Nitre biani ‘jondron ngwarbe kwrere’ nie yebätä nita debe bien krubäte

1. ¿Kukwe meden kwin bianta ngwarbe Jesukwe nie?

NI ÑAKA jire iti kä tibienbätä ja ngwanka mantiame krubäte Jesús erere. Ñodre, niara nämäne kä tibienbätä ngwane ja di kwe yebiti kukwe kwin nuainbare kwe nitre kräke aune ye köböire nitre kwati dimikani kwe (Luc. 9:​12-17). Aune kukwe bäri kri nuainbare kwe ni jökrä kräke ye abokän ja nire biani kwe ni ütiäre (Juan 15:13). Nükaninta nire ye bitikäre ja ngwani mantiame kwe jankunu. Üai deme käkwe ni töi mikadre jäme aune ni dimikadre ye tä ribere käre Jehovai ni kräke käbämikani kwe ye erere (Juan 14:​16, 17, nota; 16:13). Ne madakäre gätä yebiti tä ni tötike ye köböire nikwe kukwe driedre bäri kwin nitre jökrä käbiti tibien ie (Mat. 28:​18-20).

2. ¿Nitre ruäre meden abokän bianta “jondron ngwarbe” ye kwrere nie? (Efesios 4:​7, 8).

² Akwa kukwe ne ñan aibe biani Jesukwe ngwarbe nie. Ñakare aune apóstol Pablo mikani gare erere Jesús nikaninta kä kwinbiti ye ngwane nitre biani “jondron ngwarbe” ye kwrere kwe nie mikata gare (ñäkädre Efesios 4:​7, 8 yebätä). Nitre ye rabadre kukwe keta kabre nuainne konkrekasionte yekäre Jesukwe biani ye mikani gare kwe (Efes. 1:​22, 23; 4:​11-13). Kä nengwane “jondron biani ngwarbe” kwe nie ye abokän ruäre nitre siervos ministeriales, nitre umbre konkrekasionte aune ni ni circuito tuabitikä.a Metrere niaratre ye ngite aisete kukweta nainte ietre arato (Sant. 3:2). Niaratre ye ütiäte krubäte ñobätä ñan aune niaratrebiti Jesús tä ni dimike.

3. Nitre biani regalo kwrere nie Jehovakwe ¿ye ni raba dimike ño? Mä raba mike gare.

³ Nitre biani Jesukwe “jondron bianta ngwarbe” ye kwrere yebiti tä konkrekasion dimike (Efes. 4:12). Ni jökrä raba sribi ütiäte tä nitre ne kisete ye dimike. Kukwe ne rükadre gare kwin nie yekäre kukwe ne bämike ja töite. Ju Ja Ükarakrö sribeta ye ngwane, nitre ruäre tä ju ye sribere, mada tä nike mrö ngwena, mada tä niken nitre ngwena karo kwe yebiti o kukwe mada nuainta kwetre sribi ye dimikakäre. Ye erere arato nitre umbre konkrekasionte, nitre siervos ministeriales, nitre ni circuito tuabitikä ye kisete sribi ruäre tä yebätä ni jökrä raba niaratre dimike dre nieta nikwe o dre nuainta nikwe yebiti. Nitre ne tä sribire ja dibiti ye köböire dre kwin tä nemen nikwe ye nikwe mikai gare jai aune nita debe bien niaratre aune Jesús ie ye ni raba bämike ño ye nikwe mikai gare jai.

NITRE SIERVO MINISTERIAL YE TÄ JUTO NITRE DIMIKAKÄRE

4. ¿Nitre siervos ministeriales ye nämäne ni mada “die mike” ño siklo kena yete?

⁴ Siklo kena ye ngwane, nitre brare ruäre kädeka nämäne siervos ministeriales (1 Tim. 3:8). Nitre ni mada dimikaka niebare Pablokwe 1 Corintios 12:28 yete ye ngwane, nämäne blite nitre nebätä raba ruin nie. Nitre ne nämäne sribi ütiäte ruäre nuainne ne kwe nitre umbre yekwe ja töi mikadre kwatibe nitre mada tötike aune nitre tuinbiti. Ñodre nitre siervos ministeriales ne nämäne copia Kukwe Ngöbökwe yebätä ye sribere o jondron meden ribe nämäne copia sribekäre ye nämänentre kökö raba ruin nie.

