Mä tare Jehovakwe

1. ¿Ñobätä mäkwe ja dianinkä mento Jehová kräke? (Üai mikadre ñärärä).

¿MÄKWE ja dianinkä mento Jehová kräke ye törö mäi? Jehová namani gare bäri mäi aune mä namani tarere yebätä mä kukwe ye diani jai. Niara töi ye rabai bäri ütiäte mä kräke ye mä käbämikani ie aune yebätä mäkwe taredi ja brukwä tätebiti, ja töi tätebiti aune ja di tätebiti ye mä käbämikani ie (Mar. 12:30). Yete ja käne, mäta niara tarere ye jatani nirien bäri. Yebätä ni iti kukwe ngwandretari mäi,“¿Jehová tare metre mäkwe?”, ye ngwane bengwairebe mäkwe niedre: “¡Jän tare tikwe! Kukwe ñokwa biti ta niara bäri tare tikwe”.

2, 3. ¿Dre ie Jehová tö? (Jeremías 31:3). ¿Dre rabai gare nie kukwe ja tötikara nekänti?

² “¿Jehovata mä tarere ye era mä kräke?” kukwe ne ngwandretari mäi ngwane, ñan rabadre nuäre mikakäre gare mäi. Ñobätä ñan aune, Jehová ñaka ja tare bämikadre mäi ye mäta nemen nütüre yebätä. Meri testiko iti ñaka tarebare nämäne chi ye ngwane yekwe niebare: “Jehová tare tikwe ye gare metre tie. Akwa, niarakwe ti tare o ñakare ye tita nemen ngwentari ruäre ngwane jai”. Akwa ¿Jehová ie mä tuin ño?

³ Jehovakwe ni tare ye nikwe mikadre era jai ie niara tö (ñäkädre Jeremías 31:3 yebätä).a Jehová tö namani mä tuai ja ketamuko kwe yebätä mä jatani kwe ja kokwäre. Mäkwe ja dianinkä mento kräke aune ja ngökani ñöte ye ngwane, kukwe ütiäte biani kwe mäi: ja tare metre kwe ye biani kwe mäi. Aune ja tare ye dite aune kärekäre ye tä bämike ni niara mikaka täte ye ie aune mä arato. Ja tare ye köböire mä mikani “jen jakwe kwe” (Mal. 3:​17, nota). Jehovakwe mä tare o ñakare yebätä mä ñan rabadre töbike ye ie tö, ñakare aune Pablo ie ja nämäne ruin ño ye erere ja rabadre ruin mäi ye tö, yete niebare kwe: ‘Jändrän ñakare jire kä raba Ngöbö töi kwite ni krütadre ya o ni tädre nüne ya, angele köböire amne üai kämekäme köböire Ngöbökwe ñan ni kitadrekä ja okwä bäre mento, kukwe mtare amne kukwe jatadi ni rüere, ye abko ñan raba Ngöbö töi kwite abtä niara ñan raba ni tarere mda, jändrän kä käinbti ya o jändrän bäri mente nguse sete ya ñan raba Ngöbö töi kwite jire chi ni tarebtä’ (Rom. 8:​38, 39). Jehovakwe ni tare ye tädre era ni kräke aune dre käkwe ni dimikai ye mike bäri era jai ye ütiäte krubäte ye rabai gare nie kukwe ja tötikara nekänti.

JEHOVAKWE MÄ TARE YE TÄDRE ERA MÄ KRÄKE YE ÜTIÄTE KRUBÄTE

4. ¿Drebiti Satana tä ni ngökö aune ñaka ni ngökadre kwe yekäre dre nuainne?

