwen ño yebiti (Deut. 30:​19, 20).

4. Ni iti diankata mento konkrekasionte ye ngwane, ¿ñobätä mikata gare ja mräkätre jökrä ie?

⁴ Ni ja mikaka ngite käme krubäte ye ñan tö kukwe blo ye tuainmetre ngwane ñan niena ni testikoa erere konkrekasionte mikata gare. Akwa kukwe ye ñan nuainta mikakäre tuin ene jai o mikakäre tuin ngwarbe jai yekäre, ñakare aune ni ja ngwanka ye kwrere ben nikwe ñaka ja ketadre aune ñaka mrödre nieta Bibliakwe yebätä nuainta (1 Cor. 5:​9-11). Kukwe kwin rabadre bare yekäre Jehovakwe kukwe ne mikaninte mikakäre täte. Apóstol Pablo tikabare: “lebadura mikata chi arinante abko tä niken jökrä arinante ta” (1 Cor. 5:6). Ni ja mikaka ngite ye ñan tö ja töi kwitai kukwe blo yebätä ye ñan diandrekä konkrekasionte ngwane, ja mräkätre mada ja di ngwandre kukwe metre Jehovakwe mike täte ye ñan rabai kite ütiäte kräke (Prov. 13:20; 1 Cor. 15:33).

5. ¿Ni iti ñan niena testiko Jehovakwe ye mikadre tuin ño jai aune ñobätä?

⁵ Ni iti ñan niena testiko Jehovakwe, ¿ye mikadre tuin ño jai? Ni ñaka niena ja kete ni yebe akwa yebätä ñaka raba ja töi kwite kukwe blo yebätä ye ñaka nütüdre, ñakare aune ni ye ni obeja nianinte ye kwrere aune raba kiteta Jehová kokwäre yei tö ngwandre. Ni ye käkwe Jehová mikani täte aune ja dianinkä mento Jehová kräke ye ñan käi kwitadrekä jire jabiti. Akwa nengwane Kukwe Ngöbökwe ye ererebätä ñan niena nüne ye tä ni mike ulire. Aisete ni ja mikaka ngite ye tä kukwe kri te (Ezeq. 18:31). Ne madakäre, ni ja mikaka ngite yei Jehová tä ja tare bämike aune tä kä bien ie ne kwe ja töi kwitadre kwe yebätä ni ye ñaka jataita konkrekasionte ye ñaka nütüdre. ¿Akwa nitre umbre ji ngwanka konkrekasionte ye raba ni ja mikaka ngite dianinkä ye dimike ño jankunu?

NI UMBRE JI NGWANKA RABA NI DIANINKÄ MENTO YE DIMIKE ÑO

6. ¿Ni iti diankata mento konkrekasionte ye ngwane, nitre umbre tä dre dre nuainne dimikakäre?

⁶ Ni iti ja mikaka ngite diankata mento konkrekasionte ngwane, ¿nitre umbre ji ngwanka ye tä dre nuainne? ¿Jatadreta Jehová kokwäre yekäre tätre rebekä kaibe aune ñan tä dimike jankunu? ¡Ñakare jire! Ni ye ñan niena testiko ye nitre umbre dianinkä Comité kräke käkwe mikai gare ie ngwane, dre nuaindre kwe rökrakäreta Jehová ken ye niaratre mikai gare ie arato. Ye ñan ngörä. Niara ye käkwe ja töi kwitai kukwe yebätä o ñakare ye mikakäre gare jai nitre umbre ja ükaikröta ben sö näin ruäre ta ye mikata gare kwetre ie. Ni ye käkwe kukwe ye kain ngäbiti ngwane ja ükaikröta ben ye ngwane niara ye dimikai ja töi kwite töi jämebiti ne kwe jatadreta Jehová kokwäre. Akwa nüke köbö yete ni ye ñaka ja töi kwite kukwe blo yebätä ngwane nitre umbre konkrekasionte käkwe ja di ngwain jankunu ja ükekrö ben dimikakäre sö ruäre ruärebätä.

