Sección mrä ja tötika Bibliabätä kömikakäre
1. ¿La Atalaya sribeta ni jökrä kräke yete sección meden mrä täi, aune ñokäre sribebare?
1 Enero ja känenkäre täräkwata La Atalaya sribeta ni jökrä kräke yete kukwe mrä keteiti täi. Kädekata “Enseñanzas de la Palabra de Dios”, ye käkwe ni dimikai ja tötika Bibliabätä kömike. Nitre törbai ñäkäi sección täi täräkwata keteitire keteitire yebätä, akwa metrere kukwe ye tä ükaninte ne kwe nitre kukwe driekä rabadre nitre mada tötike.
2. ¿Sección ye tä ükaninte ño jatäri?
2 Tä ükaninte krörö. Título bätä subtítulo ye tä ükaninte kukwe ngwantarita ye kwrere, ne kwe nikwe kukwe ngwantaridre nitre madai ja tötikakäre ben. Texto meden tä kukwe ye mike gare metre ye tä tikani yete, ne kwe nitre ñäkädre metrere Kukwe Ngöbökwe yebätä. Párrafo ñaka nga krubäte, ye medenbätä ni rabadre nitre mada tötike jötrö ngwarbe. Kukwe kädrieta sección yebätä ye sribebare, ne kwe ni rabadre tärä Enseña driere aune ja tötika ye kömike arato.
3. ¿Kukwe driedre ju ju te ye ngwane sección yebiti ni raba nitre tötike ño?
3 Driedre ño. Täräkwata driedre angwane, sección tä blite drebätä ye ererebätä kukwe ngwantaridre nitre töimikakäre kukwe yebätä. Ñodre, Biblia ye ütiäte La Atalaya 1 enero tä mike gare. Mä raba niere krörö: “¿Biblia ye tuin mäi Ngöbö Kukwei erere o tärä mada ngwarbe kwrere? [Mäkwe tuanmetre blite.] Täräkwata ne tä kukwe ye mike gare”. Kukwe ngwantarita kena sección yebätä ye mäkwe mika tuare, biti ñäkä párrafo kena yebätä aune texto tä tikani yete ye mäkwe känä. Mäkwe ñäkä bobukäre kukwe ngwantarita kena yebätä, aune ni mä kukwe nuaka raba dre niere ye mäkwe niemana ie. Kukwe kädrieta yebätä mä raba ja tötike bäri ben angwane mäkwe nuain, kukwe ngwantarita jatäri ye ererebätä ja tötikadre ben. Mä jämi ja tuaita niere ie ye känenkri kukwe mada ngwantarita ye mäkwe ngwantari ie, biti mäkwe köbö ükate kukwe ye mikakäre gare ie. Mä rika bämän kratire kratire te ja tötikakäre ben kukwe ngwantarita jatäri yebätä nemen täräkwata mrä rükadre ye ngwane. O nitre törba ja tötikai Bibliabätä ye mä raba ngwentari ietre. Ja tötikata ño Bibliabätä ye mä raba mike gare ie täräkwata yebiti.
4. ¿Nitre tuadrebiti ye ngwane sección yebiti ni raba dre nuainne?
4 Nitre ie nita niken täräkwata ngwena käre bätä nita niken nitre tuinbiti ye ngwane sección ne raba ni dimike. Ni raba niere ne kwrere: “Sección mrä tä La Atalaya nebätä. Dre nietabätä ye ti tönibi mikai gare mäi”. Sección mrä yebiti “kukwe era metre [...] rabadre gare ni jökräye” ye nunta ribere Jehovai orasion yebiti (1 Tim. 2:4, Kukwe Kuin Ngöbökwe).