⁴ Jehovakwe ni tare ye tädre era ni kräke ye köböire ni täi “dite jabtä” aune ñan rabai nuäre Satana kräke ni ngökakäre (Efes. 6:11). Ni ñan tare Jehovakwe ye erere nikwe töbikadre ie Satana tö, nikwe ñaka Ngöbö mikadre täte yekäre. Satana ye abokän kwra lion ye kwrere nieta Bibliabätä (1 Ped. 5:​8, 9). Metrere, kwra lion ye abokän jondron nire tä bobre, di ñakare aune kriemikaka ñaka ye ngwane, tä biarebe mike ñärärä kwetakäre. Ye erere arato Diablu ye tä nuainne nita ulire, nita di ñakare, nita töbike krubäte kukwe rabai bare ja känenkäre yebätä o kukwe namani bare kirabe nibätä yebätä (Prov. 24:10). Ni ñan töi rabadre ye erere yekäre nikwe ñan Satana tuadremetre ja ngökö aune ja di ngwandre Jehovakwe ni tare ye mikakäre era jai (Sant. 4:7).

5. ¿Jehovakwe ni tare aune ni ütiäte kräke tädre gare nie ye ñobätä kwin?

⁵ Ni tare Jehovakwe ye tädre era ni kräke ye ngwane ni rökradi bäri niara ken. ¿Ñobätä nunta ne niere? Ñobätä ñan aune, Jehovakwe ni töi mikani ni mada tarere aune ja rabadre ruin tarebare nie yekäre. Ni iti käkwe ja tare bämikadre nie ye ngwane, ni töi rabai nierare niara tarebätä siba. Ye medenbätä, Jehovakwe ni tare aune ni tuin ütiäte ie rabai era ni kräke ngwane, ni rabai niara tarere bäri arato (1 Juan 4:19). Aisete, nikwe taredi bäri ngwane, niarakwe ni taredi bäri siba, ñobätä ñan aune Biblia tä niere: “Krötö Ngöbö ken munkwe amne Ngöbökwe krötadi mun ken” (Sant. 4:8). Jehovakwe ni tare ye tädre era ni kräke yekäre dre käkwe ni dimikai ye nibike mike gare jai ja känenkäre.

¿JEHOVAKWE MÄ TARE YE DREKWE MÄ DIMIKAI MIKE ERA JAI?

6. ¿Jehovakwe mä ñan tare ruin mäi ngwane mäkwe dre nuaindre?

⁶ Jehovakwe mä tare ye tädre era mä kräke yekäre mäkwe ja di ribere bä kabre ie ne kwe mä dimikadre kukwe ye mike nüke gare jai (Luc. 18:1; Rom. 12:12). Aune niara ie mä tuin ño ye erere rükadre gare mäi ye mäkwe käräi ie. Akwa yebiti ta niarakwe ñaka mä tare raba ruin mäi ngwane, niara ye bäri kri mä brukwä ye kräke ye mä ngwanta törö jai (1 Juan 3:​19, 20). Aune mä gare bäri kwin ie aune mä töi kwin keta kabre ñan tuin mäi ye tuin kwin niara ie (1 Sam. 16:7; 2 Crón. 6:30). Aisete ja ruin ño mäi ye mäkwe niei ie aune niarakwe mä tare ye mikadre nüke gare kwe mäi ye mä niei ie arato (Sal. 62:8). Mäkwe dre ribe orasionte ye erere mäkwe ja töi mika nuainne. Aune kukwe meden nuain raba mäkwe ye ani mike gare jai.

7, 8. ¿Jehová tä ni tarere ye Salmos raba ni dimike ño mike era jai?

