¿Ja tare nikadi kri ye kräke mäta juto?

1. ¿Kukwe tare jämi nakainkä ye känenkri ja mikadre juto ye ñobätä kwin?

JA MIKATA juto köböire nita nemente nire. Ñodre, kukwe tare tä nemen bare ye ngwane nireta juto ja tuare kukwe yebe, ye raba ja tuin kukwe tare yebe aune nitre mada dimike arato. Organización keteiti Europa nitre dimikakäre käkwe niebare “ja mikata juto yebiti kukwe kwin ta nemen bare ye nemen gare metre nie”.

2. ¿Ñobätä ja mikadre juto ja tare nikadi kri ye kräke? (Mateo 24:44).

² “Ja tare nikadi kri” ye kömikai jötrö ngwarbe (Mat. 24:21). Kukwe ne ñaka kukwe tare mada ye erere ñobätä ñan aune nitre kwati ñaka kai jäme kwe. Kä nikanina 2.000 ta yete, Jesukwe niebare nitre nänkä niara jiebiti ie, rabadre ja mike juto köbö ye kräke (ñäkädre Mateo 24:44 yebätä). Kukwe ne nikwe mikai täte ngwane, rabai bäri nuäre ni kräke rabatekäre nire aune nitre mada dimikakäre rabatekäre nire köbö tare ye näire (Luc. 21:36).

3. Kä ngwandre nüke jai, nitre mada mikadre tuin bobre aune ja taredre, ¿ye ñobätä nita ribere ja mikakäre juto ja tare nikadi kri ye kräke?

³ Kukwe ketamä kwin ribeta jai, ja tuakäre ja tare nikadi kri yebe. ¿Nikwe kukwe tare mikadi gare yebätä nitrekwe ja mikadi ni rüere ye ngwane nikwe dre nuaindi? (Apoc. 16:21). Nikwe kä ngwandre nüke jai Jehová mikakäre täte aune niarakwe ni kriemikadi ye ie tö ngwandre. ¿Ja mräkätre kän jondron ruäre raba nente o riadrete jökrä kän ngwane nikwe dre nuaindi? (Hab. 3:17, 18). Nikwe ja töi mikadre nitre mada mike tuin bobre jai, niaratre dimikakäre aune dre ribeta kwetre jai ye biankäre ietre. ¿Juta jökrä käkwe ja ükaikrö ni rüere ye ngwane nikwe dre nuaindi? O ¿rabai nünandre kä chi te keteitibe ja mräkätre mada yebe nie ngwane nikwe ja ngwandi ño? (Ezeq. 38:10-12). Ja mräkätre ja üairebiti ye tare krubäte nikwe ye rabai bämikadre nie bäri kä ye ngwane.

4. ¿Kä ngwandre nüke jai, ni mada mikadre tuin bobre jai aune taredre ye ñobätä nikwe nuaindre jankunu nüke gare nie?

⁴ Nikwe kä ngwandre nüke jai, nitre mada mikadre tuin bobre aune ja taredre ye Ngöbö kukwei tä ni nübaire nuainne käre. Lucas 21:19 tä niere: “Munkwe nünanka dite jabtä angwane, mun rabadi dianintari”. Colosenses 3:12 tä mräträre: “Munkwe ni mda mda ngwian ruen bobre jae”. Aune 1 Tesalonicenses 4:9, 10 tä niere: “Ngöbö ara käkwe mun töi tikani ja tarere kwärikwäri. […] Munkwe ja taredre bäri mda köbö kwatirekwatire abko nunta niere munye”. Nitre nämänena ja tarere nitre mada mike tuin bobre jai aune kä ngwen nüke jai. Akwa rabadre nuainne jankunu ye ngwaninta törö ietre. Ye erere nikwe nuaindre arato. ¿Raba nemen bare ño nie? Nitre kristiano kena kukwe ne bämikani ye erere ni raba ja ngwen ño ne kwe ni tädre juto biarebe ja tare nikadi kri ye kräke, ye rabadi gare nie kukwe ja tötikara nekänti.

KÄ NGWEN NÜKE JANKUNU JAI

5. ¿Nitre kristiano kena käkwe dre nuainbare kä ngwankäre nüke jai?

