Ni rabadre kä trä ngwente aune ni ñan rikadre kä ikote

1, 2. a) ¿Pablo kukwe tikani nitre Efesios ie ye ngwane, nämäne medente, ñongwane tikani kwe, aune ñobätä tikani kwe? b) ¿Kukwe ngwantarita meden rabai gare nie?

APÓSTOL Pablo nämäne ngite Roma ye ngwane ja töi mikani kwe ja mräkätre dimike. Akwa, niara ñan raba ja tuin gwärere ja mräkätre yebe, yebätä kukwe tikani kabre kwe ietre. Keteiti ye abokän tikani kwe ja mräkätre kristiano Éfeso ye ie, kä 60 o 61 ye ngwane (Efes. 1:1; 4:1).

² Kä nikani kwä jätä ta Pablo nämäne kukwe driere aune nitre tötike Éfeso (Hech. 19:​1, 8-10; 20:​20, 21). Ja mräkätre nämäne tare kwe yebätä tö namani dimikai ja ngwen metre Jehovai. Akwa ¿ñobätä kukwe tikani kwe nitre dianinkä nänkäre kä kwinbiti yei kä trä aune kä iko yebätä? ¿Aune ni kristiano jökrä raba ja kite ño kukwe yebätä? Kukwe ja tötikara nekänti kukwe ngwantarita ketebu ye rabai gare nie.

KÄ IKOTE BITI KÄ TRÄ NGWENTE

3. ¿Drebiti kukwe bämikani Pablokwe Efesios kapitulo 5 yekänti?

³ Pablo niebare nitre Éfeso ie: “Mun nämane nüne ngwarbe kä ikote, akwa mtare munta nüne Ngöbö trä ngwente” (Efes. 5: 8). Kä trä aune kä iko yebiti Pablo kukwe bämikani nitre kä Éfeso ie, niaratre ja töi kwitanina kri ye mikakäre gare ietre. Akwa käne, ñobätä niaratre nämäne kä ruäre te kä ikote niebare kwe ie ye ani mike gare jai.

4. ¿Ñobätä nitre Éfeso nämäne kukwe ngwarbe mike täte nie raba?

⁴ Kukwe ngwarbe mika namani täte. Nitre kristiano Éfeso ie kukwe metre jämi gare ye känenkri nämäne kukwe ngwarbe mike täte aune nämäne kukwe chokakwe ye mike täte arato. Juta yekänti templo ngöbö Ártemis yekwe sribebare aune ye nämäne jondron keta kükü bäri ütiäte kä yekänti abokän erere jondron mada ñaka nämäne jire. Nitre nämäne niken yete ngöbö ngwarbe mikakare täte. Nitre jondron rürübäinkä nämäne templo Ártemikwe sribere kia kia rürübäinkäre, yebätä nämäne ngwian ganainne ere krubäte jai (Hech. 19: 23-27). Ne madakäre, nitre ye nämäne gare ñobätä ñan aune nämäne kukwe chokakwe ye nuainne (Hech. 19:19).

5. ¿Ñobätä nitre Éfeso nämäne ja ngwen käme nie raba?

⁵ Nitre ye nämäne ja ngwen käme krubäte. Nitre nünanka Éfeso ye nämäne nemen kämekäme jabe aune ñaka nämäne ja gaire jire chi. Fiesta nuain nämäne känti nitre nämäne ja ükekrö aune ja bämike. Ne madakäre nitre kukwe ngwarbebätä nämäne ja ükekrö yekänti raba kämekäme jabe ye aibebätä blita nämäne bäsi käre (Efes. 5:3). Nitre nämäne kukwe blo nuainne o ñakare ye ñaka nämäne nüke gare ietre ye medenbätä ñan nämäne kukwe käme nuainne nütü nämäne kwetre (Efes. 4:​17-19). Töi ñaka nämäne nike ye medenbätä rabadre kukwe ükete Jehovabe ye ñaka nämäne nütüre jire. Kukwe meden kwin aune käme ye ñan nämäne gare ietre. Ye medenbätä niaratre nämäne kä ikote ye kwrere aune Ngöbö ni mikaka nüne kärekäre yebätä niaratre nämäne mente, ñobätä ñan aune Ngöbö ñaka nämäne gare jire chi ietre niebare Pablokwe.

6. ¿Ñobätä Pablokwe niebare nitre Éfeso ye nämäne “Ngöbö trä ngwente”?

