¿Mä tö rabai ni umbre ji ngwanka konkrekasionte?

1, 2. ¿“Sribi meden meden ütiäte” krubäte nuainta nitre umbre ji ngwanka yekwe?

KÄ NIKANINA kwati ta mäta kädekani siervo ministerial ngwane, kukwe Bibliabätä mikadre täte ribeta ye mä niena nuainne raba ruin nunye. ¿Mäta ja di ngwen ne kwe sribi ütiäte ye mikadre mä kisete? (1 Tim. 3:1).

² ¿Nitre umbre ji ngwanka konkrekasionte ye tä dre nuainne metrere? Tätre kukwe drie jie ngwen, tä ja mräkätre tuinbiti aune tötike arato tä dre niere aune ja ngwen ño yebiti tä konkrekasion dimike. Ye meden arabätä Biblia tä niere, niaratre ye abokän ‘regalo ye kwrere’ (Efes. 4:8).

3. ¿Dre dre ribeta ni brare kristiano iti kädekakäre ni umbrere konkrekasionte? (1 Timoteo 3:​1-7; Tito 1:​5-9).

³ ¿Dre dre ribeta ni iti kädekakäre ni umbrere ji ngwanka konkrekasionte? Ni iti kädekakäre ni umbrere ye abokän ñaka täräkwata keteitibätä, ja kä tikata kukwe ruäre ribetabätä sribi känänkäre ye erere. Sribi känänta ngwane, ni iti yei jondron ruäre nuain tädre gare ye köböire sribi biain raba ie. Akwa ni iti tä kukwe driere kwin o tä nitre tötike kwin ye aibe ribeta bätä, kädekakäre ni umbrere konkrekasionte. Ñakare aune dre dre ribeta Bibliakwe tä tikani 1 Timoteo 3:​1-7 aune Tito 1:​5-9 ye rabadre mike täte (ñäkädrebätä). Kukwe ketamä ribeta ja mräkä brare testiko kädekakäre ni umbrere konkrekasionte yebätä nikwe ja tötikai kukwe ja tötikara nebätä: blita rabadre kwinbätä konkrekasionte aune nitre ñaka kukwebätä ye ngätäite tädre mräkä kwe jie ngwen kwin aune tädre juto biare ja mräkätre konkrekasionte dimikakäre.

BLITA RABADRE KWINBÄTÄ

4. ¿‘Ñan ñäkä tädre blo’ ni brare kristiano iti yebätä ye dre gärätä?

⁴ Kukwe keteiti ribeta ni iti kädekakäre ni umbrere konkrekasionte ye abokän ‘ñan ñäkä tädre blo bätä’. Ye abokän konkrekasionte niara tä ja ngwen blo nie ñan tädrebätä. Ne madakäre, “kädrie tädre kwin nitre ñan näin kukwebäkwe”. Kukwe mikata täte kwe ye ererebätä tä ja ngwen aune ñan kukwe blo nuainne, yebätä nitre ñan kukwebätä tädre ñäke blo bätä ngwane, kukwe Bibliabätä ye tä mike täte metre (Dan. 6:​4, 5). Mäkwe kukwe ne ngwantari jai: “¿Nitre ñan kukwebätä aune konkrekasion ye tä blite kwin tibätä?”.

5. ¿“Kukwe kwin taredre” nieta ngwane, ye dre gärätä?

⁵ “Tädrera kukwe kuinkuin tarere” ye abokän kukwe kwin ja mräkätrebätä ye mikadre ñärärä kwe aune töi kwin o tä ja ngwen kwin yebätä kukwe kwin niedre kwe ietre. Ne madakäre dre nuainta kwe ja mräkätre kräke ye käi tädre juto bätä, ruäre ngwane ja di ngwandi bäri kwe ja mräkätre dimikakäre (1 Tes. 2:8). ¿Nitre umbre ji ngwanka konkrekasionte rabadre kukwe ne erere nuainne ye ñobätä ütiäte krubäte? Ñobätä ñan aune kä ribedi krubäte kwe jai ja mräkätre konkrekasionte tuabitikäre aune sribi tä kisete ye mikakäre nemen bare (1 Ped. 5:​1-3). Yebitita tädre ja di ngwen krubäte ye käita nemen juto bätätre (Hech. 20:35).

6. ¿Ni iti tä ni mada kai ngäbiti kwin nieta ngwane, ye drebätä blitata? (Hebreos 13:​2, 16; üai mikadre ñärärä).

