Kukwe dianinkä gätä Nita Dirire aune Ja Ngwen Ño ye kräke
4-10 NOVIEMBRE
KUKWE ÜTIÄTE BIBLIABÄTÄ | 1 JUAN 1-5
“Nikwe ñaka kä ne aune jondron kä nebätä taredre jire chi”
w05-S 1/1 10 párr. 13
Jesukwe kukwe bämikani ni käne ye nikwe nuaindre
13 Kukwe jökrä kä nebätä ye ñaka käme nütüta nitre ruäre yekwe. Ye erere akwa, kä ne aune jondron keta kabre mikata tuare ye raba ni töi mike ñaka Jehová mike täte. Ne madakäre, kukwe keta kabre ye ñaka tä ni töi mike nökrö Ngöbö ken. Ye medenbätä jondron kä nebätä ñaka käme akwa, nita tarere ngwane, ja mika raba kukwe kri te (1 Timoteo 6:9, 10). Kukwe keta kabre kä nebätä ye käme krubäte aune raba ni töi kwite.
Mäkwe nünandre ño yebätä töbike
18 Ni ñan rabadre “jondron tä kä nete” kain ngäbiti yekäre töbikadre kukwe tikani Juankwe yebätä: “Jändrän jökrä kämekäme Ngöbö rüere mdeita nebe nie, ye abko rikadi jökrä ta, akwa Ngöbö tö dreye, erere nire nire tä mike täte, ni ye abko käkwe nünandi kärekäre” (1 Juan 2:17). Satanakwe ja töi mikani krubäte kä ne ükatekäre ye raba tuin kwin nie aune nuadi raire kwe raba ruin nie, akwa kä rükai angwane kä ye rikai tibien. Nikwe ñaka ja tuanemetre ngökadre: jondron jökrä kä nebätä ye ñaka nuadi käre.
Perla ükani känändre
Jehovata kukwe miketa törö ye kwin metre
14 Kukwe Kristiano Tikani Griekore yete kukwe keta kabre mikata törö nie ja taredre kwärikwäri yebätä. Jesús niebare kukwe ketebu biani nuaindre abokän bäri ütiäte: “Mata ja tarere au, ye kwrere makwe ni mda mda tare arato” (Mat. 22:39). Santiago, Jesús etebakrä kukwe ye kädekani “kukwe biani nuendre nie” (Sant. 2:8). Aune apóstol Juan kukwe tikani: “Ti mräkätre tare tikwe, kukwe biani nuendre Ngöbökwe tita tike munye, ye abko ñakare biani btin abko tita tike, ñobtä ñan angwane mun jatani tödeke krire Jesubti angwane, munkwe ja taredre kwärikwäri abko niebarera munye, [...] aisete ñakare btin munkrä. Akwa kukwe ye abko kukwe btin kwrere abko tita tiketa munye” (1 Juan 2:7, 8). ¿“Kukwe biani nuendre Ngöbökwe [...] abko ñakare biani btin” aune “kukwe btin” niebare Juankwe ye dre gärätä? Kukwe ketebu ye tä blite ni mada taredre yebätä. Kukwe biani ye ñaka namani bitin, ñobätä ñan angwane “tödek[a] [jatani] krire” ye ngwane Jesukwe kukwe ye niebare. Aune kukwe ye namani “btin” ñobätä ñan angwane ye käkwe niaratre dimikadre ja tarere kwärikwäri aune kukwe mada rabadre bare ja känenkäre ye ngwane. Ni ja tötikaka Kristobe arato, ye medenbätä ni mada taredre ye ütiäte krubäte aune nitre mada töi ja aibebätä ye ñaka mikadre ja töi kwite ngwanta törö käre nie yebätä nita debe bien, ¿ñan ererea?