5. ¿Nitre siervos ministeriales ye tä sribi meden nuainne kä nengwane?

⁵ ¿Nitre siervos ministeriales ye kisete sribi meden tä nengwane? (1 Ped. 4:10). Siervos ministeriales ye tä ngwian bianta konkrekasionte ye täine, medente kukwe driedre ye tä ükete, tä tärä aune täräkwata ye kärere döräikäre nitre kukwe driekä yebiti, mada tä sribire audio aune video yebätä konkrekasionte, mada abokän tä nitre ka ngäbitikäre gätäte, aune tätre kukwe ükete ne kwe Ju Ja Ükarakrö ye tädre kwin yekäre. Kukwe jökrä ne ütiäte krubäte ne kwe konkrekasion ye tädre kwin (1 Cor. 14:40). Ne madakäre gätä Nita Dirire aune Ja Ngwen Ño yete asignación bianta nitre siervos ministeriales yei, gätä bämän krüte yete kukwe kädriedre kwe ribeta ietre. Arato niaratre ye kädekata grupo kukwe drie jie ngwanka dimikaka. Ruäre ngwane nitre umbre raba niken ngwena jabe ja mräkätre tuinbiti.

6. ¿Ñobätä debe bianta nitre siervos ministeriales yei?

⁶ ¿Nitre siervos ministeriales tä sribi nuainne yebätä debe bianta krubäte ietre? Ja etebantre käkwe kukwe ruäre niebare niaratrebätä ye ani mike gare jai. Meri testiko iti käi Bolivia kädekata Beberlyb tä niere: “Nitre siervos ministeriales ye köböire ti raba gätä ye käi ngwen juto täte jabätä. Tä sribire ye tä ti dimike kantare, blite gätäte, kukwe kädrieta ye kukwe nuin, aune video bätä üai mikata tuare ja kitakäre nunye, aune gätäte nun tädre kwin yekäre tä nun ngübarebiti. Arato tätre ja mräkätre mike videoconferencia yete. Gätä bitikäre Ju Ja Ükarakrö mikata mrebe ye dimikata kwetre aune ngwian bianta ja töi jeñebiti ye tätre täin aune täräkwata ja tötikakäre ye tädrera nunkwe ye tä mike gare jai. ¡Tita debe bien kri ietre!”. Ni umbre iti ji ngwanka Colombia muko kwe kädekata Leslie ye tä niere: “Nitre siervos ministeriales ye tä ti muko dimike krubäte. Sribi tädre krubäte ti muko ye kisete niaratre ye ñan tädre ngwane. Niaratre tä juto biare sribi bianta ietre ye ka ngäbitikäre aune tä nuainne kä jutobiti yebätä tita debe bien krubäte ietre”. Ja mräkätre ne erere, nita debe bien krubäte nitre siervos ministeriales ie (1 Tim. 3:13).

7. ¿Nitre siervos ministeriales ie debe bianta ye bämika raba ño? (Üai mikadre ñärärä arato).

⁷ Ruäre ngwane ni töi raba nemen debe biain nitre siervos ministeriales ye ie. Akwa nita “debe” bien ye bämikadre nieta Bibliakwe (Col. 3:15). Ni umbre ji ngwanka konkrekasionte kä Finlandia kädekata Daavid tä niere: “Tita tärä chi tike yete tita texto keteiti kädekete aune drebätä siervos ministeriales iti ti dimikani ye tita niere ie, yebätä sribita kwetre ye ütiäte krubäte ye tita mike gare ie”. Pascal aune Jael nünanka Nueva Caledonia ye tä siervos ministeriales ye kädekete orasion kwetre yete aune tä niere: “Bitinkä nun jatani nitre siervos ministeriales ye kädekete bäri orasion nunkwe yete. Aune Jehovakwe dimikadre ye nunta ribere ie”. Jehovata orasion nunkwe ye kukwe nuin ye köböire konkrekasion yekwe kukwe kwin tä nemen (2 Cor. 1:11).

NITRE UMBRE KONKREKASION JIE NGWANKA YE TA ‘SRIBIRE JA DIBITI’

8. ¿Siklo kena ye ngwane nitre umbre nämäne sribire krubäte ye ñobätä Pablokwe niebare? (1 Tesalonicenses 5:​12, 13).

