“Kukwe mikata gare täte” ju krikri mente kwin yekänti
1. ¿“Kukwe kwin mikadre gare täte” ye nuain raba ño?
1 Apostol Pablo tö namani “kukwe kwin ye mikai gare täte” (Hech. 20:24). Ni arato. Ye medenbätä nita ja di ngwen kukwe kwin Gobran Ngöbökwe yebätä mike gare kä nikwe ye jökrä känti, ju krikri mente kwin yekänti arato. Ruäre gänti ni tuametre ñaka näin gwä ju krikri mente kwin yekänti. Akwa, nitre kwati krubäte nüne ju krikri mente kwin yete. Ye medenbätä kä raba nemen bati bobu nie kukwe driekäre ietre.
2. ¿Ñobätä ütiäte krubäte ja ngwandre töbätä aune töbikadre kwin kukwe driedre ju krikri mente kwin yekänti ngwane?
2 Ni mada nuainta tare bätä kukwe blo nuainta, ye medenbätä ju krikri mente kwin ye kwati krubäte jukwei dikata llave yebiti aune guardia o kamara mikata krara (2 Tim. 3:1, 2). Ruäre gänti nitre kädekani ju ngübabitikä ye ñaka raba nitre nübai ñaka ye tuanmetre näin gwä. O nitre kädekani ju ngübabitikä ye raba kä mikakamana nie ju yekänti, nitre nünanka ju krikri mente kwin yete ruäre töi rabadre ñaka kwin ye ngwane. Kukwe nebätä, ja ngwandre töbätä aune töbikadre kwin ye ütiäte krubäte.
3. ¿Ño ngwane kukwe drie raba bäri kwin ju krikri mente kwin yekänti aune ñobätä?
3 Ño ngwane kukwe driedre. Kä mada känti ye erere, nitre tädre gwi ju krikri mente kwin yekänti angwane kukwe driedre ye bäri kwin. Nitre nünanka ju krikri mente kwin yete ñaka gwi angwane ni rabadre ye raba nitre mike töbike blo. Ja mräkätre kwati ie nitre tä kwen gwi dere, bätä sabadote aune bämänte ñänä ruäre yebitikäre. Kukwe driedre dekä krubäte nikwe, metrere bämän krüte yebätä ye raba nitre nünanka yete töi mike blite nitre kädekani ju ngübabitikä yebe.
4, 5. Ju krikri mente kwin ye jukwei tädre dikani llave yebiti angwane ¿ni raba nemen ño kwarto ruäre yekänti?
4 Nändre ño gwä. Mäkwe kukwe drie käne biti mäkwe blita nitre kädekani ju ngübabitikä o nitre mada sribikä ju yekänti yebe. Ju kri mente kwin dikani llave yebiti känti intercomunicador ye tädre angwane, mäkwe blitabiti aune ni ruäre raba mä tuinmetre näin gwä ye känän mäkwe blitakäre ben. Ju kri ye ño ererebätä, mäkwe blita nire käkwe mä tuanmetre näin gwä yebe biti mä raba niken jukwe mada mete. Ruäre gänti, bäri kwin mäkwe kä mikaka aune mäkwe blitata bobukäre intercomunicador yete blitakäre ni mada nünanka kä yekänti yebe. Nitre nibe ben mäkwe blitai jondron yebiti kä ye ngwane yebätä mäkwe töbika kwin.
5 Ñokäre mätä nitre tuinbiti ye nitre ruäre nünanka ju yekänti töta nemen mikamana gare jai intercomunicador yete. Ye erere angwane, mäkwe ja mika gare ja töi jämebiti. Ni gwi ye kä tädre tikani täräbätä angwane mäkwe kädeka kä kwe yebiti. Dre kädrie tö mäkwe ye mäkwe kädekate. Kukwe nieta tärä Razonamiento yekänti yebätä ja mräkätre ruäre kätä ñäke köböire kukwe kwin tä nemen kwetre.
6. ¿Ni jukwe ngübabitikä tädre ju kri mente kwin yekänti angwane dre nuaindre nikwe?
6 Ju kri mente kwin yekänti ni jukwe ngübabitikä ñaka ni tuainmetre näin gwä kukwe driere kwarto kwatire kwatire te angwane, mä raba kukwe driere niarai. Nitre kwati jukwe ngübabitikä töta nemen ñäkäi kä jutobiti tärä nikwe yebätä. Ja tötika raba ben Bibliabätä kä nänkräke gwä yekänti. Ni jukwe ngübabitikä käkwe mä tuametre nitre ruäre tuinbiti ngwane, mä ñaka rika jukwe mada mete ja töi jeñebiti.
