KUKWE JA TÖTIKARA 20
Nikwe ja di ngwandre orare bäri kwin
“Munkwe ja brukwä ye mika gare ie” (SAL. 62:8).
KANTIKO 45 “Tita töbiketari ja brukwäte”
KUKWE NEBÄTÄ JA TÖTIKAIa
Ni raba orare käre Jehovai aune ja jie ngwamana ie kukwe jökräbätä (Párrafo 1 mikadre ñärärä)
1. ¿Jehovata ni nübaire dre nuainne? (Üai mikadre ñärärä).
NI TÖI mikadre jäme aune ni jie ngwandre ye nita ribere jai ngwane, ¿nire ie ni raba ja di ribere? Kukwe ye mikata gare metre nie: ni raba orare Jehovai. Niara tä ni nübaire nuainne. Nikwe oradre käre ie tä mike gare nie, ñobätä ñan aune tä niere: “Käre munkwe blita tibe” (1 Tes. 5:17). Ni raba orare töi jämebiti ie aune kukwe jökräbätä ni raba ja jie ngwamana ie (Prov. 3:5, 6). Jehová mantiame krubäte yebätä bäbe erere ni tö rabadre orai erere ni raba nuainne.
2. ¿Dre rabadi gare nie kukwe ja tötikara nekänti?
2 Orasion ye regalo ütiäte krubäte nikrä. Akwa kukwe keta kabrebätä kä ñan tä nemente nie blitakäre Jehovabe. Ne madakäre ni rabadre orare bäri kwin nita nemen nütüre. Akwa kukwe keta kabre tärä Bibliabätä ni dimikakäre. Jesukwe kukwe bämikani yebätä nikwe ja kitai aune ni raba kä denkä ño jai orakäre ye rabai gare nie. Arato kukwe ketarike ütiäte krubäte nikwe nuaindre ne kwe nikwe orasion nuaindre kwin krubäte ye rabadi gare nie kukwe ja tötikara nekänti.
JESUKWE KÄ DIANINKÄ JAI ORAKÄRE
3. ¿Dre nämäne gare Jesús ie?
3 Orasion ye ütiäte krubäte Jehová kräke ye nämäne gare kwin Jesús ie. Ñobätä ñan aune Jesús jämi kite kä tibienbätä ye ngwane, nitre Jehová mikaka täte käkwe orabare ie ye Jehovakwe kukwe nuani ye tuani kwe. Ñodre, Ana, David, Elias aune nitre mada käkwe orabare ja töi bökänbiti aune Jehovakwe kukwe mikani nemen bare kräke ye tuani kwe (1 Sam. 1:10, 11, 20; 1 Rey. 19:4-6; Sal. 32:5). Aisete nitre ja tötikaka Jesukwe ye rabadre orare käre aune töi jämebiti ye niebare Jesukwe (Mat. 7:7-11).
4. ¿Jesukwe kukwe kwin meden bämikani ni käne?
4 Jesukwe kukwe kwin bämikani nitre ja tötikaka kwe käne. Kukwe driebare kwe ngwane käre nämäne orare. Kä ñaka nämäne nemente ie, nämäne sribire krubäte aune nitre kwati nämäne bäre ye medenbätä kä dianinkä kwe jai orakäre Rün kwe ie (Mar. 6:31, 45, 46). Kä nämäne diore dekä ye ngwane nämäne niken blite Rün kwe ben (Mar. 1:35). Bati orabare kwe dibire nememe kä ngwen dekä kukwe ütiäte diankäre nuaindre jai (Luc. 6:12, 13). Deu Jesús murie keta jämi känenkri orabare bä kabre kwe Rün Jehová ie ñobätä ñan aune kukwe bäri tare ben ja tuadi kwe kukwe driebare kwe ye ngwane ye nämäne gare kwin ie (Mat. 26:39, 42, 44).
5. ¿Ni raba ja ngwen ño Jesús erere?