⁸ Nitre umbre nämäne sribire krubäte siklo kena yete (ñäkädre 1 Tesalonicenses 5:​12, 13 yebätä; 1 Tim. 5:17). Niaratre nämäne gätä ye jie ngwen aune kukwe ruäre nämäne diandre jai ietre ye ngwane nämänentre ja ükekrö. Ne madakäre nämänentre mäträre metre ta ja eteba o ja ngwai yebätä akwa töi jämebiti ne kwe konkrekasion tädre kriemikani (1 Tes. 2:​11, 12; 2 Tim. 4:2). Ne madakäre niaratre nämäne ja di ngwen rabakäre kwin kukwe ja üairebiti aune nämänentre mräkätre kwe ye ngübare kwin (1 Tim. 3:​2, 4; Tito 1:​6-9).

9. ¿Sribi ruäre meden meden nuainta nitre umbre ji ngwanka konkrekasionte yekwe nengwane?

⁹ Kä nengwane nitre umbre konkrekasionte ye tä sribire krubäte aune tätre kukwe driere arato (2 Tim. 4:5). Tä kukwe kwin bämike kukwe driebätä. Nikwe kukwe driedre ño aune nitre tötikadre ño bäri kwin ye tä driere nie. Aune kä kukwe driekäre konkrekasion ie ye tädre ükete arato. Ne madakäre niaratre ye ni kukwe ükatekä töi bobre aune ñaka nitre kitete jire. Ni iti tä ja mike ngite krubäte ye ngwane, niaratre tä dimike ne kwe rabadreta ja kete kwin Jehovabe. Aune konkrekasion tädre mrebe ye tä mike gare kwin jai (1 Cor. 5:​12, 13; Gál. 6:1). Metrere ni umbre konkrekasion jie ngwanka ye ni ngübaka (1 Ped. 5:​1-3). Tätre ja ükete kwin krubäte kukwe kä driekäre ni jökrä kräke. Tä ja di ngwen ja mräkätre jökrä konkrekasionte ye mikakäre gare jai. Aune tädre niken ja mräkätre itire tire tuinbiti dimikakäre. Ne madakäre ni umbre ji ngwanka ye tä sribire Ju Ja Ükarakrö yebätä aune ükateta ye ngwane arato. Gätä kri ükateta yebätä tätre sribire aune nitre umbre dianinkä ruäre tä blite doctore ben (Comités de Enlace con los Hospitales) yebätä tä sribire arato. Ja mräkätre umbre konkrekasionte ye tä ni bren ye tuinbiti aune sribi mada tätre nuainne. ¡Niaratre tä sribire krubäte ni kräke!

10. ¿Ni umbre ji ngwanka konkrekasionte tä kukwe meden nuainne abokän bätä niaratre tare nikwe?

¹⁰ Pastor ye käkwe obeja ngübai kwin krubäte niebare Jehovakwe aune obeja ye “ñan rabai nekwetekä aune kä jürä ñan rabaibätä” (Jer. 23:4). Aune kukwe ye erere namani bare meri testiko kädekata Johanna nünanka Finlandia yebätä meye kwe namani bren krubäte ye ngwane. Niara tä niere: “Ja driedre ni madai ye ñan nuäre ti kräke, akwa bati ni umbre ñan gare tie ye käkwe ti kukwe nuaba kwekebe aune oraba kwe tibe. Arato Jehovakwe ti tare krubäte ye mikaba gare kwe tie. Dre nieba kwe tie ye ñan törö tie, akwa ye ngwane ja rababa ruin kriemikani tie, Jehovakwe niara juani ti dimike ti nämä ribere jai ye ngwane, ye rükaba gare tie”. ¿Aune mä? ¿Ni umbre konkrekasionte mä dimikanina ño?

11. ¿Nita debe bien nitre umbre ji ngwanka konkrekasionte ie ye ni raba bämike ño? (Üai mikadre ñärärä).

