KUKWE JA TÖTIKARA 52
Nireta ja tuin kukwe tare ben ye nikwe dimikadre
“Nire tä jondron ribere jai ye mä raba dimike angwane, mäkwe ñaka jondron kwin ye käbäidre kän” (PROV. 3:27).
KANTIKO 103 Nitre ji ngwanka ye ütiäte krubäte
KUKWE NEBÄTÄ JA TÖTIKAIa
1. Nitre Jehová mikaka täte tä kukwe ribere ie orasionte ngwane, ¿bä kabre dre nuainta kwe nuainkäre?
¿JA MRÄKÄ tä ja di ribere krubäte Jehovai ye Jehová raba dimike mäbiti gare mäi? Ni ni umbre ji ngwanka, siervo ministerial, prekursor, ja mräkätre kukwe driekä, ni bati, ni umbre, ni brare aune ni merire ni raba nuainne. Ja mräkä tä Jehová tarere tä ja di kärere ie ngwane, bä kabre nitre umbre ji ngwanka aune ja mräkätre mada tä ja mräkä ye töi mike jäme (Col. 4:11). Sribidre kore Jehová aune ja mräkätre kräke ye ütiäte krubäte. Epidemia tä nakainkä, kukweta nemen bare jötrö ngwarbe aune ja mikata ni rüere ngwane, ni raba nuainne.
EPIDEMIA TÄ NAKAINKÄ NGWANE
2. ¿Ñobätä ñan tä nemen nuäre ni kräke ja mräkätre dimikakäre bren tä tare tä nemen käbiti tibien ye ngwane?
2 Epidemia näire ñan tä nemen nuäre ni kräke ja dimikakäre kwärikwäri raba ruin nie. Ñodre, ni törba nuäin ja mräkätre gwirete, akwa ñan nuain raba. O ja mräkätrekwe mrö ñakare, ngwian ñakare ye ni törba nübai ja gwirete mröre jabe, akwa nuain ñan raba. Ni tö ja mräkätre dimikai akwa ni mräkä nikwe tä ja tare nike, yebiti ta nita ja töi mike ja mräkätre dimikabätä aune ni raba dre nuainne ye erere nikwe ja di ngwain nuainne ngwane, nikwe kä mikai juto Jehovabätä (Prov. 3:27; 19:17). Ye medenbätä, ¿ni raba dre nuainne?
3. Nitre umbre ji ngwanka konkrekasion Desikwe yete käkwe kukwe kwin bämikani, ¿ye tä dre driere nie? (Jeremías 23:4).
3 Nitre umbre ji ngwanka raba ne nuainne. Mä ni umbre ji ngwanka ngwane, mäkwe oveja mika gare kwin jai (ñäkädre Jeremías 23:4 yebätä).b Desibätä blitaba kukwe ja tötikara känebätä tä niere: “Nitre umbre ji ngwanka nämäna kukwe driere tibe aune ja mräkätre madabe aune nämäntre kukwe ruäre nuainne nunbe”.c Nitre umbre ji ngwanka kukwe nuainbarera ye kwrere, ye köböire pandemia COVID-19 näire nämäne bäri nuäre kräketre Desi dimikakäre aune Desi yekän mräkätre ruäre krütani bren tare ye köböite.
4. ¿Dre köböire nitre umbre ji ngwanka käkwe Desi dimikani aune kukwe meden ja töi kräke?
4 Desi tä niere: “Nitre umbre ji ngwanka ye nämänena ja ketamuko tikwe, aisete ja nämä nemen ruin ño tie aune dre nämä ti mike töbike ye rababa nuäre ti kräke mikakäre gare ietre”. ¿Kukwe meden ja töi kräke nitre umbre ji ngwanka kräke? Nitre umbre ji ngwanka munkwe ja mräkätre tuabiti aune munkwe ja keta ben kukwe tare rakadrekä känenkri. Bren tare rakadrekä ngwane, ñan raba nemen ja mräkätre tuinbiti gwirete ngwane, rabadre kukwe mada känene blitakäre jankunu ja mräkätre ben. Desi tä niere: “Ruäre ngwane, nitre umbre ji ngwanka kwati nämä ti kärere o kukwe juen tie köbö arabe näire. Texto meden mika nämä gare kwetre tie ye nämänena gare tie, akwa yebiti ta mataba ti brukwäte”.
5. Ja mräkätre tä dre ribere jai ¿ye ñokänti raba nemen gare nitre umbre ji ngwanka konkrekasionte ie aune raba dimike ño?
