Oli Tayari “Kushokoola Egulu” Si?
RHWESHI rhulingirize oku nyorha okuyenezwa kw’echila chilagane cha Yesu: “Abasiimire bali balala bali berhonzi, bulala njibashokoola egulu.” (Mt. 5:5) Abashigwa njibashokoola egulu amango njibarhambula nka bami omu embingu haguma na Yesu. (Ufu. 5:10; 20:6) Banene omu Bakristu b’okuli bagwerhe obulangalire b’okushokoola egulu n’okulilamako esiku n’amango, eyibanali bashinganyanya, bagwerhe omwishingo, banalamire omu murhula. Yinjibishobokana, njirhwagwarha akasi kanene k’okukola. Omufano, njibarhabala kujira egulu libe paradizo, n’okujira okwabo koshi yibalala njibafuuka bahaabwa ebibakeneere n’okubayigiriza. Rhuwaze oku bintu rhwakajira zene omu kuyerekana oku rhulonzeze kujira ebyola bintu omu gulu lyayinjire.
K’OLI TAYARI KUJIRA EGULU LIBE PARADIZO
Amango Yehova aherezaga abantu akasi “k’okubumbya egulu n’okulirhambula,” aliyerekene oku egulu lyoshi lyakahikire kuba paradizo. (Mwa. 1:28) Balala njibalama esiku n’amango oku gulu njibyabahema bakenge elyola rhegeko. Egulu njilirhaba paradizo oku murhondero bulala ebustani ye Edeni erhachibaho. Eharmagedoni emala kuhwa ntya, njirhwagwarha akasi kanene k’okukola omu kuchesa maeneo manene m’egulu mabihizwe zene. Okujira ntyo njikwahema kasi kanene!
Ebyola byakarhuyibusya akasi Abaizraeli bakolaga amango barhenga Ebabiloni n’okugaluka omu chihugo chabo. Echihugo chabo chabaga chaberere biguka omu myaka 70. Aliko omulebi Isaya alilebere oku, kugerera oburhabale bwa Yehova, echihugo chakashubire kukwira bwenene. Obola bulebi buderhere ntya: “Njajira erungu lyacho libe kuguma ne edeni n’erungu lyacho by’olubanda libe nka bustani bwa Yehova.” (Isa. 51:3) Yehova alirhabere Abaizraeli bajire echihugo chabo habe hantu hakwirire. Kona kuguma, kugerera oburhabale bwa Yehova, balala njibashokoola egulu njibagala kulijira paradizo ekwirire. Kandi hali ebiwakajira zene omu kuyerekana ok’osiimire kukola kw’akola kasi .
Njira nguma kuli kujira koshi wakagala omu kuchesa enju yawe n’okupanga bwinja-bwinja ebintu bilimo. Wakajira ntyo chiro akaba abaturanyi bawe barhalaga n’obusafi. Kandi wakarhabala oku kasi k’okuchesa n’okugenderera kukwiziza Echumbi lyenyu ly’Omwami n’ely’Embuganano Nkulu. Akaba ehali zawe ziyemerere, kandi wakajaza eformilere y’okuchihaana oku bulonza y’oba omu bantu b’okuhaana oburhabale omu eneo lyenyu amango m’echinjira. Okujira ntyo kwayerekana oku olonzeze kurhabala bene-benyu na bali-benyu. Wakayiga bufundi bulebe njiwakolesa akaba Yehova ayemerere olame oku gulu esiku n’amango.
K’OLI TAYARI KURHABALA ABANJI BAFUUKA?
Yesu amalire kufuula ntya omunyere wa Yairo, aderha oku oyola mwana ahaabwe akalyo. (Mk. 5:42, 43) Okushishikala oyola munyere wa myaka 12 karhaliri kasi kakomeere. Aliko jaga wawaza kasi kangana nji kakolwa amango Yesu ayeneza echilagane chiderhere oku “balala boshi bali omu shinda y’olwibuko njibayunva omulenge gwage n’okurhenga.” (Yoh. 5:28, 29) Chiro akaba Ebiblia erhaderhere buli choshi, nkabaga abanji bafuuka njibakenera kuhaabwa akalyo, ahantu h’okulama, n’emyambaro. Wakayerekana chiro na zene oku oli tayari kurhabala. Hala bintu biguma wakajira.