⁵ Nitre kristiano kena ye rabadre kä ngwen nüke jai (Heb. 10:36). Kukwe ben nita ja tuin ye erere ben niaratre nämäne jai tuin aune nämäne tödeke yebätä nämäne ja tuin kukwe tare ben. Ñodre kwati rüere nitre judío ji ngwanka kukwe ngwarbebätä aune gobranka romano nämene ja mike rüere. Mräkätre kwe nämene ja mike rüere (Mat. 10:21). Nitre apóstata nämene kukwe niere konkrekasion ñäkäbitikäre yebe niaratre nämäne ja tuin ruäre ngwane (Hech. 20:29, 30). Kukwe jökrä yebätä kä ngwani nüke kwetre jai (Apoc. 2:3). ¿Dre käkwe niaratre dimikani? Kukwe tikani hebreore Bibliabätä känti nitre kä ngwani nüke jai kädekateta, ñodre Job yebätä töbikataribare kwetre (Sant. 5:10, 11). Ja di ribebare kwetre Jehovai orasionte (Hech. 4:29-31). Niaratre kä ngwain nüke jai ye köböire kukwe kwin rabai kwetre ye nämäne törö ietre (Hech. 5:41).

6. ¿Merita kä ngwani nüke jai yebätä dre raba nemen gare nie?

⁶ Ni raba kä ngwen nüke jai, nikwe kä diandrekä jai töbikatarikäre nitre kä ngwani nüke jai tä tikani Bibliabätä aune tä täräkwata dianinkä Bibliabätä, yekwe ni dimikai kä ngwen nüke jai. Ye erere namani bare Merita nünanka Albaniabätä. Mräkätre kwe nämäne ja mike rüere krubäte yebiti ta niara kä ngwani nüke jai. Niara tä niere: “Kukwe namani bare Jobbätä yebätä tikwe ja tötikaba ye käkwe ti dimikaba krubäte. Niarakwe ja tare nikabare krubäte, aune ñobätä kukwe ye nämäne nemen barebätä ñan nämäne gare ie. Akwa yebiti ta niarakwe kukwe ne niebare: ‘¡Tikwe ja ngwain metre Ngöböi nememe ti krütai ye ngwane!’ tä Job 27:5. Kukwe bäri tare ben Jobkwe ja tuani ti ta ja tuin kukwe ben ye kräke rükaba gare tie aune ñobätä kukwe ye tä nemen bare ye gare tie”.

7. ¿Ja tua ñan kukwe tare ben gwäune akwa drebätä ja kita raba?

⁷ Käre ja brukwä tökarete täte Jehovai yebiti kä ngwan raba nüke jai (Filip. 4:6; 1 Tes. 5:17). Mä ñan ja tuin kukwe tare ben gwäune. Akwa, mä ta nemen rubun kukwe ñan tä nemen nüke gare mäi o kukwe tä nemen keta kabre mä kisete ye ngwane, ¿mäta dre nuainne? ¿Mäta ja jie ngwamana Jehovai? Mäkwe käre Jehová känäin kukwe kia keta kabre tä nemen bare mäbätä ngwane. Ye erere mäkwe nuaindi kukwe bäri tare rabai bare ja känenkäre mäbätä ngwane. Ñongwane aune ño Jehová raba mä dimike gare ie ye ie mäkwe tö ngwain kwatibe (Sal. 27:1, 3).

8. Nikwe kä ngwandre nüke jai nengwane yekwe ni dimike kä ngwen nüke jai ja känenkäre, ¿ye nemen gare ño nie Mira kä ngwani nüke jai yebiti? (Santiago 1:2-4; üai mikadre ñärärä).

⁸ Kukwe kia kia bätä ni täi kä ngwen nüke jai nengwane ye köböire rabai bäri nuäre ni kräke kä ngwankäre nüke jai ja tare nikadi kri ye näire (Rom. 5:3). ¿Ñobätä ni raba kukwe ye niere? Ja mräkätre kwati tä kä ngwen nüke jai kukwe keteitibätä ye tä mike bäri dite ja tuakäre kukwe mada yebe. Jehová köböire ja tuata kukwe keteiti ben ngwane Jehová tö ni dimikabätä tä nüke gare nie ye tä tödeka nikwe mike nirien bäri. Aune nita nemen bäri dite ja tuakäre kukwe mada yebe (ñäkädre Santiago 1:2-4 yebätä). Mira prekursora nünanka Albania ye aibe bätä kukwe tare nämäne nemen bare namani nütüre. Jehovakwe niara dimikanina kä 20 te sribibätä kräke yebätä tä töbiketa ngwane, niara ara tä niere jai: “Ja ngwen metre. Mäkwe sribibarera krubäte Jehová kräke aune kukwe keta kabre mä ganainbare Jehová diebiti ye ngwen törö jai”. Niara erere kukwe keta kabre biti Jehová mä dimikanina kä ngwen nüke jai ye mäkwe ngwan törö jai. Kukwe keteiti bätä mäta kä ngwen nüke jai ye tuin Jehovai aune niara kukwe kwin mikai nemen bare mä kräke yebätä mäkwe töbika (Mat. 5:10-12). Ja tare nikadi kri ye näire mä täira kä ngwen nüke jai aune mä töi täi kwatibe nuainbätä.