⁶ Nitre Éfeso ruäre nämäne kä ikote ye kwrere, akwa tuanimetre kwetre biti jatani nekete keteitibe ni Dänkien Jesube aisete nämäne nüne Ngöbö trä ngwente niebare Pablokwe (Efes. 5:8). Biti jatanintre nüne Jehová töi ño ye ererebätä aune nämäne ja tuenmetre jie ngwandre ie (Sal. 119:105). Nämänentre kukwe ngwarbe mike täte aune ja ngwan kämekäme ye tuanimetre kwetre. Biti jatani ja ngwen Ngöbö töi erere, nämäne ja di ngwen mikakäre täte aune kä mikakäre jutobätä (Efes. 5:1).

7. ¿Kukwe meden ja erebe ben nita ja tuin nitre Éfeso ye erere?

⁷ Ye erere arato, kukwe metre jämi nemen gare nie ye känenkri ni nämäne ja ngwen kämekäme, kukwe ngwarbe mike täte. Aune ruäre ngwane ni nämäne fiesta kukwe ngwarbebätä ye nuainne aune ja mike gure ngwarbe. Akwa, Jehová namani gare nie ye ngwane, nikwe ja töi kwitani aune kukwe tuin kwin ie bätä kukwe tuin käme ie ye erere ni jatani mike tuin jai. Ye köböire kukwe kwin tä nemen nikwe (Is. 48:17). Yebiti ta, ñaka nuäre kä mikakakäre kukwe blo yebätä aune nänkäre kä trä ngwente Ngöbö monsoi erere. ¿Dre raba ni dimike kukwe yebätä?

Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0CC by 3.0

KÄ IKO YEBÄTÄ KÄ MIKADREKÄ

8. ¿Nitre Éfeso ñaka rabadre dre nuainne nieta Efesios 5: 3-5 yekänti?

⁸ (Ñäkädre Efesios 5:​3-5 yebätä). Nitre kristiano Éfeso rabadre mente kä iko yebätä, yekäre rabadre kukwe tuin käme Jehová ye tuenmetre. Akwa, ja mika gure kämekäme ye ñan aibe tuadremetre kwetre, ñakare aune nämäne dre niere ye arato. Niaratre rabadre kukwe jökrä ye tuenmetre rabakäre “Kristo amne Ngöbö tä gobrane” yete yekäre, ngwani törö ietre Pablokwe.

9. ¿Ño ni raba ja ngübarebiti kukwe käme nuainta yebätä?

⁹ Nikwe ja ngübadrebiti krubäte ne kwe ni ñan rakadre kukwe käme nuainta abokän kä iko kwrere ye ie (Efes. 5:11). Kukwe käme nuainta ye tuata aune blitata kukwe kämebätä ye kukwe nuata ngwane tä nemen bäri nuäre ja mikakäre ngite niena gare metre nie (Gén. 3:6; Sant. 1:​14, 15). Juta keteiti känti ni ja mräkätre kwati käkwe grupo sribebare mensaje juankäre jai grupote. Kenanbe blita nämäne kukwe ja üaire ye aibebätä. Akwa bätärekä bätärekä blita jatani ja mika gure o raba jabe yebätä. Kä nikani ruäre ta ngwane, ja mräkätre kwati käkwe mikani gare, kukwe juan namani grupote ye köböite namani nuäre kräke kukwe käme nuainkäre.

10. ¿Satana tö ni tuai töbike ño? (Efesios 5:6).

¹⁰ Kukwe meden kwin aune kukwe meden käme ye ñaka rükadre gare nitre ye abokän kukwe keteitibiti Satana tä nitre töi kwite aune nitre mike töbike jene (Is. 5:20; 2 Cor. 4:4). Kä nebätä nitre jökrä tä kukwe tuin blo Jehovai ye nuainne aune tätre mike tuin kwin jai, ye ñaka ni töi mike niä (2 Ped. 2:19). Ye medenbätä película, programa mikata televisionte aune internet käi yete kukwe tuin käme Jehovai ye aibe mikata tuare. Nitre tä ja ngwen ño aune nüne ño nengwane ye kadre ngäbiti bätä käi ngwan raba juto jabätä aune ñaka käme ye kwrere mikadre tuin jai ye ie Satana tö (ñäkädreEfesios 5:6 yebätä).