7. ¿Dre ngwandre törö jai kra o maletin yebätä?
7 Ja ngwäkita bätä ja ngwan kwin. Nitre mada käkwe ñaka töbikadre blo gäre, mä ñaka rika kra kri o maletin kri ngwena, ñakare aune mä rika kra chi ngwena o mä ñaka rika ngwena jire. Nitre kukwe driekä ruäre kätä tärä denkä driedre ni madai ye tätre niken ngwena täräkwata nginimo te aune tätre niken Biblia ye ngwena kisete o balite.
8. ¿Nitre dianka raba ño kukwe driekäre ju krikri mente kwin yekänti?
8 Ñaka töbikadre blo arato gäre, ñaka ja ükadrekrö kwati krubäte, kä nänkräke gwä yekänti bätä karo mikate käi yekänti. Ne mada, ütiäte krubäte ja ngübadrebiti kwin nitre murie ketata krubäte ye käi gänti (Pro. 22:3). Ñodre, nitre nibu o nimä raba sribire piso ye arabe känti akwa rabadre ja ken kwärikwäri, o nitre mada tädre ngübare ye ngwane itire itire rikadre blite jukwebätä.
9. ¿Ja ngwan kwin ye bämika raba ño? ¿Ñobätä ye ütiäte krubäte?
9 Mun rika gwä ju krikri mente kwin yekänti angwane, munkwe sabata ye sökate kwin ja ngotobätä aune munkwe jukwe dika kwin. Ja ngwain kwin ne erere angwane, nitre nünanka ju yekänti ie kukwe ñaka kwain niedre. Mun raba gwi ngwane, mun rika jötrö ngwarbe elevador o piso känti munkwe kukwe driei yekänti, ne kwe mun ñaka rabadre nünaninkä kä nänkräke gwä yekänti gäre. Ne erere angwane kukwe ñaka kwain töbikakäre blo nitre ni mikaka ñärärä yei.
10. ¿Ño ni ñaka raba kä ngö mike ngwarbe kä dikaraka yekänti?
10 Mäkwe blita nitre ruäre nünanka yete ben angwane, ju krikri mente kwin yete kä ngö ruin kwin kä dikaraka yekänti ye mäkwe ngwan törö jai. Ye medenbätä, mäkwe ñaka blita jadibiti krubäte. Mäkwe blita nitre mada kukwe driekä yebe angwane, mäkwe ja kukwe mika chi akwa kwin aune ni töi jäme ye erere, ne kwe nitre töi ñaka rabadre blo. Nitre kukwe driekä ruäre kätä jukwe mete käkräte kwärikwäri, aune ñaka jukwe kwatire kwatire ye mete, ne erere nitre nünanka ye töi ñaka nikata kwetre. Jukwe ye metadre jadibiti krubäte o rubune ye raba nitre gwi ye ngwen nikenkä ye mäkwe ngwan törö jai arato.
11. ¿Kä ñäi kwandre nie jukwebätä angwane kukwe ño ütiäte raba ni dimike?
11 Jukwe yebätä kä ñäi tärä nikrara angwane, munkwe nünanka känenkri, ne kwe mä bätä ni nänkä mäbe ye jutuadre nitre gwi yei gäre. Mäkwe nikra metre kä ñäi yeteta, aune ni jutua nikren mäi angwane, mäkwe köbö kwin nie ie biti mäkwe blita kömika ben. “¿Mä abokän nire?” ngwantari mäi angwane, mä raba ja kädeke bätä ni nänkä mäbe ye kädeke arato. Ye erere angwane ni ye raba jukwe tike mäi. Akwa ñaka nuaindre kwe ngwane, mä raba kukwe mike gare ie jukwebätä.
12. ¿Kukwe ñaka rabadre jabätä nie gäre täräkwata mikate raba ño ni ñaka gwi yekänti?
12 Ni ñaka gwi ye ngwane. Nita nike ta yebitikäre, nitre kädekani ju ngübabitikä tätre niken täräkwata ükökrö kä dikaraka yekänti o jubäre tibien yebätä niaratre töi ñaka nemen kwin. Mäkwe ngwan törö jai täräkwata mikateta jukwebätä ye tä betekä timon aune tä niken ngwarbe, ye medenbätä mäkwe mikate nitre ye okwä bäre.