NI MADA MIKADRE TUIN BOBRE JAI

9. ¿Konkrekasion Antioquía Siria nämäne ni mada mike tuin bobre jai bämikani ño kwetre?

⁹ Ja mräkätre kristiano Judea käkwe mrö nikabare krubäte ye ngwane dre namani bare yebätä töbike. Kukwe ye namani gare ja mräkätre Antioquía Siria ye ie ngwane namani tuin bobre ie. Namani tuin ño ie ye bämikani kwetre kukwe nuainbare kwe yebiti: “Ja töi mikani ngwian juen ja mräkätre tödekaka Jesubti nünanka kä Judeate ye die mikakäre. Ye erere ni itire itire, ie ja namani nüke törö ngwian bien nuäi, ye erere namanintre bien” (Hech. 11:27-30). Ja mräkatre nämäne ja di ribere ye nämäne nüne mente akwa ja mräkätre kristiano Antioquía nämäne juto biare niaratre dimikakäre (1 Juan 3:17, 18).

10. ¿Ja mräkätre tä ja tuin kukwe tare ben ye ruentari tare nie ye ni raba bämike ño ie? (Üai mikadre ñärärä).

¹⁰ Ja mräkätrebätä kukwe tä nemen bare jötrö ngwarbe yebe tä ja tuin tä nemen gare nie ngwane niaratre ruentari tare nie ye ni raba bämike ie arato. Nikwe ja mikadre juto biarebe kukwe ne erere biti: nita juto biare nitre dimikakäre ye mikadre gare nitre umbre ji ngwanka ie, jondron o ngwian nikwe ye biandre ja töi jeñe biti juta Ngöbökwe dimikakäre aune ja mräkätre tä ja tuin kukwe tare be ye kräke oradre (Prov. 17:17).b Ñodre kä 2020, ye ngwane Comités de Socorro ja ükaninkrö 950 biti bäri kä jökräbiti tibien, nitre nämäne ja tare nike pandemia COVID-19 kisete ye dimikakäre. Nitre jökrä nämäne juto biare sribikäre labores de socorro ben ye ie debe bianta krubäte. Niaratre nämäne ja mräkätre mike ruintari tare jai, yekwe töi mikani mrö ngwen kräketre dimike kukwe ja üairebiti ju üketeta bititre aune kä gätä nuainkäre ye sribereta ( 2 Corintios 8:1-4 mikadre ñärärä).

11. ¿Nita ni mada mike ruintari tare jai yebiti nita Jehová mike ütiäte jai nita bämike ño?

¹¹ Kukwe tare tä nemen bare ngwane nitre dimikata ño tä tuin nitre madai ye tä töi mike niä. Ñodre kä 2019 ye ngwane, murie ñübe minimini kädekata Dorian Ju Ja Ükarakrö Bahamas ye juanba ngwarbe. Ju Ja Ükarakrö ye ükate nämäne ngwane ja mräkätrekwe blitabare ni iti ju sribekä ben ne kwe rabadre ju ye ütiä rikadre nuäi jökrä diandrekä kwe yekäre. Akwa niarakwe niebare: “Ti tö kukwe ruäre nuaindi mun dimikakäre. Ti tö máquina sribikäre biain munye, sribidi munbe aune dre dre ribeta sribi nuainkäre ye biain munye arato. Munta ja ketamuko mike tuin ño jai ye tä ti töi mike ñan krütare”. Nitre kwati ie Jehová ñan gare akwa munta sribire ño ye tuin ietre. Nita nitre mada mike ruentari tare jai yebiti, “Ngöbö abokän bäri moto kwin käkwe ni tarebare kri krubäte” abokän tä nemen gare nitre ie ye tä kä mike juto krubäte nibätä (Efes. 2:4).