5 Sribi tä krubäte ni kisete akwa ni rabadre kä denkä jai orakäre Jehovai, Jesús kukwe bämikani ni käne ye erere. Ni rabadre ora ükete jai, ja driekäre Jehovai, ni raba ja di ngwen nüke dekä krö orakäre o ni raba nuainne deu. Yebiti orasion ye regalo bäri ütiäte ye nikwe bämikai Jehovai. Meri testiko kädekata Lynne niara ye raba blite Jehovabe orasion yebiti ye namani gare ie ngwane debe biani krubäte kwe ye törö ie. Niara tä niere: “Ñongwane tikwe oradi Jehovai ye ngwane täi juto biare ti kukwe nuakäre ye rababa gare tie ngwane niara ye jataba tuin ja ketamuko tikwe ye erere tie aune tikwe ja töi mikaba orare nuainne bäri kwin”. Ni kwati ie ja ruin niara ye erere. Ne madakäre ani kukwe ketarike ütiäte nie raba orasionte ye mike gare jai.
KUKWE KETARIKE ÜTIÄTE KÄDEKADRETE ORASIONTE
6. Apocalipsis 4:10, 11, tä mike gare erere, ¿dre biandre Jehovai?
6 Nikwe Jehová käikitadrekä. Apóstol Juan ie Jehovakwe kukwe ñan tuabare mikani tuare känti nitre umbre grebiti nibokä nämäne Jehová käikitekä kä kwinbiti tuani kwe. Niaratre nämäne kukwe ne niere “ma aibe ngöräbe käikitadrekä amne ma aibe raba mikani ütiäte amne ma aibe di kri” (ñäkädre Apocalipsis 4:10, 11 yebätä). Kukwe tärä keta kabre angeletre ie Jehová käikitakakäre aune mikakäre täte. Niaratre tä ben kä kwinbiti aune niara gare kwin ietre. Jondron sribebare Jehovakwe yebätä niara töi kwin keta kabre ye tä nemen gare ietre aune kukwe nuainta Jehovakwe ngwane niaratre töita nemen niara käikitakabätä (Job 38:4-7).
7. ¿Nita orare ye ngwane nita Jehová käikitekä ño?
7 Nita orare Jehovai ye ngwane ni raba niara käikitekä. Dre tuin kwin niarabätä nie aune dre tä ni töi mike ñan krütare ye nita niere ie ngwane nita niara käikitekä. Nita ñäke aune ja tötike Bibliabätä ngwane niara töi keta kabre kwin abokän meden tuin ütiäte nie ye ni tö mikai gare jai (Job 37:23; Rom. 11:33). Jehová töi kwin keta kabre yebätä nita töbiketari ngwane, jata nemen ruin ño nie ye nikwe mikadre gare ie. Jehovata kukwe kwin mike nemen bare ni kräke aune nitre mada kräke yebätä ni tö niara käikitaikä. Niarata käre juto biarebe ni ngübarebiti aune ni kriemikakäre. (1 Sam. 1:27; 2:1, 2).
8. ¿Kukwe meden medenbätä ni raba debe bien Jehovai? (1 Tesalonicenses 5:18).
8 Nikwe debe biandre Jehovai. Nita orare ye ngwane kukwe keta kabrebätä ni raba debe bien Jehovai (ñäkädre 1 Tesalonicenses 5:18 yebätä). Kukwe kwin keta kabre tä nemen bare ni kräke yebätä nikwe debe biain Jehovai. Ñobätä ñan aune metrere kukwe kwin jökrä ye kite niarakri (Sant. 1:17). Ñodre, ni raba debe bien ie kä tibien sribebare bä nuäre kwe, jondron sribebare kwe, ja nire nikwe, ni mräkätre, ja ketamuko nikwe aune kukwe kwin käbämikata kwe nie yebätä. Arato ni raba nemen ja ketamuko kwe yebätä nikwe debe biain krubäte ie.
9. ¿Ñobätä ñan nuäre debe biankäre?
9 ¿Kukwe meden meden tärä nie debe biankäre Jehovai? Ye mikakäre gare jai ñan tä nemen nuäre ni kräke, ñobätä ñan aune nita nüne kä käme te aune nitre kwati ñaka tä debe bien. Ñobätä ñan aune nitre ñan tä debe bien jondron ta kwe yebätä ñakare aune tätre töbike krubäte dre rabai kwe yebätä. Nikwe ja ngwandre nitre ye erere ngwane orasionte ni raba kite jondron ribere aune ñaka debe bien jondron tä nikwe yebätä. Kukwe ye erere ñan rabadre bare nibätä yekäre nikwe ja di ngwandre jankunu debe bien, arato käre debe biandre Jehovai jondron bianta kwe nie yebätä (Luc. 6:45).