11. ¿Efesios 5:7 mikadre täte ye ñobätä ütiäte nüke gare nie kukwe namani bare Angelabätä yebiti? (Üai mikadre ñärärä).

¹¹ Nitre ñaka Ngöbö mike täte yebe nikwe ja ketadre ie Satana tö. Ye medenbätä, Pablokwe mäträbare kukwe nebiti: “Munkwe ñan kukwe käme nuen jire chi bentre” (Efes. 5:7). Nitre tä kukwe käme nuainne yebätä nikwe ja ngübadrebiti bäri kä nengwane, nitre Éfeso ye kräke. ¿Ñobätä? Ñobätä ñan aune nengwane ni ñan tä blite ngwärere nitre ben aibe ñakare aune redes sociales yebiti arato nita blite nitre ben. Redes sociales ye abokän te ni raba nakain bäri nuäre nükanina gare Angelaa meri testiko nünanka Asia ie mikani gare kwe. “Bätärekä bätärekä kukwe blo ye raba kite tuin kwin nie. Ja ketamukotre ñaka nämä kukwe ja jie ngwankäre Bibliabätä mike täte yebe tikwe ja ketadre ye ñan nämä tuin blo tie. Mrä mada tikwe kukwe blo nuaindre Jehová okwäkänti ye ñan käme krubäte ti jataba nütüre”. Nitre umbre ji ngwanka käkwe Angela dimikani yekwe niara dimikani ja töi kwite. Tä niereta: “Nengwane kukwe tä redes sociales ye ñan aibätä tita ja töi mike bäri, ñakare aune tita kukwe ja üaire yebätä ja töi mike metrere”.

12. ¿Kukwe ükaninte Jehovakwe ye ni tö mikai täte ngwane dre nuaindre?

¹² Nitre kä nebätä tä niere, kukwe kämekäme nuaindre ye ñaka käme jire chi akwa nikwe ñaka ja ngöka manandre kukwe yei, ñobätä ñan aune ye ñaka metre gare nie (Efes. 4:​19, 20). Nikwe kukwe ne kwrere ngwandretari jai: “¿Nitre nänkä kwelate tibe, sribi muko tikwe o nitre mada mada ñaka kukwe Jehovakwe mike täte yebätä tita ja ngübarebiti? ¿Tita ja ngwen dite kukwe ja jie ngwankäre Bibliabätä ye erere nuainkäre kukwe ñaka nüke gare tie niedre tie yebiti ta?” 2 Timoteo 2: 20-22 tä niere erere, nirebe nita ja kete konkrekasionte yebätä ja ngübadrebiti. Ñobätä ñan aune ni jökrä ye ñan ni dimikai nirien ja üairebiti ye ngwandre törö jai.

‘MUNKWE NÜNA JANKUNU NGÖBÖ TRÄ NGWENTE’

13. ¿Nikwe nändre jankunu “Ngöbö trä ngwente” monso kwe erere ye dre gärätä? (Efesios 5:​7-9).

¹³ Nitre kristiano Éfeso kä mikadrekä kä iko yebätä niebare Pablokwe ie, ye bitikäre niaratrekwe nändre jankunu Ngöbö trä ngwente niebare kwe ietre (ñäkädre Efesios 5:​7-9 yebätä). ¿Dre gärätä kukwe yebiti? Ye abokän nikwe ja ngwandre ni kristiano metre erere kä jökrä ngwane. Aune bäri ütiäte nikwe ñäkädre aune ja tötikadre Bibliabätä aune juta Ngöbökwe tä täräkwata bien nie yebätä ja tötikadre. Ye ngwane, Jesús kä trä ngwen bäkänkä yebätä nikwe ja kitadre bäri kwin. Jesukristo ñotra ni jökrä kräke yebätä nikwe ja kitadre ye bäri ütiäte (Juan 8:12; Prov. 6:23).

14. ¿Üai deme ye raba ni dimike ño?

¹⁴ Ni tö näin Ngöbö trä ngwente monso kwe erere ngwane, nita üai debe ye ribere jai. ¿Ñobätä? Ñobätä ñan aune kä nebätä kukwe käme aibe nuainta yebätä ñan nuäre ja ngwankäre mrebe (1 Tes. 4:​3-5, 7, 8). Akwa üai deme yekwe ni dimikai, nitre tä töbike ño aune kukwe mike täte abokän ñaka tuin kwin Ngöböi yebätä ja kriemike. Arato ni dimikai kwe ja moto mike “kuin ni mda mdakrä”, “nüne metre” aune “kukwe era erere” ye ererebätä nüne (Efes. 5:9).