⁷ Jehovakwe mä tare ye mike era jai. Üai deme ye köböire Jehovakwe nitre kwati te mikani töi kwin keta kabre niarabätä ye tike Bibliabätä. Ñodre, David käkwe kukwe bä nuäre ne niebare: “Jehová tä nitre brukwä nötaninte ye ken; nitre tä di nianinkä krubäte ye mikata kwäre kwe” (Sal. 34:18). Ja ruin ye erere mäi ngwane, nitre madai ye mä töi ño ye ñaka nüke gare aune ñaka raba mä dimike raba nemen ruin mäi. Akwa ye ngwane metrere Jehová tädi mä ken mä dimikakäre tä käbämike mäi. Aune salmo mada känti, Davidkwe niebare: “Jehová mäkwe ti okwä ñöi ye mika nibi kwata sribebare ñö ngwäre yete” (Sal. 56:8). Nitre nämäne niken kä nötare yete ta ngwane, nämäne niken ñö ngwena jai nibikwata yete, ye ngwane ñö ye nämäne nemen ütiäte kräketre. Ye erere arato, nita ja tuin kukwe tare ben ye ngwane, okwä ñöi ye tä nemen tuin ütiäte krubäte Jehovai nita ja tare nike yebätä niara töita krubäte nibiti. David käkwe kukwe ne niebare Jehová ie: “Ti jie ye gare kwin mäi” (Sal. 139:3). Ji medenbiti nita näin ye gare jökrä Jehovai aune dre kwin nuainta nikwe yebätä tä ja töi mike metrere (Heb. 6:10). ¿Ñobätä? Ñobätä ñan aune, ni töita kwatibe niara mikabätä täte ye tuin ie yebätä tä mike tuin ütiäte jai.b

⁸ Texto keta kabre käkwe ni dimiri nebiti Jehová tä ne niere nie: “Tita mä tarere ye tädre gare mäi ie ti tö aune ti töita bökän mäbätä”. Akwa, nibira gare nie erere, Satana abokän ñaka tö ni tuai töbike ye erere. Ye medenbätä, Jehovakwe ni tare o ñakare ye ngwantari tä nemen jai ngwane ni raba kukwe ne ngwentari: “¿Nire mike era tikwe jai: Satana ‘ni kukwe ngwarbe niekä’ o ‘Ngöbö kukwe metre niekä’?” (Juan 8:44; Sal. 31:5).

9. ¿Nitre tä Jehová mike täte yei tä dre käbämike? (Éxodo 20:6).

⁹ Nire tä Jehová tarere ye tuin ño ie yebätä töbiketari. Ñodre, Moisés kukwe niebare nitre israelita ie yebätä (ñäkädre Éxodo 20:6 yebätä).c Nire tä niara tarere ye ie niara tä ja tare metre ye bämike. Aune niara ñaka ja tare köböiti kän (Neh. 1:5). Akwa, yebiti ta Jehovakwe mä tare ye ñan tuin era mäi ngwane, mä raba ngwentari jai: “¿Jehová tare tikwe?”. Ye bitikäre töbike nebätä: mäta Jehová tarere aune mäta ja di ngwen ja ngwankäre kwin ie ye ngwane niara kwe mä tare yei mä tö ngwan kwatibe (Dan. 9:4; 1 Cor. 8:3). Kukwe madabiti nie raba: Jehová tare metre mäkwe ye ngwane, niarakwe mä tare krubäte aune ñaka mä mikaite kaibe jire kwe yei mä tö ngwan kwatibe.

10, 11. ¿Jesús ja nire biani ye nikwe mikadre tuin ño jai ie Jehová tö? (Gálatas 2:20).

¹⁰ Töbiketari Jesús ja nire biani yebätä. Jesús ja nire biani ye abokän regalo bäri ütiäte Jehovakwe biani nitre kä tibienbätä ie (Juan 3:16). Akwa ñan Jesús juani kä tibienbätä kwe ja nire biankäre nitre jökrä aibe kräke, ñakare aune mä kräke arato. Kukwe namani bare apóstol Pablo yebätä töbike. Jämi ja mike kristiano ye ngwane kukwe blo nuainbare kwe akwa ja töi kwitani kwe ye bitikäre nämäne ja di ngwen kukwe blo nämene nüke töite yebätä (Rom. 7:​24, 25; 1 Tim. 1:​12-14). Jesús ja nire biani ye abokän regalo bäri ütiäte Jehovakwe biani ie mikani tuin kwe jai (ñäkädre Gálatas 2:20 yebätä). Jehovakwe üai deme biani ie kukwe ye tikakäre kwe Bibliabätä ñobätä ñan aune Jehová tö kukwe ütiäte ye mikai gare nie yebätä (Rom. 15:4). Aune Jesús ja nire biani ye rabadre regalo bäri ütiäte mä kräke arato ie niara tö. Mäkwe ja töi mikai ye erere ngwane, niara tä mä tarere ye mäkwe mikai bäri era jai.