⁶ Ni iti“tädrera juto biare ni menteni kaen ngäbti ja juete” ñan tädre ja ketamuko kwe aibe kai ngäbiti kwin (1 Ped. 4:9). Täräkwata keteiti ja tötikakäre tä kukwe ne erere mike gare “jukwe tä tikani ye kwrere, ni brukwä tädre tikani nitre ñan gare nie ye ka ngäbitikäre kwin”. Kukwe ne ngwentari jai: “¿Ti abokän tä ni kai ngäbiti kwin nieta tibätä?” (ñäkädre Hebreos 13:​2, 16 yebätä). Ni iti ni ka ngäbitikä kwin ye abokän, dre tärä kwe ye tä bien nire kwe jondron ñaka yei. Ja mräkätre tä sribire ja dibiti, ñodre ja mräkätre ni tuabitikä aune ja mräkätre kukwe kädriekä ye dimikata kwe (Gén. 18:​2-8; Prov. 3:27; Luc. 14:​13, 14; Hech. 16:15; Rom. 12:13).

7. ¿Ni umbre ji ngwanka konkrekasionte ñaka ngwian tarere ye tä bämike ño?

⁷ “Ñan tärä ngwian tarekä”. Ne abokän ñan rabadre ja töi mike jondron kä nebätä ye tuabätä bäri jakwe. Jondron bäkäne o bobre akwa rabadre kukwe Gobran Ngöbökwe ye mike nuaindre käne jai (Mat. 6:33). Kä kwe, ja di kwe o dre dre tärä kwe yebiti rabadre Jehová mike täte, rabadre mräkätre ngübare aune konkrekasion dimike (Mat. 6:24; 1 Juan 2:​15-17). Ngwentari jai: “¿Tita töbike ño ngwian yebätä? ¿Jondron tärä tikwe ye debe tikrä? ¿O tita ja töi mike ngwian ganainne bäri o jondron tuabätä bäri jakwe?” (1 Tim. 6:​6, 17-19).

8. ¿Ni iti “ja ngwen kwin” dre nuainta kwe yebiti aune “ja ngübabiti gare ie” ye tä bämike ño?

⁸ Ni iti “tä ja ngwen ño” aune “tä ja ngübarebiti” yebiti tä bämike tä nüne kwin. Ye abokän ñan mröre kri o jondron ñain ere krubäte, tä ja ngwäkite ño, tä ja dätere ño aune kä kwe yebiti tä dre nuainne yebätä tä ja ngübarebiti arato. Arato nitre tä ja ngwen kä nebätä ye erere ñaka ja ngwen (Luc. 21:34; Sant. 4:4). Ne madakäre, kukwe raba mike rubun akwa tä ja töi mike jäme. Ni ye ñaka kädrieta “ni dö ñaka krubäte” ye kwrere. Kukwe ne ngwentari jai: “¿Ja ngübabiti gare tie aune tita kukwe nuainne debe näre tita bämike tita nüne ño yebiti?”.

9. ¿“Ni töi tädre kwin ja käne” aune “kukwe tädre ükaninte kwin” nikwe ye abokän dre gärätä?

⁹ Ni umbre ji ngwanka “töbike kwin ja käne” ye tä kukwe jökräbätä töbike käne dre nieta Bibliabätä ye ererebätä ye köböire tä kukwe kwin den nuaindre jai. Aune ñan tä kukwe den nuaindre jötrö ngwarbe jai. Ñakare aune, tä töbiketari känebätä (Prov. 18:13). Ye köböire tä kukwe den nuaindre jai ngwane, tä töbike Jehová ye erere. Arato tä “ja ükete kwin” kukwe jökrä tä ükaninte kwin kwe ye ngwane tö ngwan raba niarabiti. Kukwe keteiti mikata nuaindre ie ye ngwane. Kukwe jökrä ye köböire blitata kwinbätä. Ja känenkäre mada, ni umbre ji ngwanka mräkätre käne yekwe töi kwin meden mada tädre ribeta Bibliakwe erere ye ani mike gare jai.

TÄDRE MRÄKÄ KWE JIE NGWEN KWIN

10. ¿Ni brare iti “rabadre mräkä kwe jie ngwen kwin” nieta ye dre gärätä?

¹⁰ Kukwe mada ribeta ja mräkä kristiano iti kädekakäre ni umbrere ji ngwanka ye abokän mräkätre kwe yebätä blita tädre kwin. Ye medenbätä rabadre “mräkä jie ngwen kwin” ribeta ie. Niara abokän ji ngwanka kwin mräkä käne, ni mada tarere aune käre ja mike täte nie tädrebätä kukwe ja üaire nuainkäre käre tädre ji ngwen. ¿Ñobätä kukwe ne ütiäte krubäte? Ñobätä ñan aune, Pablokwe niebare: “Ñobätä ñan aune ni iti ie ju kwe jie ngwan ñaka gare angwane, ¿se ño mada konkrekasion Ngöbökwe ngübadre kwe?” (1 Tim. 3:5;TNM).

