KUKWE JA TÖTIKARA 23

Ja ngöka ñöte: ye kukwe kwin mikata nuaindre jai

Täräkwatare

Ni rabadre kristiano yekäre ja ngökadre ñöte driebare Jesukwe (mäkwe ñäkä Mateo 28:19, 20 yebätä). ¿Ja ngöka ñöte ye dre gärätä? ¿Aune dre nuaindre ja ngökakäre ñöte?

1. ¿Ja ngöka ñöte ye dre gärätä?

Ja ngöka ñöte ye kite verbo griego yekri ye abokän ni ngökata täte ñöte meden gärätä. Jesukwe ja ngökani ñöte ngwane ngökani täte ñö Jordán yete, aune “jatani gökökäta ñöte käin” (Marcos 1:9, 10). Ni kristiano metre tä ja ngökö ñöte ngwane ngökata täte ñöte arato.

2. Ni iti tä ja ngökö ñöte ngwane ¿tä dre bämike?

Ni iti tä ja ngökö ñöte ngwane, ja dianinanka kwe Jehová kräke tä bämike. ¿Aune dre nuaindre ja diankakäre Jehová kräke? Orasion nuaindre kaibe Ngöböi känti niedre ie ni tö sribidi kärekäre kräke. Ye nuainta ja ngöka jämi ñöte känenkri. “Tikwe mä aibe mikai Ngöböre jai aune mä tö dre ie ye rabai bäri ütiäte ti kräke mikakäre täte” ye ni ja diankaka Ngöbö kräke tä niere orasionte. Aune tä ja töi mike Jesukwe kukwe bämikani aune kukwe driebare ye erere. Jesukwe niebare: “Nire tö ja töi mikai kwatibe nänkrä tibe, ni ye abko tö dre dreye jakrä abko raba käikwitekä jabti amne […] jata ti jiebti” (Mateo 16:24). Ja diankata mento aune ja ngökata ñöte ye köböire ja keta raba nemen kwin Jehovabe aune nitre mada Jehová mikaka täte yebe.

3. ¿Dre nuaindre ja ngökakäre ñöte?

Mä tö ja ngökai ñöte ngwane, käne mä rabadre Jehová mike gare jai aune tödeke ie (mäkwe ñäkä Hebreos 11:6 yebätä). Kukwe rabai gare bäri mäi aune mä rabai tödeke bäri ngwane, bäri Jehová rabai tare mäkwe. Ye käkwe mä töi mikai kwatibe kukwe driere aune nüne dre nieta Bibliakwe ye ererebätä (2 Timoteo 4:2; 1 Juan 5:3). Nünanta nemen “kwin metre” Jehová ngwärekri ngwane, ja dianka raba mento aune ja ngökö ñöte (Colosenses 1:9, 10).a

JA TÖTIKE BÄRI NGÜSETA

Jesukwe ja ngökani ñöte ye tä dre driere nie aune ño ja mika raba juto kukwe ütiäte krubäte ye kräke ye ani mike gare jai.

4. Ja ngökadre ño ñöte ye Jesús bämikani

Ja ngökadre ño ñöte Jesukwe bämikani ye mikakäre gare bäri jai ñäkädre Mateo 3:13-17 yebätä aune kukwe ne kädriedre jabe:

Jesús nämäne därebe ngwane, ¿ja ngökani ñöte kwe?
¿Ñö kekani chi jerekäbe dokwäbiti? Ñakare angwane, ¿ja ngökani ño ñöte kwe?

Jesús ja ngökani ñöte ngwane, sribi ütiäte Ngöbökwe mikani kisete ye kömikani kwe. Ñäkädre Lucas 3:21-23 aune Juan 6:38 yebätä aune kukwe ne kädriedre jabe:

Ja ngöka ñöte bitikäre, ¿sribi meden namani bäri ütiäte Jesús kräke?

5. Mä raba ja ngökö ñöte

Ja diandrekä Ngöbö kräke aune ja ngökadre ñöte ye kenanbe jürä raba nemen nibätä. Akwa, mä ja tötikai bäri Jehovabätä aune niara jatai nemen gare bäri mäi ngwane, rabai bäri nuäre mä kräke kukwe ütiäte krubäte ye nuainkäre. Nitre ruäre käkwe nuainbarera ye mikakäre gare jai VIDEO mikadre ñärärä.

VIDEO: Ja keta Jehovabe ye mike dite (1:11)

Ñäkädre Juan 17:3, TNM aune Santiago 1:5, TNM yebätä aune kukwe ne kädriedre jabe:

Ni iti töita ja ngökabätä ñöte ngwane, ¿dre raba dimike ja mike juto?