it-2-S 635 párr. 8
Ngite kitadre ta
Ni raba ngite kitamana ta ni madabiti Ngöbö ie, o nitre konkrekasionte yebiti. Ye erere Moisés käkwe ribebare juta Israel ye jökrä kräke, kukwe nuainbare kwetre Ngöbö rüere mikani gare kwe aune ngite kitamana ta kwe niaratre yebiti aune Jehová käkwe kani ngäbiti (Nú 14:19, 20). Templo käi ngwani juto jabätä ye ngwane, Salomón käkwe orabare ne kwe Jehová käkwe ngite juandre ta juta kwe yebiti, nämäne ja mike ngite aune nämänentre ja töi kwiteta yebätä (1Re 8:30, 33-40, 46-52). Nitre judío nikaninta ja käite ye ngwane, Esdras orabare niaratre ja mikani ngite yebätä nitre jökrä ngwärekri. Orabare kwe ja brukwä tätebiti aune kukwe kwin niebare kwe ye käkwe nitre ye töi mikani kukwe nuainne, ne kwe Jehovakwe ngite kitadre ta niaratrebiti (Esd 9:13–10:4, 10-19, 44). Nire nämäne bren kukwe ja üairebiti ye käkwe nitre umbre konkrekasionte kärädre orakäre ja kräke, ye Santiago käkwe niebare aune “nane ja mikani ngite kwe Ngöbö rüere [...] ye diandikä mento btä” (Snt 5:14-16). Akwa “ngite gata bianka ni ie tärä”, ye abokän ñäkädre üai deme Ngöbökwe rüere, abokän nuainta töi jeñebiti, aisete ngite juan ñaka raba ta nibiti. Nitre ja mikani ngite kukwe ye ererebätä ngwane, ni kristiano ñaka rabadre orare kräke (1Jn 5:16, NGT; Mt 12:31; Heb 10:26, 27; ESPÍRITU; PECADO mikadre ñärärä).
11-17 NOVIEMBRE
KUKWE ÜTIÄTE BIBLIABÄTÄ | 2 JUAN 1-13; 3 JUAN 1-14–JUDAS 1-25
“Nikwe ja di ngwandre rabakäre jankunu kukwe metre yete”
w04-S 15/9 11, 12 párr. 8, 9
“Ni Dänkien di kri, yebti munkwe nüna dite köbö kwatirekwatire”
8 Satana tä kukwe keta kabre mike ni rüere, ye abokän garera nie, ñobätä ñan aune dre drebiti tä ni ngökö krubäte ye mikata gare Bibliabätä (2 Corintios 2:11). Diablu käkwe Job mikani ulire krubäte, jondron dianinkä kän kwe, mräkätre tare kwe krütani, mräkätre ja mikani niara rüere, bren nikabare kwe, aune ja ketamukotre ñaka kwin yekwe kukwe niebare rüere, ye köböite ni ja ngwanka metre ne namani ulire krubäte aune Ngöbökwe niara tuanimetre kaibe nütübare kwe (Job 10:1, 2). Ruäre ngwane, Satana ñaka tä kukwe ye mike nemen bare metre ta nibätä, akwa nitre kristiano kwati ja tare nikabarera kukwe yebätä aune kukwe tä nemen bare nibätä ye Satana raba mike bäri tare, niara töi mikakäre nemen bare.
9 Kä krüte ne näire ni nuateta bäri kukwe ja üairebiti. Kä nengwane, jondron keta kabre ye mikata bäri ütiäte jai kukwe ja üaire yebiti ta. Jondron keta kabre yete nitre tä nemen kämekäme jabe ye tä kä mike juto nitrebätä ye erere mikata gare aune kukwe ye tä ni mike ja tare nike ye nie ñaka kwetre. Aune nitre kwati kä tibienbätä ye “tö rabadi kä ngwen nuäre jabtä, akwa Ngöbö taredi ñakare kwetre” (2 Timoteo 3:1-5). Akwa ‘tödeka ye dokwäre nikwe rüdi’ ngwane ye ñaka rabai bäre, kukwe keta kabre ye raba ni mike di nekä kukwe ja üairebiti (Judas 3, NGT).