7. ¿Ni iti diankata mento konkrekasionte ye ngwane ni umbre ji ngwanka konkrekasionte ye tä ja ngwen ño Jehová erere? (Jeremías 3: 12).

⁷ Jehová ni mikaka tuin bobre jai ye erere nitre umbre ji ngwanka tä ja di ngwen ja ngwen, tätre ni dianinkä mento konkrekasionte mike tuin ño jai ngwane. Ñodre, nitre israelita kirabe yekwe ñaka Jehová mikani täte ye ngwane jatadreta akwle Jehová kokwäre ye ñan ngübabare kwe. Ñakare aune, Jehovakwe ja töi mikani käne niaratre dimike, ñan tö nämäne rökraita niara ken yebiti ta. Namani gare nie kukwe ja tötikara ketebukäre bätä erere, ni niara kukwe niekä Oseas yebätä kukwe namani bare yebiti niara ni ja tare bämikaka metre ye bämikani kwe. Oseas muko ye nämäne ja mike ngite yebiti ta niarakwe kadre ngäbitita ye ribebare Jehovakwe ie (Os. 3:1; Mal. 3:7). Nitre ja mikaka ngite ye käkwe kukwe blo tuadremetre aune ja töi kwitadre kwe ye ie nitre umbre konkrekasionte tö ja brukwä tätebiti Jehová ye erere aune ni ja mikaka ngite ye ie ñan tä kukwe tare ribere nuainkäre (ñäkädre Jeremías 3: 12 yebätä).b

8. Jehová tä ni mike tuin bobre jai, ¿ye Jesukwe bämikani ño monso kämikaninkä gwi yebiti? (Lucas 15:7).

⁸ Monso iti kämikaninkä gwi bätä blitaba kukwe ja tötikara ketebukärebätä ye ngwenta törö jai. Monso ye jatani tuin mente rün ie ngwane, “Nikani betekä ngäbti, käkwe küde kitani ngärä demaine kwärä” (Luc. 15:20). Nemen gare nie erere monso ye jämi ngite kitamana ta jabiti rün ie ngwane, rünkwe nuainbare käne, ni rün iti tä monso kwe tarere ye erere. Nitre umbre konkrekasionte tä obeja tä nianinte ye mike tuin jai ye kwrere yebätä tä ja di ngwen niaratre dimikakäre ne kwe jatadreta konkrekasionte (Luc. 15:​22-24, 32). Ni ja mikaka ngite tä kiteta Jehová kokwäre ye ngwane käta nemen juto kä kwinbiti, aune ¡Kä tibienbätä arato! (Ñäkädre Lucas 15:7 yebätä).

9. ¿Ni ja mikaka ngite käme krubäte ye Jehovata nübaire dre nuainne?

⁹ Nire tä kukwe blo krubäte nuainne aune ñaka ja töi kwite ye ngwane, diankata konkrekasionte ye nibi gare nie nükebe nete. Akwa Jehová ñaka rebekä kaibe, ñakare aune jatadreta kokwäre ye ie niara tö. Nire tä ja töi kwite ye Jehovata mike tuin ño jai ye mikani gare kwe Oseas 14: 4 yekänti. Känti nieta: “Niaratre ñaka ja ngwen metre tie yebätä tikwe mikaita räre. Ti tö dre nuain ye erere tita den akwle jai yebiti tikwe niaratre taredi, ñobätä ñan aune ti brukwä ñaka niena niaratre kräke”. ¡Ni iti ja mikani ngite käme krubäte ye tä ja di ngwen kukwe kwin nuainenta ye nitre umbre tädre miketari ñärärä ye ütiäte krubäte! ¡Ni ja mikaka ngite ye ja töi mikadre nökröta Jehová ken ye ütiäte krubäte!

10, 11. ¿Nitre umbre ji ngwanka konkrekasionte ye tä nitre dianinkä mekerabe kukwebätä ye dimike ño?