5 Ja mräkätre tä dre ribere jai ye rabadre gare nitre umbre ji ngwanka ie yekäre rabadre kukwe keteiti nuainne, ye abokän rabadre töbike kwin käne kukwe ngwantarikäre (Prov. 20:5). Ja mräkätre tä dre ribere jai, ñodre kräkä aune mrö ¿ye tärä kwetre? ¿Sribi o ju ye raba nete kän? ¿Ja di kärädre kwetre gobran ie yebätä ja di ribeta kwe? Jondron ja ngätärebiti ja mräkätrekwe Desi dimikani. Akwa nitre umbre ji ngwanka käkwe dimikani ja töibiti aune ja üairebiti ye käkwe dimikani bäri. Nieta kwe: “Nitre umbre ji ngwanka oraba tibe. Kukwe meden nieba kwetre tie ye ñan törö tie, akwa ja rababa ruin ño tie ye törö tie. Jehová nämä kukwe ne niere tie rababa ruin tie: ‘Mä ñan tä kaibe’” (Is. 41:10, 13).
Ja mräkätre kwati tä Ju Ja Ükarakrö yete aune iti bren tä videoconferencia yebiti tuin ja mräkä iti tä kukwe kädriere gätäte ie ye käi nibi jutobätä (Párrafo 6 mikadre ñärärä)
6. ¿Ni konkrekasionte rabadre ja dimike ño kwärikwäri? (Üai mikadre ñärärä)
6 Konkrekasion raba ne nuainne. Nitre umbre ji ngwanka tä ja mräkätre dimike käne ye gare nie. Akwa ja mräkätre ie kukwe kwin niedre dimikakäre aune dimikadre ye Jehovata ribere ni jökrä ie (Gál. 6:10). Ni bren kräke kukwe chi nuaindre ye rabai ütiäte kräke. Monsotre kia raba tarjeta o dibujo nuainne ja mräkätre dimikakäre. Monsotre bati raba niken jondron kökö meri testiko kräke. Ni mada abokän raba mrö sribere ni bren kräke aune niken ngwena kräke gwirete. Erametre bren nikata krubäte ngwane, ni jökrä ie kukwe kwin niedre dimikakäre ribeta jai. Ye medenbätä, gätä ye bitikäre ni rabadre blite ja mräkätre ben, ngwärere o videoconferencia yebiti ye kwin raba ruin nie. Nitre umbre ji ngwanka ie kukwe kwin niedre dimikakäre tätre ribere jai. Ja mräkätre ruäre tä nota debe biankäre sribere kräketre, ñobätä ñan aune metrere bren tare näire nitre umbre ji ngwanka tä sribire krubäte. Ni jökrä käkwe ja di ngwandre kukwe ne mikakäre täte ye kwin: “Aisete munkwe ja moto mika nuäre kwärikwäri nünakäre dite ni Dänkien Jesukristo kräke amne, munkwe ja mika bäri dite” (1 Tes. 5:11).
KUKWETA NEMEN BARE JÖTRÖ NGWARBE NGWANE
7. ¿Kukweta nemen bare jötrö ngwarbe ye köböite dre raba nemen bare?
7 Kukweta nemen bare jötrö ngwarbe ye köböite ni ñan raba nüne käne ye erere. Jondron raba nete kän, ju raba nete kän aune mräkätre tare kwe ye raba krüte kän. Ne raba nemen bare jä mräkätre yebätä arato. ¿Ni raba niaratre dimike ño?
8. ¿Nitre umbre ji ngwanka konkrekasionte aune nitre rüne raba dre nuainne kukwe rabadre bare jötrö ye känenkri?
8 Nitre umbre ji ngwanka raba ne nuainne. Nitre umbre ji ngwanka, munkwe ja mräkätre mika juto biare kukwe rakadrekä jötrö ngwarbe ye kräke. Ja mräkätrekwe dre nuaindre rabatekäre nire aune blitadre kwe munbe ye munkwe mika gare jai. Margaretbätä blitaba kukwe ja tötikara känebätä ta niere: “Käta nukwe käi jämi niken ta aune kämikadrekä ye nitre ji dokwä ngwanka käkwe niedre o kukwe jatadre nakainkä bäri tare ngwane, kämikadrekä jötrö ngwarbe ye nitre umbre ji ngwanka ngwanba törö kukwe keteiti kädrieba konkrekasion kräke yete”. Kukwe kädriebare ye namani ütiäte krubäte, ñobätä ñan aune bämän nikani krärike ta ngwane kä nukwani krubäte. Nitre rüne, mun mräkätre itire itire dre nuaindre kukwe rakadrekä jötrö ngwarbe ye kräke ye munkwe mika gare Ngöbö mikata täte ni mräkäbe yete. Mä aune monsotre mäkwe tädre juto biare kukwe rakadrekä kräke ngwane, ye köböire mun töi täi jäme.