Debe bianta Jehovai ye tä ni dimike kä ngwen nüke jai (Párrafo 10 mikadre ñärärä)
10. ¿Meri testiko nämäne debe bien ye käkwe dimikani ño? (Üai mikadre ñärärä).
10 Debe bianta ye tä ni dimike ja tuin kukwe tare ben. Ani töbike meri testiko iti kädekata Kyung-sook tä Ni Mikaka Mokre 15 enero 2015 yebätä. Niara bukränte cáncer käme krubäte nämäne mikani gare ie. Niara tä niere: “Ti nämä bren rababa gare tie ye rababa tare krubäte tie. Ja rababa ruin ngwarbe tie aune kä jürä rababa krubäte tibätä”. ¿Drekwe niara dimikani kä ngwen nüke jai? Niara mikani gare käre deu jämi niken kübien ye känenkri ti nämäne niken ju dokwäte kwin orakäre Jehovai aune kukwe ketarike kwin nämäne nemen bare köbö ye näirebätä yebätä nämäne debe bien Jehovai. Ye käkwe niara töi mikani jäme aune niarakwe Jehová nämäne tare ye niere ie. Kukwe tare ben nita ja tuin ye ngwane Jehovata nitre niara mikaka täte ye ngübare ye namani gare ie kukwe namani barebätä yebätä aune kä nebätä kukwe käme ye ñaka bäri kukwe kwin ye kräke. Kyung-sook erere kukwe tärä keta kabre nie debe biankäre Jehovai aune ja tuata kukwe tare ben ye ngwane, ni raba debe bien Jehovai arato. Debe bianta Jehovai ye tä ni dimike kä ngwen nüke jai aune tä ni töi mike jäme.
11. ¿Ñobätä nitre ja tötikaka Jesukwe ñaka kä jürä ngwandre jabätä ribebare kwe?
11 Kä jürä ñaka rabadre nibätä kukwe driekäre ye nikwe ribedre Jehovai. Jesús jämi nikenta kä kwinbiti ye ngwane, nitre ja tötikaka kwe rabadre niken kukwe driere “juta Jerusalénte amne kä Judeate amne kä Samariate. Erere arato, mun näin kukwe kuin ye niere kä jökräbti temen” niebare kwe ie (Hech. 1:8; Luc. 24:46-48). Ye bitikäre nitre judío ji ngwanka kukwe ngwarbebätä nikani apóstol Pedro aune Juan ngwena Sanedrin ngwärekri aune ñaka rabadre kukwe driere ye ribebare kwe ietre aune niaratre rä ötani kwe (Hech. 4:18, 21). Akwa, ¿nitre ja tötikaka ne käkwe ja töi mikani ño?
12. Hechos 4:29, 31, tä mike gare erere, ¿nitre apóstol käkwe dre nuainbare?
12 Pedro aune Juan käkwe kukwe ne niebare, niaratre rä ötani ye ngwane: “Ngöbö okwäbti dre nuendre nunkwe abko bäri kuin, yebtä töbike kuin munkwe, bti munkwe nieta nunye. ¿Nunkwe mun kukwei mikadre täte amne Ngöbö abko nunkwe ñan kukwei mikadre täte ya? ye abko bäri kuin ya abko munkwe nie nunye” (Hech. 4:19, 20). Nitre judío ji ngwanka kukwe ngwarbebätä ye käkwe niaratre nibu mikaninta kwäre ngwane niaratre nibu ye ja ükaninkröta apóstol mada yebe. Gwairebe niaratre dimikadre ñaka kä jürä ngwen jabätä kukwe kwe ye nuainkäre ye ribebare kwe orasionte Jehovai. Niebare kwe ie: “Makwe ja di bian nun sribikä mäkwe neye, kä jurä ñan rabadre jire chi nunbtä blitakäre ma kukweibtä”. Aune dre ribebare kwe orasionte ye Jehovakwe mikani nemen bare kräketre (ñäkädre Hechos 4:29, 31 yebätä).
13. ¿Jin-kyun kukwe bämikani yebätä dre nemen gare nie?
