¿Mäta ja töi mike nemen siervos ministeriales?

1. ¿Ja mräkätre siervo ministerial ye nämäne tuin ño Pablo ie?

JA MRÄKÄTRE siervo ministerial ye tä sribi ütiäte nuainne konkrekasionte. Ja mräkätre brare ja ngwanka metre ye nämäne tare Pablokwe bämikani kwe. Pablo tärä tikani ja mräkätre Filipos ie ngwane, nitre siervo ministerial aune nitre umbre ji ngwanka konkrekasionte ye kädekaninte kwe (Filip. 1:1).

2. ¿Luis tä sribire siervo ministerial erere yebätä ja ruin ño ie?

² Ja mräkätre kwati bati aune umbre kädekata siervo ministerial ye tä sribire kä jutobiti. Ñodre, Devan kä nämäne 18 biti ngwane kädekani aune Luis kä nämäne 50 biti bäri kädekani. Ja mräkätre siervo ministerial ie ja ruin ño ye ja mräkä ne tä mike gare. Kukwe niebare kwe nebiti: “Tita sribire siervo ministerial erere ye käi juto tibätä akwa bärira jire ja mräkätre konkrekasionte tä ti tarere ye ngwane”.

3. ¿Kukwe ngwantarita meden ni bike mike gare jai?

³ Ja mräkätre brare munkwe ja ngökanina ñöte aune mun kädeka jämi siervo ministerial ngwane, ¿mun raba kukwe ne mike nuaindre ja kä jai? ¿Drekwe mun töi mikai nuainne? ¿Kukwe ja jie ngwankäre Bibliabätä meden mä rabadre mike täte? Kukwe ngwantarita ne rabadi gare nie kukwe ja tötikara nebätä. Akwa käne ni siervo ministerial ye tä dre nuainne ye ani mike gare jai.

¿NI SIERVO MINISTERIAL YE TÄ DRE NUAINNE?

4. ¿Ni siervo ministerial ye tä dre nuainne? (Üai mikadre ñärärä).

⁴ Ni siervo ministerial ye abokän ja mräkätre brare ja ngökani ñöte aune kädekani üai deme köböire, ye tätre ja mräkätre umbre ji ngwanka ye dimike sribi keta kabrebätä. Niaratre ruäre tätre publicaciones aune programa ükete ne kwe territorio tädre ja mräkätre ie kukwe driekäre. Kwati mada abokän tätre Ju Ja Ükarakrö mike mrebe aune ükete. Mada abokän tätre sribire ni käi ükatekä ye erere o audio aune video yebätä konkrekasionte. Bätä tätre Jehová tarere, tä dite ja üairebiti aune Jehová töita ño ye ererebätä tätre ja ngwen. Arato tätre ja mräkätre konkrekasionte tarere (Mat. 22: 37-39). ¿Ja mräkä brare ja ngökanina ñöte yekwe dre nuaindre ne kwe kädekadre siervo ministerial?

5. ¿Dre nuaindre rabakäre siervo ministerial?

⁵ Ja mräkä iti kädekadre siervo ministerial yekäre raba dre nuainne ye Biblia tä mike gare (1 Tim. 3:​8-10, 12, 13). ¿Raba nemen bare ño mäi? Dre ribeta Bibliakwe yebätä ja kitadre aune ja di ngwandre mikakäre täte. Aune ñobätä mäta nuainne yebätä mäkwe töbika kwin käne.

¿ÑOBÄTÄ MÄ TÖ RABAI SIERVO MINISTERIAL?

6. ¿Drekwe ni dimikai ja töi mike sribire ja töi bobrebiti ja mräkätre kräke? (Mateo 20:28; üai kena täräkwatabätä mikadre ñärärä).