9. ¿Kukweta nemen bare jötrö ngwarbe ye känenkri aune bitikäre nitre umbre konkrekasionte rabadre dre nuainne?
9 Mä ni superintendente grupo yekwe ngwane, kukwe rakadrekä jötrö ngwarbe ye ngwane batibe mä rikadre dato ja mräkätrekwe ye ükökrö ye mäkwe ñan ngüba. Mä raba ja mräkätre kä ükökrö gwä ngwane aune mäkwe ükate gwä gwä. Ye köböire kukwe rakadrekä jötrö ngwarbe ngwane, mä raba blite ja mräkätre kukwe driekä itire itire ben aune tädre dre ribere jai ye mä raba mike gare jai. Mäkwe kukwe ye bian ni umbre ji ngwanka coordinador ie aune ni umbre ji ngwanka coordinador käkwe blitai ni circuito tuabitikä ben. Sribita gwairebe ye köböire kukwe kwin tä nemen bare. Kä nukwani ye bitikäre, ni circuito tuabitikä circuito Margaretkwe yete käkwe ñan ja dükabare ora 36 näre te, ñobätä ñan aune nämäne kukwe ükete ne kwe nitre umbre ji ngwanka käkwe ja mräkätre 450 näre yebe blitadre aune dimikadre yekäre (2 Cor. 11:27). Kukwe ye köböire kä kwani ja mräkätre jökrä kräke.
10. ¿Nitre umbre ji ngwanka oveja ngübadre ye ñobätä ütiäte krubäte? (Juan 21:15).
10 Ja mräkätre dimikadre ja üairebiti aune ja töibiti, sribi ye tä nuaindre nitre umbre ji ngwanka ie (1 Ped. 5:2). Kukwe tare tä nakainkä ngwane, ja mräkätre itire itire tädre nire, mrö, dän aune ju tädre kwetre ye nitre umbre ji ngwanka tä mike gare jai. Akwa, ja mräkätre tä ja tuin kukwe tare ben ye dimikadre ja üairebiti aune ja töibiti sö kabre te ye tädre ribere jai (ñäkädre Juan 21:15 yebätä). Harold ni sribire Comité Sukursalte käkwe blitabare ja mräkätre kwati ja tuani kukwe tare ben yebe. Tä niere: “Ja mräkätre töi rabadreta jäme yekäre kätä niken kwati ta. Kä raba kiteta jerekäbe, akwa ja mräkätre kän mräkä krütani, jondron ütiäte kwetre nianinte kän o ja tuani kukwe tare ben kwetre ye raba nüketa törö ietre. Kukweta nüke törö ietre köböite raba nementa ja tare nike o ulire. Akwa ye ñan tä mike gare ñan tödeke, ñakare aune ye nierare”.
11. ¿Kä ruäre te ja mräkätre tä dre ribere jai?
11 Nitre umbre ji ngwanka kukwe ne mikadre täte ye ütiäte krubäte: ‘Nire tä ja muaire yebe mun ja muaidre siba’ (Rom. 12:15). Ja mräkätre tä nemente nire kukwe tare tä nakainkä ngwane, ye Jehovata tarere aune ja mräkätre tä tarere niedre ietre tätre ribere jai. Nitre umbre ji ngwanka rabadre nitre ja mräkäre ye dimike kukwe ja üaire nuainne jankunu, ñodre orare, ja tötike, niken gätäbätä aune kukwe driere. Ja keta Jehovabe ye kukwe keteiti ñan raba juen ngwarbe jire ye munkwe nitre rüne töi mika niere monsotre ie. Nitre rüne, Jehová ye raba nemen käre ja ketamuko monsotrekwe aune käre tä yete ni ken ye munkwe ngwan törö ietre. Etebatre aune ja ngwaitre kä jökräbiti tibien tä juto biare dimikakäre ye munkwe mika gare ietre (1 Ped. 2:17).