12. ¿Ni mada mikadre ruentari tare jai ye tä ni mike ño juto ja tare nikadi kri ye kräke? (Apocalipsis 13:16, 17).

¹² ¿Ja tare nikadi kri ye ngwane ñobätä nitre mada mikadre tuin bobre jai? Ñobätä ñan aune nirekwe ñaka gobran dimikai yekwe ja tuai kukwe tare ben kä nengwane aune ja tare nikadi kri ye ngwane mikata gare Bibliakwe (ñäkädre Apocalipsis 13:16, 17 yebätä). Ja mräkätrekwe ja di ribedi kukwe ruärebätä. Ye nikwe mikadre tuin bobre jai aune dimikadre ye köböire Jesús jataita kukwe ükete nitre ben ngwane niedi kwe nie: “‘gobran’ munkrä ne mun jakwe kaen ngäbti” (Mat. 25:34-40).

JA MRÄKÄTRE TAREDRE BÄRI

13. ¿Nitre kristiano kena dre nuainbare ja tarekäre bäri? (Romanos 15:7).

¹³ Nitre kristiano kena nämäne ja taredre ye gare nitre jökrä ie. ¿Akwa nämäne nemen nuäre kräketre? Ani mike gare jai, konkrekasion Roma yete, nitre kristiano jene jene nämäne. Ruäre ye abokän judío nämäne kukwe biani Moisés ie ye mike täte. Mada abokän nünanka juta jene jene känti aune ja ngwen jene jene. Ja mräkätre ruäre ye nämene klabore, mada nämäne kwäre, ruäre abokän nämäne nitre klabore bäkänkä. ¿Dre niaratre dimikani ja tuin kukwe nebe aune ja tarere bäri? Kukwe nebiti Pablokwe mäträbare bätä: “Munkwe ja kain ngäbiti kwin kwärikwäri” (ñäkädre Romanos 15:7 yebätä). ¿Kukwe kwitani munkwe ja kain ngäbiti kwin kwärikwäri ye abokän dre gärätä? Ye abokän ni nübaita ja gwirete bukata aune tärä nemen siba ja ngätäite ja ketamuko nikwe kwrere meden gärätä. Ñodre Pablokwe mäträbare Filemonbätä kukwe nebiti, Onésimo ni klabore ngitiani ye “kadre ngäbiti kwe kwin” niebare kwe ie (Filem. 17). Áquila aune Priscila nämäne kirabe kukwebätä yebätä kukwe nämäne gare bäri ie akwa Apolos kani ngäbiti kwin kwe aune nikani ngwena jabe (Hech. 18:26). Nitre kristiano ne ñaka ja erebe jire chi akwa ye ñan aibätä ja ñäkäninbiti kwetre. Ñakare aune ja tuani kwe kukwe yebe aune ja kani ngäbiti kwin kwetre kwärikwäri.

14. ¿Anna aune muko kwe nämäne ni mada tarere bämikani ño kwetre?

¹⁴ Nita ja mräkätre kain ngäbiti kwin aune ja kete ja mräkätre madabe yebiti tare nikwe nita bämike ietre, ye köböire rabai bäri nuäre kräketre ni tarekäre (2 Cor. 6:11-13). Anna aune muko kwe nämäne misionero Africa Occidental ngwane, dre namani bare . Krire kwitani kä madakänti ngwane COVID-19 ye kömikani, yebätä ñan namani nuäre kräketre ja ukäkrökare konkrekasionte ja mräkätre ben. Akwa ja mräkätre nämene tare kwetre bämikakäre, ¿dre nuainbare kwetre? Ja mräkätre käräbare kwe video llamada yete ta, tö nämäne mikabata gare krubäte jai niekäre ietre. Kukwe ne matani ja mräkätre brukwäte yebätä ja mräkätre nämäne niara kärere telefononte ta aune kukwe tike ietre. ¿Ñobätä nitre misionero ne ja di ngwani krubäte rabakäre keteitibe ja mräkätrebe konkrekasionte? Anna tä mike gare ne kwrere: “Kukwe kwin aune kukwe tare nämene nemen bare ngwane ja mräkätre nämä nun dimike krubäte ye törö kwekebe tie. Tita töbike kukwe nebätä ye tä ti töi mike ja mräkätre tarere”.