Perla ükani känändre
it-1-S 125 párr. 7
Ja tare, fiesta
Fiesta sribe nämäne ja tare yebätä ye nuain nämäne ño aune bäbe sribe nämäne ye Biblia ñaka mike gare (Jud 12, TNM). Jesús aune nitre ja tötikakä kwe ye ñaka fiesta ne käi ngwamana juto jabätä, aisete ni rabadre nuainne ye nikwe ñaka nütüdre. Nitre kristiano jondron bökäne krubäte ye nämäne mrö sribere aune nitre tödekaka bentre bobre bobre ye nübai nämäne kwetre ye mikata gare. Aune ye erere nitre uli, meri kän muko krutani, nitre jondron bäkäne aune nitre bobre nämäne mröre gwairebe aune nitre kristiano nämäne keteitibe kä ngwen juto jabätä.
it-2-S 861 párr. 10
Jä
Kukwe griekore spi·lás, ye abokän jä o jä kri ñaka tuin ñöbiti ta meden gärätä. Yebiti Judas käkwe ni iti namani konkrekasion kristiano yete ja bä mikakäre jerekäbe töi kämebiti ye bämikani. Ru tädre nen ye ngwane jä kri tädre ñöte aune ñaka jutuadre ye raba kukwe tare mike nemen bare, ye erere arato nitre ye raba kukwe tare mike nemen bare nitre mada konkrekasionte yebätä. Judas käkwe ne niebare niaratrebätä: “Nitre ye abokän jä kri tä ükani ñöte ye kwrere tä niken mröre gwairebe munbe fiesta ja tare yebätä” (Jud 12, TNM).
wp17.1-S 12 párr. 3
Ja ngwani metre kwe Ngöbö okwäkänti namani gare ie
Tödeka nämäne Enockwe yebätä nita töbike ngwane, erametre Ngöbö töita ño ye erere nita ja töi mike, ye ni raba kite ngwentari jai. Kukwe driebare Enockwe nämäne ütiäte kirabe ye erere täbe ütiäte kä nengwane arato. Jehová ñü kri yebiti nitre ja ngwanka käme Noé näire ye ganinte, ye ngwane kukwe mikani gare Enockwe ye namani bare. Nitre ganinte yebiti kukwe bäri kri abokän köböra nemen bare bämikani (Mateo 24:38, 39; 2 Pedro 2:4-6). Kä nengwane, Ngöbö tä juto biare angel deme mil kabre ben nitre gatekäre arato aune kukwe ükete nitre ja ngwanka käme kä tibienbätä ben. Kukwe niebare Enockwe ye nikwe mikadre era metre jai aune nikwe nitre mada mikadre mokre. Ruäre ngwane, ni mräkä aune ja ketamuko nikwe ñaka tä ni dimike yebätä ja raba nemen ruin kaibe nie. Akwa Jehová ñaka Enoc tuanimetre kaibe jire chi aune nire tä ja ngwen metre niara ie ye ñaka tuainmetre kaibe kwe arato.
18-24 NOVIEMBRE
KUKWE ÜTIÄTE BIBLIABÄTÄ | APOCALIPSIS 1-3
“Dre dre nuenta munkwe, ye gare jökrä tie”
¿Mun töita ño ye munta bämike tuare?
