“Mä ütiäte krubäte”

1, 2. ¿Ni jökrä ütiäte krubäte Jehová kräke rükadre gare nie yekäre dre käkwe ni dimikai?

JEHOVÁ tä ni jökrä niara mikaka täte ye mike tuin ütiäte krubäte jai. Akwa, yebiti ta nitre ruäre ie töite ja ruin ngwarbe ñan ütiäte kwrere. Ñobätä ñan aune mikabare ene ja kisete o ñan ütiäte kwrere mikani tuin jai yebätä ja nemen ruin kore ietre. Mä töita ye erere jabätä ngwane, Jehová kräke mä ütiäte krubäte ye, ¿dre käkwe mä dimikai mike nüke gare jai?

² Nikwe ja mikadre tuin ño jai kwärikwäri Jehovakwe mikani gare kirabe Bibliabätä yebätä töbikadretari ye käkwe ni dimikai. Jesús, Jehová Monsoi, ye käkwe ja töi mikani kwin aune kukwe kwin nuainbare kwe nitre jökrä kräke. Nebiti nemen gare nie, niara aune Rün kwe tä nitre ie ja ruin ngwarbe o töi bobre ye mike tuin ütiäte krubäte jai ja ngwanbare ño kwe nitre ben yebiti (Juan 5:19; Heb. 1:3). Kukwe ketebu ütiäte rabai gare nie kukwe ja tötikara nekänti: 1) nitre jökrä ütiäte Jehová kräke ye Jesukwe mikani nüke gare ño nitre ie 2) mä ütiäte krubäte Jehová kräke erauto rabadre metre mä kräke yekäre, drekwe mä dimikai mike nüke gare jai (Ageo 2:7).

NI JÖKRÄ ÜTIÄTE YE JESUKWE MIKANI GARE

3. ¿Jesukwe ja ngwanbare ño nitre nünanka Galilea nükani niara känti ye ben?

³ Jesús nikani juta Galilea bämäkäre jire ngwane, nitre kwatí nämä nüke niara känti ne kwe diridre kwe ietre aune mikadreta räre kwe. Nitre “nämäne ja tare nike aune nämäne ngwarbe, oveja ngübaka ñaka ye kwrere” nämäne tuin Jesús ie (Mat. 9:36; nota de estudio suliare mikadre ñärärä). Nitre kukwe ngwarbe jie ngwanka ye kräke nitre ne nämäne tuin dokwäkä ribi kwrere, ñan ütiäte kräketre aisete nitre ne kwrere niaratrekwe kädekani “ngututu ngwarbe” (Juan 7:​47-49; nota de estudio suliare). Akwa, Jesús nämäne ja ngwen kwin nitre bobre ben, kä dianinkä kwe jai dirikäre nitre ne ie aune mikakäreta räre (Mat. 9:35). Ne madakäre, nitre bäri kwatí ie kukwe driedre aune dimikadre yekäre nitre nänkä ben kitabare kwe aune ja di biani kwe ietre nitre bren bätäkä ngwarbe mikakäreta kwinta (Mat. 10:​5-8).

4. ¿Nitre töi bobre ben Jesukwe ja ngwanbare ño ye tä dre driere nie?

⁴ Nitre kä nebätä tätre nitre mada mike ene aune ngwarbe ja kisete. Akwa nitre ene ye Jesukwe mikani tuin ütiäte jai aune kukwe kwin nuainbare kräketre kwe, aisete Jesús aune Rün kwe kräke nitre jökrä ütiäte bämikani kwe. Mätä sribire Jehová kräke akwa ja ñan nemen ruin ütiäte mäi ngwane, nitre töi bobre tö nämäne ja kitai Jesubätä ye Jesukwe mikani tuin ño jai ye mäkwe ngwan törö jai. Yebiti mä ütiäte kri Jehová kräke rükai gare mäi.

5. ¿Meri Galilea kwani Jesús ie bätä dre nämä nemen bare?

⁵ Nitre nämäne ja ükaninkrö kwatí ñan aibe ngwane Jesukwe dimikani aune diribare ietre, ñakare aune ni itire itire ie arato. Ñodre, Jesús nämäne kukwe driere Galilea ye ngwane, meri iti nämäne ja tare nike kä 12biti bren kwe yebätä (Mar. 5:25). Bren yebätä ñan nämä tuin deme nitre ie, aisete nire käkwe kise mikadrebätä ye ngwane, rabadre käme arato. Yebätä, ñaka nämäne ja kete ni madabe raba ruin nie. Erauto, ñan raba niken gwairebe nitre mada ben Ngöbö mika täte sinagogate o niken fiestabätä (Lev. 15:​19, 25). Aisete, meri ne ñan nämäne ja tare nike ngrabarebiti aibe, ñakare aune töi ñan nämä jäme arato, ¿ye ni raba bämike ja töite? (Mar. 5:26).

