Köbö 40 mrä te Jesús nämäne kä tibienbätä ngwane, kukwe nuainbare kwe yebätä ja kitadre

1, 2. ¿Nitre ja tötikaka nibu Jesukwe nikani kä Emaús kokwäre ngwane, dre namani bare bätätre?

KÖBÖ 16 nisán kä 33 ye ngwane, nitre ja tötikaka Jesukwe tä ulire aune kä jürä krubäte bätätre. Nibu ye tä niken Jerusalén bäre mento kä Emaús kokwäre, juta ye nemen 11 kilómetros (7 millas). Jesús ie nämäne tö ngwen, ye murie kiti ye medenbätä, niaratre tätre di ñakare aune ulire krubäte. Kukwe niebare Mesías bätä ietre, yebiti tö ngwani ngwarbe kwe namanintre nütüre raba ruin nie. Akwa dre rabai bare ja känenkäre ye ñan bämike ja töite.

² Ni brare iti ñan gare ie ye tä ngätäi ben aune tä niken bentre. Niaratre tö ngwani ngwarbe Jesubiti aune tätre ulire ye tä niere ni ye ie. Akwa tätre kukwe kädriere jabe ye tä niaratre töi kwite. Tärä “tikani Moisékwe nebebe tärä tikani kira nitre Ngöbö kukwei niekäkwe” yebätä Chui ye ta blite bentre aune ñobätä Mesías ja tare nikadre aune krütadre ye tä mike gare ietre. Tätre nüke Emaús ye ngwane batibe, Jesús krütani abokän nükaninta nire yebe tä blite ye tä gain. Jesús nükaninta nire ye käi namani juto bätätre ye bämike ja töite (Luc. 24:​13-35).

3, 4. a) ¿Dre namani bare nitre ja tötikaka Jesukwe yebätä? (Hechos 1:3). b) ¿Dre rabai gare nie kukwe ja tötikara nekänti?

³ Köbö 40 mrä yete Jesukwe ja mikani tuare bä kabre nitre ja tötikaka kwe ie (ñäkädre Hechos 1:3 yebätä). Niarakwe töi mikaninta jäme ye köböire ñan namanina ulire aune kä jürä ñan namanina bätätre, kä namani juto bätätre aune namanintre tö ngwen kwatibe aune ñäkä kä jürä ngwani kwetre jabätä kukwe driekäre Gobran Ngöbökwe yebätä.a

⁴ Köbö mrä te Jesús nämäne kä tibienbätä aune kukwe nuainbare kwe bätä nikwe ja kitai ngwane, kukwe rabai gare krubäte nie. Köbö mrä ye ngwane, Jesukwe kukwe ütiäte ne nuainbare 1) nitre ja tötikaka kwe dimikani kwe, 2) dimikani kwe Ngöbö kukwei mike nüke gare kwin jai aune 3) kitani kwe sribi ütiäte ye nuainkäre. Kukwe jökrä nekänti ño ni raba ja kite Jesubätä ye rabai gare nie kukwe ja tötikara nekänti.

NITRE MADA DIMIKADRE

5. ¿Nitre ja tötikaka Jesukwe ye töi mikadre jäme ye ñobätä nämene ribere jai?

⁵ Nitre ja tötikaka Jesukwe käkwe ju kwetre, mräkätre aune sribi nuain nämäne kwetre ye tuanimetre jökrä nänkäre Jesús jiebiti yebätä, töi mikadre jäme nämänentre ribere jai (Mat. 19:27). Nitre ja tötikaka mada käkwe ja mikani ja tötikaka Jesukwe ye köböire nitre kä yekänti käkwe mikani tuin ngwarbe jai (Juan 9:22). Jesús ye abokän Mesías käbämikani ye ie nämäne tö ngwen ye medenbätä nämänentre juto kukwe ñan nuäre ye nuainkäre (Mat. 16:16). Akwa, Jesús murie ketani ye ngwane, tödeka nianinte käntre aune brukwä nötaninte.

6. ¿Jesús ganinkröta ye bitikäre dre nuainbare kwe?