¹¹ “Sribi nuenta” nitre umbre yekwe yebätä tare kri nikwe aune nita mike ütiäte jai ye nikwe bämikadre ietre ye ie Jehová tö (1 Tes. 5:​12, 13). Henrietta, nünanka Finlandia tä mike gare: “Nitre umbre ye tä nitre mada dimike kä jutobiti akwa ja mräkätre ne kwe kä nemente krubäte, niaratre di krubäte, kukwe tare ñan nemen bare bätätre ye ni ñan nütüdre. Yebätä tita nökrö niaratre iti ken ye ngwane tita niere ietre: ‘¿Dre gare mäi? Mä ni ji ngwanka kwin krubäte”. Meri testiko iti kädekata Sara nünanka Turquía tä niere: “Kukwe kwin niedre ja mräkätre umbre ji ngwanka konkrekasionte yei ‘tätre ribere jai’ sribikäre ja dibiti jankunu ja käne. Yebätä tita tärä tike chi kräketre, tita nübaire mröre o tita kukwe driere ben”. ¿Ni umbre iti ie mä tö debe bien krubäte ye nüke mä töite? ¿Mä raba dre nuainne bämikakäre ie? (1 Cor. 16:18).

NI CIRCUITO TUABITIKÄ TÄ KONKREKASION DIMIKE

12. ¿Jondron meden mada biani ngwarbe Jesukwe konkrekasion dimikakäre? (1 Tesalonicenses 2:​7, 8).

¹² Jesukwe jondron mada ütiäte biani konkrekasion ye ie. Siklo kena yete Jesukwe nitre umbre ji ngwanka Jerusalén jie ngwani ye köböire Pablo, Bernabé aune nitre kristiano mada juani ni tuabitikä erere (Hech. 11:22). ¿Drekäre? Nitre siervos ministeriales aune nitre umbre ji ngwanka konkrekasionte tä kukwe nuainne nengwane ye erere nuainkäre ye abokän konkrekasion dimike (Hech. 15:​40, 41). Nitre brare ne käkwe kukwe ñan nuäre nuainbare aune ja nire kwe ye mikani kukwe tare te kwe nitre mada tötikakäre aune die mikakäre (ñäkädre 1 Tesalonicenses 2:​7, 8 yebätä).

13. ¿Nitre ni circuito tuabitikä ye kisete sribi ruäre meden tä?

¹³ Nitre circuito tuabitikä ye tä näin bä kabre kä jene jene känti. Konkrekasion ruäre mente krubäte känti tä nementre. Aune bämä kratire kratire tätre kukwe keta kabre kädriere gätäte. Arato tätre nitre tuinbiti, tätre gätä nitre prekursor ben ye jie ngwen, gätä nitre umbre kräke ye jie ngwen aune gätä kukwe driekäre ye jie ngwen. Kukwe keta kabre kädrie ye tä ükete. Gätä kri aune gätä circuito kräke ye tä ükete arato. Ne madakäre, kwela nitre prekursor ben ye tä jie ngwen. Nitre prekursor especial circuitote ye kräke tä gätä ükete. Aune sribi keta kabre mada ütiäte bianta sukursalkwe ietre ye tä nuainne.

14. ¿Kukwe ruäre meden medenbätä nita debe bien ni circuito tuabitikä ye ie?

¹⁴ ¿Nitre circuito tuabitikä tä sribire kwin krubäte ye köböire dre kwin tä nemen konkrekasion yekwe? Ni testiko brare iti käi Turquía tä niere: “Tä nüke konkrekasion nukwe tuinbiti ngwane, käre tä ti dimike rababätä ja mräkätre ye ngätäite dimikakäre. Ni circuito tuabitikä kabre garera tie, akwa jire iti ye kisete sribita krubäte o ñan tö blitai ye ñan bämike”. Johannabätä blitani párrafo 10 känti, ye nikani kukwe driere ni circuito tuabitikä yebe akwa ni ñan kwani gwi jire iti ietre, akwa niara tä niere: “Ni ñan kwanba jire gwi nunye yebiti ta köbö ye ñaka käi rikwitaikä jire tibiti. Ti eteba nibu tikwe ti nämä uliere krubäte rikaba nüne kä madakänti yebätä. Ni circuito tuabitikä ye nieba, nengwane ni raba nüne mente ni mräkätrebätä akwa ja känenkäre ye ñan rabai bare ñobätä ñan aune kä täi kabre nie nünankäre keteitibe, kukwe nieba kwe tie ye ti töi mikaba jäme”. Ja mräkätre kwati dimikata krubäte ni ni circuito tuabitikä yekwe yebätä niaratre tare krubäte (Hech. 20:​37–21:1).