15. ¿Vanessa kukwe bämikani ye tä dre driere mäi ja mräkätre taredre yebätä? (Üai mikadre ñärärä).

¹⁵ Konkrekasion keta kabre. Yete ja mräkätre jene jene tä, ja ngwen jene aune kukwe jene ben ja tuani kwetre. ¿Drekwe ni dimikai niaratre tarere bäri? Ni rabadre ja töi mike kukwe kwin bätätre yebätä. Meri testiko nünanka Nueva Zelanda kädekata Vanessa kräke ñan nämäne nemen nuäre ja ketakäre ja mräkätre, konkrekasion niarakwe yete yebe ñobätä ñan aune niaratre nämäne ja ngwen ye nämäne mate tare bätä niarakwe ja diandrekä jenena näre ja töi mikani kwe bäri kädenkä niaratrebe jai. Ñaka ja dianinkä jire kwe mento ñakare aune ja töi mikani kwe nemen bäri keteitibe ja mräkätre yebe. Ye köböire kukwe tuin kwin Jehovai ja mräkätrebätä ye jutuabare ie. Niara tä niere: “Ti muko kädekaba circuito tuabitikä ngwane nunta nemen bäri keteitibe ja mräkätre kwati yebe niaratre ñaka ja erebe jire. Akwa nengwane tä nemen bäri nuäre ti kräke. Ja mräkätre ñan ja erebe ye käita nemen juto tibätä. Aune Jehová kräke kukwe ye bä nuäre ye gare tie ñobätä ñan aune niara ara tä kite nitre jene jene ngwena juta jakwe kokwäre. Aisete niaratre tare nikwe, ¿ni raba bämike ño? Kukwe tuin kwin bätätre Jehovai ye erere nikwe mikadre tuin jai (2 Cor. 8:24).

16. ¿Ñobätä ja taredre ye rabai ütiäte krubäte ja tare nikadi kri ye näire? (Üai mikadre ñärärä)

¹⁶ Ja tare nikadi kri näire ja taredre ye rabai ütiäte krubäte, ¿Jehovakwe ni kriemikai ño ja tare nikadi kri ye kömikai ngwane? Babilonia gate jababare ngwane, Jehovakwe kukwe biani mikakäre täte nitre niara mikaka täte nämäne kä ye känti ie yebätä töbike. Kukwe ne niebare kwe: “Nän juta tikwe, mun rika cuarto munkwe ye teri, aune munkwe jukwe dika jabiti. Munkwe ja üka ken yete nememe ti töita rubun näin ta ye ngwane” (Is. 26:20). Ja tare nikadi kri näire nikwe kukwe ne mikadre täte. Mun rika “cuarto munkwe ye teri” nieta nete ye abokän blitata konkrekasion bätä. Kä ye näire ni täi keteitibe ja mräkätre ben ngwane Jehovakwe ni kriemikai käbämikata kwetre ye erere. Akwa nikwe kä ngwandre nüke jai ja mräkätre bätä ye ñan ngärä ñakare aune nikwe niaratre taredre. Ñobätä ñan aune ni ñan täi ja tarere ngwane ni ñan rabaite nire.

JA MIKE JUTO GWÄUNE

17. ¿Nikwe ja mikai juto gwäune ngwane nikwe dre nuaindi ja tare nikadi kri ye näire?

¹⁷ “Köbö Kri Jehovakwe” näire nitrekwe ja tare nikai krubäte (Sof. 1:14, 15). Ni Jehová mikaka täte arato käkwe ja tuadi kukwe tare ben köbö ye näire. Akwa nikwe ja mikai juto gwäune ngwane kä rükai nie kukwe tare jökrä yebätä aune nikwe nitre mada dimikai. Kä ngwanta nüke jai, yebiti kä rükai nie kukwe tare yebätä. Nita ni mada mike tuin bobre jai, ye köböire ni töita kwatibe ja mräkätre dimikabätä kukwe ribei kwe jai yebätä. Ja mräkätre täi tare nikwe ye köböire ni täi keteitibe. Jehovakwe ja nire käre ye bien nie, känti kukwe tare aune ja tare nikadi kri ye ñan rabaira jire (Is. 65:17).