⁶ Jesús krütani yebätä nitre ja tötikaka kwe ie ja namani ruin ulire, ye nükani gare kwin Jesuye. Aune niaratre ñan nämäne tödeke ye ñan aibätä niaratre nämäne ulire ye nämäne gare Jesús ie ye medenbätä krire ganinkröta ye ngwane, ben ngwaire ja ketamukotre kwe töi mikani jäme kwe. Ñodre María Magdalena nämäne muen dobo kwe yebiti ngwane, ja mikani tuare kwe ie (Juan 20:​11, 16). Nitre ja tötikaka kwe nibu kädrite párrafo kenabätä ye ie ja mikani tuare kwe. Aune arato ja mikani tuare kwe apóstol Pedro ye ie (Luc. 24:34). ¿Jesukwe kukwe bämikani yebätä dre raba nemen gare nie ja töi kräke? Ja mikani tuare kwe María Magdalena ie ye ngwane, dre namani bare yebätä ani ja kite.

7. ¿Dre nuain nämäne Mariakwe jutuabare Jesús ie, aune dre nuainbare kwe María kräke? (Juan 20:​11-16; üai mikadre ñärärä).

⁷ (Ñäkädre Juan 20:​11-16 yebätä). 16 nisán ye ngwane, meritre ja ngwanka metre ye nikani dekä ngwarbe dobo Jesukwe yebiti (Luc. 24:​1, 10). Meri iti ye kädeka nämäne María Magdalena. Niara ye nükani dobobiti ngwane, kä mäkä ye nämäne tökare ye jutuabare ie, aisete nikani betekä niekäre Pedro aune Juan ie. Nitre nibu ne nikani dobo mike ñärärä ngwane, metrere nämäne tökare aisete niaratre nikaninta gwä. Akwa María ñaka nikaninta namani yete muen. María nämäne muen ye Jesús nämäne mike ñärärä ye ñan gai jabätä. Meri ja ngwanka metre ne nämäne muen ye jutuabare Jesús ie ye matani brukwäte. Ye ngwane ja mikani tuare kwe ie, ye bitikäre sribi keteiti mikani kisete kwe ye käkwe dimikani krubäte. Sribi ütiäte ye abokän: niara nükaninta nire ye mikadre gare kwe ngwaitre kwe yei (Juan 20:​17, 18).

8. ¿Ni raba ja ngwen ño Jesús erere?

⁸ ¿Ni raba ja ngwen ño Jesús erere? Nikwe ja mräkätre töi mikadre sribire jankunu Jehová kräke, yekäre kukwe meden ben ja mräkätre konkrekasionte tä ja tuin ye rabadre gare nie, nikwe niaratre töi mikadre nüke gare jai aune nikwe blitadre jäme bentre. Meri testiko kädekata Jocelyn abokän etebabätä kukwe tare namani bare aune krütani yebätä ani blite. Niara tä niere: “Sö kabre te ja nämä nemen ruin ulire krubäte tie”. Nitre gure käkwe niara nübaibare ja gwirete, niara kukwe nuani kwe aune töi mikani nüke gare kwe jai bätä niara ye ütiäte Jehová kräke ye ngwaninta törö kwe ie. Niara tä niere: “Ye ngwane dre nuaindre tikwe ñan nämä gare tie aune mren rubun te ni murie jatara nötökä ye kwrere ja nämä nemen ruin tie. Akwa ja mräkätre yebiti Jehovakwe ti dianintari kukwe tare yebätä bätä ti mikani kwäre kwe. Aune ti tö nämä Jehová mikai täte yebätä ti dimikaba jankunu kwetre”. Ni tö ja mräkätre dimikai ye ngwane, nikwe niaratre tuadremetre blite aune kukwe nuadre kwekebe, ye köböire nikwe niaratre ye dimikai sribire jankunu Jehová kräke aune töi mikai jäme (Rom. 12:15).

NITRE DIMIKADRE NGÖBÖ KUKWEI MIKE NÜKE GARE KWIN JAI

9. ¿Nitre ja tötikaka Jesukwe ja tuani kukwe meden ben aune niarakwe dimikani ño?