¹⁰ ¿Ni iti dianinkä mekerabe konkrekasionte yebätä dre raba nemen bare? Raba ruin nie kukwe blo nuain nämäne kwe ye ñaka niena nuainne o ñobätä dianinkä konkrekasionte ye ñan törö ie. Kukwe ño ño yebiti ta nitre umbre käkwe ni ye känäin aune näin gwirete tuinbiti. Nitre umbre konkrekasionte näin ni ye tuinbiti ngwane, oradi kwe ben, dimikai kwe ja töi mike näinta konkrekasionte. Mekerabe ni ye dianinkä mento konkrekasionte yebätä ñaka dite ja üairebiti. Ni ye tö näinta kukwe metre kokwäre niedi kwe ngwane, nire raba niara tötiketa Bibliabätä ye nitre umbre käkwe niedi, kädeka jäminta konkrekasionte yebiti ta. Nitre umbre aibe käkwe käre kukwe ne ükaite.

¹¹ Nitre umbre konkrekasionte tö Jehová ni mikaka tuin bobre jai ye erere ja ngwen. Ye medenbätä nire nire dianinkä kirabe kukwebätä ye tä känenentari dimikakäre. Ni iti dianinkä kukwebätä ye tö näinta juta Jehovakwe yete niedi kwe ngwane ngübata kä jutobiti ye nie ie. Ni ja mikaka ngite ye ie ja ruin blo krubäte yebätä ñan niena kukwe käme nuainne ye tä bämike ngwane, jötrö ngwarbe kädekaita ni testiko erere konkrekasionte (2 Cor. 2:​6-8).

12. a) ¿Kukwe meden meden känti nitre umbre ji ngwanka rabadre töbike kwin ni iti kädekakäreta konkrekasionte? b) ¿Ja mika ngite ruäre ye Jehovakwe ñaka kitai ta nitrebiti ye ñobätä nie ñan raba? (Nota mikadre ñärärä).

¹² Ni iti ja mikani ngite mekerabe ye mikadreta konkrekasionte känenkri nitre umbre ji ngwanka konkrekasionte rabadre töbiketari kwin käne. Ni dianinkä mento, ye käkwe küdrebare monsobätä, ja ngwani apóstata kwe o kukwe känänbare nierare ja mäkäninte kwe ye mikakäre krüte. Kukwe ne erere känti ni ye ja töi kwitanina bökän aune ñan niena kukwe blo ye nuainne ye tä bämike o ñakare ye nitre umbre rabadre mike ñärärä kwin (Mal. 2:14; 2 Tim. 3: 6). Nitre umbre konkrekasionte ye tädre obeja ye kriemike akwa ni iti käkwe ja mikani ngite käme krubäte mekerabe, ye ie ja ruin blo krubäte aune yebätä tä ja töi kwite ja brukwä tätebiti ngwane, Jehovakwe kai ngäbitita juta kwe yete ye tädre gare nie. Aisete ni iti ja ngwanbare käme krubäte aune ni mada ngwani ja tare nike kwe, ye nitre umbre käkwe ja ükaikrö blitakäre ben ngwane, töbikaitari kwin kwe kukwe diankäre jai aune niaratre ñaka rabadre niere o nütüre ja mika ngite ruäre ye nitre nuaindre ngwane, Jehovakwe ñaka mikai tuin bobre jai (1 Ped. 2:10).c

KONKREKASION RABA NE NUAINNE

13. ¿Ni iti töi ükateta aune ni iti diankata mento konkrekasionte ye ben ja ngwandre ño?

¹³ Namani gare nie kukwe ja tötikara känebätä erere ni iti töi ükateta (Censura) mikata gare konkrekasionte ye ngwane, ni raba blite jankunu ben ñobätä ñan aune ni ye ie ja ruin ngite krubäte, yebätä ja töi kwitani bökän kwe (1 Tim. 5:20). Dianka ñan mento konkrekasionte yebätä dimikadre kukwe metre ye nuainne jankunu ye tä ribere jai (Heb. 10: 24, 25). Ni iti diankata mento konkrekasionte ye mikata gare ngwane, ni ñaka rabai ja kete jire ben aune mröre ben (1 Cor. 5:11).

