Kukwe ngwantarita
◼ ¿Kukwe kädrieta gätäte ye nitre testiko Jehovakwe rabadre kopia denkä o grabare biankäre ni madai?
Kukwe Bibliabätä kädrieta ye tä kä mike juto nibätä aune tä ni dimike (Hech. 15:32). Ye medenbätä, nire käkwe ñaka kukwe ye nuabare ye ni tö kukwe ye mikai gare ie. Jondron sribeta kä nengwane yebiti kukwe kädrieta ye graba raba ne kwe bengwairebe rabadre ni mada kisete. Kukwe kädrieta kä nengwane bätä ruäre abokän kädriebare mekerabe, ye ja mräkätre ruäre käkwe grababare aune ja töi kwinbiti tä bien o grabare ja ketamuko kwe ye kräke. Ja mräkätre mada abokän kätä kukwe kädrieta ye mike Internet käi yekänti, ne kwe nire törbadre diainkä jakrä rabadre nuainne.
Kukwe kädrieta ye grabadre jakrä o ni mräkätre kräke ye ñaka käme. Ne madakäre, nitre umbre raba ni mada mike kukwe ye grabare ja mräkätre konkrekasionte bren aune ñaka raba nemen gätäbätä yekrä. Akwa, kukwe keta kabrebätä kukwe kädrieta gätäte ye ñaka grabadre o kopia diandrekä biankäre ni jökrä ie.
Kukwe meden raba konkrekasion dimike ye ererebätä kädrieta, yebätä kukwe kädrieta ye biandre ni madai angwane ni ye raba töbike jene kukwe yebätä. Ne madakäre, kukwe kädriebare ye erere kädrie täbe kä nengwane o kukwe nieta ye jökrä metre ye ni mada ñaka raba gain, ñobätä ñan angwane nirekwe kukwe ye kädriebare aune ñongwane kädriebare ye ñaka gare kwin ie (Luc. 1:1-4). Kukwe kädrieta ye kopia diandrekä o grabadre biankäre ni madai, ye raba ja mräkä ruäre töimike ni mada käikitekä krubäte o ni ruäre ie ja raba nemen ruin bäri ütiäte (1 Cor. 3:5-7).
Nitre sribikä täte metre bätä töbätä tä sribire krubäte, ne kwe “mrödre ñongwane erere käita nüke angwane” tätre biare mrö ja üaire ye biankäre nie (Luc. 12:42, KKN). Kukwe kädrieta konkrekasion testiko Jehovakwe yete bätä kukwe grababare abokän ni raba denkä Internet käi www.pr2711.com. ye känti, ye abokän mrö ja üaire bianta kwetre nie. Erametre, nikwe tö ngwandre nitre sribikä täte metre bätä töbätä aune Nitre Braibe Konkrekasion Jökrä Ngübabitikä käkwe jondron ribeta nikwe jai ye biain nie ne kwe tödeka nikwe tädre bäri dite (Hech. 16:4, 5).