15. a) ¿Ni raba 3 Juan 5-8 ye mike ño täte aune nitre ni circuito tuabitikä ye ütiäte ni kräke nita bämike ño? (Üai mikadre ñärärä). b) ¿Ja mräkätre circuito tuabitikä muko yebätä ja töi mikadre siba ye ñobätä ütiäte aune nuain raba ño? (Recuadro “Ja mräkätre ni tuabitikä muko ngwandre törö jai” ye mikadre ñärärä).

¹⁵ Apóstol Juan käkwe Gayo töi mikani ja töi mike mantiame aune ja mräkätre nikani konkrekasion tuinbiti ye dimikadre kwe ribebare kwe ie. Niebare kwe ie: “Jändrän ñakare kwetre, yebtä makwe die mika. Makwe niaratre die mikadre ño, ie Ngöbö tö, ye kwrere makwe die mika niken mentokwäre ji ngrabare abko tita ribere mae” (ñäkädre 3 Juan 5-8 yebätä). Ni raba kukwe ye erere nuainne nengwane, ye abokän nikwe ni circuito tuabitikä nübaidre mröre ja gwirete aune kukwe ükateta bämän ye ngrabare ye kräke ja mikadre juto. Lesliebätä blitani párrafo 6 yekänti ye, tä debe bien krubäte aune ye bämikakäre niara tä niere: “Ja mräkätre ye tä dre ribere jai ye Jehovakwe biandre ietre ye tita ribere krubäte Jehovai orasionte. Ti muko aune ti nunta tärä tike niaratre ie känti nunta niere ie, niaratre ye tä nun dimike krubäte tä nüke nun tuinbiti ye ngwane”. Nitre ni tuabitikä ye ruäre ngwane tä nemen bren, töbikakwe tä kisete aune ruäre ngwane dita nekä arato ye medenbätä niaratre die tärä ja tuakäre kukwe jökrä ben ye ñan nütüdre. Akwa niaratre tä ja di kärere Jehovai orasionte aune Jehová raba mäbiti niaratre dimike orasion nuainta kwetre ye mike nemen bare. Ñodre mäkwe kukwe kwin nie ietre o jondron biain ietre yebiti (Prov. 12:25).

NITRE BRARE RABADRE “JONDRON BIANI NGWARBE” KWRERE YE RIBETA BÄRI

16. ¿Ja mräkätre rabadre kukwe meden ütiäte krubäte ngwentari jai? (Proverbios 3:27).

¹⁶ Kä jökräbiti tibien nitre brare rabadre “jondron biani ngwarbe” ye kwrere konkrekasion kräke ye ribeta. Mä ja ngökanina ñöte ye erere ngwane, ¿mäta juto konkrekasion dimikakäre? (ñäkädre Proverbios 3:27 yebätä).c ¿Mäta ja di ngwen ne kwe mä kädekadre siervos ministeriales? ¿O mä kädekanina siervos ministeriales ngwane, mäta juto biarebe ja mräkätre dimikakäre ne kwe mä kädekadre ni umbre ji ngwanka konkrekasionte?d ¿Mä raba kukwe ükete jai aune ja kä tike solicitud Kwela Gobran Ngöbökwe Driedre kräke yebätä? Kwela ye köböire mä raba sribire bäri Jesús kräke. Kukwe ne ñan raba nemen bare mäi mä raba nütüre ngwane, mäkwe ja drie Jehovai. Niarakwe ja üai deme kwe biandre mäi ne kwe sribi ño erere mikadre mä kisete ye rabadre bare kwin mäi ye mäkwe ribe ie (Luc. 11:13; Hech. 20:28).

17. ¿Sribi nuainta ja dibiti nitre brare Jesukwe biani jondron ngwarbe kwrere yekwe ye tä dre bämike?

¹⁷ Nitre brare tä sribire ja dibiti krubäte ye Jesús tä bien jondron biani ngwarbe ye kwrere ye tä bämike niara tä juta kwe ye jie ngwen kä mrä ne näire (Mat. 28:20). Gobran nikwe ye kwe ni tare, nita dre ribere jai ye tä juto biarebe biankäre nie aune tä ja mräkätre bien nie ni dimikakäre. Kukwe jökrä nebätä ni tä debe bien ie, ¿ñan ererea? Ye medenbätä ari kukwe känene bämikakäre ie aune nikwe debe biandre krubäte ie ye ñan käi kwitadrekä jabiti ñobätä ñan aune “Ngöbö ye ara jire käta jändrän jökrä kuin amne metre ni die mikakrä ye bien nie” (Sant. 1:17).