14. ¿Ni dianinkä mento kukwebätä, ye ben ni itire itire töi tä tötikani ño Bibliakwe ye erere bätä raba ja ngwen ño? (Üai mikadre ñärärä).

¹⁴ ¿Ni iti diankata mento konkrekasionte ye ngwane, ni ñaka rabai mike ñärärä jire ja käne aune ñan blitai ben? Ye ñan ai gärätä. Metrere ni ñan ja ketai ben. Akwa ni diankata mento ye ja ketamuko nikwe o ni mräkätre ngwane, ni raba nübaire gätäbätä ye tä gare nie. Rükadre ngwane, ¿kadre ngäbiti ño? Käne köbö kwin nie ñan nämä ie. Akwa nengwane, ni töi tä tötikani ño Bibliakwe ye ererebätä nikwe ja ngwen ben. Nitre ruäre rabai köbö kwin niere ie akwa ni ñan rabai ja kete jire ben.

15. ¿2 Juan 9-11 ye tä blite nire nirebätä? (Recuadro “¿Juan aune Pablo ye nämäne blite ja mika ngite ja erebebätä?” ye mikadre ñärärä).

¹⁵ Akwa ni raba nemen ngwentari jai: “¿‘nire nire käkwe ni ye kwrere kadre ngäbti ja gwiriete abko käkwe sribi käme ye die mikadi siba’ ye Biblia ñan niere?” (Ñäkädre 2 Juan 9-11 yebätä). Kukwe mikata gare käne bersikulo nebätä ye tä blite metrere nitre apóstata (ni ie kukwe metre gare akwa ta ja mike juta Ngöbökwe rüere) aune nitre töi käme tä nitre mada töi mike blo (Apoc. 2:20). Nitre ja ngwanka apóstata tä ni mada töi mike blo Ngöbö rüere, o tä kukwe mada mada blo nuainne ye ngwane, nitre umbre ji ngwanka konkrekasionte ñaka kukwe ükaite tuabitikäre. Akwa ni ja ngwen ne kwrere raba ja töi kwite akwa jämi ja töi kwite ye ngwane, nikwe ñaka köbö kwin niedi jire ie aune ñaka nübaidi jire gätäte.

JEHOVÁ ERERE NI MADA MIKADRE TUIN BOBRE JAI

16, 17. a) ¿Nitre ja mikaka ngite yekwe dre nuaindre ie Jehová tö? (Ezequiel 18:32). b) ¿Nitre umbre ji ngwanka konkrekasionte ye raba sribire ño Jehová ben?

¹⁶ Nükebe nete ja kitani kukwe ja tötikara krärikebätä ¿dre nemen gare nie? Ni ñaka gadrete jire iti ye ie Jehová tö (ñäkädre Ezequiel 18:32 yebätä).d Arato nitre ja mikaka ngite ye ja ketadreta Jehovabe ye ie (2 Cor. 5:20). Ye medenbätä nitre ja mikaka ngite kukwe blo nuainkä yekwe ja töi kwitadre aune ñan rabadrera ja ngwen käme ye Jehovata ribere ie kirabe nükebe nengwane. Ne madakäre nitre umbre ji ngwanka konkrekasionte ye tä sribire gwairebe Jehová ben nitre ja mikaka ngite ye dimikakäre ja töi kwite aune kukwe blo ye tuenmetre. Sribi ütiäte tä nitre ne kisete (Rom. 2: 4; 1 Cor. 3: 9).

¹⁷ ¡Ni ja mikaka ngite ye tä ja töi kwite ngwane, dre tä nemen bare kä kwinbiti ye bämike ja töite! Ni Rün Jehová yebätä käta nemen juto krubäte ni obeja kwrere nianinte tä nüketa konkrekasionte ye ngwane. Ari töbike jankunu Jehová, ni mikaka tuin bobre jai, ni ruentari tare ie, aune jondron ñan nuain bä ni kräke akwa tä nuainne ni kräke yebätä. Nikwe töbikai Jehová töi kwin keta kabre nebätä ngwane, niara tare nikwe ye ririai bäri aune tödeka nikwe ye rabai bäri dite köbö kwatire kwatire (Luc. 1:78).