8 Nikwe ñaka ja töi mikadre ye erere yekäre nikwe ngwandre törö jai Biblia tä niere Jesús “kise ruenkri abko te muke [tä] kwä kükü”. “Muke” ye tä nitre dianinkä nänkäre kä kwinbiti abokän tä sribire ni umbre erere bätä nitre umbre konkrekasionte ye bämike arato. “Muke” tä kisete ye niara raba jie ngwen töta nemen ye erere (Apoc. 1:16, 20). Niara tä Ji dokwä ngwanka konkrekasionte, yebätä tä nitre umbre jie ngwen. Biblia tä niere niara “okwä abko [...] trä ngitiekä ñukwä jutra kwrere”, ye medenbätä, ñongwane kukwe niedre nitre umbre yei töi ükatekäre aune nuaindre ño ye niara tä nuainne (Apoc. 1:14). Nitre umbre kädekani üai deme köböire, ye medenbätä nikwe niaratre kukwei mikadre jankunu täte, Pablokwe kukwe ne tikani: “Nitre mun jie ngwianka ye kukwei mika täte munkwe amne dre dre nuemna kwetre munye, yebtä abko munkwe ñan kukwei kita temen, ñobtä ñan angwane niaratre käre tä mun ngibiarebti [...]. Erere arato, kä rabadre nuäre btätre sribire munkrä, abkokäre niaratre kukwei mikadre täte munkwe. Amne munkwe ñan sribi mika tare krübäte niaratre kisete, ñobtä ñan angwane ye ñan rabadre kuin munkrä” (Heb. 13:17).
Jehová tä ni kriemike ne kwe ni rabadre kwäre
11 Kukwe tuani köböre nieta Apocalipsis kapitulo 2 aune 3 yebätä tä mike gare, Jesukristo kukwe mikani gare konkrekasion keta kükü kä Asia Menor yekänti ie. Köböbare ye tä mike gare, Kristo ñaka tä ja töi mike kukwe jökrä yebätä ñakare aune tä ja töi mike metrere kukwe bäri ütiäte yebätä. Ruäre ngwane tä nitre kädekete metre aune kä jökrä ngwane tä kukwe niere aune mäträre ni dimikakäre. ¿Kukwe kädrite ye tä dre mike gare nie ja töi kräke? Kukwe tuani köböre ye namani bare kä 1914 yete ja känenkäre. Konkrekasion keta kükü yebiti nitre kristiano braibe dianinkä nänkäre kä kwinbiti bämikata, aune mäträta niaratre yebätä ye nieta konkrekasion kä jökräbiti tibien kräke arato. Ni raba niere metre, Jehová tä Monso kwe yebiti juta kwe jie ngwen jankunu. ¿Nikwe dre nuaindre ne kwe ni jie ngwandre kwe?
w01-S 15/1 20 párr. 20
Juta Jehovakwe yebe gwairebe ni tädre näin
20 Juta Jehovakwe tä näin jankunu yebe gwairebe ni tädre näin yekäre, Jehovakwe Jesús mikani “ji dokwäte” konkrekasion kräke ye nikwe mikadre ütiäte jai (Efesios 5:22, 23). Kukwe nieta Isaías 55:4 yete ye ütiäte arato: “¡Mike ñärärä! [Ti Jehová käkwe] niara mikani testikore, ni ji ngwanka aune ni nitre rükä jie ngwanka juta keta kabre kräke”. Jesús ye abokän ni ji ngwanka bäri kwin ye gare metre nie. Aune oveja kwe bätä dre sribebare kwe ye gare kwin ie arato. Ne madakäre Jesús konkrekasion keta kükü Asia Menor ye mikani ñärärä ngwane, niebare bärike jire kwe: “Dre dre nuenta munkwe, ye gare jökrä tie” (Apocalipsis 2:2, 19; 3:1, 8, 15). Nita dre ribere jai ye gare kwin Jesús ie, Rün kwe Jehová yei erere arato. Orasion padrenuestro ye Jesús jämi nuainne ye känenkri niebare kwe: “Munta dre dre mdei nike, ye mun ngämi kärere mun Rünye, ye känenkri tärä nebe gare ie” (Mateo 6:8-13).
