**Mäkwe diri bäri kwin: ja tötikadre ño Bibliabätä tärä Dre drieta yebiti ye mäkwe nuain**

Ñobätä ütiäte. Ni raba nitre tötike Bibliabätä aune ni ñaka ütiä käräi ietre ye nita niere ietre angwane nita blite drebätä ye ñaka tä nüke gare ietre. Rikadre kwelate ye kwrere o tärä juanta jai ye kwrere nuaindre kwetre tä nemen ruin ietre. Yebätä, ni ñaka ja tötika Bibliabätä ye driedre jerekäbe ietre, ñakare aune nuainta ño ye nikwe mikadre gare ietre. Ja tötika Bibliabätä ye nuäre, akwa kwin krubäte ye nikwe mikadre gare ietre. Ni raba ye nuainne minuto braibe te aune ni raba nuainne jukwebätä ietre.

Nuaindre ño:

Mäkwe ja mika gare ni yei, ye bitikäre dreta ja känenkäre kräke yebätä tärä töbike o ñakare ye mäkwe ngwantari ie.
Kukwe ne tä nitre kwati ngwen töbike mäkwe nie ie. Biti, índice tä tärä Dre drieta yebätä ye mäkwe mika tuare ie. Biblia tä dre driere kä ja känenkäre yebätä aune kukwe mada yebätä ye mikata gare nuäre tärä nebätä ye mäkwe nie ie. Ye bitikäre, kapitulo meden tuin bäri kwin ie ye mäkwe ngwantari ie.
Mäkwe tärä ye bian kwati ie aune kapitulo meden tuin kwin ie ye mäkwe känämana ie. Párrafo kena ye känenkri kukwe ngwantarita ye mikata gare kapitulo yebätä ye mäkwe nie ie.
Niara törba ñäkäi párrafo kena yebätä ye mäkwe ngwantari ie. Biti kukwe ngwantarita párrafo ye kräke yebätä mäkwe ñäkä aune kukwe ye mikata gare ño ye munkwe kädrie jabe. Texto meden tä kukwe ye mike gare yebätä mäkwe ñäkä aune mäkwe mika gare ie. Kukwe ngwantarita ye mikata gare ye mäkwe täräi mikaninkä ño tärä mäkwe yebätä ye mäkwe mika tuare ie.
Mäkwe párrafo ja känenkäre ye kädrie ben. Akwa nekänti kukwe ngwantarita ye mäkwe mikamana gare ja kukwei jeñebiti ie.
Mäkwe kwin nie ni yei aune mäkwe kukwe ükate ben kapitulo ye mikakäre krüte mada ngwane.
Raba angwane, mäkwe video ¿Nunta nitre tötike ño Bibliabätä?, tä Internet käi jw.org/jw-ngb yete ye mika tuare ie.

Mäkwe kukwe ne nuain sö krati:

Mäkwe ja di kärä Jehovai orasionte ne kwe mäkwe ja tötika Bibliabätä kömikadre ni iti ben (Filip. 2:13).
Mä rika kukwe driere ye ngwane, nita nitre tötike ño Bibliabätä tärä Dre drieta yebiti ye mäkwe ja di ngwan mike gare bati nitre ie o mäkwe video ¿Nunta nitre tötike ño Bibliabätä? ye mika tuare ie.