11, 12. ¿ Ni kristiano iti kädekakäre ni umbrere konkrekasionte monsotre kwe rabadre ja ngwen ño? (Üai mikadre ñärärä).

¹¹ Nitre rüne kwe monso tä kia ngwane, rabadre tötike aune tädre mäträrebätä aune “monso kwe rabadre mike täte ” ye kwin krubäte. Monsotre kia raba ja denkä, kä ngwen juto jabätä akwa nitre rüne yekwe tötikai kwin ngwane, täi mike täte, ni mada mike ütiäte aune täi ja ngwen kwin. Arato nitre rüne rabadre monso kwe dimike ja kete kwin Jehovabe aune nüne kukwe ja jie ngwankäre Bibliabätä ye ererebätä, ne kwe rabadre nirien jankunu ja üairebiti ja ngökakäre ñöte.

¹² “Ngäbäkre kwe diän diän amne dokwä ribi ribi ñan niedre btä”. Akwa ni rüne monsoi kukwebätä ye käkwe ja mikadre ngite krubäte ngwane, ¿dre rabadre bare? Ni rüne kristiano ye ñan niena monso tötike, tä ja ngwen blo akwa ñan niena töibikaire ngwane, ñan kädeka raba ni umbrere ji ngwanka konkrekasionte (La Atalaya 15 octubre 1996, página 21, párrafo 6 aune 7 mikadre ñärärä).

TÄDRE JUTO BIARE JA MRÄKÄTRE KONKREKASIONTE DIMIKAKÄRE

13. ¿Ni iti tä “kukwe mike nüke gare kwin käne jai” aune “ñan ja dokwä ngwen ribi” ye tä bämike ño?

¹³ Töi kwin keta kabre tä Bibliabätä ye erere ja mräkä kristiano tä ja ngwen ngwane, ye kwin krubäte konkrekasion kräke. Ñodre, ja mräkä iti ye “ni moto jäme” tä kukwe mike nüke gare jai ye köböire tä ja mräkätre dimike nüne jäme jabe. Mä abokän ie kukwe nüke gare niedre mäbätä ie mä tö ngwane, mäkwe ni mada kukwe nua aune tä dre niere ye mäkwe mika ütiäte jai. Nitre umbre ja ükadrekrö gätäkäre ye ngwane, ¿ja mräkätre umbre bäri kwati ie kukwe keteiti rabadre tuin kwin ye mikadre ütiäte kwe jai kukwe ye ñäkäi ñaka Bibliabätä ngwane? Ni umbre ji ngwanka ‘ñaka rabadre ja dokwä mike ribi’. Ye abokän, kukwe tuin ño ie ye erere ñaka ni mada mikadre ja dibiti nuainne kwe. Ni kwati töbätä käkwe mäträdre ye bäri tädre gare ie (Gén. 13:​8, 9; Prov. 15:22). “ni romone ñakare, amne ni btä kukwe ñan matare” ñakare aune, töi jämebiti rabadre blite aune blita tädre gare kwin ie ni madabe. Niara ‘töi jäme’ ye medenbätä, ja di ngwain kukwe ne kwe kä tädre jäme kukwe ñan kwin tä nemen bare ye ngwane (Sant. 3:​17, 18). Tä kukwe nuäre niere nitre mada tä nemen ja ngwen blo ye töi mikakäre jäme arato nitre tä ja mike ni rüere ye kräke arato (Juec. 8:​1-3; Prov. 20:3; 25:15; Mat. 5:​23, 24).

14. ¿Ñobätä ni iti “krire kukwebätä ja ngökani ñöte” ye kädeka ñan raba ni umbrere konkrekasionte aune “tädrera kukwe kuinkuin tarere” ye raba bämike ño?

¹⁴ Ni iti tädre ‘krire kukwebätä ja ngökani ñöte’ ye kädeka ñan raba jötrö ngwarbe ni umbrere ji ngwanka. Kä jämi niken kwati ta ja ngökani ñöte kwe, akwa ja ngökani kwe ñöte nüke nengwane rabadrera tän ja üairebiti. Aune kädeka jämi ni umbrere konkrekasionte ye känenkri tädre ja ngwen töi bobre Jesús erere aune medente Jehová tö aune ñongwane tö ja mikamana täte ye erere rabadre nuainne (Mat. 20:23; Filip. 2:​5-8). Arato, “tädrera kukwe kuinkuin tarere” rabadre bämike kukwe ükaninte Jehovakwe mikata täte kwe, aune Jehovata kukwe bien juta kwe köböire ye mikata täte kwe yebiti (1 Tim. 4:15).