⁹ Nitre ja tötikaka Jesukwe ye nämäne tö ngwen kukwe Ngöbökwe ie aune nämenentre ja di ngwen mike täte (Juan 17:6). Akwa ñobätä Jesús murie ketani ni gokä ye erere ye ñan namani nüke gare ietre. Nitre ja tötikaka ye brukwä kwin ye nämäne gare Jesús ie, akwa Ngöbö kukwei ye ñaka nämäne nüke gare ie ye nükani gare ie (Luc. 9:​44, 45; Juan 20:9). Yebätä nämenentre ñäke drebätä ye mikani nüke gare kwe ietre. Nitre ja tötikaka nibu nikani kä Emaús kokwäre ngwane Jesukwe ja mikani tuare ietre ye ngwane, dre niebare kwe yebätä ani ja kite.

10. ¿Jesús ye ara Mesías metre ye mikani nüke gare ño kwe nitre ja tötikaka kwe ie? (Lucas 24:​18-27).

¹⁰ (Ñäkädre Lucas 24:​18-27 yebätä). Jesús ñan ja mikani gare bengwairebe nitre nibu ye ie, ñakare aune kukwe ngwanintari kwe ietre. ¿Ñobätä? Ñan ñobätä aune niaratre nämäne töbike ño aune ja nämä ruin ño ietre ye tö namani gai bätätre. Aune ye erere nuainbare kwetre. Jesús käkwe nitre Israel mikadre kwäre nitre romano yebätä ye nämänentre ngübare niebare kwe ie. Dre nämäne niaratre töi nike ye mikani gare kwe ietre ngwane, Jesús käkwe Ngöbö kukwei yebiti profecía keta kabre ye namanina bare ye mikani gare kwe ietre.b Ye bitikäre deu, nitre ja tötikaka mada ye ie Ngöbö kukwei yebiti arato profecía ye mikani gare kwe (Luc. 24:​33-48). ¿Dre nemen gare nie?

11, 12. a) ¿Kukwe Ngöbökwe yebiti Jesukwe kukwe metre driebare ye tä dre driere nie? (Üai mikadre ñärärä). b) ¿Nortey tötikaka Bibliabätä ye käkwe dimikani ño?

¹¹ ¿Ja ngwandre ño Jesús erere? Nitre tötikata Bibliabätä ngwane, kukwe ngwandretari ie ye köböire tä töbike ño aune ja ruin ño ie ye mikadre gare kwe yekäre (Prov. 20:5). Ja ruin ño ietre ye rükai gare nie ngwane, kukwe meden ben tä ja tuin ye texto meden raba dimike ye dimikadre känene. Ñan kukwe mikadre gare metre ta jötrö ie. Ñakare aune, texto ye tä dre mike gare ye ngwandretari ie aune raba mike ño täte ye rükadre gare ietre. Kä Ghana yete ja mräkä kädekata Nortey yebätä dre namani bare ye ani mike gare jai.

¹² Kä nämä 16 Nortey biti ngwane, niara jatani ja tötike Bibliabätä. Ye bitikäre, niara mräkätre ja mikani niara rüere. ¿Dre käkwe niara dimikani ja tuakäre kukwe yebe? Ja mikai nitre kristiano rüere nieta Mateo kapitulo 10 yebätä dirikä kwe blitabare ben. “Ti mräkätre ja mikani ti rüere ye ngwane, kukwe metre kwani tie rükaba gare tie”, niebare Norteykwe. Nikwe mokredre jabiti nieta Mateo 10:16 yete, ye tötikaka kwe Bibliabätä mikani gare ie ye käkwe niara dimikani ne kwe niara blitadre mräkä kwe ben ngwane, rabadre nuainne töi kwinbiti aune mräkätre kwe mikadre tuin ütiäte kwe jai. Nortey ja ngökani ñöte ye bitikäre tö namani ja mikai prekursor akwa rün kwe tö namani niara tuai niken kwela krite. Dre nuaindre kwe ye dirikä kwe ñan mikani gare metre ta ie, ñakare aune kukwe ngwantaribare kwe ie aune kukwe ja jie ngwankäre Bibliabätä ruäre mikani gare kwe ie. ¿Ye köböire dre namani bare? Norteykwe ja mikani prekursor aune rünkwe juanintari. Kukwe namani barebätä yebätä töita ño mikata gare kwe: “Bäri kwin tikwe kukwe ne dianba jai”. Nita ni mada dimike kukwe ja jie ngwankäre Bibliabätä ye mike gare jai ngwane, ni raba niaratre dimike rabakäre ni kristiano ünä ja üairebiti erere (Efes. 3:​16-19).