13 Gobrantre käkwe kukwe drie ye ñäkäidre nie ngwane ni raba ja ngwen nitre ja tötikaka Jesukwe ye kwrere. Ye erere ni testiko iti kädekata Jin-hyuk käkwe nuainbare ja ngwanbätä neutral yebätä nämäne ngite. Nämäne ngite yekänti nitre ruäre nämäne ketaninkä jenena ye niara mikani ngübarebiti. Nitre ye nämäne dre ribere jai ye aibe ngwane rabadre blite nitre ngite yebe aune ñaka blitadre jire Bibliabätä kwe bentre niebare ie. Akwa niarakwe ja di käräbare Jehovai ne kwe kä jürä ñaka rabadrebätä blitakäre nitre yebe aune kukwe driekäre ietre (Hech. 5:29). Niara tä niere: “Jehovakwe orasion tikwe ye kukwe nuaba aune ja di bianba kwe tie ne kwe kä jürä ñaka rabadre tibätä aune ti rabadre kukwe ño ye erere niere. Ye köböire ti jataba minuto krärike ye aibe te nitre nämä ngite ye tötike. Deu ti nämä tärä tike biankäre nitre nämä ngite ye ie”. Jin-hyuk erere ni raba ja di kärere Jehovai ne kwe ni mikadre töbätä blitakäre kwe aune kä jürä ñaka rabadre nibätä kukwe driekäre aune Jehovakwe orasion ye kukwe nuai ye nikwe tö ngwandre aune ni dimikai kwe kukwe driere.
14. ¿Dre raba ni dimike ja tuakäre kukwe tare yebe? (Salmo 37:3, 5).
14 Jehovakwe ni dimikadre ja tuin kukwe tare ben ye nikwe ribedre ie. Ni mräkä tare nikwe krütani nikän, ja mikata ni rüere, nita bren ngrabare o ja töibiti kukwe ne erere ben nitre kwati ta ja tuin. Pandemia aune rüta käbiti tibien ye tä ni mike ja tare nike bäri. Ye medenbätä, nikwe ja brukwä tökadrete Jehovai. Nita ja driere ja ketamuko kwin nikwe ie ye kwrere. Ye erere nikwe ja driedre Jehovai aune niarakwe ni kukwe nuai aune ni dimikai kwe yei nikwe tö ngwandre kwatibe (ñäkädre Salmo 37:3, 5 yebätä).b
15. ¿Nita ja tuin kukwe tare ben ngwane orasion ye tä ni dimike ño? Mä raba mike gare keteiti.
15 Ja driedre jankunu Jehovai ye käkwe ni dimikai kukwe tare ye näire (Rom. 12:12). Nitre Jehová mikaka täte ye tä ja tuin dre erere ben ye gare kwin Jehovai aune “nita ja di kärere ie ye niarata kukwe nuin” (Sal. 145:18, 19). Prekursora iti kä 29 biti kädekata Kristie ye käkwe ja tuani kukwe ye erere ben. Jötrö ngwarbe bren tare namani niarabätä. Ye köböite niara namani töbike dikaro. Ye bätäräbe meye bren tidrä ye mikani gare ie. Kristie tä niere: “Ti nämä ja di ribere ja brukwä täte biti Jehovai ne kwe ja di biandre kwe tie ja tuakäre köbö kwatire kwatire kukwe tare yebe. Aune tikwe ja üaire ye nuainba bäri, ti ñaka nämä gätä juen jire ja bäre aune ja tötika kaibe ye ti nämä nuainne käre”. Nieta kwe arato: “Orasion ye käkwe ti dimikaba kukwe tare näire. Jehová nämä käre ti ken ye käkwe ti töi mikaba jäme. Ti ñaka rababata räre ben gwairebe akwa Jehovakwe orasion tikwe ye kukwe nuaba, ñobätä ñan aune ti töi mikaba jäme kwe yebätä”. “Nitre nünanka era metre ye dianintari kore, ye mden kwrere ni jökrä nünanka era metre Ngöbökrä abko Ngöbökwe diandretari ño kukwe taretare ngäniene” ye nikwe käre ngwandre törö jai (2 Ped. 2:9).