⁶ Ani töbike ni iti käkwe kukwe kwin bämikani ni käne yebätä ye abokän Jesús. Niara nämäne Rün tarere aune nitre jökrä tarere ye käkwe töi mikani sribire. Ja tare bökän ye nämäne niara töi mike metre kukwe nuainne töi bobrebiti ni mada kräke (ñäkädre Mateo 20:28 yebätä; Juan 13:​5, 14, 15). Mäta ni mada tarere ye tä mä töi mike kukwe nuainne ngwane Jehová kukwe kwin mikai nemen bare mä kräke aune mä dimikai kwe nemen siervo ministerial (1 Cor. 16:14; 1 Ped. 5:5).

7. ¿Ja mräkä iti töta nemen jondron ie akwa ñaka töi kwinbiti yebätä ñobätä rabadre ja ngübarebiti?

⁷ Kä nebätä nitre töita ja mikabätä bäri ütiäte akwa juta Jehovakwe yete ye erere ñaka nemen bare. Jesús erere ja mräkätre tä ni mada tarere ngwane, ñaka töita rababätä ütiäte ni mada gobrainbätä o sribi ütiäte mikadre kisete yei. Ja mräkä iti tä bike kri ye kädekadre ngwane sribi kia kia ribeta ja mräkätre konkrekasionte ngübakäre ye ñan tö rabadre kain ngäbiti ñobätä ñan aune kadre ngäbiti kwe ngwane niara ye ñan ütiäte ni mada kräke rabadre ruin ie (Juan 10:12). Ni iti tä bike kri aune töita jondron tuabätä jakwe aibe ye kräke Jehovakwe ñaka kukwe kwin mikai nemen bare (1 Cor. 10:​24, 33; 13:​4, 5).

8. ¿Jesukwe dre niebare apóstol ie?

⁸ Ruäre ngwane ja ketamuko kwin krubäte Jesukwe käkwe ja di ngwani ne kwe kukwe ütiäte rabadre kwetre. Akwa ñaka nuainbare kwetre töi kwinbiti. Ye abokän namani bare apóstol Juan aune Santiago yebätä. Jesús rabadre gobrane ngwane niaratre mikadre ütiäte kwe ribebare kwetre ie. Akwa ye käi ñaka namani juto Jesubätä yebätä kukwe ne niebare kwe apóstol ni jätäbiti nibu yei: “Nire nire tö rabai bäri ütiäte kri mun ngätäite ye abko käkwe sribidre ni bobre kwrere ni mda mdakrä amne, nire nire mun ngätäite tö rabai bäri käne jändrän jökräbtä, ni ye abko rabadre ni klabore kwrere ni mda mdakrä” (Mar. 10:​35-37, 43, 44v). Ja mräkätre tätre ja di ngwen töi bökänbiti ne kwe sribi ütiäte mikadre kisete konkrekasionte ye abokän tä nemen kukwe kwin krubäte ye kwrere ja mräkätre kräke (1 Tes. 2:8).

¿DREKWE MÄ TÖI MIKAI JA DI NGWEN NITRE MADA DIMIKABÄTÄ BÄRI?

9. ¿Dre nuain raba ja töi mikakäre sribire bäri ni madakrä?

⁹ Jehová aune ja mräkätre tare mäkwe, akwa mä töi ñaka rababätä siervo ministerial ngwane, ¿dre raba mä dimike ne kwe mä töi rabadre ja mräkätre dimikabätä bäri? Mä raba töbike nita ja mräkätre dimike ngwane tä kä mike juto nibätä yebätä. Ye abokän Jesukwe niebare erere: “Nita jändrän bien ni mdaye, btä käta neme bäri nuäre nibtä ni jändrän kaka ngäbti ye ngwä” (Hech. 20:35). Jesús nämäne käre kukwe ja jie ngwankäre ne mike täte ye medenbätä kä nämäne jutobätä. Ye erere mäkwe nuaindi ngwane mä töi ni mada dimikabätä ye käkwe kä mikai juto mäbätä.