¹¹ Nita debe bien krubäte Jehovai ñobätä ñan aune monso kwe juani ja nire biankäre kwe ni kräke yebätä. Akwa Jesús ñan jatani kä tibienbätä ja nire biankäre aibe. Ñakare aune, kukwe metre Ngöböbätä mikakäre gare aune Ngöbö töita ño monsotre kwe kräke ye mike gare (Juan 18:37).

JEHOVAKWE MÄ TARE YE DRIEBARE JESUKWE

12. ¿Jesukwe kukwe niebare Jehovabätä ye ñobätä ni rabadre mike era jai?

¹² Jesús nämäne kä tibienbätä ye ngwane, Jehová töi ño ye driebare kä jutobiti kwe (Luc. 10:22). Jesukwe dre niebare Rün kwe yebätä ye rabadre metre ni kräke. Niara aibe ie Jehová ye gare bäri kwin, ne madakäre kä kwati te tä kä kwinbiti Rün kwe yebe (Col. 1:15). Monsotre ja ngwanka metre Jehová ie kä kwinbiti aune kä tibienbätä ye ie Jehovata ja tare bämike ño aune tä mike tuin ño jai ye Jesús ie gare kwin aune tä tuin ja okwä jeñebiti. Jesukwe kukwe niebare ye raba ni dimike ño Jehovakwe ni tare ye mikakäre era jai ye ani mike gare ja känenkäre jai.

13. ¿Nikwe Jehová mikadre tuin ño jai ie Jesús tö?

¹³ Jesús nämäne Jehová mike tuin ño jai ye erere nikwe mikadre tuin jai ie niara tö: Jehová ye bämikani kwe ni Rün ni tarekä krubäte ye erere. Ne madakäre, tärä Evangelio ketabokä yebätä Jehová kädekani kwe “Ti Rün” 160 näre. Aune nämäne blite nitre ja tötikaka kwe ye ben ye ngwane nämene niere ie “Mun Rün” bätä “Mun Rün kä kwinbiti” (Mat. 5:16; 6:26). Nota de estudio Mateo 5:16 tä suliare tä mike gare: “Nitre ja ngwanka metre kirabe ye nämäne Jehová kädeke ‘Bäri dite’, ‘Bäri kri’ aune ‘Jondron Jökrä Sribekä’ […]. Akwa, nitre nämäne Jehová kädeke ne erere Jesukwe ñaka kädekani, ñakare aune ‘Ti Rün’ niebare kwe yebiti nire tä Jehová mike täte ye ie ja rabadre ruin kwin Jehová ben ye Jesús tö namani mikai gare”. Bobu jire Jesukwe Jehová kädekani “Rün kwe” ye ani mike gare jai.

14. ¿Ni ütiäte krubäte Jehová kräke ye Jesukwe bämikani ño? (Mateo 10:​29-31; üai mikadre ñärärä).

¹⁴ Kena, Jesukwe dre niebare Mateo 10:​29-31 yebätä ye ani mike gare jai (ñäkädrebätä). Bersikulo yekänti mikata gare nukwä gorrión tä mate bäbe tibien ye gare kwin Jehovai. Jondron nire kia ne ñaka Jehová tarere aune ñaka mike täte akwa Jehová töitabätä, bärira jire ni niara mikaka täte aune tarekä yebätä töi ñan tädre. Ne madakäre, kukwe nieta “mun abokän dokwä druen kratire kratire tä jökrä täinbare” tä bersikulo 30 yebätä nota de estudio suliare tä kukwe ne mike gare: “Kukwe kia kia ne kwrere gare kwin Jehová ie nebiti nemen gare nie Jehová töita ni itire itire tä Jesús mike täte yebätä”. Jehová ye abokän kwe ni tare krubäte ye rabadre era ni kräke ie Jesús tö ye nemen gare metre nie.