6. ¿Meri nämäne ja tare nike bren kwe yebätä ye ñokänti namaninta räre?

⁶ Meri nämäne ja tare nike dikaro ne Jesukwe mikadreta räre ie tö namani akwa ñan niebare metre ta kwe. Ñobätä ñan aune nämäni ja gaire bren kwe yebätä, ñan nämäne deme aune nämä nitre kwatí ngätäite yebätä Jesús raba ñäke ie nütübare kwe raba ruin nie. Yebätä jerekäbe kise mikai dänbätä kwe ngwane (Mar. 5:​27, 28). ¡Rabaita räre ie nämäne tö ngwen aune ye namani bare! Bren riakaba meri yebätä ye ngwane, nirekwe kise mikani dänbätä Jesús ie ye Jesukwe ngwanintari aune meri ye ja driebare jökrä kwe ie. Ye ngwane ¿Jesukwe dre nuainbare?

7. ¿Jesús ja ngwanbare ño meri nämäne ja tare nike yebe? (Marcos 5:34).

⁷ Meri ye “namani grükekä” kä jürä yebätä jutuabare Jesús ie ngwane, töi kwinbiti blitabare kwe ben aune mikani tuin ütiäte kwe jai (Mar. 5:33). Ye ñan ngörä “ti ngängän” niebare kwe ie arato. Kukwe ne ñan nie nämä jerekäbe, ñakare aune nire ie ja nämä ruin ja mräkäre aune tare nämä ye aibe ie kukwe ne erere nie nämä (ñäkädre Marcos 5:34 yebätä). Nota de estudio kukwe ne kräke tä niere: ‘Ne aibe ngwane Jesukwe meri iti kädekani “ti ngängän” tä tikani Bibliabätä. Nuainbare kwe ñobätä ñan aune meri yebätä kukwe tare nämä nemen bare aune nämäne “grükekä” krubäte tuani kwe yebätäʼ. ¡Kukwe niebare kwe ie yekwe töi mikani jäme! Töbike ¿Jesukwe ñan blitadre jäme ben ngwane ja rabadre ruin ño ie? Rabaita räre bren tare yebätä, akwa ja rabai ruin käme aune ngite krubäte. Yebätä Jesukwe mikaninta kwinta, arato Rün kwe kä kwinbiti nämä tarere krubäte ye dimikani mike nüke gare kwe ie.

8. ¿Meri käi Brasil yekwe ja tuabare dre ben?

⁸ Nengwane, ni Ngöbö mikaka täte ruäre tä ja tuin kukwe ñan nuäre ben. Ñodre, bren köböite ja nemen ruin ulire dikaro ietre aune töite ja ruin ngwarbe ie. Ñodre, Renataa meri prekursora nünanka Brasil bätä kukwe namani bare. Därebare ngoto kwäräkäbe aune kise ngeberekri ñaka ie. Nieta kwe: “Tärä juete (kwela) ti mika nämä tuin ngwarbe jai (bullying) nuain nämä tibätä, ti kötai nämä, aune ti kädeka nämä käme krubäte. Gwi ti mräkä nämä ti mike tuin ngwarbe jai ti ño yebätä”.

9. ¿Renata ütiäte ye dre käkwe dimikani mike gare ie?

⁹ ¿Dre Renata dimikani? Ja mikani kwe testiko Jehovakwe ngwane, konkrekasionte ja mräkätre käkwe dimikani aune tarebare, yebiti tuin ño Jehovai nükani gare ie. Niara tä niere: “Nire nire käkwe ti dimikani ye tikwe kä tikadre jai täräbätä ngwane, ¡ñan krütadre jire tie! Tita debe bien Ngöböi ja brukwä tätebiti ñobätä ñan aune ja mräkätre brukwä kwin ja üairebiti biani kwe tie”. Kukwe jökrä nuainbare Renata kräke yebiti nükani gare ie Jehová kräke niara ütiäte.

10. ¿Kukwe tare medeben María Magdalena nämä ja tuin aune ye köböite ja nämä ruin ño ie? (Üai mikadre ñärärä).

¹⁰ Jesús nämä ni itire itire dimike, nengwane ño María Magdalena dimikani kwe yebätä ari blite. Meri nebätä chokali ni kükü juanintari (Luc. 8:2). Chokali nämä töi mike ja ngwen blo aune ñan ngwen kukwe kwin nuainne raba ruin nie, ye köböite nitre nämä kämiekäbätä. Chokali nämä ngwen ja tare nike ye näire ja nämäne ruin ngwarbe ie, ñan kriemikani bätä kä jürä nämä bätä raba ruin nie. Akwa, Jesukwe mikani kwäre choka yebätä aune namani nänkä Jesube. Kukwe nuainbare kräke ye köböire, ütiäte Ngöbö ngwärekri nükani gare ie. Akwa ye ñan aibebiti dimikani.