Bichi wakajira zene y’oyerekana oku oli tayari kushokoola egulu?
Amango bamamenyesa omu chibaga chenyu ok’omwimangizi w’omuzunguluko abalambagirira, wakamuhamagala emwawe musangire akalyo haguma. Amango abakozi baminuzize b’amango mochi baliri bakolera oku Beteli bamarhumwa kukolera omu chibaga chenyu changwa amango omwimangizi w’omuzunguluko arhakachigala kulambagirira ebibaga, wakabarhabala omu kubalonzeza aha bakalama. Akaba embuganano ye eneo changwa eminuzize yajirwa omu eneo lyenyu, wakachihaana oku bulonza okole embere changwa enyuma y’embuganano changwa omu kuyakiira abahisi.
OBE TAYARI KUYIGIRIZA ABANJI BAFUUKA
Kugerera ebiyandikirwe omu Matendo 24:15, rhwakalangalira oku amamiliyare m’abantu njibafuuka. Banene mubo barhahikiraga kumenya Yehova embere. Aliko njibahabwa orozo l’okuyiga oku bilolere Yehova.a Abakozi bimana ba Yehova bagerere mu binene, njibakola kw’akola kasi k’okuyigiriza. (Isa. 11:9) Charlotte, wakolere akasi k’okuhubiri Ebulaya, omu Amerike ye Side, n’omu Afrika, agwerhe enyorha y’okukola akola kasi. Aderhere ntya n’omwishingo: “Ngwerhe enyorha y’okuyigiriza abantu amango m’obufuuke. Amango nansoma emyazi elolere omuntu walamaga mira, nanzigana kuwaza: ‘Nk’oyula muntu amenyaga Yehova, akalamo kage kakahindamukire bwenene.’ Ngwerhe enyorha y’okubwira abantu njibafuuka oku bilolere Yehova na kangana gurhe akalamo kabo njikaba kenja nji bakamukolera.”
Chiro n’abakozi bemana ba Yehova balilamire oku gulu embere Yesu ayinje njibyabahema bayige binene. Bankawawaza oku busiime na lukengo lungana gurhe njirhwagwarha amango njirhwayinja rhwafasiriya Daniyeli okuyenezwa kw’amalebi ayandikaga ey’arhanaliri amayunva. (Da. 12:8) Chwangwa waza oli warhabala Rutu na Naomi bamenye oku oluburho lwabo lwaliyinjire kuba omu chizazi Masiya arhengeragamo. Njirhwagwarha obusiime b’okuyigiriza abantu oku gulu lyoshi, njiharhanachiba akahidiko n’ebintu by’okurhuhugisa by’elila gulu libi lya zene!
Bichi rhwakajira zene yirhuyerekana oku rhuli tayari kurhabala kuyigiriza balala njibafuuka? Njira nguma wakakolesa kuli kujira okwawe koshi y’oba mwalimu mwinja onayinje wahubiri oku kahunda. (Mt. 24:14) Akaba orhakagala kuhubiri zene bwenene nk’oku wakasiima eju y’emyaka yawe changwa eju y’ezindi mpavu, wakayerekana oku ogwerhe enyorha y’okuyigiriza abanjibafuuka amango oli wajira okwawe koshi ogalire zene omu kasi k’okuhubiri.
Kuli kwinja okuwaza kw’ebila bibazo by’akamaro: ‘Ka kweri oli walingiriza n’enyorha okushokoola egulu? K’ogwerhe enyorha y’okurhambula egulu, okurheganyiza abanjibafuuka akalyo, ah’okulama n’okubayigiriza? Wakayerekana oku oli tayari zene kulama esiku n’amango oku gulu omu kukolesa orozo oliwagwarha omu kukola oku makasi mali nk’amanjiwakola amango washokoola egulu!
a Olole omwazi “Okulerha Banene oku Kunali,” omu Omunara g’Omulanzi g’Omwezi gwa 9, 2022.