15. ¿Kukwe nieta Juan 6:44 yete dre nemen gare nie Jehovabätä?

¹⁵ Ketebu Jesukwe Jehová kädekaninte “Ti Rün tikwe” Juan 6:44 yekänti arato (ñäkädrebätä). Nebiti nemen gare nie Jehová jatani ni ngwena ja kokwäre ni namani tuin bobre ie ni brukwä kwin aune ni töi kwin ye gare ie yebätä (Hech. 13:48). Jeremías käkwe kukwe kädekaninte abokänbätä blitata kukwe ja tötikara nekänti ye Jesukwe kädekaninte Juan 6:44 yebätä nota de estudio suliare ye tä mike gare yete nieta: “Ti jatani mä ngwena ja kokwäre ja tare metre yebiti”. Bersikulo ne kwita raba ne kwrere arato “Tikwe ja tare metre ye bämikani jankunu mäi” (Jer. 31:3; nota; Oseas 11:4 mikadre ñärärä). Jehová täbe mä tarere yebätä töbike aisete mä töi kwin keta kabre ñaka tuin mäi tuin ie.

16. a) ¿Jesús tä dre driei nie aune ñobätä nikwe tö ngwandre ie? b) ¿Jehová ni Rün kwin krubäte ye ai nita ribere jai ye dre tä mike gare nie? (Recuadro “Ni Rün ne kwrere ni jökrä tä ribere jai” mikadre ñärärä).

¹⁶ Kukwe ne kwrere niere nie: “Jehová ye ñan ti Rün aibe; ñakare aune mä Rün arato. Aisete niara töita krubäte mäbätä ye gare metre tie”. Akwa, kukwe niebare Jesukwe yebiti ta, Jehová tä mä tarere ye ñan tuin era mäi ngwane Jesukwe dre niebare ye mä ngwanta törö jai niara tä kukwe metre niere aune Jehová ye gare bäri kwin ie aisete mäkwe mika era jai (1 Ped. 2:22).

JEHOVAKWE MÄ TARE YE KÄRE MÄKWE MIKA ERA JAI

17. ¿Jehová tä ni tarere ye ñobätä rabadre käre era ni kräke?

¹⁷ Nibira gare nie erere, Satana ye abokän ni rüe käme krubäte abokän ie ngöka gare tö ni tuai kämikekä Jehovabätä yebätä tä kukwe ñokwa nuainne ne kwe nikwe kämikadrekä Jehovabätä. Aune kukwe keteitibiti tä ni töi mike ye abokän Jehovakwe ni ñaka tare ye nikwe mikadre era jai ie niara tö. ¡Akwa nikwe ñaka tuanemetre ja töi kwite! (Job 27:5). Ye medenbätä, nikwe ja di ngwandre köbö kwatire kwatire Jehová tä ni tarere ye mikakäre era jai.

18. ¿Jehovakwe mä tare ye mikakäre era jai dre käkwe mä dimikai?

¹⁸ Dre raba ni dimike Jehovakwe ni tare ye mikakäre bäri era jai ye nibi gare nie kukwe ja tötikara nebätä. Kukwe ruäre ye abokän, Jehová töita ño nibätä ye erere nikwe töbikadre ye nikwe ribedre ie ni niara mikaka täte ye tä tarere krubäte ye texto Bibliabätä ruäre tä niere yebätä nikwe töbikadretari. Aune nire tä niara tarere ye niara tä tarere arato ye ngwandre törö jai. Ne madakäre, Jesús juani kä tibienbätä ja nire biankäre kwe ni itire itire kräke ye nikwe mikadre tuin regalo ütiäte ye kwrere jai. Jehová ye mä Rün niebare Jesukwe. Ye medenbätä, kukwe ne kwrere ngwandretari mäi “¿Metrere Jehová tä mä tarere?”, bengwairebe mäkwe: ¡Jän! niedi töi kwatibebiti. “Aune köbö kwatire kwatire tita ja di ngwen tita tarere ye bämikakäre ie” ye mäkwe nie.