11. ¿María Magdalena nämäne tare Jehovakwe ye Jesukwe bämikani ño ie?

¹¹ Jesús nämä niken kukwe driere ngwane, María Magdalena nübaibare kwe arato.bKöböire, dre drie nämäne kwe ye María Magdalena käkwe kukwe nuani. Arato, Jesús nükaninta nire ngwane, ja mikani tuare kwe ie, aune María Magdalena ben blitabare käne kwe köbö yete. Jesukwe juani kukwe mike gare nitre apóstol ie. Kukwe ye jökräbiti María Magdalena nämä tare krubäte Jehovakwe Jesukwe bämikani ie (Juan 20:​11-18).

12. ¿Nitre mada ñan Lidia taredre ye ñobätä nämäne ruin jabätä ie?

¹² Nengwane María Magdalena erere nitre kwatí ñan mikata ütiäte jai. Meri testiko käi España kä Lidia bätä ani blite. Jämi därere känenkri meye tö namani murie ketai, akwa ñan nuainbare kwe. Akwa, yebiti ta Lidia nämäne chi ngwane, meye ñan nämäne ngibiare kwin aune ñäke tare tare ie törö ie. Tä niere: “Ti ngwarbe yebätä nitre mada ñan ti taredre ye ti meye nämä niere tie. Aisete nitre madakwe ñan ti taredre o ti mikadre ütiäte jai ye jürä nämäne tibätä. Akwa, ti tö nämä kukwe ye ie krubäte ja kräke”.

13. ¿Lidia tare krubäte Jehová okwäkänti ye kukwe meden meden käkwe dimikani mike nüke gare jai?

¹³ Akwa, Lidia jatani kukwe metre mike gare jai ngwane, jatani töbike jene. Nämäne orare, ñäke Bibliabätä aune ja mräkätre nämäne ja tare bämike ie yekwe dimikani mike gare jai, niara tare krubäte Jehová okwäkänti. Niara tä niere: “Tita dre dre nuainne kwin aune ti tare ti mukokwe ye niara tä niere bäre bäre tie, akwa ñan niara aibe, ñakare aune ja ketamukotre tikwe tä ye kwrere nuainne arato”. ¿Konkrekasion mäkwete ni ruäre ie ja tärä nemen ruin Lidia erere? Ye erere ngwane, Jehovakwe tare krubäte ye dimikadre mike nüke gare ie aune mäta kukwe niere o kukwe nuainne yebiti mä raba dimike.

MÄ ÜTIÄTE JEHOVÁ KRÄKE YE DRE MÄ DIMIKAI MIKE NÜKE GARE JAI

14. ¿Ni tuin ño Jehovai yebätä 1 Samuel 16:7 tä dre driere nie? (Recuadro “¿Ñobätä Jehová tä ni niara mikaka täte ye mike tuin ütiäte krubäte jai?” ye mikadre ñärärä).

¹⁴ Nitre kä nebätä tä ni mike tuin ño jai ye erere Jehová ñaka ni mike tuin jai ye ngwen törö jai (ñäkädre 1 Samuel 16:7 yebätä).c Nitre kä nebätä tä ni mike tuin ütiäte jai nünanta kwin o ni ja tötikabare ye ngwane, akwa Jehová töi ñan ye erere (Is. 55:​8, 9). Yebätä ni ütiäte nuäi bätä töbikadre ngwane, Jehová töi ño yebätä töbikadre. ¿Yekäre dre käkwe mä dimikai? Nitre kirabe ie ja namani ruin ngwarbe, ñan ütiäte ye kädekateta Bibliabätä yebätä töbikadretari, ñodre Elías, Noemí aune Ana. Ño Jehovakwe mikani tuin ütiäte jai ye mä mikatari ñärärä. Arato ñongwane Jehovakwe mä tarebare aune mä ütiäte krubäte bämikani kwe mäi ye mäkwe tika täräbätä jai. Mä raba kukwe mada känene bäri jai ja ruin ngwarbe mäi yebätä täräkwata bianta juta Ngöbökwe yebätäd

15. ¿Ñobätä Jehovakwe niebare Daniel ie “Mä ütiäte krubäte”? (Daniel 9:23).