10. Jesús nämäne kukwe nuainne ni mada kräke nämäne kä mike jutobätä ¿ye bämikani ño kwe? (Marcos 6:​31-34).

¹⁰ Jesús nämäne ni mada dimike ye nämäne kä mike jutobätä ye ani ngwen törö keteiti jai (ñäkädre Marcos 6:​31-34 yebätä). Bati Jesús aune apóstol nämäne nainte krubäte yebätä nikani kä kaibe känti jadükakäre. Akwa nitre kwati nikanina niaratre känenkäre ne kwe Jesukwe kukwe driedre ietre. Jesús tö rabadre akräke ñaka kadre ngäbiti kwetre ñobätä ñan aune niaratre ie “kä ñan namani mrökrä ietre”. O Jesús tö rabadre akräke kukwe kwati krobu niedre kwe ie biti rikadre mento. Akwa niaratre nämäne tare krubäte Jesukwe yebätä “nikani kukwe dirire kabre bätäkä ngwarbe ietre”. Kä nükani ruin Jesubiti ngwane “kä jatani dere” gani kwe (Mar. 6:35). Niara ñan kukwe ye nuainbare mikani nuainne ja dibiti yebätä, ñakare aune “namani tuen bobre ie” aune nämäne tare kwe. Erametre niara nämäne ni mada dimike ye nämäne kä mike jutobätä.

11. ¿Jesukwe nitre nämäne niara kukwe nuin ye dimikani ño? (Üai mikadre ñärärä).

¹¹ Jesús nämäne kukwe driere nitre ie akwa arato niaratre nämäne dre ribere jai ye nämäne bien ietre. Jesukwe kukwe ñan tuabare nuainbare, mrö mikani kwe nirien ere. Biti döräi mananbare kwe nitre discípulo yei (Mar. 6:41). Yebiti sribidre ño ni mada kräke ye Jesukwe bämikani niaratre yei. Arato ja mräkätre dimikadre kukwe ruäre tätre ribere jai, yebätä ja mräkätre siervo ministerial tä nuainne erere ye ütiäte arato ye Jesukwe mikani gare. ¡Kä namani juto apostolbätä ye bämike ja töite! Jesús dimikani kwe mrö döräire nitre jökrä yebiti. Ye köböire ni kwati käkwe mröbare aune namanintre trine jökrä (Mar. 6:42). Ye ñan aibe ngwane Jesukwe nitre mikani käne nämäne dre ribere jai yebiti ta. Ñobätä ñan aune niara nämäne kä tibienbätä ngwane, käre nitre mada nämäne dre ribere jai yebätä töi nämäne (Mat. 4:23; 8:16). Jesús nämäne nitre mada tötike aune nämäne dimike kukwe ribe nämäne kwetre jai yebätä ngwane ja nämäne nemen ruin kwin ie. Jesús erere ja raba nemen ruin mäi arato. Mä täi juto biare nitre mada dimikakäre siervo ministerial erere.

12. ¿Ñobätä nikwe ñaka nütüdre ni ñan raba ja mräkätre konkrekasionte ye dimike jire?

¹² Kukwe nuain ñaka gare mäi ruin mäi ngwane, mäkwe ñan töbika. Ñobätä ñan aune kukwe ruäre nuain gare mäi yebiti mä raba ja mräkätre konkrekasionte dimike. Kukwe käkwe mä dimikai ye abokän oradre biti mäkwe ñäkä 1 Corintios 12:​12-30 yebätä. Yete Pablo tä mike gare mrebe, mä aune ni mada Jehová mikaka täte ye jökrä ütiäte krubäte konkrekasionte. Ye medenbätä dre ribeta ni iti kädekakäre siervo ministerial ye erere, jämi nemen bare mäi ngwane mäkwe ñaka ja ngwan di nekä. Bäri kwin mäkwe ja di ngwan jankunu ja mräkätre dimikakäre aune mä raba dre nuainne Jehovakrä ye erere nuainkäre. Mäkwe ye erere nuaindi ngwane nitre umbre ji ngwanka konkrekasionte käkwe sribi nuain raba mäkwe ye erere mikadi mä kisete (Rom. 12: 4-8).