15. ¿Ni raba dre nuainne üai deme rabadre nikwe yekäre? (Efesios 5:​19, 20).

¹⁵ Jesukwe niebare “mun Rün kä käinbti bäri moto kuin munkrä abko ie munkwe niara Üai Deme kärädre angwane, biandi kwe munye” (Luc. 11:13). Akwa üai deme rabadre nikwe yekäre nikwe kärädre Jehovai. Arato üai deme rabadre nikwe yekäre nikwe Jehová käi kitadrekä ja mräkätre ben konkrekasionte (ñäkädre Efesios 5:​19, 20 yebätä). Üai deme täi nikwe ye köböire nikwe nünandi Ngöbö töi ño ye erere.

16. ¿Dre ni dimikai kukwe kwin den nuaindre jai? (Efesios 5:​10, 17).

¹⁶ Kukwe ütiäte tä nemen diandre jai nie ngwane, Ngöbö tö ni tuai nüne ño ye erere nita känene biti nita nuainne (ñäkädre Efesios 5:​10, 17 yebätä). Ni töta nemen kukwe dian jai yebätä nita kukwe ja jie ngwankäre känene Bibliabätä ngwane, metrere Ngöbö töita ño kukwe yebätä ye nita känene. Aune nita kukwe ja jie ngwankäre yebiti ja jie ngwen ngwane ni raba kukwe kwin den nuaindre jai.

17. ¿Dre nuaindre ñaka kä gatekäre ngwarbe? (Efesios 5:​15, 16; üai mikadre ñärärä).

¹⁷ Nitre kristiano Éfeso ñaka kä juandre ngwarbe ta niebare Pablokwe ietre (ñäkädre Efesios 5:​15, 16 yebätä). Ni ngututu “käme”, Satana, ye tö ni tuai kä juen ngwarbe ta ne kwe kä ñan rabadre Ngöbö kräke jire chi nie (1 Juan 5:19). Tä nemen bäri nuäre töbikakäre ngwian ye jiebiti, ja tötikabätä, aune sribibätä, Ngöbö mikadre täte ye kräke. Ye erere tä nemen bare nibätä ngwane, nitre kä nebätä tä töbike ño ye kitera neketekä nibätä ni raba niere. Bäkänä kukwe ye ñaka käme, akwa ye ñan mikadre ütiäte krubäte jai. Nänkäre jankunu “Ngöbö trä ngwente” nikwe ñan kä gadrete jire chi, dre bäri ütiäte yebätä ja töi mikadre kwatibe.

18. ¿Donald dre nuainbare ñaka kä juankäre ngwarbe ta?

¹⁸ Nikwe ja di ngwandre sribikäre bäri Jehová kräke. Ye erere nuainbare Donald, nünanka Sudáfrica yekwe. Niara tä niere: “Kukwe nämä ti kisete yebätä tikwe töbikaba aune tikwe ja di ribeba kisere Jehovai sribikäre bäri kräke. Sribi kwandre keteiti tie akwa ti rabadre sribire bäri niara kräke tikwe ribeba ie. Jehová köböire, ye erere rababa bare. Ti aune ti muko nunkwe ja töi mikaba sribire köbö täte Jehová kräke”.

19. ¿Nikwe dre nuaindre nänkäre jankunu “Ngöbö trä ngwen” monsoi ye erere?

¹⁹ Üai deme köböire Pablokwe kukwe tikani nitre Éfeso ie yekwe niaratre dimikani ja ngwen metre Jehovai aune tä ni dimike arato. Nibi gare nie erere, tä ni dimike ja näkwitakäre aune ja ketamuko kwin känene. Arato tä ni dimike nemen ja tötikaka kwin Bibliabätä, nänkäre Ngöbö trä ngwente aune ni jie ngwandre kukwe metrebiti kwe yekäre. Ne madakäre, üai deme ye köböire Ngöbö töi kwin keta kabre ye erere ni raba ja ngwen. Pablo mäträbare ye erere nikwe mikai täte ngwane, nikwe kä mikai juto Jehovabätä nikwe dre diain nuaindre jai yebiti. Aune ni ñan täi kä ikote ñakare aune ni täi jankunu kä trä ngwente.