¹⁵ Mäta ja ngwen metre yebätä Jehová kräke mä ütiäte krubäte ngwen törö jai. Ni Ngöbö kukwe niekä Daniel kä nämäne bäsi 100 biti ngwane, bati ja namani ruin ngwarbe aune di ñakare ie (Dan. 9:​20, 21). ¿Ye ngwane Jehovakwe dre nuainbare dimikakäre? Niara orasion kukwe nuabare ye mikakäre gare ie, ángel Gabriel juani kwe känti aune niebare kwe ie: “Mä abokän ütiäte krubäte” (ñäkädre Daniel 9:23 yebätä).e ¿Ñobätä Jehová nämä mike tuin kore jai? Töi kwin keta kabre yebätä, ñodre nämäne ni mada tarere, ñan ni mada nuainne tare aune ja ngwen metre yebätä (Ezeq. 14:14). Jehová käkwe kukwe ne tikamana täräbätä ni dimikakäre arato (Rom. 15:4). Daniel erere Jehovata orasion nikwe kukwe nuin aune tä ni mike tuin ütiäte jai, ñobätä ñan aune kukwe metre nita tarere bätä ja ngwanta metre ie yebätä (Miq. 6:​8, nota; Heb. 6:10).

16. ¿Jehová rabadre tuin nie ni Rün ni tarekä kwrere gäre dre nuaindre? (Üai mikadre ñärärä).

¹⁶ Ni rün kwe ni tare kwrere mä Jehová mika tuin jai. Dre nuainta blo ye ñan ai mikata ñärärä kwe, ñakare aune tö ni dimikabätä (Sal. 130:3; Mat. 7:11; Luc. 12:​6, 7). Töbikadretari kukwe nebätä ye käkwe nitre kwatí dimikanina ja ñaka rabadre ruin ngwarbe aune ñan ütiäte ie yekäre. Ñodre, ani töbike Michelle, niara ye käi España, muko kwe nämäne ngrentebiti ñäke tare ie ye köböire ja nämä nemen ruin ngwarbe aune ñan ütiäte ye kwrere ie kä kwatí te. Aune ni madakwe niara ñaka nämäne tare nämä nemen ruin jabätä ie. Niara tä niere: “Jata nemen ruin ngwarbe tie ñan ütiäte ye kwrere ngwane, ni Rünkwe ni tare krubäte tä ni kriemike aune tä niken ni ngwena ja kise mrökate ye kwrere tita Jehová bämike ja okwäte yeta ti dimike” (Sal. 28:9). Meri testiko käi Sudáfrica tä niere akwle jai: “Jehová ara jatani ti ngwena ja kokwäre ‘kö ja tare yebiti’, aune kä kwatí nete niara tä käre tibe ti dimikakäre. Ti köböire niara tä nitre mada tötike, aisete nemen gare metre tie ti ütiäte krubäte niara kräke” (Os. 11:4).

17. ¿Jehovata mä kain ngäbiti ye kukwe meden köböire raba nüke gare mäi? (Salmo 5:12).

¹⁷ Jehovata mä kain ngäbiti ye mike tuin era jai (ñäkädre Salmo 5:12 yebätä).f Jehová tä ni kain ngäbiti ye “escudo kri” kwrere tä ni ja ngwanka metre kriemike niebare Davidkwe. Jehovata mä kain ngäbiti aune tä mä kriemike yekwe mä dimikai mäta nemen töbike blo jabätä aune mä ñan ütiäte tä nemen ruin mäi ye ngwane. ¿Akwa Jehovata mäbe metrere ye ñokänti rabai gare mäi? Nibira gare nie erere, niarakwe ni tare krubäte ye niebare nie ja kukweibätä. Ne madakäre, nitre umbre konkrekasion jie ngwanka, ja ketamuko aune ja mräkätre yebiti tä niere nie ni abokän ütiäte krubäte kräke. Kukwe kwin nieta nie ni dimikakäre ye ngwane, ¿nikwe kadre ngäbiti ño?

18. ¿Kukwe kwin niei mäi ngwane, ñobätä mäkwe kadre ngäbiti?

¹⁸ Ni iti ie mä gare kwin aune tä mä tarere ye tä kukwe kwin niere mäi ngwane, mä ñaka ye kita temen. Ñobätä ñan aune ja mräkätre yebiti Jehová tä mä kain ngäbiti raba mike gare mäi. Michellebätä blitanina käne tä kukwe ne erere niere: “Kukwe kwin nieta tie ye ñaka nemen nuäre tie ka ngäbitikäre, akwa bätärekä bätärekä tita ja di ngwen kain ngäbiti, ñobätä ñan aune Jehová tö ti tuai ye erere nuainne”. Arato töi kwinbiti nitre umbre tä niara dimike medenbätä matare niara tä sribire prekursora kwrere aune tä sribire Betel ben ja gwirete.

19. ¿Mä ütiäte krubäte Jehová kräke ye ñobätä tädre era mä kräke?

¹⁹ Ni Rün kri kä kwinbiti Jehová kwe ni tare krubäte ye Jesukwe mikani gare nie kukwe nuärebiti (Luc. 12:24). Aisete mä ütiäte kri Jehová kräke ye mä ngwan törö jai. ¡Ñan käi kwitaka jabiti! Arato Jehová kräke ni mada ütiäte krubäte ye mäkwe ja di ngwan mike gare nitre ye ie.