13. ¿Kukwe ribeta ni iti kädekakäre siervo ministerial yebätä dre tädre gare nie?

¹³ Kukwe jökrä tä Bibliabätä ye ni kristiano rabadre bäsi jökrä mike täte ye mäkwe ngwen törö jai ye käkwe mä dimikai arato ja töi mike nemen siervo ministerial. Ni kristiano jökrä rabadre krötö Jehová ken. Ni mada dimike ye käi ngwen juto jabätä aune ja ngwen kwin. Akwa ja mräkä brare iti konkrekasionte kisete sribi ütiäte mikadre ie tö ngwane, ¿drebätä rabadre ja töi mike metrere?

KUKWE MEDENBÄTÄ SRIBIDRE BÄRI

14. ¿Ja mräkätre kristiano mikadre “ütiäte jai” nieta ngwane drebätä blitata? (1 Timoteo 3:​8-10, 12).

¹⁴ Dre nuaindre mikata gare 1 Timoteo 3:​8-10, 12 ye ani mike ñärärä (ñäkädrebätä). Ja mräkätre siervo ministerial ye rabadre ja di ngwen sribi jökrä mikata kisete konkrekasionte o asignación bianta ie ye mike täte. ¿Kukwe ne tä dre mike gare? Ye abokän niaratre mika raba “ütiäte jai”, tätre ja ngwen ño yebätä. Akwa niaratre ñan rabadre kötö ja denkä ye ñan ai gärätä ñakare aune raba ja denkä aune kä ngwen juto jabätä arato (Ecl. 3:​1, 4). Ye köböire niara tä ja ngwen ño yebiti ja mräkätre rabai mike ütiäte jai tö ngwen ie aune konkrekasion dimike.

15. Ñan rabadre “ni ngökö” aune ñan ja töi mikadre kwe jondron tuabätä jakwe kukwe käme köböite ¿ye dre gärätä?

¹⁵ Ñan rabadre “ni ngökö”. Rabadre blite bökän, kukwe era niere aune tö ngwan rabadre ie. Dre niedre kwe ye erere rabadre mike nemen bare (Prov. 3:32). ‘Ñan tö rabadre jondron tuabätä jakwe jondron kämekäme köböire’. Tä jondron rürübäine ngwane o ngwian konkrekasionte yebiti rabadre kukwe era niere, ñan rabadre kraire ja mräkätre kristiano yebätä ngwian ganainkäre jai.

16. a) ¿“Ñan dö ñarekwe krubäte” nieta ye dre gärätä? b) ‘Ni töi tädre kwin’ o ja ñan tädre ruin ngite nie ¿ye dre gärätä?

¹⁶ “Ñan dö ñarekwe krubäte”. Ye abokän ñan käikitaka tätre dö ñabätä krubäte. Ne madakäre ‘töi tädre kwin’ ja ñan tädre ruin ngite ie ñobätä ñan aune tä nüne Jehová töi ye erere. Bäkänä ni töi ngite akwa ni raba nüne jäme Jehovabe nita ja kete kwin ben ye köböire.

17. ¿Sribi nuain gare ja mräkätre ie ye ñokänti raba nemen gare? (1 Timoteo 3:10; üai mikadre ñärärä).