Ja tuakäre ni nuateta yebe yekäre ni rabadre, 1) ja di kärere Jehovai, 2) ni raba dre nuainne ye erere nikwe nuaindre 3) nikwe ja di ngwandre ja kete bäri Jehovabe. (Párrafo 16 aune 17 mikadre ñärärä)
16. ¿Ñobätä nita Jehová die ribere jai ja tuakäre ni nuateta yebe?
16 Jehovakwe ni dimikadre ja tuin ni nuateta yebe ye nikwe ribedre ie. Ni ngite ye medenbätä nita ja di ribere ja tuakäre ni nuateta yebe. Satana tä ja di ngwen kukwe jökräbiti ni nuatekäre ne kwe ñaka rabadre nuäre ni kräke. Ñodre, töta ni töi juanbätä ngwarbe ja näkwita käme yebiti. Ja näkwita yebiti tä ni töi mike käme ye köböire ni ñan tä nemen ja ngwen deme Jehová okwäkänti abokän köböite ni raba ja mike ngite krubäte (Mar. 7:21-23; Sant. 1:14, 15).
17. Nikwe oradre akwa yebiti ta, ¿nikwe dre nuaindre ja tuakäre ni nuateta yebe? (Üai mikadre ñärärä).
17 Ni ñan raba ja tuin kaibe ni nuateta yebe, nita Jehová di ribere jai. Ni rabadre orare ño ye Jesukwe bämikani ni käne: “Kukwe kämekäme tö nun nuaite ja käne ma rüere, ye känti makwe ñan nun jie ngwian. Akwa makwe nun ngibia nun rüe diablu ngäniene” (Mat. 6:13). Jehová tö ni dimikabätä akwa yekäre ni rabadre kärere ie. Nikwe oradre ye ñan ngörä. Ni rabadre ja di ngwen ni raba dre nuainne ye erere nuainne aune kukwe käme abokän raba ni töi mike blo yebätä ja ngübarebiti (Sal. 97:10). Ja töi kriemikakäre ni rabadre töbike kukwe kwin ye aibebätä, ni rabadre ñäke Bibliabätä aune töbiketaribätä, niken gätäbätä aune kukwe driere. Kukwe raba ni nötö tibien yei Jehovakwe ñaka ni tuainmetre nuadrete jire tä käbämike nie (1 Cor. 10:12, 13).
18. ¿Ni jökrä rabadre dre nuainne?
18 Kä krüte ne näire bäri nikwe oradre Jehovai ja ngwankäre metre. ‘Nikwe ja brukwä ye mikai gare’ Jehovai yei niara tö (Sal. 62:8). Yebätä ni rabadre kä denkä jai orakäre ja brukwä tätebiti köbö kwatire kwatire Jehovai. Aune niara ye käikitadrekä aune debe biandre ie kukwe jökrä nuainta kwe yebätä. Ni dimikadre kwe ñaka kä jürä ngwen jabätä kukwe driekäre arato kukwe tare ben nita ja tuin yebätä ni dimikadre kwe aune kukwe tarebätä ni nuadrete yebätä nikwe kä ngwandre nüke jai ye nikwe ribedre ie. Kukwe ño ererebiti ta käre nikwe oradre Jehovai. Nita dre kärere orasionte Jehovai, ¿ye tä mike nemen bare ño ni kräke? Ye rabai gare nie kukwe ja tötikara ja känenkäre yebätä.
KANTIKO 42 Ni Ngöbö mikaka täte tä orare
a Ja brukwä tätebiti ni tö oradi Jehovai, ja ketamuko kwin nikwe ie nita kukwe tike ye kwrere ni tö nuaindi. Akwa ruäre ngwane ñan tä nemen nuäre ni kräke nuainkäre aune dre niedre ñan tä nemen nüke gare nie. Kukwe ketebu ne ñaka ni ketadrebätä yekäre dre nuaindre ye rabadi gare nie kukwe ja tötikara nekänti.
b Salmo 37:3, 5: “Mäkwe tö ngwan Jehovai aune mäkwe kukwe kwin nuain; mäkwe nüna kä tibienbätä bätä mäkwe ja ngwan metre. Mäkwe ji mäkwe ye mika Jehová kisete; tö ngwen ie aune niarakwe kukwe nuaindi mä dimikakäre”.