JA MRÄKÄTRE KITADRE SRIBIKÄRE JA DIBITI KONKREKASIONTE

13. ¿Jesús rikadreta kä kwinbiti bitikäre kukwe drie ye tädre jankunu yekäre dre nuainbare kwe? (Efesios 4:8).

¹³ Jesús nämäne kä tibienbätä ye ngwane, Rünkwe sribi mikani kisete ye mikani nemen bare kwin kwe (Juan 17:4). “Dre rabadre bare kwin ie ti tö ngwane, bäri kwin ti ara käkwe nuaindre”, kukwe ne Jesukwe ñaka nütübare jire. Kä komäbiti ötare nämäne kä tibienbätä ye ngwane, nitre mada kitani kwe. Jesús nämäne tö ngwen kwatibe nitre ja tötikaka kwe ie. Ye medenbätä niaratre käkwe kukwe kwin Gobran Ngöbökwebätä driedre aune oveja ütiäte Jehovakwe ye ngübadre kwetre ribebare kwe ietre, niaratre ruäre nämäne bati aune kä jämi 30 biti ye ie kukwe ye niebare kwe arato (ñäkädre Efesios 4:8 yebätä). Nitre ne käkwe sribibare gwairebe Jesube. Akwa Jesús jämi nikenta kä kwinbiti ye känenkri niaratre ye tötikani kwe ne kwe rabadre sribire bäri kwin. Nuainbare ño kwe ye ani mike gare jai.

14. ¿Köbö 40 mrä te Jesús nämäne kä tibienbätä ye ngwane nitre ja tötikaka kwe dimikani ño kwe nirien ja üairebiti? (Üai mikadre ñärärä).

¹⁴ Jesukwe mäträbare nitre ja tötikaka kwe yebätä metre ta akwa ñan ñäkäbare tare kwe ietre. Ñodre, niara nükaninta nire ye nitre ja tötikaka ruäre ñan namani mike era jai, aisete kukwe ye metre ye mikani gare kwe ie (Luc. 24:​25-27; Juan 20:27). Aune Jesukwe niaratre ye töi mikani nitre Ngöbö mikaka täte ye dimike aune ñaka ja töi mikadre kwe ngwian yebätä ye ribebare kwe ie (Juan 21:15). Nitre mada kisete sribi ño mika nämäne yebätä ñan ja töi mikadre kwe niebare kwe ietre (Juan 21:​20-22). Gobran Ngöbökwe yebätä niaratre ñaka nämäne töbike kwin ye medenbätä niarakwe töi ükaninte aune dimikani kwe ja töi mike kukwe drie yebätä (Hech. 1:​6-8). ¿Dre raba nemen gare Jesús yebätä nitre umbre ji ngwanka konkrekasionte ye ie?

15, 16. a) ¿Nitre umbre konkrekasion jie ngwanka ye raba ja ngwen ño Jesús erere? b) ¿Mäträbare Patrickbätä ye käkwe dimikani ño?

¹⁵ ¿Nitre umbre ji ngwanka konkrekasionte ye raba ja ngwen ño Jesús ye erere? Rabadre ja mräkätre kite aune dimike, monsotre bati arato ne kwe sribi mika raba kisete.c Ja mräkätre ye käkwe käre kukwe nuaindi kwin ye ñan ngübare bätätre, ñakare aune mäträdre kwebätä ngwane ñan ñäkädre tare kwe ie ne kwe bätärekä bätärekä jatadre sribire bäri kwin aune ja töi mikadre bobre kwetre, tö ngwan raba ietre aune tädrera juto ni mada dimikakäre ye driedre ietre (1 Tim. 3:1; 2 Tim. 2:2; 1 Ped. 5:5).