¹⁷ Kukwe mada ütiäte rabadre nuainne ye abokän “känenkri tä nüne kuin ya, ñakare ya abko mikadre ñäräre käne”. Ye abokän tö ngwan raba ie kukwe ruäre nuainkäre rabadre bämike. Ye köböire ja mräkätre umbre ji ngwanka sribi mikai kisete ngwane, ja di ngwandre kwe mikakäre täte juta Jehovakwe tä nuainmana ño ye ererebätä. Kukwe keteiti nuainkäre dre dre ribeta ye tädre gare mrebe ie aune ñongwane ribeta ye kräke arato. Täi ja di ngwen sribi mikata kisete ye nuainkäre ngwane jutuai ja mräkätre ie aune tä ja di ngwen ririakäre ye jutuai bätä. Nitre umbre ji ngwanka konkrekasionte, ni ja ngökanina ñöte tärä konkrekasionte ngwane, mun raba kite (ñäkädre 1 Timoteo 3:10 yebätä). Ñodre konkrekasion munkwe yete, ¿monsotre bati tärä abokän tä ja tötike kaibe Bibliabätä? ¿Tä comentario bien gätäte aune kukwe driere? Ye erere ngwane, mun raba sribi ruäre mike niaratre kisete kä kwäbe bititre ye ererebätä. Ye köböire monsotre bati ye rabai ünä. Rabaira kädekadre ni siervo ministerial erere ngwane täi juto biare sribi ye nuainkäre.

18. ¿Ni ñan ja mike ngite nieta ye dre gärätä?

¹⁸ Ja mräkätre siervo ministerial ye ñan tädre ja mike ngite. ¿Ye dre gärätä? Ye abokän ja mikani ngite kwetre ye ñan nie tädrebätä. Bäkänä ni kristiano rüere kukwe ngwarbe niedi niebare Jesukwe, namani bare Jesubätä ye erere (Juan 15:20). Akwa ja mräkätre täi ja di ngwen ja ngwankäre deme o mrebe Jesús erere ngwane, konkrekasionte blitadre kwin bätätre (Mat. 11:19).

19. ¿Ni brare tädre gure “meri itibe” ben nieta ye ben töite rabadre dre ngwen törö jai?

¹⁹ Ja mräkä kristiano tö rabai siervo ministerial yekwe “meri itibe” tädre. Kukwe ükaninte Jehovakwe kenanbe ye rabadre mike täte. Ni brare iti aune meri iti aibe tädre jabe (Mat. 19:​3-9). Ja mräkätre kristiano ye ñan rabadre ja mike gure bati bati (Heb. 13:4). Akwa ye ñan aibe nuaindre kwe ñakare aune rabadre ja ngwen metre muko kwe ie aune ñan rabadre okwä mike meri mada jiebiti (Job 31:1).

20. ¿Ja mräkä brare iti tä mräkä kwe jie ngwen kwin ye tä bämike ño?

²⁰ Arato ja mräkätre siervo ministerial ye rabadre“ngäbriänkä kwekwe btä mräkä kwekwe jie tikadre kuin kwe btä ngibiadre kuin kwe”. Nire tä ji dokwäre mräkätre käne ye rabadre sribi tä kisete ye nuainne kwin. Rabadre ja tötika ja mräkäbe bämän kratire kratire ye nuainne. Rabadre ja di ngwen kukwe driekäre käre mräkätre kwe yebe. Rabadre monso kwe dimike ja kete kwin Jehovabe (Efes. 6:4). Ja mräkä kristiano brare ye rabadre mräkätre kwe ngübare kwin yebiti rabai bämike raba konkrekasion jie ngwen arato (1 Timoteo 3:5 mikadre ñärärä).

21. ¿Mä kädeka jämi siervo ministerial ngwane mä raba dre nuainne?

²¹ Mä jämi siervo ministerial ngwane nunta mä nübaire orare Jehovai aune ja tötike kukwe ja tötikara nebätä. Dre dre ribeta ni iti kädekakäre siervo ministerial ye mäkwe mika gare jai. Jehová tare nuäi mäkwe aune ja mräkätre tare nuäi mäkwe yebätä mäkwe töbika aune mäkwe ja di ngwan sribikäre bäri kräke (1 Ped. 4:​8, 10). Ye köböire mäta sribire mä mräkätre ja üairebiti kräke ye käi rabai juto mäbätä. ¡Jehovakwe mä dimikadre nemen siervo ministerial ye ie nun tö! (Filip. 2:13).