Perla ükani känändre
“Ngöbö kebera nüke mun tiketeta”
12 ¿Jesús jatai “di kri bä nuärebti” ye ngwane dre nuaindi kwe? Nire nire käkwe ja ngwandi metre Ngöböi ye kräke jondron kwin nuaindi kwe aune nitre käkwe ñaka ja ngwandi metre Ngöböi ye abokän mikai ja ngie nuin kwe (Mateo 24:46, 47, 50, 51; 25:19, 28-30). ¿Nuaindi ño kwe? Niara arabe käkwe mikani gare: “TI NI Kä Nebtä Ngobo jatadita ja di kri bä nuärebti angwane, angeletre tikwetikwe rabadi jökrä bäre temen angwane, kürä gobrankrä bti ti rabadi täkänintbe kä bä nuärete. Ye ngwane abko nitre nünanka kä jökräbti temen rükadi ja ükekrö ti ngwärekri angwane, ni obeja ngibiaka käta obeja erere ükekrö jenena amne kabra erere tä ükekrö jenena, ye kwrere jire tikwe ni ükadikrö ketebu jene jene. Amne ni jen tikwe obeja kwrere erere tikwe mikadi ja küde ruenkri amne ni ñakare tikwe kabra kwrere abko tikwe mikadi ja küde ngeberekri, ni obeja ngibiaka käta nuene obeja amne kabrabtä ye kwrere” (Mateo 25:31-33). Ye tä mike gare Jesukwe kukwe ükaite nitre jökrä ben. Ni iti ñaka ja ngwani metre Ngöböi rabai tuin ie angwane, ja töi mikai kwe kädeke “kabra” aune gadrete kärekäre niedi kwe. Akwa ni iti käkwe ja ngwani metre Ngöböi rabai tuin ie angwane, ja töi mikai kwe kädeke “obeja” aune tuainmetre kwe nüne kärekäre (Mateo 25:46).
13 Biblia tä niere nitre “kabra” kwrere ye gaite rabai gare ietre angwane, “rabadi nekwetekä krübäte ja jiebti” (Mateo 24:30). ¿Aune nitre dianinkä nänkäre kä kwinbiti bätä nitre mada Ngöbö mikaka täte ye abokän käkwe dre nuaindi? Jesús kukwe niebare ne erere nuaindi kwetre: “Kukwe nini tikwe ye erere rabara nakenkä mun okwäbti angwane, munkwe kä ngwian nuäre jabtä, ñobtä ñan angwane Ngöbö kebera nüke mun tiketeta” (Lucas 21:28).
w09-S 15/1 31 párr. 1
Kukwe ütiäte dianinkä tärä Apocalipsis (parte 1) yebätä
2:7, NGT. ¿“Paraíso Ngöbökwe” ye abokän dre? Kukwe ne niebare nitre dianinkä nänkäre kä kwinbiti ie, ye medenbätä kä bä nuäre ye abokän kä kwinbätä, Jehová ngwärekri meden gärätä. Metrere ye bä nuäre krubäte. Nitre dianinkä nänkäre kä kwinbätä ja ngwanka metre ye käkwe “kri ngwäkä ja nirekräkwe” ye kwetai ye abokän ja üaire ñaka krüte biain ietre meden gärätä (1 Cor. 15:53).
25 NOVIEMBRE NEMEN 1 DICIEMBRE
KUKWE ÜTIÄTE BIBLIABÄTÄ | APOCALIPSIS 4-6
“Nitre nibokä tä näin mädä jene jenebiti”
wp17.3-S 4 párr. 3
Nitre nibokä tä näin mädäbiti mikata gare Apocalipsis yete, ¿ye tä dre bämike?