15. ¿Ni kristiano iti tädre kukwe kädriere bängrabe ye ngwane, kädekadre ni umbrere konkrekasionte?

¹⁵ Ngöbö kukwei tä mike gare mrebe nire tä ni mada tuinbiti ye ie ‘ni mada tötika tädre gare kwin’. ¿Ye abokän kukwe kädriekä kwin aibätä blitata? Ñakare. Ñobätä ñan aune ja mräkätre kwati umbre ji ngwanka tärä akwa ñan gare kukwe kädrieta kwin kwe yebätä, ñakare aune kukwe drie gare kwin ietre aune tädre ja mräkätre tuinbiti yebätä (1 Corintios 12:​28, 29 aune Efesios 4:11 mikadre ñärärä). Akwa ja mräkä brare kristiano iti törbai ni umbrere konkrekasionte ngwane, rabadre ja di ngwen ne kwe ni tötika tädre gare ie. ¿Raba nuainne ño?

16. ¿Ño ni brare kristiano iti raba nemen dirikä kwin krubäte? (Üai mikadre ñärärä).

¹⁶ ‘Rabadre kukwe Bibliabätä ye mike täte metre’. Ni umbre ji ngwanka rabadre dirikä kwin yekäre rabadre käre kukwe Bibliabätä ye ererebätä blite nitre kwati okwäbiti o tä mäträre ni itibätä kaibe ngwane. Rabadre ja tötike Bibliabätä aune täräkwata bianta juta Ngöbökwe yebätä (Prov. 15:28; 16:23). Tädre ja tötike kaibe ye ngwane, bersikulo keteitire keteitire Bibliabätä raba mike ño täte yebätä rabadre ja töi mike. Aune tä nitre mada tötike ngwane, kukwe raba mate ño nitre brukwäte yebätä tä ja töi mike. Kukwe keteiti raba dimike ye abokän ni umbre ji ngwanka bäri käne kräke ie kukwe gare bäri ye ie rabadre ja di kärere (1 Tim. 5:17). Ja mräkätre umbre ji ngwanka ye ie ja mräkätre mada ‘dimika tädre gare’ akwa käre rabadre nuainne töi kwinbiti, rabadre mäträre o ja mräkätre “töi ükete” ye ngwane. Niaratre ye erere nuaindi aune kukwe nieta kwe ye erere tä Bibliabätä niedi kwe ngwane, rabai ja mräkätre tötikaka kwin krubäte aune täi ja ngwen Ni Dirikä Bäri Kri, Jesús ye erere (Mat. 11:​28-30; 2 Tim. 2:24).

MÄKWE JA DI NGWAN JANKUNU

17. a) ¿Dre raba ja mräkätre siervo ministerial ye töi mike nemen ni umbre ji ngwanka konkrekasionte? b) ¿Ja mräkätre umbre ji ngwanka konkrekasionte ye rabadre töbike drebätä, ja mräkä iti kädekakäre ni umbrere konkrekasionte? (Recuadro “Nitre umbre, munkwe kukwe mika nüke gare kwin jai nitre mada dimikakäre”).

¹⁷ Kukwe ruäre ribeta ni iti kädekakäre ni umbrere konkrekasionte mirira gare jai ye bitikäre nitre siervo ministerial raba nemen nütüre, kukwe ye ñaka raba nemen bare jire ie. Akwa munkwe ngwan törö jai kukwe ye mikadre täte metre aune kukwe ñan randrete jire nie ye juta Jehovakwe aune Jehová ñan ribere nie (1 Ped. 2:21). Ne madakäre, üai deme Jehovakwe ye köböire kukwe ye raba nemen bare nie (Filip. 2:13). ¿Akwa mä tö töi kwin keta kabre nibi gare nie, ye keteitibätä sribidi bäri? Ye erere ngwane, mäkwe ora Jehovai, mäkwe kukwe känä aune ja mräkätre umbre ji ngwanka ye ie mäkwe ja dimikamana kukwe nuainkäre.

18. ¿Nitre siervo ministerial jökrä ye töi tädre dre nuainbätä?

¹⁸ Ni jökrä, arato nitre umbre ji ngwanka konkrekasionte rabadre töi kwin keta kabre miri gare jai kukwe ja tötikara nebätä ye mike täte (Filip. 3:16). Mä abokän siervo ministerial ngwane, mäkwe ja di ngwan jankunu rabakäre ni umbrere konkrekasionte. Akwa yekäre mä rabadre ja di kärere Jehovai, mä tötikadre kwe aune mä rabadre ütiäte kräke bätä konkrekasion kräke ye mäkwe ribe ie (Is. 64:8). Mäkwe ja di ngwain krubäte rabakäre ni umbrere ngwane, Jehovakwe kukwe kwin mikai nemen bare mäkrä.