Kukwe tare rakadrekä ni käite ngwane, ¿ni raba ja mike juto biare nitre dimikakäre? (Párrafo 12 mikadre ñärärä)f
12. Sribi nuainta ja mräkätre tä ja tuin kukwe tare ben dimikakäre, ¿ye konkrekasionkwe dimikadre ño? (Üai mikadre ñärärä)
12 Konkrekasion raba ne nuainne. Kukwe tare rakadrekä känime mä bäre ngwane, mä raba dre nuainne ye mäkwe ngwantari nitre umbre ji ngwanka ie. Ja mräkätre tä niken kä mada känti kukwe tare köböite o ja mräkätre nitre dimikaka ye mä raba mike kä ruäre te ja gwirete. Mä raba ja mike mrö aune jondron mada ye ngwankäre ja mräkätre kräke. Kukwe tare rakadrekä mente ngwane, mä raba ja dimike arato. ¿Mä raba nuainne ño? Orare ja mräkätre tä ja tuin kukwe tare ben ye kräke aune sribi nuainta ja mräkätre tä ja tuin kukwe tare ben ye dimikakäre ye kräke mä raba ngwian bien ja töi jeñebiti sribi nuainta gobran Ngöbökwe kräke (2 Cor. 1:8-11; 8:2-5). Aune mä raba niken ngwane, mä raba dre nuainne ye mäkwe ngwantari nitre umbre ji ngwanka ie. Mä nübaidre ngwane, mäkwe sribidre kwin kä ye ngwane aune medente mä ribeta yekänti mä mikadre ye kräke mä tötikai raba ruin nunye.
JA MIKATA NI RÜERE NGWANE
13. ¿Sribi Jehovakwe ñäkäita yekänti ja mräkätre tä ja tuin kukwe meden ben?
13 Ja mikata ni rüere köböite ja mräkätre tä ja tuin kukwe bäri tare ben. Sribi nikwe ñäkäita yete ja mräkätre meden tä nüne ye tä ja tuin ngwian o jondron ñakare yebe, tätre bren nike aune mräkätre tare kwe tä krüte kän. Sribi nikwe ñäkäita ye köböite nitre umbre ji ngwanka ñan raba dikekä jäme kwäräkwärä o ja mräkätre meden ie kukwe niedre dimikakäre tätre ribere jai yebe niaratre ñan raba blite. Andreibätä blitaba kukwe ja tötikara känebätä yebätä kukwe ye erere namani bare. Meri testiko iti grupo kwe yete, yekwe jondron aune ngwian ñan nämäne, bätuakäre karo matani te. Operación nuainbare bä kabre yebätä ñan namani sribire. Sribi Ngöbökwe ñäkäita aune pandemia yebiti ta, ja mräkätre käkwe ja di ngwani kukwe ükatekäre meri testiko ye dimikakäre aune kukwe ye nämäne gare Jehovai.
14. ¿Nitre umbre ji ngwanka tä tö ngwen Jehovai ye tä bämike ño?
14 Nitre umbre ji ngwanka raba ne nuainne. Andréi orabare Jehovai aune raba dre nuainne ye erere nuainbare kwe. ¿Dre ribebare kwe ye Jehovakwe nuainbare ño kräke? Ja mräkätre meden raba dikekä bäri töi jämebiti aune raba dre dre nuainne yebiti dimikani kwe. Ja mräkätre ruäre nämäne niken meri testiko ye ngwena doctor känti aune mada abokän nämäne ngwian bien ie. Ja mräkätre sribibare keteitibe aune ja töi mikani kukwe nuainne ye jökrä Jehovakwe mikani nemen bare kwin (Heb. 13:16). Sribi Ngöbökwe ñäkäidre ngwane, mun nitre umbre ji ngwankä, munkwe ja mräkätre mada mika ja dimike (Jer. 36:5, 6). Akwa kukwe jökräbiti ta, munkwe ja dimikamana Jehovai. Niara raba mun dimike ne kwe ja mräkätre tä dre dre ribere jai yebätä mun raba dimike.
15. ¿Ja mikata ni rüere ngwane dre nuaindre rabakäre keteitibe?
15 Konkrekasion raba ne nuainne. Ja mikata ni rüere ngwane, ja ükakrö raba brai brai. Aisete, ni tädre jäme ni madabe ye bäri ütiäte kä nengwane. Nikwe rüdre Satanabe aune ñan ngüdrärekä jabe. Nikwe ngite juandre ta ja mräkätrebiti aune kukweta jabätä nie ja mräkätrebe ye nikwe ükadrete (Prov. 19:11; Efes. 4:26). Nikwe ja töi mikadre ja dimike kwärikwäri (Tito 3:14). Ja mräkätre grupo Andreikwe käkwe meri testiko dimikani ye köböire kukwe kwin namani bare niaratre jökrä kräke. Niaratre namani bäri keteitibe ni ja mräkäre ja üairebiti (Sal. 133:1).