¿Ni nänkä mädäbiti ne abokän nire? Kukwe ye mikata gare tärä Apocalipsis yebätä. Kapitulo mada ja käne yete ni nänkä mädäbiti ye kädekata “Ngöbö Kukwei” (Apocalipsis 19:11-13). ‘Kukwe’, nieta ye abokän Kristo ñobätä ñan aune niara ye abokän tä Ngöbö kukwei mike gare (Juan 1:1, TNM, 14). Aune kädekata arato “Jrei bäri kri jrei mda mda kräke amne Dänkien bäri kri dänkien mda mda kräke” aune niara abokän “Ja Kukwei Mikaka Täte amne Ni Era Metre” mikata gare (Apocalipsis 19:11, 16). Metrere, niara die tärä yebätä raba rei rükä ye kwrere nuainne aune ne madakäre niara ye ñaka kukwe käme nuainkä aune die ñö yebiti ñaka bike bäri. Akwa ni tä nemen kukwe mada ngwentari jai.
wp17.3-S 4 párr. 5
Nitre nibokä tä näin mädäbiti mikata gare Apocalipsis yete, ¿ye tä dre bämike?
Akwa, ¿ñongwane nitre nibokä nänkä mädäbiti ye jatani? Jesús nikani käne, korona biani ie ye ngwane (Apocalipsis 6:2). ¿Aune ñongwane namani Reire kä kwinbiti? Ñaka namani bare niara krütani aune nikaninta kä kwinbiti ye ngwane, ñobätä ñan aune kä yete ja känenkäre namani kukwe ye ngübare mikata gare Bibliabätä (Hebreos 10:12, 13). Ñongwane Jesús kukwe ye ngübadi mrä aune rabaira gobrane kä kwinbiti, ye ñokänti rabadre gare nitre nänkä niara jiebiti yei, ye mikani gare kwe ietre. Niara jatai gobrane ye ngwane, jötrö ngwarbe kukwe bäri tare jatai nemen bare rü rakaikä, mrö nika aune bren jatai nemen bare niebare kwe (Mateo 24:3, 7; Lucas 21:10, 11). Rü kri nakaninkä kena kä 1914 ye bitikäre, kukwe ye namani bare ye mikani gare metre aune ni namani nüne “kä krüte” te mikata gare Bibliakwe ye erere (2 Timoteo 3:1-5, TNM).
¿Nire köböite metrere rüta nakainkä aune ja tare nikata?
Ni täkäni mädä tainbiti yei ja di biani “kä jäme dian[kakäre] jökrä nikän kä nebtä”. (Apocalipsis 6:4.) Kä 1914 yete ja känenkäre, rü nuainta krubäte kä tibienbätä. Rübare Kri Kena ye bitikäre krire kä nikani grebiti kwati ta angwane Rübare kri Bobukäre aune nitre murie ketani bäri: 60,000,000 näre nieta. Kä 1945 yete ja känenkäre, juta ruäre aibe te rüta akwa ja murie ketata krubäte arato. Nitre ruäre kukwe kira tikaka tä niere siklo XX ye ngwane nitre cien millone biti bäri murie ketani rübare yete.
wp17.3-S 5 párr. 4, 5
Nitre nibokä tä näin mädäbiti mikata gare Apocalipsis yete, ¿ye tä dre bämike?
“Ye btäräbe tikwe nikraba angwane, mdä bä drüne, btä ti okwä rababa amne, ni näma näin mdä yebti abko näma jändrän däbä nuatekrä ngwena kisete. Angwane jändrän ketabkä, ye ngätäite Ngöbö kukwei jaraba krörö tie: [...] ngwian ganaindre köböiti abko biandre jökrä trigo kilo kratibe btä. Erere arato, ngwian ganaindre köböiti abko bti sebada kökadre kilo krämäbe jökrä, akwa olibo köi amne uba döi, ye abko makwe ñan juan ngwarbe jire chi, nieba kore kwe abko jaraba tie” (Apocalipsis 6:5, 6).