¹⁶ Ja eteba iti kädekata Patrick yebätä kukwe namani bare ye ani mike gare jai. Patrick nämäne bati ngwane, ñaka nämäne ja ngwen kwin ja mräkätre ben aune nämä ñäke tare ja ngwaitre merire ie. Akwa ni umbre konkrekasionte ünä käkwe gani, yebätä mäträbare kwebätä töi kwinbiti aune kukwe metre niebare kwe ie. Patrick tä niere: “Ti dimikaba kwe yebätä tita debe bien ie. Sribi ie ti tö nämäne abokän mika nämäne ja mräkätre mada kisete ye nämä mate tare tibätä. Akwa ni umbre iti käkwe kukwe nieba tie ye käkwe ti töi mikaba sribire töi bobrebiti ja mräkätre kräke aune ñaka ja töi mike sribi ño mikadre konkrekasionkwe ti kisete yebätä”. Ye köböire, Patrick biti kä nämäne 23 ngwane, kädekani ni umbre konkrekasionte erere (Prov. 27:9).

17. ¿Jesús nämäne tö ngwen nitre ja tötikaka kwe yei ye bämikani ño kwe?

¹⁷ Nitre ja tötikaka käkwe kukwe driedre ye ñan aibe Jesukwe mikani kisete, ñakare aune rabadre nitre tötike ye ribebare kwe ietre arato (nota de estudio “Enséñenles”, tä Mateo 28:20 ye mikadre ñärärä). Niaratre ye ie sribi ye ñan rabai bare namanintre nütüre. Akwa sribi ye rabai bare kwin ietre ye ie Jesús nämäne tö ngwen ye medenbätä tö namani kukwe ye mikai gare ietre. Yebätä ne niebare kwe ietre: “Ti Rün käkwe ti juani ño, ye kwrere ti bike mun juen arato” (Juan 20:21).

18. ¿Nitre umbre ji ngwanka konkrekasionte raba ja ngwen ño Jesús erere?

¹⁸ ¿Nitre umbre ji ngwanka konkrekasionte ye rabadre ja ngwen ño Jesús erere? Nitre umbre ie kukwe gare krubäte ye käkwe sribi biandre nitre mada ie aune kitadre kwe sribikäre kwin ye gare ietre (Filip. 2:​19-22). Ñodre, monsotre bati ye rabadre Ju Ja Ükarakrö ye ükete aune mike mrebe ye ribedre kwe ie. Yebiti nire kitani kwe aune sribi mikani kisete kwe ye käkwe nuaindi kwin yei tä tö ngwen. Ja mräkä iti krire kädekani ni umbre konkrekasionte erere kädekata Matthew ye tä debe bien krubäte, ñobätä ñan aune nitre umbre ie kukwe gare krubäte käkwe kitani sribi keta kabre nuainkäre konkrekasionte aune sribi nuaindi kwin kwe yei tätre tö ngwen yebätä. Niara tä niere: “Kukweta nainte nie ye abokän nierare ye kwrere tikwe mikadre tuin jai nieba kwe tie aune ti dimikaba kwe ne kwe sribi mada mikadre ti kisete ye ngwane ti rabadre nuainne bäri kwin”.d

19. ¿Ni töi tädre kwatibe dre nuainbätä?

¹⁹ Köbö 40 mrä Jesús nämäne kä tibienbätä ye ngwane, nitre mada dimikani kwe, tötikani kwe aune kitani kwe. Jesús ja ngwanbare ye erere nikwe ja ngwandre (1 Ped. 2:21). Metrere niara ni dimikai ñobätä ñan aune kukwe ne käbämikani kwe: “Ti abko tädi kärekäre munbe köbö kwatirekwatire nebebe kä mrä” (Mat. 28:20).