16. Colosenses 4:3, 18 tä niere erere, ¿ja mikata ja mräkätre rüere ye kräke ni raba dre nuainne?
16 Ja mräkätre kwati tä Jehová mike täte, gobranta kukwe drie ñäkäire yebiti ta. Ruäre tä ngite kukwe mikabätä täte. Nikwe oradre kräketre, mräkätre kwe kräke aune ja mräkätre tä ja mike kukwe tare te niaratre dimikakäre ja üairebiti, ja ngätärebiti aune kukwe legal yebiti ye kräke arato, (ñäkädre Colosenses 4:3, 18 yebätä).d Nita orare ye mikadre ütiäte krubäte jai (2 Tes. 3:1, 2; 1 Tim. 2:1, 2).
¿Mä raba mä mräkätre dimike ño nemen juto biare ja mikata ni rüere ye känenkri? (Párrafo 17 mikadre ñärärä)
17. ¿Ja mikata ni rüere ye kräke ni raba ja ükete ño kä nengwane?
17 Mä aune mä mräkätre rabadre ja ükete biarebe ja mikata ni rüere ye känenkri (Hech. 14:22). Kukwe ñaka kwin raba nemen bare yebätä mä ñan ja töi mika krubäte. Ñakare aune, mätä ja kete Jehovabe ye mä mika bäri dite aune monso mäkwe ye mäkwe dimika nuainne arato. Ruäre ngwane, mäta nemen töbike krubäte ye ngwane, mäkwe ja drie Jehovai (Sal. 62:7, 8). Ñobätä tö ngwandre Jehovai yebätä mun jamräkäre blita jabe.e Monsotre ükateta kukweta nemen bare jötrö ye känenkri, ye erere ükadrete ja mikata ni rüere ye känenkri ye ütiäte krubäte aune tö ngwandre kwe Jehovai ye driedre ie. Ye köböire ja ngwain dite kwe aune töi täi jäme.
18. ¿Dreta ni kräke ja känenkäre?
18 Kä jäme Ngöbökwe ye tä ni kriemike kwin (Filip. 4:6, 7). Bren tare tä nakainkä, kukwe tä nemen bare jötrö ngwarbe aune ja mikata ni rüere ngwane, kä jäme yebiti Jehovata ni töi mike jäme. Nitre umbre ji ngwanka yebiti tä ni ngübare kwin aune tä kukwe ütiäte bien nie, ye abokän ja dimikadre kwärikwäri. Kä jäme ye tä ni mike juto biare ja tuakäre kukwe bäri tare rabai bare ja känenkäre yebe aune ja tare nikai kri ye ngwane, kä jäme ye käkwe ni dimikai arato (Mat. 24:21). Kä ye ngwane, ni töi tädre jäme ye rabai ütiäte aune nitre mada dimikadre ye erere nuainne arato. Ja tare nikai kri ye bitikäre, kukwe raba ni mike töbike krubäte ye ñan rabaira. Mrä mada, Jehová töi nämäne dre ie ni kräke ye rabai nikwe: kä jäme erametre aune käre rabai nikwe (Is. 26:3, 4).
KANTIKO 109 Ja taredre ja brukwä ngöibiti
a Bäsi käre Jehováta nitre ja ngwanka metre yebiti ja mräkätre dimike kukwe tare näire. Mäbiti Jehová raba nitre dimike tä ribere jai ye ngwane, mä raba dre nuainne ja mräkätre dimikakäre rabai gare nie kukwe ja tötikara nekänti.
b Jeremías 23:4: “Aune tikwe oveja jie ngwanka mikai ye käkwe jie ngwain metrere. Ñan rabai nekwetekä aune kä jurä ñan rabaibätä aune täi täte”, Jehovata mike gare metre”.
c Nitre ruäre kä kwitani.
d Sukursal aune central mundial ñan raba raba carta juen ja mräkätre tä ngite ye kräke.
e Kukwe ja tötikara “Ni rüe rakadrekä ye känenkri ni tädre juto biare”, tä Ni Mikaka Mokre julio 2019 ye mikadre ñärärä.
f KUKWE MIKATA GARE ÜAIBÄTÄ: Ja mräkätrebätä kukwe namani bare jötrö ngwarbe aune tä kä gitiara yekänti ye kräke nitre gure niki mrö ngwena.