13. ¿Ni gwi rabadre rubun ye ngwane dre nuaindre?
13 Nitre gwi rubun. Ni kwan ruäre rubun gwi mäi bätä törba nitre kädekani ju ngübabitikä käräi angwane, mäkwe kä mikaka piso yekänti biti mä rikata köbö mada ngwane. Ruäre gänti bäri kwin kä mikadrekä täte ju kri yekänti ne kwe kukwe ñaka rabadre jabätä nie nitre kädekani ju ngübabitikä yebe gäre. Ye angwane, nikwe ñaka ni gwi ye tuadrebiti jämin niere nie, akwa bäri kwin numero kwarto yebätä tikadre täräkwatabätä biti mikadre tarjeta del territorio yebätä ne kwe ñaka kukwe driedre yete gäre. Yebitikäre, nitre umbre raba niken tuinbiti bobukäre töi mikakäre gare jai, nuainta ju mada mada känti ye erere.
14, 15. ¿Nitre kädekani ju ngübabitikä käkwe kä mikaka manandre mäi ye ngwane mä raba dre nuainne?
14 Kä mikaka manandre mäi ngwane. Mä tädre kukwe driere ju kri yekänti angwane, nitre kätekani ju ngübabitikä o guardia o nitre mada sribikä käkwe kämikaka manandre mäi angwane, mäkwe nuain jötrö ngwarbe. Nikwe ñaka ja töimikadre ñäke jai ni madabe, ne kwe ñaka kukwe mikadre ni rüere o ni driedre guardiai gäre. Ni sribikä ju kri yekänti ñaka ja rüere nitre testiko Jehovakwe yebe ye mäkwe ngwan törö jai, ñakare aune sribi kwe erere nuainta kwe.
15 Nitre kädekani ju ngübabitikä käkwe kä mikaka manandre mäi ye ngwane, ñokäre mätä nitre tuinbiti ye mäkwe mika gare töi kwinbiti ie (1 Ped. 3:15). Sribi kri krubäte tä mä kisete, kä mikakäre juto nitre nünanka yebätä, aune ju kri ngübabitikäre ye gare tie mä raba niere ie. Ñokänti raba mä tuinmetre ju yekänti; akwa ye erere ñaka angwane, mäkwe kämikaka käbube. Niaratre raba mä tuinmetre angwane, mä raba kä kärere kä nänkräke gwä o kä dän ngutu bätäte käi yekänti, täräkwata mikatekäre nane nane (Col 4:6). Ni umbre kukwe drieta jie ngwanka ye ie kukwe ne mikadre gare.
16. ¿Ju kri mente kwin yekänti kukwe drie ye ñäkäidre jankunu nie angwane dre nuaindre?
16 Kä rikadre debe näreta ye bitikäre, kukwe drie raba bobukäre ju kri yekänti. Akwa, kukwe rabadre nirien jankunu angwane, nitre umbre raba ja di kärere sukursal yei, aune nitre kukwe driekä ye ñaka tuanemetre kukwe ye ükete akwle jakräke. Ñaka rabadre nuäre kukwe driedre ju krikri mente kwin yekänti angwane, kukwe drie raba nitre yei teléfono yete o tärä tikata yebiti. Nitre kukwe driekä ruäre tätre kukwe driere ji ngrabare ju krikri mente kwin ye ken dekäkri aune derekri, nitre tätre niken sribikäre o tätre kiteta ja gwirete ye ngwane.
17. ¿Ñobätä ütiäte krubäte kukwe driedre ju krikri mente kwin yekänti?
17 Jondron käme Kä nebätä mikai krüte käi nibira ja ken krubäte, aune nitre käkwe Jehová mikai gare ye aibe rabai kwäre. “Akwa, ¿ni ie tödeka ñaka ye mika raba gare ño? ¿Ni kukwe nua ñaka ye ie tödeka raba ño?” (Rom. 10:13, 14). Nitre kwati “töita metre nünankäre kärekäre” ye abokän tä nüne ju krikri mente kwin yete (Hech. 13:48). Ni ja gwen töbätä bätä ni töbike kwin angwane, ni rabai kukwe kwin ye mike gare ietre.