Ni nänkä mädä nebiti ye tä mrö nika ye bämike. Mrö nika krubäte ye mikani gare “trigo kilo kratibe” (0.7 kilos o 1.54 libras) ye rürübäindi denario kwatibebätä, ye abokän siklo kena yete sribi nämäne köböitibe ütiä bian nämäne ye näre (Mateo 20:2). Erere arato “cebada kökadre kilo krämäbe” ngwian ye näre biti (2.1 kilos o 4.63 libras), trigo ye nämäne bäri kwin sebada yebätä nitre kräke. ¡Ye rabadre chi krubäte nitre ja mräkäre kwati kräke! Yebitikäre nitre rabadre aceite oliva aune vino ñäketubu kwin, mrö ye kweta nämäne kä ye näire.
¿Nire köböite metrere rüta nakainkä aune ja tare nikata?
Ni täkäni mädä bä sotrobiti ye abokän tä bren tare krubäte ngwen (Apocalipsis 6:8.) Siklo XX yete bren tare krubäte nikabare ye abokän bren gripe española. Nitre nibe krütani bren ye kisete nie ñaka ja erebe, akwa nitre 50,000,000 krütani nieta. Tärä Man and Microbes tä mike gare: “Bren tare ñan tuabare erere bren ye kisete nitre krütani bäri [...]. Bren ye erere bren bubónica ye kisete nitre ñaka krütani krubäte drekebe ngwarbe”. Bren viruela, malaria aune tuberculosis (mura nöta) ye nemen neketekä ni madabätä arato abokän kisete nitre millon kwati krubäte krütani siklo XX yete.
Perla ükani känändre
re-S 76 párr. 8
Kürä Jehovakwe bä nuäre krubäte
8 Sacerdote nämänena kädekani sribikäre tabernáculo kira yete, nämäne gare Juan ie. Ye medenbätä kukwe meden mikani gare ne niara töi mikani ñan krütare: “Kürä gobrankrä ye bäre ta abko kürä mdara jire näma kwä gre bti kobkä. Kürä yebti abko nitre unbre unbre näma täkänintbe ni gre bti nibkä. Nitre ye abko metre amne deme, ye bä mikakrä dän bä ngwen bürere näma kitani btätre amne korona orore orore näma mikani dokwäbti, btä ti okwä rababa” (Apocalipsis 4:4). Ye erere, sacerdote tädre näre, nitre umbre nämäne 24 täkäni küräbiti aune mikani gobrankäre. ¿Nitre umbre ye abokän nire? Ye abokän nitre dianinkä nänkäre kä kwinbiti tä konkrekasion kristiano yete bätä nitre ganinankrö aune tä kä kwinbiti käbämikani Jehovakwe ietre ye erere. ¿Ye ñokänti gare nie?
cf-S 36 párr. 5, 6
“Ni iti Judá mräkäkri abko dite kwra lion kwrere”
5 Ni ñaka kä jürä ngwanka jabätä ye bämikata kwra lion ye kwrere. ¿Mäkwe ja tuanina ngwärere kwra lion kri ye kwrere ben? Metrere ye ngwane, ki nämäne mä kriemikakäre kwra yebätä. Yebiti ta kä jürä raba nemen nibätä. Kwra dite aune rubun krubäte mikadre ñärärä aune okwä rabadre kwekebe nibätä ngwane, kwra ye raba ngitie jondron ngäniene ye bä ñaka raba nemen ni töite. Biblia tä mike gare kwra lion “ye abokän bäri dite jondron nire mada mada ye jökra kräke, aune nire tädre ngwärekri yebätä ñaka nainteta ja trökwareta jire chi” (Proverbios 30:30). Ye erere arato Kristo ñaka kä jürä ngwen jabätä.
6 Kwra lion ye erere Jesukwe ñaka kä jürä ngwani jabätä bämikani kwe kukwe ketamä känti: kukwe metre yebätä ja kwetani kwe, kukwe metre nuain manamane kwe aune ja mikani niara rüere yebe ja tuani kwe. Bätä nikwe mikai gare jai ni nierare ñaka kä jürä ngwen jabätä o kä jürä tärä nibätä akwa ni raba ja ngwen niara erere aune ni raba kukwe ye bämike.