A. Meri iti tä orare ja diankakäre mento Ngöbö kräke.

B. Meri ye arabe tä ja ngökö ñöte ja mikakäre testiko Jehovakwe. Ngökata täte ñöte.

Ni tö sribidi kärekäre Jehová kräke nita niere ie ngwane, nita ja denkä mento kräke.
Nita ja ngökö ñöte ngwane, nita bämike nitre jökrä okwäbiti nikwe ja dianinanka mento Ngöbö kräke.

6. Ja ngökata ñöte ngwane nita nemen Jehová mräkätre ngätäite

Nita ja ngökö ñöte ngwane, nita nemen nitre ja mräkäre keteitibe kä jökräbiti tibien ye ngätäite. Ni kite medenkri, nikwe dre nuainbare, akwa kukwe keteitibe mikata täte nikwe aune nünandre ño nieta Bibliakwe ye erere mikata täte nikwe. Ñäkädre Salmo 25:14 aune 1 Pedro 2:17 yebätä aune kukwe ne kädriedre jabe:

Texto ne tä niere erere, ¿ja ngökadre ñöte ye tä kukwe meden kwin mike nemen bare ni kräke?

Ja ngwai iti ja ngökani ñöte tä ja kete kwin jä mräkätre konkrekasionte ben ye tä bämike ja töite üai tä jatäri: 1. Tä kukwe jakwe niere ja ngwai iti ie. 2. Tä ja ngwai umbre dimike dikekä. 3. Ja ketamuko kwe kä ñan ja närebiti ben tä mröre. 4. Tä kukwe driere ni iti ie. 5. Tä ja üai denkä ni testiko nibu kwata bä jene jene yebe.

NITRE RUÄRE TÄ KUKWE NE NIERE: “Ja ñan törö ja ngökakäre ñöte tie”.

Akwa mäkwe ja töi mikadre ja ngökö ñöte, ¿ye ütiäte raba ruin mäi?

¿DRE NIBI GARE MÄI?

Ni rabadre kristiano yekäre ja ngökadre ñöte niebare Jesukwe. Yekäre, tö ngwandre kwatibe Jehovai, kukwe kwe mikadre täte aune ja diandrekä mento kräke.

Ngwankäreta törö

¿Ja ngöka ñöte ye dre gärätä aune ñobätä ye ütiäte?
¿Ja dianka mento Ngöbö kräke aune ja ngöka ñöte ye ja erebe?
Ni iti jämi ja denkä mento Ngöbö kräke aune ja ngökö ñöte ye känenkri, ¿rabadre dre nuainne?

Kukwe ja tötikara ne miri krüte:

Mäkwe kukwe ne nuain

Lista (tä sección 4 mrä yete) känti kukwe ngwantarita “¿Ti niena juto kukwe driekäre konkrekasion ben?”, “¿Ti niena juto ja ngökakäre ñöte?” ye mäkwe mika ñärärä kukwe ribeta ye mätä mike täte ya ye mikakäre gare jai.

Kukwe mada:

Kukwe mada

KUKWE MIKE GARE BÄRI JAI

Ja ngöka ñöte ye metrere dre gärätä aune kukwe ruäre ñaka metre nietabätä ye mike gare jai.

“¿Ja ngöka ñöte ye dre gärätä?” (Artículo jw.org)

Kukwe ruäre raba mä dimike ja ngökö ñöte ye mike gare jai.

“Debe bianta Jehovai aune tareta ye tä ni töi mike ja ngökö ñöte” (Ni Mikaka Mokre, marzo 2020)

Töi bökänbiti ni iti ja töi mikani ja ngökö ñöte yebätä ñäke.

“Kukwe metre rabadre gare akwle tie yei niaratre tö nämä” (Ni Mikaka Mokre, 1 febrero 2013)

Mä ja töi mikadre ja ngökö ñöte ye ñobätä ütiäte aune mä raba ja mike ño juto nuainkäre ye mike gare jai.

“¿Ti rabadre ja ngökö ñöte gwä ngwane?” (Monsotre bati tä kukwe ngwentari. Kukwe mikata gare ietre volumen 2, kapitulo 37)

a Ni iti ja ngökani ñöte iglesia madate ngwane, rabadre ja ngököta ñöte bobukäre. ¿Ñobätä? Ñobätä ñan aune iglesia mada ye ñaka kukwe metre Bibliabätä driebare ie (Hechos 19:1-5 aune kukwe ja tötikara 13 mikadre ñärärä).